Capitol 19

Un secute crujinte ia tremeta la tren. Denova on ia para. Pierre ia velia. Lenta. En alga modo el ia es iritada par no persepi plu la ritmo calminte del rotas molininte. El ia frota sua oios. La dia nova ancora no ia neti. Sur la plataformas, siluetas gris ia move e un ferovior ci pasa corente ia cria: “Metz! Cadun sorti!”

Metz! Final! Pierre ia ordina sua vestes, ia prende sua valis e ia atenta avansa puxante se tra la masa compata de corpos umana ancora no plen nondorminte, ancora pasiva, tan apatica ce los ia aspeta colida. Esitante, la flue ia dirije se a un scalera prosima, desendente, ia presa se a en un coredor tunelin, apena luminada, gidante de su la ferovias a la sorti.

Ultra la parador, sola poca persones ia espeta. Par regardas avida, sin cualce discretia, los ia atenta reconose su la espresas tensada e polvosa del arivores la fas esperada. Sola poca persones. Perce on ta espeta tra oras e oras, e oji e doman, espetante un tren cui dia de ariva nun conose, an no la xef de stasion? Pierre ia senti ce, plu ca fatiga, alga cosa seria e grave ia es gravada sur la fases. No esclama joiosa, no parola de broma, an no un espresa vososa de nonpasientia. Mera un prosegue muda. Parente, cadun ia es consensa ce el ariva en un urbe prosima a gera, en un urbe sirca cual, a distantia de mera alga desuples de cilometres, sangue umana ia es ja fluente.

Cuando un person contata a ves prima alga cosa situada estra la limitas de sua pote e sabe, el es invadeda par un senti subita de teme e respeta. E el silenti. Ante un obra grandiosa de arte un person persepi sua nania. Cuando el pasa tra la porte de un catedral, traversa la limina de un ospital, entra a la sala de un person mor, el es inondada par la serenia del atmosfera. El senti como mera un gran de polvo ante la infinitia del misterio. E el silenti.

Ma lo es ance en la natur umana ce la fie del teran adata rapida, abituante. Alora an la grandiosia mesma es rapida consumada. Un miracle, si lo repete a cada dia, no ajunta a sua misterio. A contra! Lo aveni ce, an en la catedral la plu majeste, xicos de misa malcondui intercambiante selos postal su sua camisones blanca. Un studiante de sirurjia palpa sin emosia par la beco calda de sua pipa la ventre inflada de un person afocada, destinada a un disesioni autopsial. Persones abitua se.

Cuando Pierre e algas de sua acompaniores de viaja ia senta sirca un table – la sola libre en la restorante del stasion – los ia concista ja la senti nondefinable e otusa cual ia catura los tan majiosa a la ariva. Sirca los, en tota locas, la vive, acel fenomeno intruinte, movente sin sesa, ia ativi, deveninte evidente en sua funsiona la plu usosa, ma no la plu estetical: la nesesa de come.

Sola poca siviles ia es ala. Cuasi tota tables ia es ocupada par membros del armada. Lor uniformas nova en gris de campo ia es ja no plu fresca. Servores vea, subita reativida, ia coxea de loca a loca, portante platos peti de comes de matina con odor de cafe. La cafe ia es calda e bon.

Pico pos pico, Pierre ia pote secute a via la rijidia del note. Sua pensas ia clari. El ia pote razona. El es asi en Metz. E aora? Sua projeta, ja consetada en Berlin, resta la mesma. Longo tota informa disponable, la linia fronte serpe tra alga loca entre Metz e Nancy. Chanzy, a do Pierre ia fa un escurso con sua tio en acel matina de soldi a cuasi un anio pasada, es ancora situada sur la lado deutx. Ala el conose Sr Mazotte. La soldatos franses es probable nondistante. Cisa ambos partitos ia respeta la frontera asta aora? Ala el va debe pasa. Chanzy es a ueste del linia ferovial de Metz a Château Salins. Sua stasion de tren es Secourt. De ala asta la casa de Sr Mazotte lo va es no plu ca du cilometres. A pos, de Chanzy a Autrecourt – esta el sabe de sua propre esperia – es un distantia de apena un ora de pasea.

Su teto de Bertringer el va es salvada. Ala el va reseta probable novas sur sua familia. Sua frate Louis? Serta movablida. Un dotor veterinar en alga rejimento de cavalores. Pierre debe ateni Frans. Sin fali. Serta, el va pote filtri se tra la rede del vangarda deutx. Serta on ave bucos en la linia fronte. Lo es bien nonpensable ce la soldatos deutx es postida ala sin interompes, con codo a codo. Un buco va esiste ja tra cual el va susede lisca. E plu temprana, plu bon. La situa pote cambia de un dia a un otra.

Ma ja a la fenetra de biletas sua scema, tan lojical projetada en Berlin, ia fesura. Cuando el ia solisita “Un de clase tre per Secourt!”, alga laboror fatigada, vea, nonrasada, ia responde con noncompatia picante: “No plu on ave un Secourt en Deutxland. La stasion es aora nomida Unterhofen!”

“Grasias per la informa. Donce per favore dona a me un bileta per Unterhofen.”

“Ma senior,” – la fenetror ia dise sarcasmosa – “esce tu veni de ariva del sentro de Africa? Tu no ia oia ce on ave asi un zona de gera? La linia de Metz a Château Salins, pardona, de Metz a Salzburg, es cluida. Me regrete. Per favore lasa la loca al person seguente.”

Con un vacua subita en la testa, Pierre ia pone se a lado. Denova no tren! El ia sta nonmovente, con valis en mano. El ia senti denova solitar, asustante solitar, sin consela, a media de persones fretosa, stranjer. Persones puxante entre se, separante … Grupos ia luta per reformi. Clamas e crias. No ofisior ia pote dona informa fidable. Viajores noncapas ia demanda de visinas acaso: “Esce on va ave un tren a Saarbrücken?” Algas ia dise si, otras no. Un om peti, gris barbida, ia fora un via asta prosima a Pierre.

“Tu es el ci vole vade a Secourt, no? Me ia oia tu. Me ia sta pos tu al fenetra.”

“Si,” – Pierre ia responde, atentante divina cua esta om peti vole – “ma no tren funsiona plu sur acel linia.”

“Tu es de acel rejion?”

“Ma … si, me ave amis ala. Mea madre ia nase en un vileta prosima.”

Basinte sua vose asta cuasi un xuxa, con ginia complis, la om ia traversa a la lingua franses: “Tu es loren. Bon. Me va dona a tu un consela. Secourt no es distante de Delme, si? Vale del Seille. Si me ta es tu, me ta vade al taverna ‘Au Cheval Blanc’ nel Place Mazelle. Lo es la loca do tota campanianes de esta canton reuni cuando los es en Metz. Tu va trova serta un con veculo ci va vade en tua dirije. Prende informa del mestre, Dieudonné vea. El conose tota sua clientes e va pote organiza tua caso.”

Pierre ia salta nonesitante a la posible. El ia grasia la informor aidosa e ia demanda sola, ja a punto de parti: “Esce lo es distante, la Place Mazelle?”

“Sinco minutos. Tu no va pote era. Ma atende! Los ia sutrae tota nomes franses de sur la indicadores. Sola Mazellenplatz resta. A, e si, la ‘Cheval Blanc’ ia deveni resente ‘Zum weissen Ross’.” E con malvole alga joiosa la peti om barbida ia ajunta, ancora plu basinte sua vose: “C’est eux les rosses!”¹

El ia vade, ma ia reveni instante sur sua pasos. “Es cauta cuando tu parla franses! Ier nel Café Central los ia aresta Dr Thiriat car el ia dise a sua tablanes, alga tro oiable: A votre santé.²”

La Mazellenplatz, en acel dia, ia sembla un camperia vasta e ruidosa. Ala reuninte, cisa ja del dia presedente, serta del oras temprana de matina, ia es veculos comandada con cavalos e lor acompaniores. Ala, filida longa sua tempos acaso de ariva, veculos ia sta de tota tipos, xef caros de campo, composada de plances longa supra la rotas con, a ambos lados, un parador simil a un scala orizonal reclinante. Un faxo de palia sur la fronte ia servi como seja per la gidor.

On ia ave ance alga calexes e transportadores de formas diversa, de cual multe ia ave tetos de stofa de tenda. Asi e ala entre los, con alga palia su se, la cavalos ia espeta, liada a ases o rotas. La acompaniores, servores de stala no plu en sua anios de debe militar, ia sta grupida, puiante sua testas a lunlotra, car cadun ia es avida per sabe la novas e, ante tota, la destina reservada per el.

Pierre ia para per pausa, a lado de un tal grupo. El ia depone ja la valis pesosa e ia instala se sur lo. Del parlas ladal intercambiada de alga campanianes el ia comprende ce esta persones no senti comfortosa en la lingua deutx; los ia usa lo sola tropezante, con multe rompes, ma con un esforsa ostinosa per puxa sua conversa a un veste deutx. Los ia es urjeda a tal esforsas par causa probable del presentia entre se de suofisiores supravidente, vadente e veninte con paperes e lapis en mano.

La campanianes no embarasa se par sutiles gramatical, e si la parola coreta ia manca a los, los ia introdui fasil la radis franses su aspeta deutx. A la verbos los ia ajunta la coda -ieren, un metodo praticada an par la clasicas la plu clasica del leteratur deutx. Lor conversas ia foca esensal a temas prosima a la tera. “Cuando nos va debe reiugi? – On va envia nos a distante? – Cuando on va permete nos a via?” e similes, per cual los ia improvisa parolas como attelieren, rassemblieren, an partieren³ cual, solitar, no ia pote es plu monstrin ca neolojismes usada en sua tempo par Sr Goethe mesma: moussieren, completieren, blessieren, decorieren⁴ e multe otras no plu ortodox!

En Pierre la interesa del filolojiste ia velia instante. El ia fa escutas secreta zelosa. A un ves, an sin vole, el ia esplode con rie a la crea spontan de un parola nova del boca de un campanian prosima. Acel om simple, sentante sur un ase a cual sua cavalo ia es liada, con apetito vidable ia engoli peso pos peso de un bloco de ceso firma tenida sur la pan par sua diton spesa, cuando la cavalo, sin causa parente, ia xuta un serie corta de ruidos resonante en la matina azul. Poi la om ia esclama: “He, Bijou,⁵ hast du fertig mit petieren?⁶ Serta, acel campanian en acel momento no ia pote recorda, o cisa ia conose nunca, la parola deutx furzen. Direta e simple ance el ia deutxi casual la radis franses con aida del sufisa conoseda.

Poi un camerada visina ia atrae la atende del om a la nom franses de sua cavalo. Bijou! Nonfelisia e teme grande ia es instante lejable sur la fas del om noncauta. El ia regarda a sirca per verifia ce no suofisior ia oia el.

“Bon,” – la otra ia consela – “no ansia! Clar ce tua cavalo no va tradi tu. Plu, tu no es culpable. E vide. Asi es mea cavalo: el ave un bon nom deutx, e an tal lo pare a me plu recomendable ce me no ta usa lo!”

“E perce?”

“El es nomida Bismarck!” – a cual la om sur la ase ia sta se, tremante en teme, e ia fa sinias a sua camerada per solisita ce el silenti.

