Capitol 12

Un de la joias la plu pur de Sr Geist, asta du o tre anios pasada, ia es pasea con sua familia en la posmedias bela de soldi. Alora sua ava ia vive ancora e no ia es malada. Ma ela no ia acompania los. El no ia ave bon gamas. El ia resta en la casa. En la saison clemente, el ia senta a un fenetra abrida en la sala de come, de do el ia pote oserva la trafica sur la strada e, con interesa sempre nova, la trenes del Hochbahn. A acel loca, los ia pasa rolante a la altia de sua nivel, tal ce el ia distingui fasil la persones en la vagones. El ia ateni acel eda e sajia par cui causa an la spetaculos sempre denova repetente ave an tal nunca la mesma aspeta. Si la clima ia es plu sever, la bon ava ia acrupi, contraente su la xal negra cual el mesma ia tricota, tan prosima como posible a la telias del forno, comun an apoiante sua dorso contra acel mur calda, e ia lasa se a lisca en sonias umil. De ves a ves, si Minna no ia sabe do el va vade, el ia resta con la ava. E la conversa ia es nonconsumable.

Sr Geist, en ci instintos primeval de patriarcia ia survive ancora sin duta, ia saborea sua rol de xef de familia, e el ia es orgulosa cuando los ia pote pasea en cuatruple tra la stradas, jardines o forestas prosima de Berlin. Cuando la fies ia es ancora enfantes, los ia pasea a lado de lunlotra ante la jenitores. Alora ancora Hugo ia gida Lotte, la peti, par mano. La jenitores ia segue sempre sin interval, tal mostrante ce la cuatro formi un intera. Sr Geist, an plu atendosa a sua vestes en soldis ca en la otra dias, ia teni se a lado de sua sposa, con braso su braso. Ambos ia pasea con petos avansada como proas. Los ia vade en pulsa egal, car Sra Geist ia longi sua pasos per adata al mesura del sposo. El ia senti, completa coreta, ce un om ci atenta conforma a la ritmo scerzo del peti pasos fema aspeta riable. Esta sua atenta de marca la unia ia es volente compensada par Sr Geist cuando per alga razona los ia cade de la pulsas. Alora la ajuntor de la “paso cambiante” ia es el, como el ia aprende sur la patios de casernas, e en esta modo el ia reegali fasil la ritmo del move. El la dirije la ordina del pasea par dona a la enfantes la comandas nesesada per segue la via. Tal el ia ave la impresa de gida la veculo del familia, turnante la rotas fronte a destra o a estra.

Paseante, on ia regarda la fenetras del bela botecas grande. Ante la venderias de juas Hugo e Lotte ia tende permane. En la menses ante la festas a fini del anio, los ia es inspirada ala a formi la desiras cual los va scrive plu tarda, en leteras tan artosa como posible, sur leteras enviada a la Barbida de Natal su la adirije “En la sielo”. Ance Sra Geist, sola per vide “cua on porta aora”, ia para volente a la comersiores de Leipzigerstrasse, de Friedrichstrasse. Los ia presenta tan atraosa la modas nova de xapos, faldas, robas, vestes de pelo, joalas e tota e plu cual un seniora de site no pote iniora! A esta veses, sua sposo ia urje nunca el. El ia escuta con pasientia bonvolente sua comentas sur detalias definida e sur la custas jeneral. Ma, a sua propre lado, no sin regarda e amira el ia pasa la botecas do on ia cumula acel comedas deletante cual es cuasi unica furnida par la plu esplotada del animales, la porco. E esta demostra ce ance antipodas pote encontra lunlotra, asi: deletas e porcos. En esta departe, Sr Geist ia es nonfatigable.

