Capitol 9

“Acel es mea veliador!” – Sra Stecken ia cexeta cuando Otto, la traor de la compania Bolle, ance oji como en cada dia, a dui pos ses del matina, con sua ruido usual ia pone tre carafones de metal ante la porte de numero 102 del strada Bülow. Sin retarda, Sra Stecken ia tira se de leto, ia apone rapida un roba longa en forma de jacon supra sua camisa de note e ia es ja preparada per abri sua boteca e la porte a la strada, afin Otto pote reprende la carafones del dia presedente e trae la plenes en loca.

Sra Stecken, un fem sincodesan, seca ma forte como un mola, con capeles cuasi roja, con puntetas noncontable cual en cada saison ia covre sua brasos e fas, ia ave un de acel peti botecas cuasi suteran, o, plu coreta, partal en sutera, cual on vide comun en Berlin.

Per penetra en acel benerias, jeneral ocupada par comersiores minor e modesta o par artisanes simil nonaspirante como capelores, sapatores e tal plu, on ia desende de la troteria sur cuatro o sinco grados. A veses ance, como en la caso del boteca de Sra Stecken, no entra ia es direta posible del strada, ma on ia debe traversa prima la limina del casa per trova, sur un lado de esta cuasiatrio, la scalera a la boteca.

Pintida en leteras jala sur la porte de esta beneria, on ia pote leje la ojeto comersial de la loca e – conformada a un comanda obligante del polisia – ance la nom de la posesor.

Ovos – bur – lete
cesos delicata
Vidua Emma Stecken.

Esta boteca ia ave du fenetras a la strada. Lor borda alta ia es situada apena supra la nivel de tera. La cava ante los ia es covreda par un grilia de fero per preveni ce pasores distraeda sur la troteria cade a en. Tra esta grilia la fenetras, side per lus, ia pote asorbe un rasiona de lumina pal de dia. Supra los on ia ave un avisa peti cual ance en sua turno ia informa la publica sur la comersia del vidua Stecken. Lo ia es an plu completa, car lo ia ajunta:

lete fresca a du veses en cada dia.

La avisa ia es sufisinte alta locada per no tenta canes pasante vagante.

Lo es strana ce la vidua Stecken, ci ia dormi sana, ia es regular veliada en cada dia par la ruido del carafones de lete descargada, an si otra ruidos, plu temprana e frecuente plu resonante, ia resta nonatendeda. Ja ante la ora ses un tren del Hochbahn, modo xef de trafica en esta visineria, ia rola prosima a la abiteria de Sra Stecken, sur un via alta, simil a un ponte, supra la strada Bülow, e longo lo, asta la stasion Plaza Nollendorf. Lo pare ce en sua dormi, sua suconsensia ia labora bon per filtri e entra sola acel ruidos cual pertine direta a sua profesa.

Ance esta dia no ia promete multe emosias. Nonfricante, programida, lo va pone se en la filo plana de tota otra dias de autono temprana. Par caprises del ventas, folias secida, cadente de arbores en stradetas visina, va lisca ance oji a traversa del distrito. Como usual, la tren alta va ruidi sua pasa tra la dia intera, tan regular ce nun va atende lo. Pos la traor de lete del compania Bolle, la clientes prima va veni, femes servinte de casas burjes, e con los la momentos la plu interesante en la monotonia del dial, car lor rumores va porta alga spise a la sopa de vive de Sra Stecken. Sra Stecken serta no aproba tota racontas intercambiada en sua boteca e serta no la cosas vulgar reportada de Guste Sähmisch, ci no esita mensiona detalias jusosa de sua vive privata. Ma conversas de cada tipo es bonvenable. Par acel Guste Sähmisch, un xica forte, tra plur anios ja a otra lado del numero dudes, Sra Stecken ia ave contata con la garnison deutx. En sua visineria on ia vide sola rara un soldato – ma Guste Sähmisch ia conose cuasi tota suofisiores de la caserna Maikäfer.¹ En cada lundi el ia reporta nonavar sur sua “prometeda del dia pasada”, caturada en cada soldi en un danseria a borda del site, e sua aventuras ia es sempre plen de diversia car la “prometeda del dia pasada” a cada ves ia ave no mera un otra nom, ma ance un otra tatica en cosas de ama. Tra esta descrives de alga situas estra la model de bon costumes, Sra Stecken ia ave sola un cura, pd. verifia ce la porte a sua cosina es coreta cluida, car en la cosina sua fia Friedel labora sur taxes de casa, e lo es evidente ce la racontas de Guste Sähmisch ta conveni en no modo a oreas casta.

Cuando la cadena de malparletas de la servores serial ia rompe, la vidua ia ave alga minutos libre. El ia pote retira se a la cosina peti do Friedel prepara la cafe de matina. A pos, Sra Stecken ia prende la scopa e ia limpi no sola la boteca, do el ia atende bon ce bures e cesos senta su lor propre jares campanin e ce la lete es protejeda su un covreplato conveninte, ma el ia dedica se ance a beli la entra del casa an asta la troteria. Entretempo Friedel, blonde e des-otan, ia porta botelas de lete asi e ala tra la visineria a clientes tardiosa. E tal plu. En cada dia la mesma program, de cual la pasos ia es conoseda a Sra Stecken en grado perfeta e noiante.

Ma oji, nonespetada, alga cosa ia aveni.

Lo ia es apena la dui ante oto cuando un postor de bisicle ia pasea a en la casa 102, Bülow-strato, con un telegram en mano! E lo ia aveni ce esta mesajor ia turna a Sra Stecken, scopinte en acel momento la saleta de entra. Multe consisa el ia xerca informa: “Geist?”

