Capitol 23
“Aora, Senioreta Odette, me crede ce nos pote pone la punto final. Lo ia es plu fasil fada ca me ia suposa. Dumoulin es natural deletada. Un torta tan bon cade a sua plato! Ja organizada. El va atende tota, con tua aida, natural. Tu no va perde tua posto. Me ia sede ance tu! E aora me va dita a tu mea atesta final. No aspeta tan stonada. Atesta final? Si, lo es alga tal cosa. Scrive, per favore … Poi tu va tape un stensil per reprodui lo e va envia un copia a cada nom en nosa libro de adirijes. En forma de letera jeneral. Tal, donce:
Asnières, 4 setembre 1939
A mea clientes respetada.
Senioreles,
Me regrete informa vos, ce par causa de la movabli jeneral resente cual clama ance me denova a la armada, me debe sesa mea ativia profesal, ja de oji.
Desirante ce la interesas de mea clientes va es plu atendeda con consiensa e capasia masima, me ia fa un acorda spesial con un colega, onorable conoseda en nosa site, per dise:
Sr René Dumoulin
ajente de asecura
67 Rue Mourillon
Asnières
Sr Dumoulin ci, par sua eda, va resta en la vive sivil, es preparada a tota momentos per studia con vos tota vosa problemes de asecura e consela a vos la solve la plu conveninte. Me solisita ce vos trae a el la fida cual vos ia dona tan bonvolente a me.
Grasiante vos per acel vosa fida asta aora, e esperante ce pos corta nos va pote continua nosa relatas plasente, me presenta a vos mea salutas la plu respetosa.
Pierre Touchard
Grasias, Senioreta Odette! A, si! Un plu cosa. No oblida prepara un avisa peti per fisa ancora oji sur la porte esterna. Del tipo:
Cluida par causa de la movabli. Pf. consulta Sr Dumoulin …
e tal continuante. Tu mesma sabe bien.”
Pierre Touchard ia retira se a la sala visina, spesial reservada a el. Sua studio. El ia vole aora ordina ance sua propre cosas. Doman el va debe presenta se en Châlons-sur-Marne, do Capitan Touchard del reservadas va reseta probable la potia de comanda supra alga compania de infantria. Sua uniforma e tota ajuntadas es ja preparada tra alga dias. A la min esta gera no es como la otra, en 1914. A esta ves, on ia vide la prosimi. E an tal, on no ia vole crede!
Cuasi, el es ja no plu un sivil. Un plu note. E poi? Esta studio, esta emprende de asecura, creada par el, developada par el, aora final florinte, ja tota de esta parteni plu a el mera par nom. Doman, o en la dia seguente, Dumoulin va transporta tota documentos a sua propre ofisia …
Ma aora la tempo urje. El debe ordina sua caxetas privata. Noncredable, cuanto paperes ia cumula. Notas vea de reseta; anunsias ja longa noninteresante; cartas postal de amis en vacanse, cartas de visita; e leteras, leteras. Perce el conserva eterna tal balasto emosiosa? El va limpi sever! Ja la bocon grande del sesto de dejeta es avida per pajes trinxada.
La scrive de Henri Merle, no? Si! “Aurillac … 1927”! Perce nos ia coresponde cuasi no plu pos acel epoca? El anunsia la nase de sua fio du. U ala un bebe ci ave aora des-du anios. Nosa vias ia separa. Separante nos. Donce! Trinxada! Si me comensa releje tota, me va fini nunca.
Desidosa, sua ditos labora, trinxa. Folias de data fresca, folias jalida a la bordas, egal, tota pasa en serie entre ditos sin compatia. A veses un parola, acaso videda, atrae sua regarda con la ososia nonesperante de un condenada ci ancora en la momento ultima atenta influe la esecutor a favore. Trx … trx … sin interompe. Asi es la mentis ros de un Simone “ci ama tu per sempre …” A la sesto!
Ma no esta! No! El va conserva esta. Un letera de sua madre. Un letera scriveda de sur sua leto de maladia, en leteras tremante. “Autrecourt, 8 agosto 1934. Mea fio cara, esta es mea letera final. Me no ave plu fortia …” Pos des dias, el ia mori, en Autrecourt, do pos la jubila de Sr Touchard, la sposes ia compra en 1928 la casa de Sr Dulong. En acel epoca la casa ia es per vende. Sr Dulong, la tio bon, ia mori ja a un anio a ante, a ses menses pos sua sposa. Louis Touchard, sempre un veterinar en Mussey, ia consela acel compra a sua jenitores. En esta modo, los va es plu prosima a el e en la rejion de nase del madre a la mesma tempo. Tra ses anios, Sra Touchard ia abita la casa comfortosa en Autrecourt e ia saborea comun la joias del ava con sua netes Alain e Georgette, fies del veterinar. Tempos pasada.
