Capitol 26
Pierre Bouchardelle ia ariva en Marseille e ia enama direta a lo. El ia es instante colpada par la du cualias xef de Marseille: Lus e Ruido.
Plen de lus es Marseille par sua situa a un costa estendente sin bari asta orizones distante, su un sielo sempre serena, do ventas enerjiosa, limpores nonfatigable del atmosfera, scopi a via cada nube ja en cuando lo formi.
Plen de ruido lo es, car lo es un site de porto en sude jentil. Marores aterante nesesa, par crias joiosa, compensa per la silentia del vive longa sur barcon. Trafica nonsesante densi sirca la portos; la vade de asi a ala de calexes, autos, camiones, trames es nonposible sin ruido. La comersia sur caros del strada, la pexores, la terazas de caferias, clamas e contraclamas en tota linguas, e la comanda internasional del sibileta del polisior – tota de estas ajunta sona a la fondo.
Marseille es ruidosa ance par la tempera esplodosa de sua abitores. Cuando, en climas plu moderada, du persones vide lunlotra de distante, sur alga plaza, sur alga strada, e si los ave alga cosa per comunica a lunlotra, bon, alora los vade ance a lunlotra. En Marseille, no! Ala los iniora nobil la distantias, como ance la presentia de otra escutores posible. De un borda del strada al otra – no sola en la cuartales sentral, do la stradetas es tan streta ce on pote resiproci presas de manos de un troteria al otra, ma ance sur la Canebière, sur la bolevares del Prado, sur la plazas la plu vasta, egal – cualce Marius demanda vososa a cualce Olive: “He, colega! Tua sposa ia resani pos sua aborta resente?”
La contribuores la plu notable en relata a la forti del ruido urban ia es la trames. Par causa del nonposiblia de recambia en tempo de gera partes danada de materia ja no plu nova, on ia parxea los con aida de cosas tempora, fidante multe plu la interveni de un miracle ca la capasia del tecnolojia moderna. Tra dia e note esta casolas rolante, sempre plen pacida con folas discutente, ia cascade clacente tra stradetas caososa, tal ce on ia oia los de distante. An con esta, lor gidores ia continua crede a la nesesa de suprapasa la ruido del carnaval completa par la libri nonpausante de avertadores basa, perfeta imitante la clama anelante de un bove nostaljiosa.
Ma, renante supra tota, la sol ia rie, un sol reteninte sua umor egal, sin depende del ososia del spetaculo en la site; nunca la sol ia usa un modestia fasil como un escusa per veli sua fas. Lo ia servi con serenia. Un contrasta tan grasiable entre la joia de vive asi e la frontes grimante cual Pierre ia lasa a sola un pico de dias a ante, su la sielos gris de rejiones min favoreda!
Plen de lus e ruido, tal el ia ama Marseille, identica en tota detalias a la fem amada famosa de La joalas de Baudelaire:
… … … … et j’aime à la fureur
les choses où le son se mêle à la lumière.1
Pierre, con sua valis peti en mano, ia debe nota pronto ce el no va descovre un sala libre en un site ja suprafolida. Longo la consela de un servor parlosa de restorante, el ia continua sua xerca en cuartales periferial. “Regarda cisa nel ambiente de Pointe Rouge. Ala, sur la plaza peti, fasante la mar, on ave un ajente de lua. Linias 18 e 19 de tram.” Pierre ia viaja ala sin retarda.
“Si – du salas con cosina, completa furnida, sur la bolevar Grimaldi. Lo es un cabanon2 bela, intera nondependente, aora no plu usada par causa del gera. – Bon, on no pote dise ce lo es grande-grande, ma la jardin es grande, ance la platanes, tota ensircada par mures grande. Un situa grandiosa, a pede del pinos, tal ce on ole la resina e abita ala es un plaser. – Como en inverno? La inverno no resta longa en Marseille! Ma multe fasil per caldi, an tal. Considera, la salas es pico-pico, u ala un vantaje! Par un plenimano de lenio tu va ave instante la caldia de enferno … Natural tu pote visita. Vade al boteca de vejetales visina. Bartoli ave la clave. Me va dona a tu un bileta de visita. – No, vera no distante. Vade asta la eglesa de Montredon, e ala, la plu simple, demanda a cualce pasor. El va mostra a tu la dirije.”
Ancora en la mesma sera Pierre ia reloca se a la caseta de estate “Pescadou”.3 Lo ia es un abiteria simple, un sola nivel de tera, resente construida, como multe otras, par un botecor o artisan rica en la site. Tota ia es neta ordinada, con telones e telas diversa en la armario, con un colie completa de utiles de come e cosini en la caxetas e sur la scafales del cosina. Tota solos, seguente la moda del rejion, ia es covreda par un pave de telias roja. Gas, acua fluente e lus eletrical ia es instante disponable.