En la mesma modo como ante la scultas de Siegesallee, do el ia sabe raconta sur la istoria prusen a sua acompaniores muda – o ante la cajes del Jardin Zolojial, do el ia sita volente con nomes esotica ance abituas strana de la vive del animales – o en la vietas e invernerias del Jardin Botanical en Dahlem, do sua capasia ia mostra se tan plu completida car cada tipo individua de planta mesma ia anunsia, sur un peseta de lenio afisada, como si par un carta de visita, sua nom e ance sua orijina – en esta mesma modo, ante la deleterias, esta padre model de familia ia distribui sua siensa cosinal longo bon prinsipes de pedagojia paseante. Sua sabes consernante la prepara de salsixes, tartes, jaleas, fumigadas e similes ia es solida. En esta relata el ia profita multe de la consentas en Brummbär, do la mestre, si bonumorosa, no ia deveni noiada mostrante sua spesialis par descrives e jestis rituin seria, depintante la manera la plu oportun de prepara, coce e presenta perfeta, tal ce un interesa ia velia instante en la stomaco an de un person veninte de sasia se. La enfantes ia es plu intensa retenida par la esibi, comun comica, si no sempre saborosa, de esta benes de prosa. Asi ia es desinias divertinte siselida en la pel brun de jamones, ala scultetas scultada en sebo abundante, asi un lingua fumigada de bove, sempre en forma de pede roja, e figures personin construida de salsixes, de cual algas ia es tan talentosa presentada ce on ia regrete ce la artiste no ia dispone materias plu durante. Ante tal spetaculos, divertinte e … sin custa, la familia ia asembla con plaser, en cuando la padre, con surie jentil sirca la boca, ia lisi sua barbeta par un jesti lenta e bon conoseda, como prendente lete, de la mano destra.

Si la fenetra de la carneria de porco ia es spesial atraente o inspirante, Sr Geist ia corti la pasea e ia dirije sua grupo peti a la taverna la plu prosima, de bon aspeta ma custa media, do la enfantes e la madre ia reseta cafe con torta. Si disponable, Sra Geist ia comanda un tarte de nozas, cual el ia adora, an si sempre a pos el ia debe luta longa par lingua pintida per vinse la ostina de pesos pico de nozas en sua cavas de dente. Hugo e Lotte ia prefere “alga cosa con crema bateda”, ma la padre ia resta fidosa a plaseres de dinia plu mas, cual el ia sabe varia longo la umor del momento: salsixes peti con salada de patata, un steca axida de carne cru con oniones, brotos de capara e otra spises – tota nomida Hackepeter en la jergo berlinan – o a veses un Rollmops picante, cual – contra sua nom – no ia es un can¹, cual ance en acel epoca on no ia come en Deutxland, ma un arenge, un arenge marinida e tenida en anelo par pesetas de lenio, simil a fosfores, sirca un concombre vinagrida.² Cuando la madre e la enfantes ia fini sua banceta miniatur, Sr Geist, ci entretempo ia gargara du vitros grande de bir a su, ia clama a la servor: “La paia, per favore!” Lo ia es un sena emosiante en cual cuatro duples de oios ia oserva atendente la lapis ajuntante del servor. On ia senti ce multe va depende de sua deside. Alora Sr Geist ia estrae sua portamone de cuoro. Lenta, calculante, el ia alinia la monetas sur la table con la sertia de algun ci sabe ce un sentim es un sentim. Sur funda del mesma sabe, el ia pone ance la grasieta sur la table, separante lo de la otra soma, e per esta el ia vole asentua: Acel me deta, e esta me ajunta libre, un donada.

Si los ia es fatigada, o si lo ia es ja tarda, los ia usa la metodo de trafica la plu conveninte per viaja a casa. La enfantes ia prefere un bus motorida, de cui nivel superior los ia pote ancora sasia se par regarda la vive sur la stradas, la fasadas del caferias e oteles grande, la posteres colorosa ante la sinemas con la imajes prometente de Pola Negri o Asta Nielsen. Ma cuando posible, la jenitores ia usa plu volente un bus de cavalo. Lo ia es plu barata e donce comun supracargada en la seras de soldi. Lo ia es moveda par du cavalos fatigada, lenta, jeneral plu tirante sua pedes ca trotante, longo la strada Potsdamer asta la stasion final a la strada Bülow. Esta viaja ia custa per cada person sola sinco sentimes.