U asi los! En Pierre sentis, franca nunca silentida, ia retumulta instante. Esce el va destrui ance esta leteras? Perce el ta conserva plu los? Un episodio dolosa en sua vive. La naufraga de sua ama. Sola du leteras. Plu coreta diseda, sola un, car bien la prima ia es scriveda par el mesma, sin esita, cuando, pos la contrata de pas de Versailles, la posta ia funsiona denova entre Frans e Deutxland.
Asi es la envelopa, adirijeda par el, a Senioreta Annemarie Balkenwirth, Hohenstaufen Strasse 118, Berlin-Schöneberg. En loca del responde espetada, tan longa soniada, la sola cosa cual ia reveni ia es sua propre letera con informa seca, un marca del ofisia de posta: “Person nonconoseda. No Annemarie Balkenwirth a numero 118.” Un judi jelin.
Ma el ia debe retrova ela, ia anela retrova ela. Tra la gera intera, en fosos fria, su bombardas de artileria enemin, tra la miserias de atacas en matinas gris, sola la imaje de ela ia suporta sua coraje, sua vole de vive. Direta el ia scrive a Sra Geist, su la escusa conveninte de solisita sur la familia. Como los ia pasa la gera? E cua Hugo fa? E Lotte? E esce on ave novas sur la Cuatrofolia? Esce los sabe cualce de Hedwig? De acel Trudchen Bachmann suriente? El espera reseta pronto sola novas bon …
… Hugo, nosa fio amada, ia cade sur la campos de batalia polsce, ja en agosto 1915 … Lotte ia sposi en 1918. El abita aora en Leipzig. Vati ia vei multe, ma ancora el labora en Nordstern;. La tempos es tan difisil … Hedi ia resta con sua jenitores nel boteca del tortor. Trudchen ia deveni un ofisior de banco nel Berliner Kreditbank. De Annemarie Balkenwirth on ia oia no plu. El ia sposi Erich von Bastrow ja en 1914. A alga tempo plu tarda, Bastrow ia mori par feri militar. De alora on sabe no plu … Nos vive en conforma con la situa nonfelis …
Pierre ia sufri tan multe en acel epoca! Annemarie – vera la sposa de Erich Bastrow! El no ia pote crede esta. Ela, ci ia promete, en acel dia de separa, en la atrio del stasion Potsdamer: “Cua tu suposa, Pierre? Me va espeta tu!” Ela no ia espeta longa. An no cuatro menses! En momentos de despera, cuando el ia es consumada par la tormenta de esta senti burlante de enganadia, el ia vole cuasi aplica a Annemarie la declara mentinte del propaganda en la gera: La deutxes? Cadun es un enganor rusosa, un trador capas! E an tal, Pierre ia refusa crede … El ia nega con testa e ia resta sin comprende …
Pierre ia persepi la vose de sua secretor en la sala visina: “Un momento, per favore; me no sabe esce Sr Touchard es ancora nel ofisia.” Ja la fem joven ia sta en la porte:
“On ave un Senior Merle ci desira parla a tu. Me ta dirije el a tua telefon?”
“Cua? Henri Merle? Serta! Reta!”
“Cisa Henri, me no ia oia la nom prima.”
“Dirije el sin pausa!” – e Pierre ia prende sua aparato: “Alo! Alo! Si! … Tu, Henri! Alo, mea vea! … Si … Si? … Serta! … De do tu telef… A casa de Jacques Archet? … Ma me es bien nel libro de telefon! … Vera, si, no su mea nom … Tu no ia pote sabe esta … Assurances pour tous!1 Mea compania! … Bon, me va raconta … Asoluta! Un idea eselente! … Si, me va es libre … Cisa anca Marcel Weiller. Archet ave serta la numero … Si, on recomensa – un cosa asurda … Bon, la loca de Mollard … Natural me conose, a fas del stasion Santa Lazare. Al ora sete, acordada. Ha, mea vea, tan surprendente! … On ia nesesa un gera per rejunta nos. E tua familia? … Lodas! … Bon, asta plu tarda! … Si, serta me va es ala! Txau!”
Serta el ia es ala! El ia es la prima ci ariva.
