Formato

La disionario es un lista de entradas. Cada entrada representa un radis o un derivada. Entre la “derivadas”, nos inclui ance la formulas (espresas de plu ca un parola) cual conteni la radis o un derivada.

La linia prima de un radis comensa con un punto (.), cual fasili trova la radis pertinente cuando on fa editas: xerca simple .radis en la surfador.

Entre cada entrada e la seguente, nos pone un linia vacua. Ante cada radis, nos pone un linia de cuatro ifenes (----) con un linia vacua a cada lado de lo.

La disionario es divideda en 166 pajes per fasili naviga e edita lo.

Categorias

La linia prima de un entrada presenta un parola (o formula) en elefen. Esta es la tema de la entrada. Si la entrada es un radis, la linia comensa con un punto (.esemplo). Si la tema es un nom propre, lo ave un letera major.

Ancora en la linia prima, la tema es segueda par du ifenes entre spasios ( -- ) e un lista de categorias. Si la lista conteni plu ca un categoria, estas es separada par spasios. Alga categorias refere a consetas gramatical; otras es semantical. La categorias seguente es disponable:

Gramatical:

• ajetivo
• averbo
• conjunta
• corti
• desusada (per la forma vea de un parola cual nos ia revisa; la sola campo permeteda es vide, referente a la forma(s) nova)
• determinante
• esclama (sin la sinia “!” en la tema, ma lo apare usual en la traduis)
• espresa (usada per fratos acaso de frases cual ta pote apare ance en la campo usa, ma a cual on vole ajunta traduis en otra linguas)
• nom
• plural
• prefisa
• prenomal
• preposada
• preverbal
• pronom
• simbol (usada per leteras de la alfabeta)
• stranjer
• sufisa
• sujunta
• verbo
• verbo transitiva
• verbo nontransitiva
• verbo liante (rara)
• nom-ajetivo (composada)
• verbo-nom (composada)

Semantical:

• anatomia
• animal (incluinte verbos per la sonas de animales)
  • amfibio
  • artropodo (incluinte insetos, aracnidos, miriapodes e crustaseos)
  • avia
  • dinosauro
  • inseto
  • mamal
  • molusco (incluinte caracoles, limasas, polpos e calamares)
  • nonvertebrato
  • pex
  • retil (lezardos, serpentes, tortugas, crocodiles, etc)
• arciteta (incluinte ance mobilas)
• arte (incluinte pinti, fotografia, sculta, teatro, sinema, etc)
• astronomia
• biolojia (incluinte jenetica e ecolojia)
• cimica
• color
• cosini (comedas, bevidas, e modos de prepara los)
• demonim
• filosofia
• fisica
• governa (incluinte politica, judi, leges, e otra fenomenos de potia sosial)
• informatica
• istoria
• jeografial (un nom propre de un loca)
• linguistica
• matematica
• medica
• militar
• mitolojia (incluinte fables e superstisios)
• mone (incluinte unias de mone, e ance parolas tecnical de finansia)
• musica (incluinte dansas e strumentos)
• onomatopea (incluinte parolas cual imita la voses de animales)
• planta (incluinte arbores)
• relijio
• siensa-umana (incluinte antropolojia, psicolojia, e sosiolojia)
• sporte (incluinte juas)
• tecnical
• tera (incluinte jeolojia e clima)
• util (incluinte aparatos)
• veculo
• veste (incluinte moda e cose)

La categorias semantical no es perfeta, e no pote es perfeta. Los permete ce nos analise la vocabulo de elefen de tempo a tempo. Nos no intende ce usores comun de la disionario vide los.

Campos

Con un eseta (discuteda a su), cada de la otra linias de un entrada furni un valua per un campo de la entrada. Un tal linia comensa con un eticeta, un dupunto e un spasio (per esemplo defini:  o en: ).

Un entrada no nesesa furni tota campos, ma cada campo pote es furnida a no plu ca un ves en un entrada.