Pierre ia reprende sua valis e ia dirije se a acel parte del Mazellenplatz cual ia es bordada par un filo longa de construidas. Sin retarda, el ia vide la taverna xercada. Leteras fresca pintida “Zum weissen Ross” ia informa el. Leteras vidable tro peti per pleni la spasio. Los ia aspeta vergoniosa timida, tan nonautofidante ce la ombra del Cheval Blanc presedente, como si per protesta contra la usurpor, ia reapare desifrable clar tra un strato de pinta fondal tro fretosa aplicada.

Un taverna peti, de clase multe modesta. Pierre ia entra. Sentante a la tables ia es sola poca clientes, laborores, campanianes, en cuando la mestre, un om vea ma ancora forte, de aspeta cexetosa su sua barba de capelones, con mangas de camisa alta pliada, ia es ocupada pos un bancon zincida. Pierre ia abri apena la porte cuando el ia ave la impresa disturbante ce el es un intruor. El ia sensa ce a sua apare la conversas ia para subita. Tota oios ia regarda el. El ia turna a la mestre: “Sr Dieudonné?”

“Si.” – la nomida ia anui, e el ia solisita, en tono apena cortes: “Cua es?”

Pierre ia confesa multe simple: “Me es embarasada. Me debe ateni ancora oji la vileta Chanzy, ma me veni de descovre ce no tren funsiona plu en acel dirije. On ia dise a me ce cisa me va trova asi un veculo per vade al ensircantes de Delme.”

Sola aora la vea Dieudonné, ci ia escuta Pierre con testa basida, ia regarda direta sua fas.

“Cua tu vade per xerca en Chanzy? Lo es nel zona de gera. Tu conose algun ala?”

“Si. Me vade a Sr Mazotte. El es un ami de mea familia. Me ave un frate en Mussey.”

La tavernor ia deveni plu compatiosa: “Tu es de Loren?”

“Me es fran—” Pierre no ia pronunsia la parola asta la fini. Subita el ia es consensa del era. El no ia es solitar con Dieudonné; clientes es presente, e on escuta serta la conversa. Instante la mestre de fas cexetosa ia interompe la parlosia de Pierre:

“Bon, bon, bon! Bon Dio! Tu es loren, si, bon. Del rejion de Delme? Me ia vide ancora nun oji, ma lo es temprana. A du dias pasada, Sr Mazotte mesma ia es asi. Per dise adio a sua fio, ci servi con la rejimento 4 baieres. Tempo sufisinte! La rejimento 4 ia parti ier. Reveni a esta posmedia. Me suposa ce alora tu va trova posibles …”

“Grasias, e … esce me pote, asta alora, lasa mea valis con tu?”

“Pone lo ala.” – la mestre ia punta a un angulo pos la bancon. “Cua tu va bevi?” – el ia demanda, car per el lo ia es evidente ce sola a un cliente el pote fa la servi solisitada.

“Un vitro de blanca.” – Pierre ia comanda, tal deveninte un cliente.

Pos sorti del taverna, Pierre, ci ia pote emprende no cosa usosa per aselera sua scema, e ci no cosa ia urje en la oras seguente, ia vaga sin dirije tra un vila en cui stradas, par causa esata de esta nonocupadia, el ia senti duple stranjer. Un tal fretosia febrin sirca el! Persones fatigada, fases pendente, vades e venis. On core, on para. On demanda, on responde. Soldatos, soldatos, soldatos … parteninte a tota categorias de arma … los ia pasa cuasi sin interompe, en grupos desordinada, en scuadrones reta, sur veculos, sur cavalos, asi ja preparada per marxa en sua uniformas nova, ala sola partal organizada; asi ruidosa, ala silente meditosa. Ance soldatos lasa a casa un sposa, enfantes, un prometeda. Multes ave en alga loca sua Annemarie … E asi ia es la bromores, per ci la movabli jeneral es a veses un otra cosa, un cosa simil a un feria, e ala, movente en filo con pasos desidosa a la stasion, un scuadron intera ci ruidi per concista esitas posible par canta vinsente:

Siegreich wollen wir Frankreich schlagen,
sterben als ein tapfrer Held!⁷

Sur la troterias persones ia regarda stonada. Algas ia surie, algas ia plora pico. Botecores a limina de sua venderias ia oblida sua clientes.

Noncredable de do tan multe pintores ia pote veni tan subita. Profesales, amatores, improvisantes. Ancora los ia ave multe labora per desradisi de avisas comersial cada testo de lingua franses. Rapidi, rapidi, si no, alga bande de patriotas tro stimulada va pote maneja par metodos plu enerjiosa un limpi instante del depinta del strada!

En la restorante “Zum Monde”,⁸, asta la dia ante ier ancora “À la Lune”, en la sentro del vila, do Pierre ia senta a table per sua come media, el ia es la atestor divertida de un conflita minor par causa del cambia de nom. La restorantor ia ave en sua patio peti, al dispone del clientes, du saletas separada sur cui destina asta alora la enscrives Pissoir e Toilette ia lasa no duta. La prima, evidente, ia es usable sola de omes, car lo ia presenta no posible de senta o acrupi. La otra, plu ecletica, ia aseta ambos sesos. E tal tota ia es bon ordinada asta aora. Ma la gera ia cambia tota. Tota parolas parteni a la lingua franses, donce al enemi. On debe sutrae acel du parolas sin lasa un trasa. Sur esta la tavernor, como ance la pintor clamada, ia acorda. Ambos ia sabe ce la consensia nasional veni de velia, e ia mostra ja se, de un popla intera ci es ja longa sufisinte matur per furni par nomes en sua propre tesoro cultural tota sua nesesadas, no?

Ma la demanda ia resta, an tal: A cua on va recambia la parolas provocante? On no pote sola simple desprende la parolas franses e lasa la clientes a divina cua asconde pos portes muda. La fato, ce aora ance alga del clientes presente ia ajunta se a la misca, tota no ia fasili la taxe, e tan plu car, si algas ia intende colabora construinte, on ia ave no manca de otras cui sola esforsa ia pare es sujesta mera cosas stupida per diverti sua tablanes.

Alga representor del categoria prima ia proposa la parola deutx Abort, ja vasta usada sur la ferovias deutx, ma instante un otra ia comenta, multe coreta, ce la espresa es tro jeneral e grupi su sua autoria la saleta prima e la saleta du sin distingui. Ma on ia debe, longo la opina del mestre, fa un difere entre ambos.

Poi un otra person presente, ance del serie del serias, ia opina ce on debe usa la enscrives Männer e Frauen – Omes, Femes – ma la tavernor ia esplica ce, si la parola Männer cabe bon a la loca asta aora nomida Pissoir, la parola tro escluinte Frauen tota no conveni, car a veses ance omes debe vade a acel Toilette.

La problem ia pare nonsolvable, cuando alga farsor ia ariva con un idea cual mesma es vera no bobo, per dise: lo ta sufisi si on ta mostra la spesialia de cada saleta par imajes sasiante.

Cuando la riones titilada par esta proposa ia sesa, de un angulo distante, un om de aspeta modesta ia parla, nonotada asta alora, ocupada sola par talia sua costeleta en modo la plu economial.

“Seniores,” – el ia dise, e instante totas ia silenti per escuta, car cuasi totas ia sabe ce Sr Reimlinger es un profesor en la liseo del vila e un colaboror a veses del jornales local franses, aora proibida. Un nonsposo vea, el ia veni comun per come media a La Luna.

“Seniores,” – el ia repete e ia comensa la leson: “Lo es notable ce multe poplas empresta de sua visinas la parolas nesesada per indica cosas vulgar, de cual on no es usual orgulosa. Esta es vera per alga maladias sesal, esta es vera ance per la instituida del saletas privada. En Deutxland on usa Pissoir e Toilette, ambos del disionario franses, e en Frans la padres de batiza per la mesma locas es la engleses. Ala on dise lavatory e W.C. Lo aveni ance ce la franseses, mestres nel arte de retorica, aplica a sua urinerias urban un eufemisme, bonvenida longo sona e sinifia, per dise: Vespasienne, par cual los redona la propria, si no de Cesar, al min del desendente de Cesar.”

Car la silentia respetosa ancora no ia rompe, profesor Reimlinger, cui siensa almanacin ia es vasta, ia continua: “Vespasiano ia es acel imperor roman ci ja en acel eda ia condui tan inventosa per trova impostas nova como ministros finansial a pos. En fato, el ia ave la idea de imposta la latrinas. Plu – ma vos sabe esta – el ia deveni famosa como autor de un proverbo conoseda. Cuando sua cositadanes ia reproxa ce la mone tal resetada va es credable acompaniada par un sabor definida, Vespasiano ia declara: Pecunia non olet.⁹ E aora,” – la bonparlor ia conclui – “per reveni a vosa conflita, me pensa ce la lingua deutx no ave un tradui esata per la Pissoir franses. Parolas diversa composada, probada de ves a ves, ia oteni nunca la direto de sitadan nel usa poplal.”

La tavernor ia rasca sua testa, ia turna al pintor e ia deside: “Oji nos va contenti nos par desapare la parolas enemin. Ta ce nun suspeta ce me vole par los presenta sentis de simpatia a Frans! A via! Entretempo me va atenta demanda a colegas o al autoriosas del ofisia munisipal per vide como los ia solve la problem. La aveni no es unica, mil diablos! On trova ja la mesma enscrives sur tota saletas publica en tota vilas e viletas del impero deutx.”

E lo ia es tal. Pos ja un cuatri de ora, la pintor ia pote anunsia: “Fada! Me ia aplica plur stratos de pinta opaca. An par lupa tu no va retrova tua Pissoir.” Ma la mestre ia atende apena la reporta del pintor, car a acel momento un cliente ia entra, a ci el ia turna como a un salvor:

“A, Sr Berger!” – ancora el ia pronunsia “Berjé” longo la costum asta alora entre lorenes. “Tu apare en bonmomento! Como person major nel maneja del vila, tu pote estrae nos de un embarasa. Lo es un caso de esta …”

La ofisia munisipal ia es multe prosima, a traversa del plaza, e Sr Berger, secretor en la Sesion de Rejistras Sivil, ia cura, par visitas dial a la beveria, la manteni de relatas bon con La Luna. El ia ama dise orgulosa, bromante, sur sua nom: “Un de poca cual ave la direto de sitadan en ambos linguas.” Cuando el ia conose la ojeto del discute, en tota detalias, el ia surie e ia declara noncompatiosa: “Tu tormenta tu a tema futil. No min resente ca en esta matina, nosa comite de vila ia deside lasa noncambiada la enscrives Pissoir e Toilette sur tota tal saletas cual depende del maneja munisipal.”

“Como me ia dise, no?” – la profesor ia dise, pico vinsente. “En esta caso, la lingua del filosofistes no conose un solve. On ta pote bien empresta de un otra popla ca la franseses. Ma de ci? Ance la engleses es enemis. Cisa Pisciatoio e Ritirata. Los es italian, donce de sona bela. Ma esce la italianes va resta neutra?”

De la persones presente on ia oia un pico de toses, cui sinifia ia es consela a Sr Reimlinger un freni de sua parlas. E la pintor ia opina: “Pos du o tre dias, cuando tota es total seca, me va restora tota como a ante.”

“Con fatura nova, natural!” – la mestre ia conclui, no sin ironia amarga.

Cuando Pierre ia reveni a la Mazellenplatz, lo ia ave un aspeta tota diferente. La camperia del matina no ia es plu. Sola pesos craseda de palia ia resta, con multe sterco de cavalo, paperes e otra sinias ce persones ia come ala.