En la restorante Mollard, en acel parte fronte destinada a la plaseres de aperitivos, on ia ave multe ruido. Plu ca usual. Frans e England ia veni de declara gera a Deutxland. Ja on ia batalia. Ja la soldatos deutx ia invade Polsca, de do los ia anunsia vinses pos vinses. Aora un stimula ia vibra en la voses del asembladas; un ansia ia trema de multe oios. Sur cuasi tota fases, entre acel publica solida burjes, on ia leje un plieta de preocupa. Un senior suinte, a un table prosima, no ia asconde la ojeto xef de sua consernas:
“Vos va vide, la asiones va craci! Nonevitable, mea cara! Pos la movabli, brasos va manca del industria. La produi va stania. La tasos de intercambia va es nontolerable. Nonevitable, mea cara!”
“Perce nonevitable? La reversa!” – un otra ia oposa. “Tota fonderias de aser va reseta comandas como nunca a ante. Del armada. E cuando lo pertine al armada, on trova brasos. Si nesesada, nos va prende los de Deutxland! Escuta, si me pote dona a tu un consela, vende la revenu del stato e compra, a cualce custa, asiones de Creusot, de Homécourt, de tota minerias de fero, de fonderias de aser! Tu va vide, lo va vade bon! Crede me!”
Ja Pierre ia leva se. El ia vade per encontra Jacques Archet e Henri Merle, ci veni de ariva. Merle ia porta ja sua uniforma de capitan.
“Ha, mea vea! Un tal encontra!” E, amin e resonante, manos ia colpa dorsos resiproca. “Serta me ia ta reconose tu sin esita, an si Archet no ta acompania tu. Sempre la mesma, acel Merle vea! Alo, Jacques! Ance tu me no ia vide tra longa. Lo vade bon? Ma Henri, raconta, raconta. Cua tu ia deveni?”
“E tu, Pierre? Tro stupida ce tra tempo tan longa nos no ia coresponde plu …! Per me …” – Merle ia responde aora a la regarda demandante de un servor diniosa – “per me … un Pernod! Un ves no es un abitua! Si, donce trae Pernod per cadun! Amis vea no encontra lunlotra a cada dia!”
Pos alga tempo ance Marcel Weiller ia ariva, con dorso curva, un oculo grande e un barba ja partal gris. An con estas, ance el: “sempre la mesma!”
“No, no, no!” – Weiller ia protesta a la servor. “Tota nonposible! No Pernod per me. Me ave un figato, o – plu coreta diseda – la figato ave me. Dona a me un cuatri de acua de Vichy!” – Sempre la mesma …
La cuatro cameradas pasada no ia es fatigada par repete sempre denova, pos lunlotra: “U la plaser de retrova nos en junta pos tan multe anios!” An Archet e Weiller, an si abitante en Paris mesma, e Pierre, de un suburbe vera prosima, no ia pote recorda lor encontra mutua la plu resente. La vive ia separa los. La vive, lor profesas, lor familias, la situa.
Jacques Archet, aora un dirijor en un sucompania cuartal de Crédit Lyonnais, ia ave un sposa e du enfantes. Weiller, asta sua colo en taxes de ajente de asiones, con “plu labora ca sempre. Mea padre ia vei; apena el veni ancora al ofisia de ves a ves …” – Weiller ave un sposa e cuatro fias – “tota de esta es un monopolio! Me regrete ce me no pote resta per come de sera con vos. Me mesma ave invitadas a casa.”
Egal per Jacques Archet: “Ance me no pote. Poca tempo resta a me. Par causa de mea funsionas nel banco me no va es movablida ja doman, ma serta pos un pico de dias. Mea sposa no ta comprende si oji me no …”
… E esce algun ave novas del cameradas de clase pasada? “Vos recorda acel sera canibal a Ginette? Nos ia rie bon!” – “Acel Duriz joiosa! Duriz, la turbosa! La bonom compatiable! El ia resta sur un campo de batalia, en alga loca prosima a Verdun. Ance Corbeau ia reveni nunca. Malfortuna. El ia cade a poca dias ante la fini del gera. En Santa Mihiel.” – “Tissier? El es la impostor xef en un buco provinsal. Me ia encontra el a un ves sur la bolevares. Sirca 1929. En acel epoca el ia es completa ocupada sur la formales de sua divorsa.” – “E Podo? Étienne Podowski? El es un vendor major – datilas, figas, oranias – en alga parte de Maroco.”
La tema ia es consumada. A tal grado la cuatro cameradas del anios de liseo ia deveni entre se stranjeres ce ja los ia pote plu suporta la conversa coxeante sola par parletas banal del momento. Los ia es no plu capas de intercambia pesos amin de sua propre vive, comparti sua secretas, como a ves pasada.
“Bon, cameradas cara, me joia multe ce me ia ave la posible de revide vos!”