Descontentida par la nonparlosia del postor, Sra Stecken ia responde con la mesma secia: “Nivel du, a destra!” – e el ia resta solitar con esta comprende: un telegram ia ariva per Geist!

El no ia pote an espera plu detalias de Minna, la fem servinte en la familia Geist, car Minna ia prende ja la lete e la bur ante la ariva del telegram.

Pos alga tempo, cuando Lotte, la fia joven Geist, rapidiosa como sempre, ia core per desende la scalera con un faxo de libros su la braso, Sra Stecken ia nota no cosa nonusual en la disposa del xica. E simil no cuando, pos corta, Hugo, la fio Geist, ance en sua turno ia pasa con pasos urjente per vade a la jinasio. Sra Stecken, ci, par la situa del boteca, ia vide la persones del nivel de tera en sola lor partes basa, ia ave ja longa alga esperia de identifia tota abitores del casas par lor faldas o pantalones. E longo la aspeta, plu o min curada, de esta vestes de gama, o longo la modo de pasea del persones, el ia es an capas de dise ci sorti mera per compra rapida alga cosa mancante en la saleta de comedas, ci per bevi un vitro en la taverna del canto, ci per encontra sua xica de cor en un visineria distante, e tal plu.

Ma oji, como ier, Hugo ia porta sua pantalon comun de scola, simil a un tiratapo, e de esta la vidua astuta ia pote auguri no cosa spesial. Alga ante la ora oto ance la pantalon de Sr Geist ia pasa, diniosa, con plias coreta presada como sempre. Sr Geist, xef de departe en la Compania Asecurante Nordstern, ia dirije se sempre con pasos egal pasosa a sua ofisia. Donce no sinia de cosa nonespetada. E an tal on ia reseta un telegram en la familia Geist.

Sra Stecken ia respira como si sentable relasada cuando subita Minna ia entra corente a la boteca.

“Ach, Sra Stecken, prepara un plu litre de lete e un duilibra de bur; me salta a la spisor e va reveni direta.”

“Ma aora, Senioreta Minna, tu pare es su urje grande! Cua aveni? Cua arde?”

“No parla a me de urje, Sra Stecken! En un familia con cuatro persones on ave nunca sinco minutos de pausa. Me no sabe esce me va continua labora longa ala, a supra. Cuando la enfantes ia es plu joven, cisa la cuantia de labora ia es simil grande, o an plu, ma on ia lasa me en pas. Sola Sra Geist ia comanda. Ma aora la enfantes jua como senioreles! Lotte opina ce me es sua servor personal e Hugo nesesa ancora me. Do es esta? E do tu ia asconde acel? Si me ta escuta el, a cada dia me ta presa denova sua pantalon, como si un plia presada ave cualce valua per un tal avieta!”

“Mea dio! La jovenes es esijosa aora! Ma la seniora joven ta pote aida tu con taxes de casa.”

“Tu pensa cua? Aida con taxes de casa? Ma sua altia la senioreta atende sola sua taxes de scola, e como? On debe sola regarda la gradis cual el reseta! Plu, el es ocupada par la piano, par beli se! Me compatia la om ci va sposi un tal pavo. En loca de aida, el crea per me mera plu labora. Me ia espera ce oji me va ave un posmedia calma. Si, un torta! A esta matina me ia prende la lete e la bur, no? Cuando me ia reveni, Lotte ia demanda: ‘Tu no ia oblida, Minna, ce en esta posmedia nos va fa un ronda de cafe en nosa casa?’ Natural me ia oblida. Me ave otra cosas per considera. Aora me pote recomensa vade al botecas. E vera nos no ia nesesa acel ronda de cafe oji! Si, me ancora no ia dise a tu, Sra Stecken, ce nos ia reseta un telegram!”

“Esperable no cosa de tristia?”

“Un telegram de Paris, Sra Stecken! Me ia raconta ja a tu sur nosa visitor franses, no? Bon, el va ariva oji, en la sera.”

“Cua tu dise a me, Senioreta Minna? La senior franses va veni oji? Esce lo es posible?”

“Como si mea labora no ta sufisi con cuatro persones! Un person sinco ia manca! Me comprende ja ce pos la mori del ava un sala bela resta libre. Ma la ava ia ajunta nunca a mea labora – contrastada, a multe veses el ia aida me – ma serta la suluor nova va ave desiras personal.”

“Ma dise aora, Senioreta Minna, perce los prende un franses? On ave tan multe seniores joven en Berlin ci ta aseta ance abita su teto de Geist. Al min sur los on ta pote ave informas fidable, sur la reputa e tota …”

“Ach, Seniora Stecken, acel es un cosa propre. La franses joven es un ensenior, e la mestresa ia pensa ce lo va es bon per Lotte e Hugo si los pote eserse la lingua franses en casa con un person vera franses.”

La vidua Emma Stecken tra alga momentos ia rijidi en la posa cual el ia prende. Como un sculta de un diva elinica de venja el ia aspeta, en cuando con dijitos ososa el ia teni en averti, levada asta la altia de sua testa, la cotel de bur en lenio, e ia vosi la condena: “Del franseses on dise ce los es multe emprendosa e nonvirtuosa. Sur los on sabe nunca … En cualce caso ta ce el no ocupa se con mea Friedel!”

“Alora, Seniora Stecken, esta me dise a tu: Me es un xica de Spreewald! Plu saja ce on retira la manos!”

“Plen acordada, Senioreta Minna!”

Ma Minna ia parti ja per completi sua compras del spisor visina.