Difisil ia es penetra en la taverna del Cavalo Blanca: lo ia es tan plen. Los ci no ia pote entra ia sta grupida ante la porte. Pierre ia mervelia a la cuantia grande de soldatos entre los. On ia ave ance multe femes, de tota edas, en vestes coletiva fabricada, de moda nonmoderna par plur anios. Femes del campania. A Pierre lo ia pare strana ce acel soldatos deutx parla franses – mera reduinte la sona en condui cauta. Los ia silenti direta cuando los ia persepi el. Ala, vidable, relatadas ia asembla per dise a lunlotra un adio final ante la sperde grande.

Ultima Pierre ia susede visi se tra la fola asta la interna del sala. A la bancon la vea Dieudonné ia labora suprema, plu ocupada, plu cexetosa ca a ante. El ia loca, desloca, reloca, ia prende, reprende, ia lava o no ia lava vitros e tases, e ia destapi botelas. Alga tempo ia pasa ante ce Pierre ia pote prosimi e indica sua presentia. Dieudonné ia fa no plu ca un sinia par ginia a un porte peti en la fondo del sala: “Ala, a retro, nel salon peti, on ave du o tre ci va viaja en tua dirije. Vade per demanda.”

Lo no ia es fasil. La tables e sejas ia es visina a lunlotra, cuasi sin spasio a entre, e, an tal, stante entre los ia es ancora la persones ci ia trova no posible de senta. Cuando Pierre ia abri la porte a la salon indicada, el ia ave a ves nova la impresa nonplasente ce el ia interompe un conversa. El ia pote divina ancora sur la labios del omes sentante, longo la forma del bocas, parlas no completa parlada. E a ves nova, disturbada, el ia sensa tota oios turnada a el con reproxa clar: Cua tu vole asi? El ia pote sola balbuta: “Verzeihung.¹⁰ Me ia vole mera demanda esce algun del seniores va viaja oji asta Unterhofen o un loca prosima?” No responde. Un silentia stupida.

Ala sirca des omes ia senta, presada sirca un table peti en un angulo, en ce la parte la plu grande del sala ia es ocupada par un leto con armario e un portalavabo. Los ia regarda lunlotra, finjente noncomprende. Algas, par testa, ia secute un sinia de nega. Pierre ia comensa duta. Esce el ia era en eleje la porte? Ma on ia ave no otra salon. Pos reateni, no sin esforsa, la bastion del bancon, el ia dise a la mestre: “Mal fortuna. On ave nun ala per mea dirije.”

“Cua tu raconta? Me no sonia, an tal, e no sonambula. Mangin de Luppy, Poirier de Solgne, Thomas de Moncheux a sinco minutos pasada ia comanda vino ancora. Veni!” – e enerjiosa sua grandia forte ia puxa la blocores a via. En la salon, el ia vade direta a un del omes sentante e ia parla en sua orea, e pos esta la om sentante ia leva sua regarda a Pierre, ci ia resta a la limina, ia continua discute con la mestre e ia dise final a Pierre: “Bon. Me va fa ancora du-tre compras. Pos un dui de ora nos va parti. Me va retrova tu asi, sur la plaza.”

“Grasias. Me va es serta asi.”

Con leva de spalas, la mestre ia cexeta: “Tan nonfidable, acel campanianes!” – e ia clari a Pierre: “El es Thomas de Moncheux. El va debe bien pasa la stasion de Secourt. Tu va ariva ante la sera.”

Pierre ia vole grasia, per es brava, e el ia suposa ce el va fa esta en modo la plu eficas par comanda un bevida. El ia solisita un cafe a la bancon. Autoriosa – car esta ia pare a el evidente – la mestre ia versa ance un coniac de mirabel a en. Instante la odor delicata levante en vapor del misca calda ia velia en Pierre un recorda de nidinia plasente. Bevinte sua cafe, el ia fantasia sur reunis familial cuando, pos un festa peti, un cafe con alga mirabel ia fasili la dijesta e ia favore la bonumor. El ia sorbe lo con saborea vera. Un surie ia broti al angulos de sua boca cuando el ia dise a se: “Un peso de Frans!”

Cuando, pos presisa un dui de ora, Sr Thomas ia reveni con multe pacos, Pierre ia es preparada per viaja. Sentante sur sua valis, ante la taverna, el ia scrive ja rapida un carta postal a Senioreta Annemarie Balkenwirth, Hohenstaufen Strasse 118, Berlin-Schöneberg. La testo ia es clixe banal, con intende, per no perili la resetor. Sola “Salutas la plu zelosa de Metz – Peter. 7 de agosto 1914”.

Cuando la carta ia cade en la caxa blu de posta, Pierre ia deveni triste. Un cosa defininte ia aveni. La contata entre el e Annemarie ia rompe. Con melancolia Pierre ia pensa ce acel carta, lansada a la caxa, sinifia – ai! – multe probable: “Adio, Annemarie!”; ma sin pausa el ia rebela contra esta idea, cual el ia secute a via como un inseto fea cadeda de supra, e ia dise a se, con ostina volente: “Asta revide, Annemarie! Asta revide!”

Apena instalada sur la seja del calex, Sr Thomas ia turna a Pierre: “Aora en via! En duple me ia ariva a esta matina, en duple me parti …”

“Tua acompanior ia resta nel vila?”

“A, si! Regretable!” – la vea ia suspira pico. “Adrien, mea fio plu vea. Un reservada del rejimento 8 de artileria, el ia debe oji presenta se nel caserna. Aora ance el es movablida. E tu? Dieudonné ia dise a me ce tu es franses. Perce tu no ia sorti plu temprana de Deutxland, cuando tu ia ave ancora la tempo?”

Pierre ia raconta lo cual ia aveni. Ce el no ia vole crede a la posiblia de gera e ce la trenes ia es no plu usable per siviles a pos. Sola oji el ia pote ariva en Metz. El ave conosedas e amis en Chanzy, en Autrecourt. El espera …

Sr Thomas ia interompe sua parla. “He! Nonevitable. Asi los es. Tu ave un Ausweis?¹¹ Un demanda stupida. Tu bien no pote ave. Difisil!”

Los ia ariva a la sorti del vila, e par punto de sua flajelo la veculor ia mostra a un grupo de soldatos, ala a supra, a lado del Semetero Este. Los ia es parante tota veculos. “Los esamina paperes de identia.”

Pierre ia pali. “Me ave no cosa. E an si me ta ave … Como franses me va es arestada. Me debe revade al vila.” El ia prepara se per salta de sur.

Sr Thomas ia es un om vea, ma un person durida, un de acel campanianes ci no deveni fasil nervosa. Un barba larga e gris ia invade tota sua fas, lasante apena un loca sufisinte per du oios rusosa, enerjiosa ardente como carbones entre la senes. El ia pare no atende la parolas de Pierre e ia urje sua du cavalos a vade plu. Ponente un mano sur la braso de Pierre, como per calmi, el ia dise: “Cua tu vole fa nel vila? Resta! Me veni de pensa ce mea Ausweis es valida per du persones. Me ia veni bien con Adrien. Si on demanda tu, tua nom es Adrien Thomas.”

Pos dise esta, el ia estrae un paper plietada, ia desplia lo par ditos noncapas e ia confirma: “Augustin Thomas e Adrien Thomas, ambos de Monchern, canton Vernach, ave la permete de viaja a Metz e reveni.” Con selo del comunia e alga cosa scriveda par la Ortskommandant.¹²

La soldatos verifiante ia fa no demanda. La viajores ia pote continua sua via. Sr Thomas ia es contente. “No ansia. Si no difisiles de otra tipo apare, tota va vade lisca.” Aora un complisia definida ia uni la du, e la vea ia pensa ce el deta un esplica a sua acompanior joven: “Serta tu vole sabe perce – ala su teto de Dieudonné – nun ia responde cuando tu ia solisita un posible de viaja.”

“Franca diseda, si, me ia es stonada par la silentia jeneral, e me es an plu stonada ce, a pos, tu ia acorda sin plu pensa, cuando Sr Dieudonné ia parla a tu.”

“Vide,” – Sr Thomas ia parla esitosa, cauta evitante ofende sua coviajor en cualce modo – “vide, cadun de nos ia crede ce tu es vera un Beiuns.¹³ Vide como on pote era!”

“Bei uns?” – Pierre ia repete. “Lo sinifia cua?”

“Tu no sabe? Lo es clar ce tu no es de nosa rejion. Asi on nomi Beiuns la deutxes ci ia veni a nos de Deutxland, del interna, como los dise. Ala, longo lor dises, tota es plu bon e plu bela, ma con nos los critica tota cosas. Los fa comparas entre nosa costumes de casa, nosa modos de vive e tal plu, e la paradiso cual los ia lasa pos se en alga loca nel fondo de Pommern. En cada frase du los recomensa: Bei uns lo es diferente … bei uns on fa tal … bei uns la casas … bei uns la omes … Ultima, los noia nos!”

“Bon,” – Pierre ia dise – “me comprende acel, ma perce tu ia suspeta ce ance me …?”

“Serta lo es stupida” – Sr Thomas ia solisita cuasi un pardona ja temprana – “e cadun de nos ia es enganada. Nos ia pensa lo par causa de tua xapo.”

“Mea xapo? Cua es mal a mea xa—” Pierre no ia fini parla. El ia comprende subita e ia es confusada. El ia desapone sua xapo, acel xapo bela de feltro, comprada a sola du menses pasada en un bon boteca berlinan, Peek & Kloppenburg, e aora, noncredente, el ia fa un secute peti del testa, dutante se. El ia regarda la xapo con reproxas, como si lo ta es culpable; el ia regarda lo con sentis simil a los de un gal cuando el trova ce, de un ovo cual el ia pone fidosa, un pateta corposa ia salta con beco torpe. En tono umil el ia xuxa: “Vera! Mea xapo es verde! Como esta ia pote aveni?”

Como acel ia pote aveni? Esce el mesma, a apena un anio pasada, no ia declara ce nunca un franses ta acorda apone un tal xapo? Como lo ia pote aveni? E aora, en loca de senti umilida, Pierre ia senti superior a sua paisanes, car plu rica ca los par un esperia grande. El pote comprende lo cual los no comprende, ce otra situas, otra ambientes gida a otra puntos de vista. Con cada cosa nova esperiada, la umana vasti sua orizon.

Cuando el ia compra la xapo, el bien no ia es enebriada. A pos el ia es nunca xocada par la color de lo, cisa car lo ia cabe como un nota coreta en la scala del imaje del strada berlinan. Lo no ia pote es “un peca contra la bongusta”. Sua oios, pos vide senas plu variosa, ia es aora plu completa educada, e par esta el ia ateni un comprende plu larga e ia pote, donce, puxa a via la limitas del Nonposible!

Ma – el ia medita plu – si la xapo verde es un cosa stranjer en Frans sentral, asi, en acel parte de Loren proprida par la deutxes, la abitores ia ave comun veses, sin duta, per abitua a tal composas de color. Tal los ia pasa, como me, tra la mesma pasos de evolui gidante a un comprendosia plu vasta, donce a un tolera. E cua? Si – Pierre ia conclui – si! Tolera, lo es la parola grande! Ma la patriotisme bon, cultivada de nase par cada franses bon, proibi aselera la tolera sur esta tereno. Asi on ave la taxe multe plu urjente de largi la fesuras, ma nunca calafata los.

