Capitol 28

La strada Paradis es un del plu longas de Marseille. Cisa ance un del plu variosas de aspeta. En la sentro de site, sirca la Porto Vea, do lo comensa, lo sembla sua colegas cuartal. Ala lo dedica se intera a comersia, en botecas solida, en ofisias de sento anios. Plu distante, lo ospita emprendes cual nesesa spasios plu vasta. Garajes, reparerias de tota tipos, companias industrial, e entre construidas moderna jigante, subita, como si regretable oblidada, u asi ancora casetas de sentenios pasada, con la botecas de vendores minor. Do lo prosimi, en sua parte final, a la bolevar de pasea del Prado, lo pasa tra un rejion cuasi campanial, reservada a clinicas e a la casones de investores retirante se en la natur.

A numero 425 on ia ave un casa como la otras, con sola du niveles, bien burjes, a media de arboretas e pinos maral. Ala ia es la xeferia del Gestapo. Sua xef suprema ia es Kälter, avente la grado de Comandor de S.S.

De la jardin, un via larga ia gida a un construida multe prosima, plu moderna e, mera par esta causa, con sua sete niveles, disturbante intruosa en esta ambiente de burjesia jentil. En esta cason alta, su la teto, en un sala peti, ocupada par femes servinte en sua tempo, aora aspetante como un selula de prison par sua manca de mobilas, e par sua fenetra de cual tri cuatris ia es cluida par un mur de brices, Annemarie ia pasa un note orible. U la dia cual el ia esperia! E subita acel fini ruinosa! Tan desperante! No person pote tolera acel! Esperable Pierre ia evade!

Sua caso no ia pare comun a la ofisiores suordinada ci ia ocupa se sur el en la matina seguente. Un fem deutx, ci longo sua propre confesa prefere abita en Frans, ci dejeta volente sua diretos sivil deutx, ci no asconde sua pasion contra la governa, ci ave relatas con un teroriste: esta no es un catura banal.

En la posmedia, la xef suprema Kälter, Comandor de S.S., ia es tan bon per aseta personal Annemarie Bastrow, naseda como Balkenwirth, en sua ofisia. La sala ia es vasta, rica mobilida, sur la nivel du del cason, con un balcon bela a la parce. Un pino prosima ia envia salutas curiosa a en.

Annemarie, en un sejon comfortosa, con dorso a la ximineria de marmo, presisa su un imaje grande en moldur dorada de marexal jeneral Göring, ia senta tal ce la lus de dia ia lumina tota cualias de sua fas. A la ves cuatro a la min, de ier, el ia debe raconta cua ia aveni. Sua parolas no ia varia. Sola ier el ia ariva en Marseille. La acaso ia fa ce en la rasioneria el retrova un conoseda vea, Sr Bouchardelle. Sur la ativia political de esta senior el sabe no cosa. El ia revide el ier a la ves prima pos dudes-nove anios e sola per un pico de oras.

Per fa cua el ia veni a Marseille? Perce el no ia resta en Lyon? Car asta du dias pasada, sua filo ia trova se con sua rejimento en Marseille, en presisa la distrito Pointe Rouge. Lo pare a el normal ce un madre ave la desira de revide sua filo veninte direta del fronte rusce.

“Sua nom e rejimento?”

“Teninte Paul von Bastrow, rejimento infantrial 238.”

Aora, final, Kälter ia es tan bon per pone a lado la lima peti par cual asta aora el ia fa rascas pico a la bordas de sua ungias, como si la racontas de Annemarie tota no interesa el. El ia turna sua regarda a Annemarie, de su suprasiles densa e negra.

“Von Bastrow? La destruor de tances?”

“Posible.”

“E tu no vergonia desonorante tu par asosia con tal persones como esta Bouchardelle? Do es Teninte von Bastrow aora?”

“En Istres. Per servi. Ma sua batalion ia resta en Pointe Rouge.”

Par un dito spesa e cuadro, Kälter ia presa un boton de campaneta sur la table. De un caxeta Kälter ia prende un sigar, ia morde la punto a via, ia sputa lo a sua sesto de dejeta, ia ensende la sigar, ia apoia sua corpo a retro asta cuasi un posa reclinante sur la reposadorso del sejon, e ia envia, no sin ruido de sofla, bandas rapida de fuma a la sofito. Fatigada el ia jesti a la soldato entrante: “Gida el a via!”

Ja pos dudes-cuatro oras, Teninte Paul von Bastrow, informada longo la via ierarcial ce la Geheime Staats-Polizei en Marseille desira consulta el “sur un tema spesial”, ia presenta se ante Kälter, Comandor de S.S.

Pos instrui sua visitor sin reserva e con detalias sur tota aspetas del caso “Vidua von Bastrow, naseda como Balkenwirth”, Kälter ia conclui:

“Me no va asconde de tu, Teninte von Bastrow, ce me ia ta comanda direta la prisoni de Sra von Bastrow, car mea senti de debe dita a me ce me ta elimina ja en sua broto cualce menasa contra la securia de Deutxland. Ma considerante tua person, tua fidosia nondiscutable en pertine a la Partito, par causa de tua servis eselente e condui eroin sur la campos de batalia, me ia esita. Me suposa ce en esta relata tu va es, con autoria ultima, la judor la plu capas. Esce tu acorda parla con tua madre, ambos total solitar, con no otra person presente, e poi deside longo tua consiensa?”