La campos seguente es disponable. Los ta apare en un entrada en la ordina alfabetal mostrada:

Definis

Cuando tu ajunta un defini nova, atenta prima trova un parola simil, e copia la stilo de la defini de acel. En esta modo, la disionario va pare plu coerente scriveda. Per esemplo, nos debe defini tota esclamas e afisas, tota nomes de siensas, paises, etc, en un stilo coerente.

Alga definis comensa natural con un preambul cual clari plu o min detaliosa la contesto semantical de la sinifia. Esta ave normal la forma “en …” e apare entre brasetas curva, per esemplo (en alga formas de budisme) o (en istoria).

Per sujesta la spesie de nom a cual un ajetivo pertine tipal, o cual es tipal la sujeto de un verbo, indica simple acel nom – pe. (un xapo) – en la preambul.

En un defini de un verbo transitiva, no inclui direta sua ojeto, car esta no es un parte de la verbo mesma. En loca, scrive un sujesta de ojetos tipal entre brasetas curva.

Ance entre brasetas curva, un defini pote indica parolas tipal asosiada, per esemplo un preposada tipal acompaniante. Estas apare en sua locas natural en la frase.

La xercador de la disionario ofre un spelador con un boton per “Lista definis malspeleda”. Esta es un bon modo per trova eras de tape en definis.

Traduis

Nos pote (e vole!) ajunta otra linguas de tradui.

En la traduis, posibles cuasi sinonim es separada par virgulas; un cambia plu grande de sinifias es indicada par un punto-virgula.

Usa (brasetas curva) per ajunta claris o eticetas cual no es vera partes de la traduis mesma. La xercador permete iniora la contenida de tal brasetas.

Per clari cual preposada(s) acompania comun un parola, scrive (a ...) o simil en la defini. Traduis pote inclui claris de preposadas en otra linguas, entre brasetas: (to ...).

Evita eticetas de HTML en la datos. Si un tradui debe inclui leteras peti e alta (como en 10^e), scrive los ^como esta^, per esemplo: 10^e^.

Speles alternativa en elefen

Un cuantia peti de parolas ave un spele alternativa con w o y. La campos per estas apare su la spele tradisional, ma cada radis o derivada presenta ala ance la spele alternativa, en esta modo:

.ciui|ciwi -- nom avia
defini: ...
en: ...

.Iaman|Yaman -- nom jeografial
defini: ...
en: ...

iamani|yamani -- ajetivo
en: ...

E a la punto en la alfabeta do la spele alternativa debe apare, on scrive mera un entrada spesial:

=ciui|ciwi

=Iaman|Yaman

=iamani|yamani

La sistem copia alora la article tradisional a la article alternativa, e la xercador presenta un lia de cada article a la otra.

Nota ce on debe segue la regulas usual per linias separante an en relata con esta entradas alternativa: un linia vacua ante un derivada, e un linia de ifenes con un linia vacua a cada lado ante un radis.

Speles american e brites

Cuando la spele de un parola engles difere entre la dialetos american e brites, on scrive la spele american segueda direta par un bara vertical (|) e la spele brites: tire|tyre.

On pote corti la casos la plu comun de esta fenomeno:

Si la parte sustituable apare a plu ca un ves en la spele american, la sustitui afeta sola la plu destra de estas: per esemplo, supercenter|re jenera supercentre per la spele brites.

La xercador de la disionario presenta ambos speles, separada par un bara inclinada (/). La usor pote xerca ambos, egal.

Tipografia per la libro

A veses rara, un defini o tradui conteni un espresa matematical o simil cual nesesa un tipografia spesial en la libro. Tal espresas es ensircada par {brasetas risa}.

Ordina de derivadas

Tota derivadas, composadas e formulas segue la radis, en ordina alfabetal. Cualce otra sistem es tro complicada e plen de esetas per funsiona bon. Nosa sistem es ance oportun per la usor de la disionario.