Pierre ia demanda a se esce el va mostra a sua acompanior como tota es fasil e normal esplicable, como an el, un parisan vera an tal, evoluinte de un paso a la otra, sin cualce viole contra natur, ma ance sin sede muda a prejudis, ia pote ateni un idea de limitas sufisinte vasta per aseta sin xoca, ance en consideras de arte, tonos verde en composas diversa de color. Ma el ia sabe ce asi la cosa ave un aspeta completa diferente. Asi la xapo verde es nonamada par la persones local, car lo ia reseta la valua de un simbol. Lo sinifia la deutx, la Beiuns concistante. E Pierre ia silenti.

Pos alga tempo, Sr Thomas ia reveni a la tema:

“En la vila on desfida la xapos verde. E coreta. Cuando me ia es nel farmasia, on ia raconta ce un profesor del liseo veni de es arestada per un ‘disposa antideutx’, como los dise. Bon, acel person ia come media oji nel Luna. Lo es un restorante do usual la sola clientes es loren. Ala la profesor ia parla alga vososa. E un person nonconoseda ia es ala, nunca videda a ante nel Luna. Sola cuando el ia sorti, la otra clientes ia vide ce el porta un xapo verde. Pos un duiora, cuando la profesor ia vole entra a sua casa, el ia es saisida. Un plu person ci va pasa alga tempo nel fortres Ehrenbreitstein.”

Pierre ia prefere ajunta no cosa. El ia vole gida la conversa a un otra tereno, cuando la sonas pesosa ia ateni los de un campanon de vose baso. Lo ia es un zumbi monotono, formal, lenta, repetente pos intervales longa con sempre la mesma fortia.

“U ala,” – Sr Thomas ia grima – “un tal miseria! Los obliga nosa campanas, fondeda de metal franses, a anunsia lor vinses deutx. Nosa Mutte debe labora aora en cuasi cada dia. Cua es plu? Esce denova los ia elimina tota rusces?”

La gidores de un colona pasante de furnis militar ia es plu bon informada. Lor joia ia jeta un pico de turbosia cuando los ia indica: “Lüttich ist gefallen!¹⁴ Pos oto dias nos va es denova a casa de mama!”

“Si, si,” – Sr Thomas ia dise interna sarcasmosa – “car entretempo la franses va resta dorminte, no?”

Los ia encontra ancora multe soldatos longo la via, e a cada ves fases radiante ia rie a los. Sempre entre los on ia ave bonvolores per informa: “Lüttich ist gefallen! Aora asta Paris!” – e a cada ves la vea Thomas ia leva alta sua flajelo, como si per atesta sua joia sinsera compartida, ma entre dentes presada el ia sofoca un esclama venjante de “Dummkopf!”¹⁵ – probable la sola parola deutx insultante cual el ia conose. En dise esta, el ia regarda sua cavalos, car alga limitas on no pote esede sin es punida. A un cavalo on pote dise “Dummkopf!” e esta lejeri la cor.

El ia turna a Pierre e ia cexa: “Lo es bien nosa miseria ce nos debe esibi joia cuando los joia, an si lor joia es nosa dole. Plu grave es ce nosa fios, en ci un cor franses bate, porta uniformas deutx. On ave familias ci ave un fio en Frans, nel armada franses, en ce la otra ia resta asi, con la jenitores. Aora los va debe batalia, frate contra frate. Lo es sin compatia.”

La cavalos ia sesa trota e ia comensa asende longo un via serpente a la alta de Mécleuves. “Me vole sabe como los ia rebatiza Mécleuves.” – Thomas ia comenta. “Per la viletas cual fini con -y lo ia es fasil. En loca de -y los ia pone -ach.¹⁶ Verny ia deveni Vernach, Tragny Tranach, e si, no oblida ce tua Chanzy es aora nomida Schanzach. Sabe acel va es usosa. Ma como los ia nomi Mécleuves?”

“E cua ia deveni a Autrecourt?”

“A, joven, tu oblida ce Autrecourt ia resta sempre sur la tera franses, departe Meurthe-et-Moselle. Sola en Alsas-Loren los deutxi la nomes cual sona tro franses. Me no comprende perce los no ia pensa ja plu temprana a esta.”

Pos ariva a culmina del colina, los ia pote estende un regarda vasta a norde asta Metz e la rejion de forja a ultra, a ueste asta la cadenas de montes entre Metz e Pont-à-Mousson, e plu a sude-ueste asta la altas ante Nancy. Sirca los, sur la plano, tota ia es tan cuieta ce Pierre ia mervelia: “Ci ta pote suspeta ce la gera ia radisi asi? Ala on falxi la trigo como en tempo de pas, e ala es un om ci gida sua boves al pasto. Si on no ta ave la colonas nonsesante de veculos militar, on ta pote oblida la gera.”

“E an tal, lo no es distante.” – la vea ia declara. “Asi me no sabe clar, ma en nosa rejion la linia pasa a distantia de sola un pico de cilometres. Los ia ocupa Voiron e Autrecourt. On dise ce lor patrulias ia penetra asta Nomeny. La franseses ancora no move. Los prepara serta un colpa forte.”

Cuando los ia ariva en Solgne, aora Solgen, Sr Thomas ia proposa: “Nos va vade per bevi un vitro peti su teto de Lavaux. Cisa nos va oia novas del viletas al fronte.” Ma ante la caferia de Lavaux, grupos de soldatos ia sta discutente. Vidable los ia festa ja la cade del fortres beljes. Alga de los ia fa sinias de invita a la viajores sur la calex, en ce otras ia anunsia: “Vinse pos vinse!” – Nonesitante, la om vea ia flajeli pico sua cavalos e ia deside: “Nosa vitro es bevida!”

A la casa ultima, un posto ia para los: “A do?”

“Monchern.”

“Ausweis?”

Los ia pote plu viaja. Poi Sr Thomas ia indica la orizon montaniosa prosima. “A sinistra, pos acel cresta, es Moncheux. Ala, a destra, acel construida cuatroladal es la stasion de Secourt; alga plu distante es Chanzy, e al otra lado del foresta, tua Autrecourt. Me va gida tu asta Chanzy. Tal me va reseta la plaser de presa manos con Sr Mazotte.”

Pierre, prosima a sua punto de para, ia respira contente. “Me no sabe como me ta grasia tu.”

“No problem! Tota cual me solisita de tu es ce tu ta dise al franseses ce los ta rapidi! E aora cisa tu va rie, como on rie en tota la rejion ja de du dias. Sur la nom nova del stasion. Asta du dias pasada, lo ia es Secourt. Ma aora la vileta es nomida Unterhofen.¹⁷ On ia debe scrive acel sur la fasada del stasion. En leteras gotica, serta! Ma la pintor conose mal la leteras gotica. On dise ce la difere entre la f e s gotica es mera peti. Apena un linieta. Bastien, la pintor, no ia sabe esta – o el ia fa con intende – el ia oblida la linieta. U ala lo cual el ia scrive! Divertinte, no?”

Pierre ia leje la grande leteras negra Unterhosen. Contra vole, el ia rie. “Ma Unterhosen sinifia pantaletas! Comica!”

En esta momento los ia nota sur la via ante se un spetaculo nonespetada. Veninte del dirije de Chanzy, encontrante los, ia es du montores, entre ci un om ia pasea en sotana negra.

“Txa, fandango!” – Sr Thomas ia mervelia. “Los es la polisiores de Solgne. Los ia aresta la prete de Chanzy. Lo ia es nonevitable. Prete Klein ia asconde nunca sua simpatias per Frans.”

Cuando la grupeta ia es pasante, Sr Thomas e Pierre ia leva sua xapos. Cada polisior ia pone sua mano noncurante a sua elmo e ia vade plu sin parla. La viajores de calex ia regarda ancora longa la truple strana. Negante con testa, la vea ia dise: “Nos ia saluta la prete, ma la polisiores ia confisca nosa saluta per se.”

Aora los ia descovre ja la tetos roja de Chanzy. Ma du soldatos ia bari la via. La paper de identia de Thomas, de Monchern, tota no ia contenti los. Los ance no ia vole escuta la esplicas del vea, ci ia parla deutx en modo mal, e no la frases plu capas produida par Pierre, sur un visita a Sr Mazotte en Schanzach.

“Tua Ausweis dise Monchern. Tu ave no cosa per fa en Schanzach. Revade al via xef!”

Un sarjento ia junta se a la grupo discutente e ia interompe: “Fa como la posto dise. Asi on gera. On fa no plu visitas a amis.”

Tra alga tempo, sur la calex lenta rolante en la dirije de do lo ia veni, nun ia parla. A fini, Sr Thomas ia opina per coraji Pierre: “Egal! Oji tu va pasa la note con nos, en Moncheux.”

E tal lo ia aveni.

En la leto de Adrien Thomas, en acel note, Pierre ia dormi como un petra. De cuando el ia parti de Berlin, a tre dias pasada, sua corpo e mente no ia conose un reposa completa. Tan multe emosias ia puxa lunlotra ce el no ia pote sorti de un febrinia fatigante. Ma en acel note, su teto de Senioreles Thomas, sua natur ia sede a sua nesesas.

En la matina seguente, clamas forte de comandas sur la strada ia estrae Pierre de un sonia jentil. La vileta ia es plen de soldatos ci ia pasa la note en la casas del abitores. Instante Pierre ia reorienta se en la strutur del reales. Pos dormi profonda, el ia senti aora refrescida, librida del emosias febrin del dias presedente. Aora el ia razona multe sobre e ia vade per informa sua ospitor: “Me debe parti. Me trova me asi en un situa estra la lege. Lo es urjente ce me ateni un vileta franses, an si ja ocupada par la deutxes. Ala, al min, me no va es ance un peril per mea amis. Un joven franses en un vileta franses, esta es esplicable.”

“Si.” – la campanian vea ia acorda. “Asi tu no va pote resta longa. On va parla nel vileta. Ma como tu va continua tua viaja? Sin paper spesial de identia, nun pote move, an no vade a un vileta visina. Sin tal paper, entra e sorti de tota viletas nel zona de gera es nonposible … Estra —!” – un sintil subita ia ensende en la oios del vea – “estra per los ci vade a sua laboras de campo nel ambiente. Si, los es fasil reconosable como cultivores. Vestida per un dia de labora, con falxes e tota la bazar …”

Pierre no ia esita: “Me debe proba lo. No otra metodo esiste. Tu va dona a me un pantalon vea? Un camisa gastada? Me va lasa a tu mea veston, mea xapo, si, la xapo verde!” Ja el ia senti ce sua autofida reveni e el ia surie pico rusosa.

“Et-ete, joven! Sin freta sieca! Si, bon, me crede ce tu va pote evade tal. Nos va sorti juntada del vileta. E de tua valis, de tua cosas, no ansia. Maury, nosa panor, porta la panes a Chanzy a du veses de semana, sur sua caro peti. El va pote porta ance tua posesedas. El va lasa los con Mazotte.”

En la mesma posmedia, du laborores de campo, apena vestida par causa del caldia grande del dia, ia pasea lenta a ultra la posto del vileta Moncheux, aora Monchern. La un, un om joven, con fas covreda par barba, ma coceda par sol, ia penduli un zada de lenio a fini de un braso seca; la otra, un joven, cui pel plu delicata la sol ancora no ia ave tempo per tana, ia porta sur spalas un falxe longa, par cui metal osidinte e lama danada cualce recolior de gran ta sabe instante ce lo merita sola ce on dejeta lo.