Tal ia es la plaseres de soldi del familia Geist cuando Hugo e Lotte ia es ancora en sua anios plu joven. Ma esta plaseres, tan cara a Sr Geist, ia deveni gradal plu e plu rara. La fies ia prefere la sosia de sua cameradas e ia usa cualce causa asetable como un escusa per evade la proteje de la jenitores. Lo ia es o un visita con la amis de scola a un museo, o un migra estra la urbe, organizada par un grupo esplorante entre la clasanes, o la prepara de un peti sena teatral per alga festa, e tal plu. Jeneral la xicas ia resta entre se, e la mesma per la xicos. Ma con grasias a la duple del conasedas Geist, ci ia ave contatadas en ambos partitos, on ia deveni fasil informada sur la ojetos resiproca del escursos e ia pote ordina un encontra acaso a la bon momento.

En la comensa on ia ave serta alga confusas e eras. Ancora aora, tota de los recorda bon la fiasco del manobra a ves del escurso prima. La comunicas de Hugo a la membros de sua grupo sur la program del xicas ia es coreta. El ia oteni de Lotte la sabe ce la scoltas fema intende vade a Werder per vide la flori famosa del serisos. Ma Lotte, a sua lado, ia tradi a estra sua ecipo ce la xicos vole fa un turi de la parce del castel de Potsdam. E tal lo ia aveni ce, en acel soldi de primavera, la cavaleros joven ia gasta sua plantas su la flores de seriso en Werder, futil anelante Julietas posible, en cuando la xicas-amis de Lotte, pos un insiste a momento ultima de Hedi Griethke, ia vade a Potsdam, do los ia esplora sin resultas la parce intera e tota vietas sirca la castel de Sanssouci e la Molin istorial.

De alora on ia ave un acorda mutua e tazeda entre ambos partitos ce la inisia del manobra va parteni a la “seniores”, lo cual ia plase vera multe la xicas. Los ia prefere jua la rol de vitimes pasiva an con – o, franca, par causa de – la senti de nervos titilada, sempre causada par la previde de periles nonevitable. Tota ia aspeta como un diverti nonculpable, simil a un jua de asconde con, en la sentro, un espera pico ce cisa on va ave un bon momento per separa como un duple, cisa an per un recrea a scala minor de la fura de la femes de Sabina! Ma entre se la xicos ia afeta volente ce los ave no interesa a core pos capras balante, en cuando la xicas ia dise comica, con ofende bon imitada, ce esperable en la soldi veninte “la savajes va lasa nos en pas!” E an tal, si la xicos, esente noncapas o tro fretante, ia fali trova la campa del xicas, o a veses ia pasa an estrema prosima a lo, vidente no cosa, sempre lo ia aveni ce la aidores fema bonvolente sabe ia revela sua loca de resta, par un “Huhu!” reproxante, a la patrulias del siecas.

La ariva de Pierre Touchard ia es un causa – a la min en la tempo prima – a la familia per retrova sua unia de soldi, contentinte Sr Geist. La visitor nova ia es ancora un nonconoseda ci on no pote lasa solitar. Hugo ia reclama nonpausante la direto de introdui el a la ronda de sua cameradas de clase, como un enfante nonpasiente per mostra un jua nova, ma sua jenitores ia opina ce plu conveninte va es reteni la stranjer joven en la vasto del familia. E Hugo e Lotte ia junta se volente a esta proposa, consensa ce lo ia es ancora no lor turno per monopoli la joven franses. En ajunta, lo ia es ja otobre, pico fria a veses; la escursos de la bandes ruidosa tra la foresta Grunewald o sirca la lagos del rio Havel ia deveni min atraosa. Donce on ia pasea brava tra la site per mostra sua vistas a la comensor, e en esta la familianes ia ave un plaser definida, si no ance un orgulo nonmiscada. Volente o nonvolente, los ia senti la presa de un prestijia nonegalable, radiante de la nom Paris!