Kälter, Comandor de S.S. ia gusta alga refinas.

Conosente la crimines sur cual on reproxa sua madre, la ofisior joven ia senti picada en sua onora militar, ma el ia sabe mestri sua ofende. “Longo tua desira, Sr Comandor!” – el ia inclina ante Kälter, clicante sua talones a lunlotra.

Un servor postida ia gida el a traversa del jardin, a en la cason visina, e ia demanda ce el espeta en un “salon”, cual, con sua mures nuda e la simplia de sua mobilas, ia sembla cualce sala de visita en un prison.

Paul, un om joven perdurante, de altia media, sana e bronzida, no ia senta se; el ia lansa sua xapeta sur un seja e ia esuga la suo de sua fronte. El ia pasea par pasos longa, nonpausante, tra la sala. Un tal revide con sua madre el no ia espeta. Perce sua madre no ia resta ascondeda? Perce el ia veni asi en insulta provocante a sua carera briliante? Perce el mesma porta orgulosa sur sua peto la Crus de Fero de clase prima, a un largia de mano su la cor, e la Crus Deutx de Oro, e la Crus de Cavalero, si en sua libreta militar on trova esta manxa: “Fio de Annemarie Katharina von Bastrow, nas. Balkenwirth”?

Cuando Annemarie ia entra, el ia pausa stonada a la limina. Instante el ia oblida sua situa e un joia briliante ia lumina sua fas. Tan bela es sua filo!

“Paul! Mea Paul! Tu asi!” Con brasos estendeda per un jesti madrin el ia pasea a el. E ia para en via. La om no ia move. Un odia jelin ia parla de sua regarda. El ia distanti sua madre par un braso puiante.

El ia parla sisante: “Per esta tu ia deside veni a Marseille! No per me!”

“Paul, mea fio, escuta! Tu debe comprende.” Cuasi sua fortia ia abandona el. Desenerjida, el ia cade sur un seja prosima e ia comensa sanglota. Orible es trova se como un acusada ante sua propre fio. Paul ia regarda el, intensa, sin compatia. Final Annemarie ia pote parla: “Ier, Paul, ia es la dia 6 de maio. Tua aniversario …”

“Un bulion bela de festa tu ia prepara per me. Tan vergoniosa per me! Donce tua cor no es deutx? En un epoca cuando nosa popla asembla unanim sirca nosa Führer amada, cuando tota la popla deutx luta en sangue e sufris per salva sua direto de vive, tu conspira con la enemis! Tu ia tradi la carne de tua carne!”

“Paul! Me no permete!”

“Silenti, serpente! Me sabe tota. Tota, tu oia? Si lo cual me ia oia no es vera, jura ce tu va revade direta a tua propre pais per junta tu al linias de madres deutx consensa de sua debes. Vade per servi nosa Führer, fidosa asta mori! Sola tal tu va pote compensa tua crimin, sola tal regania mea respeta!”

“Paul, me reproxa me sur no crimin! La crimin la plu grande es menti a se, no es sinsera con se; la crimin la plu grande es ata contra sua propre consiensa. Respetosa es la person ci vive longo sua convinse. La tradi la plu grave es la tradi contra se.”

“La tradi la plu odiosa es la tradi contra sua propre popla. Iu! O, perce tu es mea madre?”

“Nunca me ia ata contra mea pais, esta me pote jura!”

“Cua tu ia fa nel nido de acel teroriste franses, do on ia aresta tu? Tu ia conspira contra nos, no?”

“Teroriste? Tan asurda! Acel senior es asoluta respetosa …! Nunca …”

“Ta ce me no suspeta ce tu ia es con el, nel note … per un otra razona!”

“Acel om es mea sposo!”

“Ba! Cua tu menti? Un franses! Ma acel ta peca bien contra nosa raza! Par prostitui!”

Annemarie ia es aora completa calma. Denova sua serenia costumal ia susede lisi sua fronte. El ia parla lenta, cuieta, ma firma: “Paul, acel om es tua padre!”

“Ma silenti, puta! No plu parolas! Asi nos parti per sempre! Ta ce me revide tu nunca plu!”

La om joven ia saisi sua xapeta; roja de coleria, furia e ofende el ia marxa del sala, rapida, sin bambola. A estra, la posmedia calda ia sofoca el. A plur veses el ia pasea sirca un arboreta, como perdeda en un foresta sin sorti. Final el ia para, ia firmi la xapeta sur sua testa, par alga jestis de reti ia neti sua uniforma, e ia dirije se par pasos desidente a la cason de Kälter, Comandor de S.S..

En la ofisia grande sur la nivel du, su la portrae suriente de marexal jeneral Göring, la judi ia cade rapida.

“Grasias, senior teninte. Me ia espeta no otra deside de un ofisior deutx.”

Du brasos reta estendeda, alta levada, ia fasa lunlotra en saluta: “Heil Hitler!”

“Heil Hitler!”

Rijida, reta, Teninte von Bastrow ia pasea asta la porte. Ala el ia turna: “Pardona, senior Comandor, ancora un demanda: Cua es la nom de acel om con ci mea … con ci Sra von Bastrow …”

“Bouchardelle!” Kälter ia clace la nom en modo resonante, con plaser previdente de un gastronomiste ci confida comandante a un restorantor la nom de sua plato prefereda. Cisa la silabas final del nom ia remente el de alga Frikadelles¹ del cosina de sua sposa.