Ambos ia vade longo la via de campos, cual ia asende presipe a la loca alta ante la vileta. Lo ia es difisil per pasea, plen de petras, caososa con multe ranures de drena, escavada en anio pos anio par acua de pluve cascadente. Sr Thomas ia eleje acel via car del culmina, ala ante se, los va descovre la plano intera sirca la peti rio Seille. De ala los va pote conta la viletas e divina do, aprosima, la linia de fronte pasa. La vias, vietas va es tan clar desiniada ce on va pote segue los par dito indicante. Tal Pierre va es orientada a sua destina sin esforsa. Ma en la vade, los ia debe para pico per lasa ce la vea pausa per respira. Los ia senta se sur la mur basa e ruinada del semetero vea.

Alora, ambos ia atende subita e simultan. Oiable ia es la ruido de feros de cavalos galopante. Si, tra la vileta cual los ia lasa pos se, un grupo de montores ia es rapida asendente. Dudes, cisa tredes. Serta ofisiores de grado alta, car a ambos lados del strada la soldatos asta alora vadente, veninte, sentante ante la casetas ia deveni nonmovente en posas rijida de sta. Ja la montores ia ateni la semetero vea e ia pasa la duple ci senta. Cuasi cadun, si on pote judi par la spaletas larga, ia es un person major. Longo sua pantalones los ia porta la bandetas malva larga del ofisiores jeneral. A esata la culmina del colina los ia para la cavalos.

“No stupida, acel jenerales.” – Sr Thomas ia opina. “Los ia trova direta la punto la plu oportun de oserva.”

E, como si per justi la opina del vea, la montores ia esplora ja la plano a la otra lado, tamisinte la panorama intera con telescopios avida.

“Lo no es la momento per disturba los. Ta ce nos vade nonotada!” Sr Thomas ia tira sua acompanior a un vieta de pasea a destra. Pos corta, ance ante lor oios la campania ueste ia abri, e instante la gidor vea ia declara contente: “Tota desenrola como si de bobin! Vide, la persones ci falxi ala, al otra lado del via, es de Chanzy. Si me no era, acel es la campo de Guillet. Un bonom. Vade e misca tu con los. Dise ce tu fa un taxe per Mazotte. Cuando los vade a casa, tu va acompania los, como un de los. Regarda, sola pico plu distante es la Frans vea cual estende a tu sua brasos. E aora, con ce esta sepe de prunel asconde nos ancora, ta ce nos dise adio par un presa forte de manos. Avansa, joven, e bon fortuna!”

“A ancora un ves, grasias de tota mea cor!” E ja Pierre, con oios fisada a la grupeta de Chanzy – Schanzach! el ia coreti se – ia desende paseante tra prados e campos nova falxida, en linia direta a sua destina.

Ance en Chanzy, en e de tota locas, soldatos ia xama. Asi los ia sta a la bordas del stradas, sirca la fonte del vileta, ala los ia senta sur bancas ante la casas, con fusiles a lado, con bolsones sur tera, preparada a cada momento per regrupi, per comensa marxa.

Pos un saluta discreta a sua acompaniores, Pierre ia desapare en la coredor longa de Sr Mazotte. El ia ariva a la limina del sala de patio. El ia reconose instante sua paves de brice brun roja. Vidente esta joven, vestida como om de campo, con falxe gastada, Sra Mazotte ia pone ambos manos a sua cor: “Cua aveni?” Pierre ia presenta se e la bonfem ia lamenta: “Mea Dio! Mea Dio! Un franses su nosa teto. Ma los va destrui la casa par foco. La polisiores va reveni! Los ia aresta ja nosa padre. E nosa Gaston, ci ia vade a la gera! Nos ave no novas! Tan misera! Esce nun ia vide tu entrante asi?”

“No teme, seniora, los ci ia vide no sabe ce me parteni al otra lado.” Sin pospone, el ia informa ela sur sua desira de ateni Autrecourt, an oji, si posible.

Sra Mazotte ia es vidable contente sur la deside del visitor strana. “Mea sposo ia vade con la fias a nosa campo, entre la forestas. Me va mostra a tu la via. Ma prima tu va prende un vitro de vino con un pico de otra …”

Pierre ia aseta grasiosa, e direta a pos, sin perde tempo, el ia repone sua falxe sur sua spalas. “Strana” – el ia oserva suriente – “ce par un tal strumento mal me sirculi oji plu rapida ca par bisicle!” Los ia pasa nondisturbada ultra la postos a la fini del vileta e ia vade longo un via de campos. Sra Mazotte ia mostra la dirije e ia parti de el.

Poi, de alga loca, distante, multe distante, un clace debil e seca ia es oiable. En alga loca, distante, algun ia es sparante. La gera ia deveni un cosa real. Pierre ia rapidi sua pasos, entrante a la foresta. Mera un vieta streta, cual ia deveni pos corta un filo apena marcada par pedes. El ia sorti del foresta e ia vide ante se la persones ci el ia xerca. Vera diseda, el ia vide sola lor testas, inclinada supra spigas ondante. El ia reconose Sr Mazotte su un xapo de palia con borda larga. La fias el ia pote fa no plu ca divina, car lor testas ia es completa ascondeda par bonetas de sol en stofa de lino asta la nucas.

Instante, tota ia ensirca la arivor, ci ance los ia recorda sola pos alga parolas esplicante de Pierre. Poi los ia mervelia sin fini a la aventuras del migror. La fias, ancora plu roja de testa e sana de aspeta ca usual, ia profita de esta pausa per desapone sua bonetas.

“Bon.” – Sr Mazotte ia conclui cuando el ia conose la intende de Pierre. “Lo es fatible. Ta ce nos vade.” – e ance el ia prende un falxe. “Sola alga minutos tra acel foresta ala; a sua otra borda, la distritos comunial de Chanzy e Autrecourt entretexe se. Sin duta, tu va trova ala laborores nel campos. De Autrecourt. Con los tu va es salvada.”

Pierre ia reconose joiosa la via peti longo cual el ia vade a un ves con sua tio, en acel matina de soldi a cuasi esata un anio pasada. El ia reconose la Cuerco del Virjin.

“Ha!” – el ia comunica sua joia a Sr Mazotte. “Me recorda la lejenda! Lo es la sculta peti cual veni felisia a la lado cual lo regarda, no? Cadun turna lo a sua vileta!”

“No plu! No plu! La patruliores deutx ia nota acel. Los ia crede, suposable, ce la posas cambiante del figur comunica indicas a alga spiores. U ala lo cual los ia fa, la foles!”

Arivante a la pede del cuerco, Pierre ia persepi ce la sculta peti de lenio es, par clos spesa, rigorosa fisada a sua suportador e de aora no plu movable.

“Oserva” – Sr Mazotte ia grima – “ce los ia cloi en tal modo ce de aora la Virjin va regarda sempre Frans. Ja los ia perde la gera.” El ia saborea sua conclui.

Alga plu tarda, sortinte del foresta, Mazotte, pos regarda inspetante sirca se, ia joia: “U ala! Parente on ia espeta tu! Ala, sur la campo de avena, es la persones del casa de Thiriot. Me ia oia ce el no es en relatas bon con Bertringer pos la sposi de Lisette. Ma serta el no va refusa gida tu asta la cultiveria. Vade per misca tu con los, ma cauta! Me aposta ce ala, do la via flue del foresta, scuadrones deutx oserva nos. Los ta pote deveni suspetosa. Falxi du o tre faxos nel campo visina per finje … Lor veculo es ja cargada par plu ca un dui. Tu va ariva a tempo bon per acompania los al vileta. Saluta Bertringer e Sr Dulong! On dise ce la deutxes ancora no ia traversa la Seille. Tan triste ce mea Gaston no es asi con sua rejimento. El ta ave un motiva bon per fa un traversa rapida …”

La apare del om joven ia velia natural un curiosia entre la laborores de Thiriot. La falxores ia interompe sua ritmo regular de talia per leva sua testas. Pierre ia vole completa evita cualce sena alarmante. Con dedica aplicada el ia comensa falxi, pensante ce on ave no cosa estracomun en fa tal. Ma sua jestis torpe ia sembla plu desglumi ca falxi. La oservores visina ia deveni suspetosa. La plu prosima ia clama a Pierre: “He, falxor, esce tua es la campo cual tu masacra?”

Instante Pierre ia pasea a el, atentante no tradi tro temprana sua emosia. Ma car aora ance la otra laborores, de plu o min prosima, ia comensa core a el, Pierre ia cria a los: “Me suplica vos, resta sur loca. Me va esplica tota a pos.” Turnante a la falxor prima, el ia demanda: “Sr Thiriot es entre vos?” – tal presentante se como conoseda.

Sr Thiriot ia sta ja prosima. “Me es el. Cua tu desira?”

Thiriot ia es un sincodesan seca, con fas multe plietosa sur cual suprasiles densa negra ia releva un carater sever. Pierre ia prefere no provoca la noncontentia posible de esta person. El no ia mensiona Sr Bertringer.

“Me es un ami de Sr Dulong. Esce tu ta acorda …” – e par poca parolas el ia espresa la esense de sua situa.

“Fasil,” – Thiriot ia aseta la solisita – “fasil. La veculo es cuasi plen cargada. Nos va afisa aora la palo teninte. Tu va pote trepa al culmina, ma nel vileta asconde entre la faxos. Lo es conselable. Jovenes de tua eda on no ave plu nel vileta. Los ia parti a alga dias pasada per junta se al armada. La plu resente, mea fio plu joven e Totor, la fio de Bertringer. Los ia debe pospone sua parti par causa del laboras de campo. Los ia susede evade ancora nel momento ultima, con grasias a Bertringer. El, la prima, ia persepi patrulias de cavalores parante al borda del foresta. Direta el ia envia un encargada per averti nos. Nosa xicos ia comensa en via a lado de lunlotra.”

Tan grande ia es la surprende de Sra Dulong cuando, timida, el ia abri sua porte a la batetas del falxor joven!

“Cua? Tu, Sr Touchard? De do tu veni? E tua vestes! Ma la deutxes es en nosa vileta. Entra, entra!” Rapida el ia clui la porte de coredor pos Pierre e ia clama a la jardin a retro del casa: “He, Gustave! Veni rapida! – A, Sr Pierre, un tal surprende! Nos serta no ia espeta vide tu asi! Ma tu es fatigada, fame, side, senta tu, veni per senta!”

Ancora en la coredor de acel casa amin, cual ia recorda en sua memoria imajes plu plasente de un tempo parente cuasi ier, Pierre ia suspira profonda. Aora el ia es protejeda. En Frans. Final en Frans! Poi el ia vide, subita, sola aora con consensia completa, la grandia del aventura perilosa cual el ia esperia, e el ia plora. Larmas calda e calminte. Ma ancora el no ia sta a la destina ultima. El ia vole retrova sua familia, sua madre, sua padre e sua propre casa …

“Tro riscosa!” – Sr Dulong, la tio, ia opina plu tarda, cuando Pierre ia abri a el sua intende. “Pasa al armada franses, lo es no plu posible. Si, ancora la soldatos deutx asi no es cuantiosa. Mera un vangarda. Ma la Seille es a lado del vileta. Lo marca la linia. Me crede ce asta aora sola alga lansiores ia traversa. Probable asta Vétilly, la vileta prosima. Esce ala los ia encontra la nosas? Cisa. Ma como tu ta traversa? Ja de tre dias, tota pontes grande e peti es gardada. On proibi cualcun de prosimi al ponte. La deutxes lasa nos a salva la recolies del campos sola a esta lado del rio. A sur la otra lado nun pote vade. Nos es barida de ala. Sin novas de nosa jovenes. Los ia vade a Nancy. Ance Totor, mea dusobrino. El ia vade ultima, con la fio de Thiriot. Los ia deveni amis denova. Ance la jenitores. C’est la guerre!¹⁸ Algas lo separa, otras lo rejunta. Ma per tu, si me ta dise la vera, me no vide un solve … e an tal, un joven de tua eda no pote resta sin peril en un vileta ocupada par la deutxes.”