La sola eseta es ce, cuando un radis es direta reusada en un otra categoria gramatical, la entrada per esta segue direta pos la radis. Per esemplo, on ave la ordina:

• ateni (verbo)
• ateni (nom)
• atenable (e tota otra derivadas)

Verbos nontransitiva presede verbos transitiva.

Ajetivos e verbos presede sua reusas como nomes.

Ajetivos presede sua reusas como averbos.

Formulas cual comensa con la parola pertinente segue direta pos lo. (Un otra modo de dise esta es ce la ordina alfabetal no iniora la spasios entre la parolas de un formula.) Per esemplo, on ave la ordina:

• abitor
• abitor luante
• abitores

Alga radises esiste sola con la sufisas “-isme” e “-iste”, per esemplo: “otimisme/iste”. La disionario presenta la forma con “-isme” como la radis, e “-iste” como un derivada.

Parolas derivada es listada su sua radis xef. Ma nos trata sola la afisas ofisial en esta modo. Parolas con afisas tecnical (pe. “artrite”, “artrose”) es tratada como radises propre, car tal parolas ia es creada en la mundo de siensa, estra elefen. Si un afisa tecnical apare en vera multe parolas, cisa nos debe leva lo a un afisa ofisial.

Parolas composada, como “abrivia”, “portaculpa” e “manodestra”, es listada su sua radis prima.

Sinifias

La plu de parolas en elefen ave sola un sinifia: cisa los ave varias minor cuando los es usada en campos diferente de la vive, ma on pote vide ce la sinifia es plu o min la mesma.

Ma alga parolas (sola la preposadas, a presente) ave plu ca un sinifia cual on vole distingui clar en la disionario.

La comensa de un tal sinifia es indicada par un linia spesial cual conteni sola un numero entre brasetas ronda. La sinifia prima ave la numero 1; la sinifia du ave la numero 2; etc. Linias pos un numero es campos normal, asta la numero seguente o la fini de la entrada.

En la strutures interna de la xercador, cada sinifia pos la prima deveni un entrada propre. En esta modo, la xercador reconose tre spesies de entrada: radises, derivadas, e otra sinifias (de un radis o derivada).

Imajes

Un radis o derivada pote es acompaniada par un imaje. La imajes abita la arcivo “imajes” su la disionario a elefen.org, e cada ave un imajeta corespondente (con altia de 40 pixeles) en la arcivo “imajetas”. Imajes debe veni de fontes libre reusable, e debe es reduida si los es tro grande (plu ca 500 pixeles de altia es probable tro grande). Los debe es de spesie JPEG.

En la testo de la disionario en la vici, on indica la esiste de un imaje par ajunta la campo seguente:

imaje: #

La sinia # sinifia ce la nom de la fix es simple la terma elefen + “.jpg”. Cuando la terma conteni spasios, estas deveni ifenes en la nom de fix (pe. viola-de-rota.jpg). On usa leteras major en nomes propre (pe. Abcazia.jpg, America-Norde.jpg).

A veses, par causa de omonimes o simil, on nesesa spesifia un otra fix. On scrive alora la nom de la fix, sin la sufisa “.jpg”, en loca de la sinia #:

imaje: bongo-animal

A veses rara, on vole spesifia du imajes. On separa los con un virgula:

imaje: #, clave-util

Nomes propre

Nomes propre de la forma “Monte Aconcagua” apare como radises en la loca alfabetal de sua parola du (“Aconcagua, Monte”).

Per no estende tro multe la disionario, nos inclui sola alga categorias de nom propre:

• Nomes de nasiones moderna, e sua formas ajetival. Ance, teritorios importante.
• Nomes de grupos grande de relijio e politica.
• Nomes de mares, rios, montanias, etc, multe importante.

Jeneral, la disionario no conteni:

• Nomes de paises (imperos, etc) e poplas istorial.
• Nomes de persones (estra si otra parolas es derivada, como “platonisme” de “Platon”).
• Nomes de locas (statos, etc) su la nivel de nasiones.
• Nomes de la multe setos de la relijios grande.

Tal nomes pote es plu bon listada en la Vicipedia de elefen.