Tal Sr Geist, a punto de tira la atende de Pierre a esta o acel monumento, ia presede lo sempre con cuasi un desculpa, como “Clar, esta no va stona un parisan …” o “Natural, tu ia vide en Paris cosas plu merveliosa …” Ma Sr Geist ia conose bon sua site e ia sabe raconta detalias interesante. E tan multe cosas ia es completa nova a Pierre. An tal, con alga nostaljia el ia judi cuasi tota comparas en favore la capital franses. Serta, el ia es multe impresada par la linialia reta de la stradas de Berlin, lor bordas bela rasada, cual no caferia e no boteca ta osa traversa par desbotoni sua uniforma nonpermeable. Esta responde a prinsipes constrinjente de ijien ortodox e del nesesa de ordina, si, ma lo dona al imaje del strada un aspeta de noia brosida. Un contrasta tan grande en la moves plu colorosa sur la stradas de sites min sever, do la botecas sembla sestos jigante, caxas larga abrida, de cual sua plenia esedente, sua flores, frutas, frivoles, sua natur intera, tota artisanias, inonda la troterias e lisca entre la gamas del pasores!

A la Porton Brandenburg, Sr Geist ia vole gania un punto. “Berlin es un site relativa joven. Lo no posese anticas. An la eda medieval no ia lasa pos se un sinia mensionable, ma nosa Brandenburger Tor, plu modesta como un construida ca tua Arco famosa de Vinse, es plu vea ca esta, an tal. Plu vea par cuatrodes o sincodes anios. Lo ia orijina en 1783!” De la otra detalias, Pierre ia reteni sola ce la caro de cuatro cavalos a culmina de la porton, scultada de cupre, ia es tirada par la armadas de Napoleon a Paris en lor epoca, ma ce ja en 1814 “nos ia vade per reprende lo!” La plu interesante per el ia es ce, de la sinco vias pasante entre la colonas de porton, sola cuatro es donada a la trafica de veculos, e la media resta reservada escluinte per la corte del imperor. “Lo es usada par nosa Kaiser.”

Cuando, a veses de otra visitas a la monumento, con relatadas de la provinse, Sr Geist ia fa la mesma oserva, la relatadas ia es sempre e instante curiosa: “E do Sua Majestia la Imperor abita?” – “Esce vos ave comun la posible de vide el?” e simil, e pos esta, volente, Sr Geist ia desenrola tota informas disponable sur abituas e cualias spesial del imperor, de sua sposa, del prinse erital. A cada ves, esta ia lasa la impresa ce el prosimi fasil a la majestias alta. E par esta el ia senti lodada. Ma Pierre ia oblida fa demandas sur la tema, o plu probable el ia teme malfa, car a alga grado el ia es consensa ce sua sabe sur la xef de stato deutx devia del istoria ortodox. Lo ia es fundida sur racontas, tota no respetosa, vastida en Frans an par jornales seria o versida en refrenes de consertas de caferias. En alga modo el ia senti ce cisa la solisita de informas, mera per descovre esce la rumores en Paris es vera, ta irita o an ofende la renadas del senior alta. Serta lo ia sufisi ce el reconose con cual amira muda la familia intera regarda aora la vacua del paseria sentral, reservada escluinte a la corte del imperor, en cuando seguente lunlotra, comun ostaculinte la trafica, sur la cuatro otra vias, on ia ave buses, taxis-caros, bisicles, de cual an no un ta pensa pico a usa la via sentral.

A tempo ja corta pos acel pasea, Pierre ia esperia un cosa cual ia convinse el ce taze es frecuente plu saja ca loda. El ia trova se con Hugo entre sua cameradas. La conversa del jovenes ia turna se sirca la figur nobil, vera majeste, de Wilhelm Du. Ohlberg ia sulinia la disposa taliante, elegante, sempre militar del imperor en tota avenis. “Si!” – Erich von Bastrow ia declara – “egal esce como amiral sur un barcon de batalia, o a la timon de sua iate, o sur cavalo ante la gardores armurida!” E aora Pierre ia entra tufante. Credente ce el contribui cortes, el ia ajunta: “El es an plu meritante car serta sua braso noncapas impedi multe jestis.”