Ance esta ia sona falsa. Los ta debe dise: seniores cameradas!
Henri Merle e Pierre Touchard ia resta solitar.
“Nos no va come asi,” – Pierre ia proposa – “lo es tro ruidosa. Me conose un restorante peti, a distantia de sola un pico de pasos, nel strada Castelanne. Ala nos va senta plu intima.”
A estra, la sena de strada ia es ja no plu la usual. La site ia es apena luminada. La peril de atacas de aira no ia es nonposible. La figures felis anunsiante sur balcones e tetos, acel miracles colorosa de eletrica, ia resta muda. Cortinas spesa, de stofa negra, ia prisoni a interna del caferias la abunda jenerosa de fontes de lus desirante sorti. Sur la strada, la pasores ia aspeta curvida su cargas de consernas. Ja alga motoristes, per conforma a un comanda resente del polisia, ia manxa la vitros de tota lampas par un pinta blu cual ia depone sur la sena la nota funeral de un velo de crespe. Asi e ala, vendores de jornales, per reenerji sua comersia, ia anunsia pos la numero final un numero ancora plu final, con titulos ancora plu dramosa.
“Mea vea,” – Henri Merle ia comensa – “me no sabe como esta va fini, ma on vide fasil ce la cor manca en tota de lo. No zelo. On vade, si, ma on vade como si a un taxe noiante. An no un sinia de odia es mostrada. On no pote fa un gera bon sin odia sinsera! A esta posmedia, nel strada Duphot, me ia pasa la boteca de un floriste. Sur la porte me ia leje en leteras grande man spricht deutsch.2 Completa casual. Nun ia protesta. Nun ia regarda an! Tu pote imajina un cosa simil en 1914? Ja ante la declara de gera, la boteca e la floriste ia ta es destruida! Comprende bon me; me no desira revide la senas pasionosa de acel epoca, ma esta mostra ce nos no es matur per vade a gera contra Deutxland.”
“Esce tu crede ce la deutxes a sua lado—”
“Si! Los ia arde al min un odia grande, contra la iudis. E los ia proclama multe desidosa: Si tu es contra Hitler, tu es un ami del iudis e mesma un iudi; donce: tu va es eliminada! Tal es serta lor sentis a nos. Los ave un flama, nos no …”
“Tu dise coreta. Lo pare ce esta gera per nos es no cosa otra ca sola la reali nonevitable de debes contratal.”
“Lo es tal,” – Henri Merle ia acorda – “ma multes no vole identifia se con la suscrivores del contratas. Tan multe de mea propre conosedas jogla ja sua relatas en tota sferas, political o manejal, per serti a se un posto favorente distante del fronte! Tan diferente de 1914! Tu recorda la flami patriota en tota clases de sosia? Tota jovenes, la omes sana, sin eseta, ia invade la casernas per deveni soldatos!”
“Me sabe, e me no va oblida lo. Cuando me ia ariva en Paris, final, nel dia 12 de agosto, tu ia es ja enscriveda nel caserna Clignancourt. Pos du dias me ia es con tu, nel rejimento 76 de infantria … Ancora me revide nosa sarjento, el con la nom strana … Miraboir! E acel pantalones roja, taliada per jigantes …!”
La du amis ia senta en un peti angulo comfortosa en “La Molinor Bela”. Un sala plasente, no grande, mobilida en stilo campanial, con calderones de cupre sur la mures; un nix larga de ximine con onca de coce supra blocos de lenio (felis no ardente en esta note calda) e, sur la culmina, sur un serie de scafales, acel portacandelas, vasos peti, un molin de cafe e otra utiles del bon epoca vea; la fenetras, peti par intende, ia es covreda par cortinas de cretona con acel motifes egal de cuadros roja-blanca, como en cosinas de vileta. Tota de esta ia dona a clientes la impresa ce los senta no en la sentro de Paris, ma en un taverna de campania distante. En soma on ia ave sola oto tables peti, tota ocupada, ma en no loca la conversa ia sona tro forte.
“Si nos considera,” – Pierre ia dise – “nos debe confesa ce nos ia es fortunosa. Tra la gera intera, cuasi sin interompe, nos ia resta juntada, asta acel dia cuando tu ia reseta la xrapnel en tua spala.”
“17 janero 1918. A lado de Villers-au-Bois. Alga datas on no oblida. Ma ta ce nos lasa la gera. Probable pos breve nos va reseta un monton nova de lo.”
“En fato,” – Pierre ia pensa subita de esta – “en fato, a do on clama tu aora? Me mesma va presenta me doman en Châlons-sur-Marne, caserna Forgeot. E tu?”
