Capitol 30

La Rena Tre de Mil Anios, prometeda par Hitler, ia prosimi a sua fini.

A comensa de junio 1944, la armadas esuan-brites ia atera en Normandia. Sempre plu la fesuras ia largi en la Fortres Europa “nonvinsable”. Ostinosa, par paso pos paso, la aliadas ia penetra la sistem de defende deutx. En agosto los ia invade ance Italia. La governas tiranal ia craci. La soldatos deutx, asta alora estendente asta la periferia de Europa, ia comensa retira se. Los ia sede terenos concistada e pos corta la ritmo del retromarxa ia aselera. Soldatos fatigada ia es rompeda. Tra dias intera los ia resta sin comedas. La munis no ia ateni plu los. Veculos de motor e tances ia resta sin gasolina; la aviones deutx ia es scopida de tota sielos.

Alora, tro tarda, ance la popla deutx ia comprende. Adolf Hitler ia engana los. El no ia es plu acel cuasidio ci en dias ruidosa de vinse la popla ia amira. Hitler ia es mera un umana; un umana ci ia era, ci ia lansa la mundo a masacras noncompatiosa, ci ia ensenia odia e ia fa de odia la mola xef de sua dotrina. Futil Goebbels, la retoriciste de propaganda, ia pone aora en brigadas la reservadas ultima, ia envia futil xicos contra la tances rusce. Nonsalvable la Rena Tre ia desintegra. Cuando la estasia de vinse ia atrofia, no cosa ia resta plu. Longa ja la zelo ia sede a despera. E la velia a realia, pos la estasias patriota, ia aveni tro subita. Aora ance la soldatos sur tota frontes ia sabe ce de la tempestas semida par Hitler no recolie bonvenida ia crese. Tota sacrifias e atas eroin ia es futil – futil ance la atas cruel e odiable del governa. La sola restante ia es un vacua. Un vacua en la pais deutx; un vacua en la almas.

Del norde, del ueste, del sude, la bataliores ia reflue. Pos corta los ia es engolida par un caos densa.

Un grupeta de soldatos consistente de elementos diversa, tancores sin tances, canonores sin canones, ofisiores retro sin armas, e con los un sola cor solida de infantriores, ia agrega ja su la punio amasante de un enemi a tota lados. Entre los – probable sola par un fali stupida de motor – on ia ave un coronel ci ia prende la comanda: “A noti nos va debe bate nosa via en dirije a Metz. La site es ocupada par la enemi, ma nos teni ancora forterias esterna. Ala es nosa espera ultima. Avansa donce, sin compatia, sin pardona e sin atende nosa propre perdes. Heil Hitler!” La voses respondente ia sona nonconvinseda.

Alga soldatos ia prosimi, tirante du siviles, un om e un fem. Los ia veni de estrae los de un cabana peti de xasores en la foresta visina. Ambos ia es vestida en trapos, noncurada, vea e estrema fatigada. Cuando los ia sta tremante con oios temosa ante la coronel, esta ia persepi direta ce, longo la color plu oscur del stofa sur la peto del jaca del om, la contorno ia es detetable de un stela grande de ses puntos, ala portada asta resente. El ia descovre rapida, de lamentas e confesas apena coerente, ce esta duple misera, iudis franses, ia vive tra la gera intera en la peti vila prosima Pont-à-Mousson. Obedinte, la veas peti ia sede se a tota maltratas par la ocupores, e ia porta, asta du dias pasada, sur sua petos la stela jala de Israel. Los ia sorti apena de sua caseta, ia pasa nonpersepida e ia es nunca deportada, e sur esta los mesma ia pote sola mervelia. Ma los ia deveni subita terorida ce la deutxes, furiada par sua defeta, va mata los ancora a la momento final. A du dias pasada, los ia vade per asconde en la foresta con aida de amis nonegosa.

Grimante con espresa nauseada sirca sua angulos de boca, la coronel ia turna a via e ia dise a un teninte stante a sua lado: “Nonpardonable ce on ia lasa tal esemplos vivente asta oji. Peri du baletas ta es mal. Senior teninte, atende, per favore, ce on pende los o bate los a moria par bastones. Un tal paco iudi debe desapare!”

La teninte indicada ia rijidi e ia informa neta: “Senior coronel, me no fa tal labora!”

“Me ia comanda. Tu refusa?”

“Me refusa.”

De la linias del infantriores voses aprobante ia es oiada.

“Tu es fortunosa” – la coronel ia flajeli – “ce me no usa mea arma, conformante a la regulas militar del armada. Me demanda a me esce tu merita ancora porta la insinias de un ofisior deutx.”

“Senior coronel, asi es mea spaletas e tota cruses e medalias!” La jesti ia acompania la parolas. “Me no fa un tal gera.”

“Teninte! Esta es un rebela a media de batalia!” Furiosa, pal par coleria, la coronel ia desgaini sua revolver. “Par autoria de …” – el ia fini nunca sua frase. De la linias del infantriores un xuta ia clica. La coronel ia cade, tocada par moria. E murmuras ia deveni sonosa. “La stupidia basta!” – “La teatral ia fini.” – “Perce on ta mata ancora esta iudis peti?” – “Aora sola un cosa importa: estrae nos de la merda!” – “Ta ce nos resta con nosa teninte! El ave la coraje nesesada.”

“Cameradas!” – alga capitan de la ofisiores retro ia parla. “Manteni sangue fresca. Sin disiplina nos es nonsalvable perdeda. Asta la fini, ta ce nos adere fidosa a lunlotra. Heil Hitler!”

“Scheiss auf Hitler!”¹

Ci ia osa dise tal? Nun ia atenta descovre el. La infantriores del teninte desgradida ia deside: “Nos va segue Teninte von Bastrow!”

“Cameradas! Tota es finida. Me no es plu un teninte!”

Sin batalia, sin an un sola spara peti, la grupeta del perdedas ia presenta se a un scuadron esuan patruliante. Los ia ave a media de se du persones vea e tremetante.