O! Cua el ia dise? “Braso noncapas, nosa imperor?” – totas ia protesta unanim. Bastrow ia es stimulada: “Tan osante! Un tal cosa ta es tota nova. S.M.” – el ia pronunsia Es Em, usante en un espresa snobe de acel epoca, spesial en ambientes militar, sola la inisiales de Seine Majestät, Sua Majestia – “S.M. es perfeta sana en tota sua membros, grasias a Dio!”

Pierre no ia vole contradise. El ia comprende ce el ia toca un punto sensosa. Ma el ia senti ance ce algun ia engana el. Esce ance la duibraso del imperor deutx es mera un mito incubada en Frans? Ala la espresa “imperor de braso descapasida” ia es ja repeteda asta gasta. Aora el ia deta a la min un atenta de desculpa se, an si no convinsente: “Me ia leje sur acel en jornales franses. Probable los ia esajera.”

“Esajera?” – Bastrow ia coleri – “Menti sin vergonia, esta los ia fa. Denova la noncortesia franses!”

Hugo ia interveni calminte: “On no pote fa un reproxa a Pierre per sua nonsabe.”

Ohlberg, un otra camerada de Hugo, ia conclui: “U ala como on scrive la istoria estra la pais. Tan on invia nos ce tota conveni si on pote burla nos.”

Pierre ia resta solitar con sua mal paso. “An tal,” – el ia razona en sua interna – “no tota pesos de esta pote es inventada. Lo conteni bien alga veria. Me suposa ce en Deutxland on prefere no mensiona esta descapasi, car si no, los ta sabe serta lo, esta jovenes ci pare tan bon informada sur tota la moves e muxas del imperor.”

Grande ia es la desilude de Hugo cuando, en la mesma sera, el ia reporta a sua padre sur la peti disputa causada par acel Pierre malinstruida. “Esce tu sabe, Vati, cua on raconta en Frans?” Alora el ia debe oia ce “si, nosa Kaiser, vera, a sua nase ia sufri un debili minor del mano sinistra, par cui causa sua braso sinistra ia resta min forte, ma natural on no pote parla de noncapasia. En ajunta, la impedi peti no es persepable e ia limita nunca la capasias fisical de Sua Majestia.”

Persepable lo no ia es, acel noncapasia, sur la portraes ofisial, cual ia inclui jeneral sola la busto, e no sur la fotos reproduida par la jornales, e ance no cuando Wilhelm Du ia apare a formales publica o en la sosia, car de sua eda la plu joven el ia eserse se a vinse constante sua manca. El ia sabe eleje longo la situa, con la instinto presisa de un bon ator, vestes e disposas per masci la atrofia disturbante. Plu, el ia gusta bien mostra se en aponedas teatral, como ance multe otra xefes de stato. El ia sabe posa mestrin, aora, a ves de balo mascida, como prinse elejente de Brandenburg del eda medieval, aora su plias larga de burnus en viaja a Ieruxalim, aora como xasor teninte en mano destra tota un buce de lepres, volpes, fasianes, aora en la pratica de sua funsionas militar como marexal, con la basto cual ia dona a la braso sinistra un escusa per curvi, aora como husar, su la xapo alta de pelo ornada par un cranio supra tibias crusante, aora como cavalor armurida su metal briliante de peto, con elmo coronida par un agila enairante. El ia ave un aspeta impresante, acel imperor e ator. Sua renadas ia pare iniora la defeto del braso imperoral. Si en la mesma epoca la presidente de la republica franses ta porta un jiba, tan multe cantetas sur lo la bolevares parisan ta oia!