Los ia es sentante en la sala comfortosa de come, pico fria par causa del covrefenetras cluida tra tota la dia. La duilus ia dona reposa. Platos antica e ojetos diversa de cupre, frotada asta brilia, ia es fisada a la mures. La pendulo longa de un orolojo campanial, en un caxa alta de lenio, como un caturada en un caje, ia continua sua tictaci monotono. Sin espera de libri. Como Pierre, la nonfelis. Restante sur la table ia es un botela, du vitros e pesetas de un regala peti improvisada par Sra Dulong afin Pierre pote survive asta la come de sera.

La tio no ia cambia. Oios calma en un fas calma, ma con sinias serta de alga fatiga. El ia es asorbeda en pensas importante. Pos un silentia longa el ia repete: “Evidente, un joven de tua eda no pote resta asi. La deutxes va prende tu. Ma cua tu va fa?” – e denova la conversa ia para. Ambos omes, la joven, la vea, ia sabe an tal ce los ave tan multe cosas diversa per raconta a lunlotra, ma ancora sola un tema osesente ia preocupa los, e ancora an no un espera pico ia ensende en la dirije desirada par Pierre.

A estra, sur la strada polvosa, un scuadron de infantria ia es pasante. Ambos ia vade a la fenetra e ia regarda tra fesuras del covrentes. Abri la covrentes ia es sever proibida, ma alga spasios pico a entre ia sufisi per regardas. Ante los, la plaza peti del eglesa no ia reconose se mesma. No fas conoseda. Do es la enfantes juante? Sola soldatos. No person sivil. Como si respondente a la demanda muda de Pierre, la tio ia clari:

“No viletan estra sua casa pos la ora 6 de sera. Acel es la comanda!” E denova silentia ia rena nel duilus del sala.

A estra, comandas xiliante criada, a un ves o un otra, ia causa un move sur la strada. Scuadrones de soldatos ia vade en dirijes diversa, suposable per recambia la postidas ci fini sua labora. Soldatos en tota partes. Los ia senta sur tota bancas ante la casas, su la nozos en la plaza peti, sur la petras bordante la fonte, sur la grados del eglesa. Lor fusiles ia sta pasiente, sempre en cuatruples, con la mesma cuantia de bolsones a basa, en faxos piramide, aliniada en ordina bon. La soldatos ia parleta; algas ia come; otras ia dormeta.

Poi, a la stona grande de Sr Dulong e ance de Pierre, del dirije de rio un om ia veni, un viletan, con pasos completa calma. Como si no proibi conserna el. Con xapeta apoiante puxada a un lado, portante en mano un sesto simil a un caxa con covrente, e un basto longa, el ia pasea a la plaza peti. Un sintur larga de lana, en roja gastada, ia ensirca sua taie.

“Natural! Lo es el! Sola el lo pote es!” – la tio ia jemi pico. “Sola el en Autrecourt porta un tal sintur. Un om tan nonatendente! Bignol la noncoretable! Como esta va fini?”

“Bignol?” – Pierre ia demanda. “No la acordioniste del festa de sposi nel anio pasada? El ci ia teme tan la polisiores?”

“Esata! Tu ave un memoria fidosa. Si, lo pare ce la loca ia conveni a el. El ia revade nunca a Voiron, de do el ia veni. El ia resta como un encargada de Bertringer. Ma aora cuando me pensa a lo,” – e un brilieta de joia ia ensende en la oios del tio – “esta es nosa person! Si sur la globo intera un person esiste ci pote estrae tu de asi, lo es Bignol! Ma vide, la soldato postida al eglesa ia clama el. Mea Dio, cua va aveni?”

Ambos omes ia es avida fisada a la covrefenetra e ia segue la sena, a mera alga metres de se. Bignol, no plu fretosa ca a ante, ia vade a la soldato e calma, cuieta, ia estende un paper. Esta ia pare contenti la soldato, car pos leje lo, el ia sinia a Bignol ce el pote continua en sua via.

“Cual scema acel om ia descovre per pote ancora sirculi tan libre tra la vileta cuando tota otras debe resta a casa? Ma el va dise direta a nos. Nunca, pos la avenis, alga encargada de Bertringer pasa ante mea casa sin entra. Tal mea sobrino reseta novas de nos tan frecuente como posible.”

E en efeto, pos un pico de minutos, los ia oia ce a la porte algun raspa a via la susia de sua sapatos contra la rascabota de fero. E Bignol ia entra, tra la coredor direta a la jardin, do el ia trova usual Senioreles Dulong. La tio ia clama el a retro, a la sala de come.

“A, Bignol, tu diablo, nos veni de trema per tua vive. Como tu pote move a estra pos la ora ses?”

“Cosa longa! Me va raconta a vos.” Ma Bignol ia fa ja un pausa per segue interesada la moves de Sr Dulong, ci ia veni de prende un plu vitro del armario e aora ia versa per pleni lo. Sola cuando Bignol ia vacui lo, el ia continua:

“Vos sabe ce la cultiveria intera de Bertringer es plen de soldatos. Tota de los bivaca sur la patio, nel cabanas, nel stalas, con eseta de un person de grado alta, cisa un major, cisa un coronel, me ave no comprende de lor spaletas, bon, alga vejetal spesa. El ocupa la sala bon. Acel es un capitol. Aora la otra. Me ave nel Seille mea retenador per crabes de rio, ascondeda en alga loca. Secreta! Ma me ia pensa ce cisa acel soldatos mal va descovre mea retenador. Ma mea crabes no es per lor gargas. Donce a esta matina me ia trae tre desduples al mestresa. El ia coce los direta. Los ia es eselente. En acel relata, no cosa per critica. Sra Bertringer conose la arte de cosini. Inclina la xapo. A pos, on ia lansa la restas del crabes sur la sterco, como sempre, en un angulo del patio. Ma instante mea major-coronel ia nota la restas roja e instante sua nas spesa ia comensa moveta. Écrevisses?¹⁹ – el ia demanda al mestre – el parla franses como nos, ma con otra pronunsia! – e el ia vole sabe de do on ave crabes de rio. Sr Bertringer ia raconta. El ia pensa: perce el no ta dise la vera? E la devoror spesa fa ce me veni sin pausa e dise: Ch’aime beaucoup égrevisses.²⁰” – Bignol ia fa un imita burlante del major – “Vade e catura per me, el dise a me. – Bon, me ia dise, ma la égrevisses vive nel Seille e la Seille es verboten! me dise. Poi el responde: Me va dona a tu un Ausweis. Tu pote calma catura nel rio, a 500 metres a cada lado del ponte. Vade. Acel es tota. Si vos no crede, me va mostra la paper.”

Pierre ia prende la documento e ia tradui per sua tio: “La portor es encargada per catura crabes de rio en la Seille. El pote move libre, en la oras de dia, en la setor del batalion 2. Xef de batalion e comandor local Major von Rauwitz.”

“Bon,” – la tio ia comensa, repleninte la vitro de Bignol – “tu, ci sabe estrae tu de situas, ta ce tu escuta la desira de Sr Pierre. El es la frate par sposi de Lisette.” E Pierre ia raconta.

Bignol ia segue multe atendente, interompente sola de ves a ves per vacui sua vitro. Cuando Pierre ia fini, Bignol no ia responde instante. Lenta, considerante, el ia despoxi un libreta de folias de sigareta, ia estrae un par lasera, ia para en sua move, negante con testa, ia prende de un otra pox de pantalon un paco de tabaco en paper gris e ia comensa crea un sigareta.

Lo ia es noncredable como acel ditos calosa ia manobra con capasia estrema e tan enerjiosa! Par puntos de ditos la mano sinistra la presenta la folia preparada, ja un molda flexable, per aseta del mano destra la cuantia coreta de tabaco. Poi, supra la folia, la du ditos indicante ia comensa ata, orizonal, planinte en partes egal la bandetas negra de tabaco asta cuando, sedente a un rola comandante, la tubo peti ia apare, e Bignol ia puia lo, como un armonica pico, longo sua labios. Tal la parte protendente a borda del paper ia deveni rapida moiada su toca del punto de sua lingua.

Un plu presa caresin par la ditos sur la forma silindre, la bordas ia deveni colida a lunlotra, la sigareta ia es preparada e ja en un angulo del boca del artiste. El ia ensende lo e ia enspira avida un pleniboca grande de fuma cual, pos alga momentos, el ia reenvia tra sua nas, e alora el ia parla:

“On debe pensa bon. La posto franses la plu prosima es situada pos la semetero de Vétilly, a tredes metres a sinistra del vileta. Me sabe esta. En Vétilly mesma on ave no soldatos. Entre la semetero e la flue del Seille. La ponte es barida. Tota pontes. Ance en Mailly, ance en Thézey. No cosa fatible. On debe entra al salsa. Lo no es profonda. Me conose locas fasil per traversa vadante. Ma nel dia lo es nonposible ce on traversa nonvideda. Gardores sta a ambos lados de nosa ponte e longo la rio a cada duicilometre. A note, si. O nel crepusculo. Alora an plu bon, car la oios ancora no ia abitua al oscur. Alora un ombra, un salse, un silueta, tota de tabaco simil. Joven, tu va pasa. Ma solitar tu no va pote. Bon? Donce si: Me va dise a mea coronel ce on pote catura crabes de rio sola cuando lo noti. Per demostra, me va mostra a el mea sesto vacua. Vera diseda, me ia catura bien algas, ma no per el! Me ia asconde los en mea retenador. Un caje grande de bastetas de salse cual me mesma ia fabrica. Interna decorada con rede de filo. Me no fida la pinses de acel animales. Bon. Si tu ta conose mea devoror spesa, tu ta sabe serta ce el va dona a me un lisensa per pasea nel note al bordas del Seille. Monsieur, ça ira!²¹” – Bignol ia conclui corajinte. Sola afin el no oblida sua promete, la tio ia pleni denova sua vitro.

Pierre ia regrete ce el no va pote acompania Bignol asta la cultiveria de Bertringer. Ma lo ia es tro tarda; en ajunta, ance en la dia el ta ata plu saja par no mostra se do on ave tan multe soldatos deutx. On dise ce los aresta la omes joven. Cual novas del familia Bertringer? Bon, los es sana, ma los resta natural ansiosa sur la fortunas de Totor, sur la fortunas de Lisette, la fia. Si, ancora en la soldi pasada el ia es asi con sua sposo, la dotor veterinar. Sin duta, ance el es aora movablida. Esce Lisette ia resta en Mussey?

Pos la come de sera, la tio e Pierre ia senta ancora longa a la table. Cortinas spesa ia covre aora la fenetras, afin no raio peti de lus vaga a estra. Aora ambos ia pote raconta.