Bartoli, la comersior visina, ia condui aidosa en tota relatas; el ia trae an alga lenio afin Pierre pote ensende la forno peti en la sala de come, e par esta causa, ancora en la mesma sera, Pierre ia deveni un cliente del fruteria. Plu, Senioreles Bartoli ia vende no sola vejetales e frutas, ma ance comables de tota tipos, si posible jamon e salsixes, e a veses ance coneos, galetas, e natural ance ovos, bur e ceso. En novembre 1940 on ancora no ia senti multe agu la manca de nurintes, tal ce Bartoli ia pote de ves a ves no esije la biletas de rasiona corespondente.
La “parce” sirca la Pescadou no ia es vasta, ma lo ia sufisi per lasa a Pierre la impresa de isoli, tan plu car lo ia es ensircada par un mur con la altia aprosima de un person. Un rua, cuasi plu larga ca la caseta mesma, bordada par platanes, ia gida del strada direta a la abiteria. Arboretas diversa, entre cual Pierre ia nota, no sin plaser, la puntos jala del mimosa, tota plantada sin ordina longo la capris del ventas, ia fa ce la parce manteni la aspeta de natur libre cresente.
Pos la caseta on ia ave un patio, con un cabana per alga mobilas de jardin. On ia pote conserva ala ance un furni de lenio o carbon. Situada a lado ia es un stange de reserva con mures de petra, de cual la xuxa del acua esedente ia supraflueta sin interompe, cadente a la canaleta.
La bolevar Grimaldi – Pierre ia esperia plu tarda ce la costum local dona la grado de bolevar a tota vias cuasi sin distingui, an a los cual, en rejiones min fasil influable par zelo e asentua, on ta nomi simple e realin mera un stradeta – la bolevar Grimaldi ia es situada en un cuartal calma. Lo ia ave la discretia de felisias saja.
Ala la paseor ia vade entre du linias paralel de mures muda, apena interompeda asi e ala par un boteca modesta, e sola tra la grilia del portes de entra el ia pote persepi, frecuente divina mera, pos arboretas e boscetas, casetas simple ma limpa, de cual algas ia aspira compete con casas vera del campania. Par la retia de sua mures de petra, la bolevar Grimaldi ia aspeta sever, noncomunicosa. Ma esta no ia engana la pasor. El ia sabe ce asi la joia es interna.
Pos la linia norde del bolevar, en la fondo, la masif blanca del montania rocosa Marseilleveyre ia leva, cual, con sua sincosento metres de altia supra la nivel del mar vera prosima, ia presenta un presipe impresante. Entre la rocas e la borda norde del bolevar, sur un tereno ondante e rapida asendente, on ia ave un foresta enorme de pinos, no multe densa, car esta arbores, del tipo perdurante como marores, nesesa multe spasio per brandi sua ramos sufrinte cual torse como brasos cuando secuteda, mordeda, violeda par la furia ostinosa del mistral.
Pierre ia gusta la cuartal. Par consela de Sra Bartoli e par la ajentia de ela, el ia emplea per manejor de casa Juliette Pendola. “Sua sposo es un pilote de tram. El es bonordinada e asidua. Ja el aida en casas diversa. E onesta! Tu va pote confida a el tua portamone!”
Juliette, un esemplo bela del femes del pais de sol, jentil, plasente, cisa pico spesa a la taie como multe femes mediteranean pos la anio tredes, ia aseta volente veni a cada matina per un o du oras – “si, direta ante mediadia” – per limpi la loca e per prepara la come. La vive a casa de Sr Pierre Bouchardelle, un om barbida e amin de eda media, ia es organizada. E sua nom! Tipal de Marseille! Sua silaba de coda “-elle” ia sona en lor bocas cantante como la vibra de un plato de metal pur. “Triste ce el parla con vose norde!”
La cosa restante ia es la trova de un ocupa conveninte. La custa de lua la caseta no ia es alta, sola sincosento frances per mense; ma nun ia sabe tra cuanto tempo la gera va continua ancora. Nonsaja ta es estrae tro regular de sua reservas. Ma el ta emprende cua? Pierre ia lasa a se oto dias per considera e deside.
Del comensa, la ajente de asecura ia es consensa del difisiles de crea asi un comersia nova en la situa presente. Sua ativia spesialiste va debe ave sua limitas en la strutur de un emprende ja esistente, en la funsionas de representor o promovor. En esta relata el va trova poca posibles. El es stranjer a la costumes local, e sua pronunsia “puntida”, como los ia dise, va impedi el de penetra la intimia del cliente … Pierre ia lasa a se oto dias.
La solve ia presenta se plu rapida ca el ia suposa. Cuando el ia vade a la ofisia urban de rasiona per enscrive se e validi sua cartas de nuri, sin cual el va pote compra no pan, no carne, no gras, no cafe, no tal cosa plu, el ia comensa escuta, instante interesada.
La locas encantante, sempre depintin, cual estende como un cadena de perlas de lus a sude de Marseille, longo la costa, Bonneveine, Vieille Chapelle, Pointe Rouge, Montredon, Madrague, Mont Rose, no es comunias nondependente; manejal los parteni a la urbe, esente mera sua cuartales periferial, e esta clari ce par surfas Marseille es la site la plu grande en Frans, an ante Paris. Per fasili a la abitores de acel agregas distante la reali de formales manejal, cuantiosa en la epoca de gera, on ia instala ofisias distrital, jeneral improvisada, car los ia es bien no plu ca cosas tempora.