“U ala la difere!” – Pierre ia pensa. Esce plu bon o plu mal? Cuando un popla no sabe plu cua es la mesura coreta de respeta, lo es mal, ma cuando, seguente la esemplo de adulores de grado alta, on vole iniora cualias real, lo es ance mal, cisa plu. Lo no importa si la caso es mera trivial; si la femes, par causa ce sua re amada debe asconde sicatrises fea sur sua garga, adota ance per se colares alta, o faldas longa cuando la fem favoreda del re sufri subita de un infla del gamas. Acel no importa. Nonimportante si on reteni del monarca un informa nonplasente, per dise la fato ce sua can fema prefereda ia aseta, con resultas nonevitable, la tribui de un bastardo sin linia de sangue. Jeneral on trova un aidor astuta ci pote, par formulas envolveda en veluda caresante, fa ce sua majestia la plu alta comprende lo cual el no pote continua no sabe.

Con surie, Pierre ia emerje de sua meditas, aora recordante un raconta sur alga Louis, cui numero la istoria no mensiona. Cuando acel re, a un dia, ia sorti de sua vesteria per reseta la inclinas matinal de sua cortanes, el ia oblida ordina conveninte la fronte de sua pantalon. Un xoca grande entre la seguores! Ci va osa indica a la potiosa esta defeto de sua veste? Nun! E cua on va fa? Ultima la bufon de corte ia ave un idea. El ia invita – multe discreta – a tota persones presente ce ance los, imitante la re, ta permete un balia a sua fendes de pantalon, e cuando, egal discreta, tota ia obedi la solisita, la bufon ia proposa en vose forte: “Bon, seniores, esce lo no es conselable ce tota de nos en junta ta clui nosa lucarnas?”

Pierre ia resta pensosa. “Si vera, si no, egal. De alora la costumes ia evolui. Si oji en Frans la presidente de stato ta presenta se en publica con un cualia simil estravagante de veste, on ta ave instante un person jentil per averti el: Esce tu no teme, senior presidente, ce la canario va vola a via? E nun de la persones presente ta senti obligada a sofoca un desira spontan de rie. Lo pare ce en Deutxland on ancora no ia ariva a esta grado de Libria, Egalia, Fratia. Esce acel peti republica familiar no es plu plasente, an con sua ‘lasa-fa’ abituada? Bon, estas es detalias, sola detalietas, ma lo es interesante ce par tal detalietas la sentis e carateres difere entre la poplas.”

A la contata prima con Pierre, la amis de Hugo – per la plu los ia es membros de la mesma clase en la Jinasio Prinz Heinrich – ia esita pico. Un can encontra un gato. Los ia dise “Encantada de conose tu” en modo tro rijida. Ma la tempo de oserva mutua no ia continua longa. Multe rapida los ia senti, a ambos lados, “sur la mesma nivel”, e la acompaniores de Hugo ia considera Pierre como un camerada. Ance multe rapida lor curiosia sur cosas spesial franses ia es sasiada. Sola a veses, par acaso del conversa, los ia fa ancora un demanda de tal relata, bonintendente, no per piceta. Ancora lor cameradia ia es tro fresca, no un intera ja omojen amasada; los ia evita fronti la vantajes de sua sistemes resiproca de stato, convinseda ce la preferedas de sua propre governa ta fa no plu ca umili la otra.

A pos, cuando lor amia ia deveni plu temperada, los no ia esita plu per entra liscante a discutes como cual pais, Deutxland o Frans, ia nase plu de la famosas entre la siensistes, poetas, filosofistes e tal continuante. Ci ia dona a la umanas la inventas la plu importante? La arte de primi? Polvo negra? Sinematografia? Avioni? En esta debates eroin e prestijiosa, cadun de los ia debe comprende como poca el sabe sur la positivas del otra partito. Ma, total, los ia argumenta min per studia ca sola per jua, con acel nesesa nonsilentable de burleta cual es natural e normal entre omes joven bonajustada. Jeneral la nucleo de sua conversas ia es avenis corente min stimulante ma plu prosima a los. Malparletas de la clase a tema de enseniores e colegas. Los ia parla de sua preferes del momento, cameras, colies de selos postal, bisicles, libros. Aora e alora los ia vanta sur femes. No sur la amis de sua sores, la pexes fritada, como la grupo peti sirca Lotte – “los en enfantes!” – ma sur persones ja esperiosa de la tema, no desinclinada de aventuras spisida completa conformante a la desiras de omes maturinte en cui imajinas … los ia nase!