“Felis” – la tio ia comenta – “ce la soldatos no ia veni per abita nel casas. Nos pote parleta nondisturbada. Tro prosima al franseses, asi, los debe es sempre preparada per retira se. Los pasienti a estra, preparada per marxa, con armas a sua pedes. Sola en casa de Sra Denique – la vidua Perrin a ante – un ofisior ia instala se, serta de alta grado. Ja rumores sirculi furtiva tra la vileta. Sua sposo – los ia sposi a alga tempo pos pascua – sua sposo ia vade con sua desgranadores a Lixières a oto dias pasada. Probable ance la sposo ia es surprendeda par la serie subita de avenis. El no ia pote reveni. Asta la momento ultima acel deutxes ia calmi nos al crede ce los desira sola pas, ce los va pensa nunca a vade a gera, an si secreta los ia provoca la osteraiceses a emprendes criminal. Los es un raza strana, cual me va comprende nunca. Ma tu, en fato, tu, ci veni de ave relatas con los, tu sabe esta, serta plu bon ca me.”

“Bon,” – Pierre ia dise – “si, me ia ave multe veses de vide los de plu prosima. Ma me no opina como tu. Me ia veni a conose multe deutxes. Me es serta ce los no ia acorda entre se per engana nos. Los ia es sinsera. Lor desira de pas ia es ance sinsera. Ma, natural, cuando los ia persepi ce on crea sirca los un anelo de fero sofocante, ce de tota lados on prepara la salta de ataca matante, lor senti de justia ia rebela. Los no ia acorda presenta sua petos nuda al dagas de conspirores. Esta, tio, on comprende.”

“Como, Pierre, tu crede lo cual tu dise?”

“Vide, tio, ci ia comensa la atas militar? La enemis de Deutxland, no? Prima la serbsces, ci, suportada par Rusia, ia asasina la duple del prinse erital. Pos alga semanas los ia spara de sua barcones del Danubio contra la soldatos del frontera osteraices. Poi la rusces, sin prefisa un declara de gera, ia invade sites deutx, ia arde e ia masacra. E aora plu importante: ancora en Berlin me ia leje reportas en jornales sur nosa soldatos, si, la franseses, ci ia viole la frontera, ia spara contra duanores e polisiores deutx. Ci ia veneni la posos prosima a Metz? Ci ia cade bombas sur Nürnberg?”

“He, he! Me para tu. Tu ave demostras de tota de esta? Esce tu no sabe ce ja nel semana pasada, par comanda del governa, tota soldatos franses ia debe retira se asta minima des cilometres del frontera? En cualce caso me pote serti ce on no ia vide scuadrones franses en Autrecourt, e no en cualce parte del rejion intera. Per esta nos reproxa bien nosa armada.”

“Me es tan contente de oia esta!”

“Vide mesma. Asi es la numero la plu resente arivada asi del jornal Le Matin. Jules la corposa, encargada de Bertringer, ia trae lo de Mussey a du dias pasada, si, nel matina de mercurdi. Leje la mesaje de Poincaré, cual Viviani, la ministro xef, ia comunica en Palais Bourbon²² a 400 parlamentores. La presidente del Republica sabe cua el dise. El no es un enfante!” En un vose en cual irita e emosia ia vibra ancora, Sr Dulong ia leje:

“Frans ia deveni la vitim de un ataca noncredable. Esta combatosia, tota no justable, ia comensa cuando, sin declara presedente de gera, nosa frontera ia es violeda en plu ca 15 locas. Beljia e Luxemburg ia reseta atacas de surprende. Frans, provocada contra sua diretos, no ia vole gera. Frans ia fa tota cosas posible per evita lo.”

La tio ia dona la jornal a la manos de Pierre e ia continua:

“Natural ce en Berlin on no ia informa tu de esta. La soldatos prima ci nos ia vide asi, ia es cavalores deutx, aceles con lansias longa e alga tipo de plata sur la elmo. Los ia xama galopante tra la campos e ultra la vileta, asta la Seille. En alga locas los ia traversa lo sur cavalos. Esta ia aveni nel dia 5, nel posmedia. Denova nel dia seguente, ja nel temprana de matina. Plu tarda, infantriores ia ocupa la vileta. Los ia aresta nosa prete, Sr Lanternois. Aora los garda el nel scola como ostaje. On proibi nos de sorti de casa. Sola de oji los tolera ce la cultivores prende a casa la recolie matur.”

Pierre ia silenti en medita longa. Opinas contradisente ia batalia en el. Poi el ia renunsia: “Como on ta vide clar en tal situas? Nun pote trova se simultan en tota locas. Nos formi nosa crede longo lo cual aspeta vera per nos. Desmasci mentis es difisil. Me no pote reproxa mea amis deutx per sua opinas. Los crede con sinseria. Los no es culpable.”

“Bien, tu ia studia los de plu prosima. E ala, en Berlin, cua los ia pensa de tu? Los ia considera tu como ami o enemi?”

“A acel me pote responde. Contata de person a person es sempre la plu usosa. Lo destrui prejudis stupida. De comensa me ia simpatia tota persones con ci me ia relata. Al fini, nel dias ultima, su la stimula del gera anunsiada, algas ia distanti de me, los ci ia vide en me no plu la person, ma sola la franses. Los ia judi me no plu como Pierre Touchard, longo un opina resetada de me en contatas cuasi dial, ma como un sitadan franses, longo un opina gradal puxada a los par lor jornales. Me va oblida nunca ce sola par causa del ospitia corajosa de un xica deutx, la fia de un dotor, me ia susede sorti de Berlin. Ma me repete ce me comprende ance la otras. Esce tu no crede, tio, ce cualce Dupont o Durand, oji patriotas zelosa franses, ta es patriotas no min zelosa ardente sur la otra lado si, como Müller o Schmitt, los ta nase en Köpenick en loca de en Romorantin?”

Ante responde, Sr Dulong ia prende del armario de vitros un pipa de arjila con tubo longa, e atendente, curante, con multe jestis delicata, el ia prepara e ia ensende lo. Entretempo el ia surie a Pierre:

“Asi es la pipa de sajia. Me prende lo sempre cuando un stimula menasa inonda me. No cosa es plu conveninte, plu calminte, ca un pipa bon. La mea es fasil rompable; donce lo obliga me a manipula nonfretante. E cuando on lasa a se tempo, tota deveni plu clar. Bon, lo va labora aora, nos pote parla. Si, tu dise coreta. La culpa no es a lor popla, simil como la merita no es a nos, si nos ave un otra punto de vista.

Ultima, nos es cua? Mera un goteta de acua en un rio grande. Nun pote vade contra la flue. Nos es tirada a longo. De ves a ves, lo aveni ce alga gotas, al borda, min puxada ca los a media del rio, fisa se a alga planta o susede enflue pico en un golfo ladal; a veses, la remos de un barco pasante salpica gotas sur spigas de cana o salses peti al borda. Alora acel gotas esperia la ilude de nondepende. Mera per corta. Cual va es lor destina? Los vapori a via. La sol, side como un ogro, asorbe los. No cosa resta. Esta es la destina comun del umanas. Nos es caturada par nosa ambiente, no sola en corpo, ma ance, e xef, en mente. Como acua del rio.

Cada gota nel Rhône flue a sude, cada gota nel Reno a norde. Tan distante, diferente de lunlotra es la acuas de acel rios do los enflue al mar! E an tal, tan prosima, tan relatada, tan simil en sua locas de nase! Del tre fontes del Reno, un es situada a an no des cilometres, la plu distante a apena tredes cilometres, en linia reta, del fonte del Rhône. Cua es un distantia de des o tredes cilometres en proportio a nos? Zero! Acel acuas del Rhône, del Reno, a sua nase es la mesma; sola la acaso de un linia separante envia alga acuas al Mediteraneo, la otras al Mar Norde. La mesma per la poplas. Prosima e relatada a sua nase, ma distante e frecuente enemin par la acaso mera de un linia de frontera. Tal es la Istoria!”

“Un reconose triste. Ma un problem sin espera.”

“Tota no! On ave un difere. Acuas debe segue sua via de flue, tal como la Natur ia escava lo a miliones de anios pasada. Poplas ave la libria de deside sua dirije. Ala es la espera. La rios no es respondosa. La poplas, si. Plu coreta diseda, lor gidores. Ma perce nos perde nos aora en consideras filosofial? Lo es tro tarda. Aora la petra rola. Mea parlas fatiga tu. Raconta a me tua esperias en Berlin. Tu sabe ce me ia leje sempre tua leteras con interesa grande?”

Pierre tota no ia desira revive la dias pasada. En se el ia ave alga cosa cual an no la tio ta comprende. El ia dise: “Me no ia fa studias profonda del carater o, plu jeneral, del psicolojia del deutxes. Cuando me ia ariva entre los, lo ia es ancora la epoca bon. Totas ia joia. Me ia lasa me a flota con los. Me ia vive como un de los.”

“Acel es la metodo la plu saja. Praticas de tre menses es plu valuosa ca teorias de tredes anios.”

“Si me ia ta scrive un jornal personal, asta la fini de junio me ia ta nota sola triviales, divertis, bromas, sola momentos joiosa, car la vive alora ia es tan fasil e plasente per me e per los.”

“No maljudi acel avenis parente banal. An la istoria grande consiste de cosas dial. Regretable, lo reteni usual sola la fatos triste, como si un cosa vera ta es min vera sola par parteni al tipo felis!”

Lo ia es tarda cuando Pierre ia vade a leto. Denova el ia ave sua reposeria en acel studio con la armario grande de libros, ma a esta ves, no par manca de loca, mera par causas plu pratical. Ance Senioreles Dulong no ia ocupa sua sala sur la nivel prima, ma ia instala se en la nivel de tera, per pote responde plu rapida a batetas posible a la porte xef, e ance per ateni sua sutera sin perde de tempo en caso de ativia bataliante en la vileta.

La note no ia es sin ruido. Cuasi sin interompe soldatos ia vade e veni sur la strada, voses ia forti, cavalos e veculos ia pasa. Ma Pierre, fatigada egal par sua vades zigzagante tra palias basa, plantas spinosa e forestas como par ance tota un serie de emosias diversa, ia adormi pronto. An un pico de sparas de fusiles sirca la madrugada, en alga loca a norde de Vétilly, no ia velia el. Refrescida, bon reposada, el ia pote entra a la dia nova. Lo ia es un soldi. E an tal lo no va es un soldi. No rituo relijial. La campanianes va salva del campos cuanto los pote.

Ja temprana Bertringer ia veni con sua sposo, acel seniora bon Cécile. Los ia trae a Pierre alga vestes limpa de Totor e un gal rostada per la viaja – si! acel diablo Bignol ia reseta la permete de crabes de rio! – e los ia encarga Pierre con multe recomendas a lor fia Lisette. Probable el va trova el ancora en casa, en Mussey. Ta ce el atenta ance contata lor fio Totor. El ia vole enscrive se a la rejimento 69 en Nancy. Sra Bertringer ia ta desira ajunta ance alga pacetas, ma el ia comprende ce esta no es pensable.

An si simple, la scema de Bignol ia conteni an tal plur momentos perilosa per Pierre. El ia debe nonfalinte es en la loca elejeda a lado del rio ja en la dia, e asconde ala per espeta la noti e la ariva de Bignol.

Un complica: en estende direta visina del Seille, on ia ave sola prados tro fasil oservable; no campo de gran entre cui talos alta Pierre ta pote desapare. Tal campos, con sereales ancora no recolieda, ia es plu distante del rio. Los ia es separada del prados del borda par un via ondante campal. La tereno la plu oportun situada ia parteni a Grolbois. Esta om vea, cui fio ia es prendeda de el par la ariva del deutxes, ia aseta volente la proposa de Bertringer ce el va vade con tota sua servores per atende la falxi de acel campo. Grolbois ia descovre sola plu tarda la razona vera de esta ofre.