La abitores de Pointe Rouge e Montredon ia debe rejistra se en un ofisia locada en un casa abandonada, un ruina entre otra ruinas, sur un penisola puntante a la mar. Lo ia evidenti del comensa ce la instala nova no ia es adatada a sua nesesas. La coredor ia es streta, la salas tro peti, tal ce comun la publica, spesial en dias de renovi sua biletas, ia debe sta longa a estra.
Cuando Pierre ia pote final, plu puxada ca puxante, presenta se ante la tables de du ofisiores, protestas cexetante ia forti entre la publica sur la lentia del du laborores. La xef de ofisia ia entra corente de un sala visina. “Ave alga pasientia!” – el ia consela. “Nos fa bien cuanto nos pote. En soma nos es asi sola tre persones; cadun de nos dispone sola du brasos. Si vos vole ce tota vade plu rapida, trova colaborores per nos. On va emplea!”
La stimula ia cade. Pierre ia oia an parolas aprobante. “Si la deutxes ta redona nosa caturadas, ofisiores no ta manca.” El ia deside usa la momento.
Pos ordina de tota formales consernante un arivor nova, cuando el ia teni en mano tota paperes e paperetas nesesada, el ia solisita parla con la xef, e, pos un acorda rapida mutua, el ia pote, ja en la dia seguente, colabora como membro regular del maneja urban, con salario de 1200 frances per mense e un promete de un alti a pos.
De alora la vive de senior ofisior urban Pierre Bouchardelle ia flueta egal, longo la sirculo regular renovinte de sua orario. La labora ia deveni nunca monotono. Sua spirito ia es ocupada par meditas sur la aplica coreta de proclamas e contraproclamas e la pedantia del burocratia de gera.
La publica ia es diversa e interesante. Femes ruidosa ci vende pexes, sempre lamentante la difisiles del epoca; jubilores plu cuieta e resiniada; laborores nonpasiente de fabriceria; posesores de casas lusosa campanial, avar de rasionas; comersiores rusosa, sempre preparada per scema, cuando los ia debe furni sua biletas recolieda entre sua clientes; refujadas de tota partes de Frans, entre ci, a un dia, Pierre ia ave la surprende de veni a conose Sr Gérard Bourrié, de Asnières! El ia es un om joven, simpatiosa, un avocato a la Corte de Paris. Pos corta, los ia fa encontras ance estra la oras de labora de Pierre e ia deveni amis.
Comun, en la posmedia de un soldi serena, los ia pasea en junta sur vietas apena marcada cual vade longo la custa entre rocas e vejetales misera. Los ia pasea asta Callelongue, acel peti porto depintin, frecuente depintada, cual es la fini del mundo. No via gida plu distante; asi la veculos debe revade al locas de do los ia veni. Paseores durida, trepores furnida pote treca plu, concistante pos cada paso un otra paso entre rocas cru e alta, abitada sola par gavotas ovinte.
En sua vila de casa, Asnières, los no ia conose la esiste de lunlotra, ma aora, en esclui distante, los ia deveni rapida juntada sur tereno comun. Plasente a lor oreas ia es oia algun parlante sur la stasion de Asnières, sur la sinema Alhambra, sur la pontes del Seine, e la fabriceria de gas! E “esce tu ia visita a ves acel semetero strana de canes sur la isola visina? …”
Sur sua vive personal, Gérard Bourrié ia es min comunicosa. Pierre ia atende evita cualce demanda cual ta pote pare nondiscreta. El ia sabe ce Bourrié, en la dias del batalias desidente, ia trova se como soldato en mision en Moulins e no ia retrova sua rejimento, cual ia desapare a norde del fronte del Seine. Credable ance lo ia es caturada del basas al nasas, como Paulig ta dise.
El ia sabe ance ce, par multe causas, Bourrié no desira revide Paris su ocupa deutx. La avocato joven ia es, ante la gera, un antifaxiste ativa, un suscrivor de tota apelas contra tota governas autocrata, e la autor mesma de un libreta de propaganda con titulo multe clar: Hitler, la previdosa! Bourrié ia suposa ce, par causa de sua organiza estracomun, la deutxes no ia oblida sua nom. El ia es ansiosa per sua sposa, ci ia refusa lasa solitar lor abiteria en Asnières.
Espetante tempos plu bon, Gérard Bourrié ia fisa se en Marseille, do el ia trova un posto como aidor de Dr Adoux, la avocato conoseda sur Cours Pierre-Puget. Ala Bourrié ia spesiali a cosas tratada en otra sites, e donce el ia es obligada a viaja frecuente. Gérard Bourrié, un om joven e simpatiosa, ia es un acompanior jentil e ia porta en sua disposa, en sua maneras, en tota sua person un pico del atmosfera parisan.