La plu vea entre la cameradas de Hugo ia es Erich von Bastrow. Un person longa e magra, con brotos de acne sur fas alga roja. No multe favoreda par la siensas. Ja en sua tempo el ia debe pasa tra la clase Quarta a du veses, como ance plu tarda la Secunda, e aora, con ja dudes anios, en la Oberprima, el vera no ia es serta ce el va desfisa la diploma de gradua en la esaminas final. Sua pasion ia es apone colares de camisa tan alta como posible, rijida amidonida, an si esta ia feri pico sua colo. Sua aspira ia es deveni un ofisior militar. El ia es la fio de un ofisior superior de stato e ia es interesada par sola la armada e la corte del imperor. Cuando, sur la strada, sua acompaniores ia burleta el per la estende automata de sua gamas longa, el ia declara, no sin orgulo, ce esta es “la paso de ofisiores deutx”. Sua du frates, ambos plu vea, ia es ofisiores ance. Sua “flama”, como el ia confida volente a sua amis, ia es Annemarie Balkenwirth. “Ma la spina en la sardina” – como Hugo ia tiseta el – “es ce Annemarie mesma sabe no cosa de esta!”

En ajunta a esta, Erich von Bastrow ia fumi sigaretas Manoli. “Montebello, mea marca.” E multe frecuente el ia ave no mone.

Pierre de la comensa no ia senti en se multe simpatia a esta joven alta e alga rusosa, an si, a sua lado, Bastrow, pos la disputeta consernante la descapasia de S.M., ia condui nunca nonjentil a la franses. La reversa! Ja a un pico de semanas pos lor encontra prima, el ia empresta du marcos de Pierre.

Un tempo alga longa ia pasa ante cuando Pierre ia pote lava a via la mal impresa cual, en sua opina, el ia lasa a la amis fema de Lotte. Pos acel sena umilinte de presenta, el ia fantasia un aveni pronto per regania sua prestijia. Entre la cuatro xicas ci alora ia inclina se ante la libridas del armario, on ia ave un cui imaje ia vibreta comun tra sua memoria: Annemarie Balkenwirth del oios amandin. El ia desira forte revide el. Parente la desira no ia es mutua. Ja Hedi Griethke e Trudchen Bachmann ia reveni estra program a la casa de Lotte, a ves an con intende confesada de solisita de Sr Touchard un esplica de un testo difisil franses, aora no tirada par lor capeles. Pierre ia vide los, volente, e ia senti en acel du persones peti un bonvole grande a el. A un ves, pos lor parti, an Minna ia comenta ce acel “gansetas fema ia enama bien reta!” Ma la folia cuatro ia resta nonvidable.

Pierre ia reprende espera cuando, pos un tempo, el ia comprende par alga referes de Lotte ce Hedi e Trudchen projeta invita el a la ronda de cafe seguente, cual va aveni en la casa mesma del fia del tortor, “an si ancora no mas ia partisipa asta aora, e esce en tal situa el, Pierre, ta aseta la invita?” Pierre ia opina ce el no va refusa, ce lo va es un onora per el, e ce el crede ce el es sufisinte corajosa per penetra, la prima, en la caje del leonesas encantante. Ma la invita no ia veni. Lotte no ia parla plu de la projeta. Pierre ia despasienti, car el ia espeta multe de esta encontra. A un dia el ia demanda a Lotte, como si total nonatendente: “Esce tu no ia mensiona pasada ce me va es clamada ante la corte suprema del Cuatrofolia?” Lotte ia pare disturbada. El ia dise: “La corte ia remete tu.”

“O?” – Pierre ia insiste. “Como esta ia aveni?”