En la momento ultima, la scema ia fa cuasi un fiasco. En acel matina de soldi, la deutxes ia esije tota cavalos bon. A Bertringer sola du animales vea ia resta. Bertringer ia despera porta tota recolies a casa. On no va pote plu carga plen la veculo. An tal …

Como preorganizada, en la temprana del posmedia, la veculo de Bertringer, con la mestre, mestresa e tota la servores – entre ci, natural, ia es Bignol como xef de mision, e ance Jules la corposa e Augustine, la fem fidosa – ia pasa ante la casa de Sr Dulong. Ance la vea Grolbois ia es con los. El ia senta sur la solo del veculo, con gamas pendente a estra. Los ia vole es cuantiosa, fidante ce tal la gardor del ponte, a pos, cuando la veculo va reveni, no va persepi si algun manca.

Instante Pierre e la tio ia junta se a la grupo movente, sin esita, intera natural. A alga desuples de metres ante la ponte, la via campal ia devia del strada xef e ia verje a sinistra, seguente cuasi paralel la flue del rio. Pos corta on ia ateni, sur la lado sinistra, la campo de Grolbois. Nonpausante, la encargadas e Grolbois ia emprende la falxi. La tio, Bertringer, Pierre e Bignol ia senta se entre la spigas. E Bignol ia comensa la instruis:

“Comprende perce me ia eleje esta campo. A destra, a sola un pico de pasos de asi, un rieta pasa. Lo vade en linia direta al Seille. En esta saison lo es cuasi completa sin acua. Ma sua foso es sufisinte larga e profonda per asconde tu. Tu vide do lo pasa su la via. Mera un tunel peti, basa. Un tipo de tubo. Si, acel buco negra. Ala es tua asconderia. Cuando nos revade con veculo cargada, en esata la momento cuando nos pasa supra acel tunel peti, tu va debe lisca a en. Ui, desapare! Misca, risca, nonvideda, bon dia! U ala tota. Des ia vade per falxi gran; nove reveni con la faxos … Tu va ave tempo, en tua buco, per come de sera. Sola cuando lo deveni oscur, tu va sorti, al otra lado del via, sempre rampente nel foso, asta la rio, ala, do la cuatro salses sta …”

Pierre ia escuta con tota sua atende. El ia es serta ce el va recorda bon tota, asta la detalias la plu pico.

La adio ia debe aveni multe discreta. No presa de manos, no jesti de mano; palpebris apena corajinte a un lado, un surie confidada a la otra, e Pierre ia desapare ja en la tunel peti su la via.

Nunca la tempo ia pasa tan lenta. Multe consiensosa, Pierre ia conforma a la conselas de Bignol. Sua preocupa xef ia es no deveni descovreda. Ma senta o cualce tipo de acrupi no ia es posible. La tubo del tunel no ia es sufisinte alta. El ia pote teni se ala sola en reclina. Per no resta intera sin ativia, el ia comensa cometa del saco cual el ia porta con se. No fasil.

Poi el ia rampe asta la otra fini del tunel peti. Sur ventre, e par esta, nonevitable, el ia susi se, car alga acua restante ia flueta ancora sur la fondo. El no va emerje completa ante la comensa del sera. El ia pasienti longa … e ia pensa a Annemarie, con alga reproxa a se. En la cuatrodes-oto oras pasada, el ia oblida cuasi ela!

Cuando un velo grisin ia comensa covre la ambiente, el ia deside vade furtiva a la cuatro salses, movente longo la foso, en la fondo per redui sua silueta. Ma instante, como un volpeta asustada, el ia repuxa se en la buco. Del dirije del ponte el ia persepi la pasos regular ritmosa de un grupo de soldatos. Sempre plu prosima.

E aora, direta supra el, cuieta ma penetrante, un comanda ia sona: “Abteilung – halt!²³ Sarjento …u…er…,” – Pierre no ia catura la nom – “con tua sesion vos va segue la foso a sinistra de asi asta la graneria ala distante. Dusento o dusento-sincodes metres. Pone ala un posto. Me mesma, con la sesion prima va instala nos en la molin, ala al rio. Tu vide la contorno de lo, en acel dirije, a sincosento metres. Vosa taxe: spara a cualce cosa suspetable. Ma atende bon! La om ci catura crabes per la major va sorti a esta note, per sirca un ora. No fusili el si vos no vole conflita con la major! Si la molin es atacada e si nos debe desocupa lo, vos va debe proteje nosa retira. Vos mesma va resta sur la loca. La compania tre sta reservada pos vos, preparada per contrataca. Si no cosa aveni, nos va regrupi asi, ante lus prima. Sirca la ora cuatro. Comprende?”

“Si, senior teninte!”

E denova comandas, en tonos cuasi xuxada …

“Bon,” – Pierre ia respira, con cor ancora forte batetante – “bon ce me no ia resta nel entra del tunel. Aora tota ta es cisa ja finida.” El ia vide tra la tubo la distanti, longo la foso, de des o dudes siluetas gris con fusiles su la brasos.

Final el ia ateni la cuatro salses. El ia continua rampe asta la plu sinistra. Sua tronco ia aspeta egal fatigada e ruinada como la tre colegas, ma Bignol ia afirma ce lo es completa cava a interna. El va pote fasil asconde. Pierre ia debe entra del lado del rio. Bignol ia dise coreta. Fasil ia es instala se en la tronco vacua. Aora el ia nesesa mera pasienti.

Alga nervosia febrin ia invade el. A plur veses el ia comensa tremeta, nonvolente, a la ruidos del note. Ma aora no era ia es posible. Neta persepable, sempre plu prosima, un plufi suave ia veni, como pasos vadante en la acua. Pos corta el ia reconose Bignol. En sola un xuxa, esta ia dise:

“Nos va debe rapidi. Los ia lasa a me sola un ora. Bon, mea coronel ia merita serta alga crabes. El va ave los. Rapida fada. A ante, me va fisa per tu un corda de gida asi, de un borda al otra. Tu va nesesa fa no plu ca segue lo – tu va trova tu esata sur la via de vada. Acua asta sola la jenos. La note no va es oscur. Tu va debe curvi tan multe como posible, ance rampe, asta ateni la campo de avena. Pasa tra lo. Tua dirije de pasea es la tilia ronda ala, partal a destra sur la colina. Cuando tu sta ala, atende ce la gardor franses no spara temprana. Tu va debe rampe asta la culmina del tereno, poi tu va vide prosima, sur la otra inclina, la mures del semetero. Ala los es. No esita presenta tu. Ala tu va pote clama forte. Tu va es bonvenida.”

Entretempo Bignol ia labora supra sua caje de vim de salse, nonvidable, car su la nivel de acua, ma Bignol ia conose lo perfeta. Pos un momento el ia prosimi a Pierre, ancora prisonida en sua tronco, e ia dona la instruis final:

“Tu va comensa pasea sola cuando tu vide me al ponte. Me va fa alora manobras diversa nel acua per diverje la atende del gardores. No fa un era! Sola cuando me mesma entra al rio, poi ance tu. E curvi, curvi asta sur la acua. No tro fretosa, per no cade. Par paso pos paso. E aora, adio, camerada!”

Ma el ia reveni ja:

“Me veni de pensa de esta. Lo va es usosa, si nos sabe esce tua viaja ia susede. Si la nosas no veni pos corta, ance me va segue par la mesma via. No suposa ce la zuavos va resta con manos en poxes de pantalon en esta gera! Prende esta.” E de sua sesto el ia estrae un tela longa. “Sempre me ave con me esta flanela vea. Un de mea sintures gastada. A veses, cuando crabes de rio manca, me usa lo per atrae ranas. Lo es ancora alga roja. Noncredable como acel animales peti salta a lo. Lia lo sirca tua ventre. Lo firmi la visera. Si tota desbobini se longo nosa scema, solisita al otra lado ala ce los ta pende mea sintur del tilia ronda. Tal me va sabe. Esplica a los ce on ave ancora otras ci vole traversa. Bien! Bon fortuna!”

E ja Bignol ia parti.

Ja longa on ia ave la lus de dia cuando, en la matina seguente, Bignol ia presenta se, joiosa radiante, a Sr Dulong.

“Tota en ordina!” – el ia anunsia en vinse. “Tua joven ia ariva sin asidente nel linias franses.”

Senioreles Dulong ia aseta la informa bon con oios briliante. Ma la tio ia desira un confirma. “Tu es serta de esta? Un petra cade de mea cor.”

“Positiva serta!” – e Bignol ia ginia pico malvolente: “Un rus de Bignol, ancora nonpatentada! Si vos ave oios bon, vade aora per regarda la tilia ronda sur la Colina del Lupos, prosima a Vétilly.”

Acel punto, conoseda en la rejion, ia es fasil trovable del jardin de Sr Dulong. Sin pausa, el ia vade. En fato. On ia distingui multe neta. A la estrema de un ramo, apena ondetante, alga tipo de cosa larga ia pende, como un sinta. Bignol ia saborea sua susede. “Lo es la sinia acordada!”

“Bignol, tu es un person diablin. Veni! Judi esce mea blanca es sufisinte fresca!” E la tio ia trae del sutera un botela famosa, covreda con polvo e redes de arania, e esta, en un botela de vino, es sempre un atesta de respetablia alta.

La sinia sur la tilia ia es vidable tra tota la dia.

En la note de 10 a 11 de agosto, alga pos medianote, la abitores de Autrecourt ia es arancada de dormi e sonia par sparas enerjiosa e longa continuante, no distante. Del dirije de Vétilly. Totas ia leva de leto. Rapida los ia vesti se e ia escuta con oreas tensada, preparada per asconde en la suteras o per core a via, si nesesada. Pos un duiora la sparas ia sesa.

La dia nova ia anunsia se. Pos corta la viletanes ia pote vade a sua laboras. Cuieta los ia intercambia suposas sur la causas posible e la resulta probable del sparas noturna. Sirca mediadia on ia descovre ce un ploton deutx ia reveni en esta matina de un patrulia traversante, con du persones mor e cuatro feridas. Ja plu temprana Sr Dulong ia nota ce la tilia ronda sur la Colina del Lupos aspeta como usual, sin sinta. Acel no ia pare un cosa estracomun.

En la mesma posmedia, alga del patruliores noturna ia presenta se con orgulo soldatin ante sua xef de batalion. Los ia ave la trofeo, la banda longa de flanela roja concistada en la note a la tilia en la tera de nun. La major ia vide apena lo, e ja el ia furia: “Do es acel caturor de crabes? Veni el instante!”

Pos du minutos, Bignol ia sta ante el. La major ia estende la sintur roja tan prosima su sua nas ce Bignol ia cade a retro par du pasos. E la major ia cria: “Ça à vous! – Esta es tua!”

Bignol, no comprendente la situa, no ia esita: “Mea, si. Me ia es un soldato con la zuavos; on ave un tradision —”

Ma la major no ia escuta plu. Turnante a la scuadron, ci ia rijidi ante el, el ia deside: “Esta om es perilosa. Abführen! Erschiessen!²⁴”

“Zu Befehl, Herr Major!²⁵”

Oto soldatos en soma, con fusiles sur spalas, e con los un ofisior, ia gida Bignol a via. Los ia sta el contra la mur esterna, pos la cultiveria de Bertringer. Un comanda corta. Un ruido macinal del omes automata.

“Spara!”

La armas ia clica. Seca. Bignol ia cade.

On ia entera el sur la loca. Sin retarda.