“Forteria Queuleu, prosima a Metz.”
“Henri, ta ce nos no reperde contata! Informa me sur tua loca de abita. Scrive al adirije de mea padre en Autrecourt.”
“Acordada. Cisa nos va pote encontra lunlotra. Ma aora raconta a me sur tua vive nel anios resente. Tua leteras, en sua tempo, ia es sempre tro resomante. Cuando me ia parti de Paris con mea jenitores, direta pos mea desmovabli, tu ia es esitante recontinua tua studias. Donce aora comensa a la comensa.”
“Bon, tu sabe bien ce me no ia ave, como tu, la coraje de recomensa aprende e prepara esaminas per deveni, como tu, un profesor major.”
“Per favore, no burla un profesor minor de liseo provinsal.”
“Me ia deveni un ofisior en un Asosia de Asecura. En Protection Universelle. Perce bien un departe de asecura? Me ia consensi sur acel sola a pos. En sua tempo, en Berlin, mea ospitor ia es un tipo de xef en alga Nordstern, si, asecura. Credable esta ia influe mea orienta cuando me ia xerca un situa nel sosia. Cuando un ami de mea padre ia parla de Protection Universelle, me ia segue direta sua consela. La labora ia es noiante. Pedantia statistical con multe burocratia. Ma me ia comprende ce acel carera ave ance otra lados plu vivosa. Me ia aseta ocupa me sur atrae de clientes, con susedes no mal. Alora me ia deside crea mesma un instituida, bon, natural en relatas perdurante con la companias grande de asecura, ma nondependente de los, an tal. Me ia instala mea emprende, Assurances pour Tous, en Asnières, pico e pico ia gania un colie vasta de clientes e ia es orgulosa de un conserna florinte asta oji, cuando Sr Hitler ia clama me. Op!”
“A la min ancora no cosa es perdeda. En cualce caso me loda tu. Tu ia ata plu saja ca me. Ma esce tu ia pensa nunca a sposi? Cisa me es nondiscreta? Pardona!”
“Tota no nondiscreta! Un ami vea pote fa un tal demanda a un person ja 44-an. Si, a veses me ia pensa, ma nunca con multe zelo. Lo pare ce me parteni al categoria de acel persones de cor peti ci es capas de ama a sola un ves en sua vive intera!”
“Vera! Tu ia ave bien un prometeda en Berlin! Tan comun tu ia raconta a me sur acel xica encantante, ala nel fosos! Tu ia retrova el nunca?”
“Cua me ta fa? Me ia informa tu a acel tempo bien ce, direta pos la contrata de pas, me ia envia un letera a el e ce la letera ia reveni. Resetor nonconoseda!”
“Tal! Aora me recorda.”
“Bon, me ia retrova acel letera en un caxeta, oji, en fato … A pos, me ia veni a sabe ce el ia sposi …”
“Ai! Acel es mal!”
“Plu ca tu imajina. Me ia veni a sabe ance ce sua sposo – en Berlin el ia es mea camerada, no la favoreda – ia mori par causa de un feri militar a alga tempo pos la sposi.”
“Donce el no ia ave tua adirije? Perce el no ia scrive?”
“Me no es serta ce el ia ave lo. Si, el ia pote solisita lo en casa de Geist. Ma per scrive a me cua? Ce el ia sposi? Perce el ta es ancora interesada a me? Me suposa ce el no ia resta vidua … Un xica strana el ia es … Me ia ama multe el …”
“Me comprende ce la informa sur sua sposi —”
“Si, ia feri me profonda. Alora alga cosa ia es trinxada en me e, franca, ia sicatrisi nunca.”
“Cisa tu ia era espetante el.”
“Cisa. Ma tal cosas no licuidi par un deside simple.”
“Strana ce nunca tu ia es interesada a un otra fem.”
“Ta ce nos no esajera. Me no ia vive como asceta e eremita. E me es ance no de lenio. Ance me ia fa un pico de aventuras, a un ves an a grado alga seria con un Simone. Ma me ia pote nunca libri total del imaje de Annemarie. Cuando me ia descovre ce Simone ia engana me par un otra de sua amirores, me ia es cuasi contente. Ma bastante sur me! Aora me espeta la raconta de tua vive.”
Ja longa la du amis ia es la clientes ultima e sola de “La Molinor Bela” cuando Merle ia conclui sua reporta: “U ala, mea cara, la istoria completa de Profesor Merle, liseo de Aurillac, capital de Cantal. Aora lo ia tardi. Nos ta vade a nosa letos.”