Lotte no ia es un diplomata. Pos un pico de esita, el ia pote sola confesa ce Annemarie opina ce on no pote fa acel. “Annemarie es la plu vea entre nos – per dise, el es la presidente …”

De alora la senti ia crese en Pierre ce acel Annemarie no ave un opina favorente de el. El ia regrete multe lo. El ia suspeta, pico e pico plu, ce el es un xica deutx de la tipo del novelas franses, zelosa patriota e oposada par natur a tota cosas franses. Pierre va debe espeta. En cualce caso el va evita de aora trova se en la abiteria cuando el sabe ce la Cuatrofolia consenta su teto de Geist.

E la encontra, tan anelada, ia aveni cuando Pierre no ia espeta plu lo. En acel epoca on ia parla multe entre la jinasianes de ambos sesos sur la “filma grandiosa” La scarabe oro, en cual, par causa de senas presentada en Ejipte, un escusa sufisinte ia es donada per alga cualias osante de vesti o desvesti. Diseda par los ci ia vide lo, Emmi Geigel, la stela, mostra a plur veses sua dorso cuasi completa nuda, asta la basa. Jeneral la reportor ia ajunta direta ce la merita xef de acel filma no es ala trovada. El ia fa la comenta mera pasante. Ma on debe dise ce la filma dona un regarda profonda a la costumes e conduis del ejiptianes de acel tempo. Ance Hugo e Lotte ia senti alora la nesesa de deveni instruida sur la vive del ejiptianes antica. Lo no pote nose. Pierre ia es informada e ia acorda multe volente acompania la frates e sores. En la dia seguente, Lotte ia anunsia ce ance la Cuatrofolia con tota sua folias va junta se a la escurso.

On ia encontra lunlotra ante la sinema. Annemarie Balkenwirth ia veni ultima, no tarda. La atentas par Pierre per oteni un seja a lado de Annemarie ia resta futil, partal car acel fem joven ia colabora en no modo a la mesma resulta, ma xef car la tre otra xicas ia ensirca tan avida Pierre ce final el ia trova se como un cuneo entre Trudchen e Lotte. Ance pos la spetaculo, sur la via de reveni, Pierre ia susede a sola un ves comensa un conversa con Annemarie, car la otra tre ia es tan monopolinte stimulada sirca el ce el ia senti cuasi segregada. Ja la grupo ia entra a la strada Hohenstaufen cuando final Pierre ia susede dirije a Annemarie la demanda blanda:

“E per tu, senioreta Balkenwirth, esce la filma ia plase?”

Annemarie ia opina ce lo ia conteni multe cosas naive, e ce on ia pote tro fasil previde la fini. “Me no duta” – el ia ajunta – “ce en Frans vos crea filmas plu bon.”

Cortesia? Ironia? Resta cauta. Pierre ia confesa ce el ia vade sola rara a un sinema. “Ma me trova con plaser ce tu ave un opina cortes sur la franseses. Grasias.”

“Bon, acel me no ia dise, al min no tan direta.” – la xica ia asentua. “Acel, en pasa, me no ta pote dise, car me no conose la franseses.” La fini.

Totas ia para ante la porte del casa do Annemarie abita. El ia ariva. Totas ia para per dise adio e tal ance la dialoga ia para, tropezante comensada entre Pierre e Annemarie.

A acel note, en sua sala, la joven zelosa ia revive sempre denova la pico de momentos pasada a lado de la blonde tenera. Ante adormi, sua fantasia ia continua ancora longa la conversa. Tan astuta el ia sabe aora trova la parolas perfeta en la momento perfeta! “O, tu no conose la franseses?” – e brava el ia proposa: “Me es a tota tua dispone, a cada dia, cada momento, per raconta a tu sur Paris, sur nosa costumes e abituas, sur nosa virtuas e vilias …” E tan radiante bela ela ia es en surie sua aseta: “Tu es tro jentil, Sr Pierre – el no ia dise plu Sr Touchard! – me acorda, serta, e me crede ce nos va deveni bon amis, no?”

Un fantasia bela, un fantasia dulse, cual pos corta ia traversa liscante a un sonia ancora plu bela, ancora plu dulse.