Capitol 29
Ja la letera prima de Gérard Bourrié resetada en Ribérac par Pierre Touchard ia auguri mal. A un dia pos sua parti de Marseille, la polisia ia veni per prende la valis de Annemarie e ia informa la posesor del otel ce el va pote dispone la sala de Sra Bastrow. Ela no va reveni.
A pos, Gérard Bourrié ia debe reporta ce tra alga tempo la seniora ia es en la prison Baumettes en Marseille, malfamosa conoseda como un entra a la enferno del Gestapo. E a comensa de junio, Pierre ia descovre ce, longo informas fidable donada par un membro de la resistente en la polisia franses, Sra Bastrow ia trova se, a oto dias pasada, con cuatrodes otra persones, en un vagon de animales selida e securida cual ia viaja probable en dirije a Drancy o Compiègne. Esta vilas ia es conoseda como sentros de asembla del Gestapo. Pierre ia sabe ance esta.
Ancora el no ia sede a despera. Ancora el ia coresponde regular con Gérard Bourrié e ia urje esta a investiga plu. La avocato ativa ia ave bon relatas en multe partes del promove resistente. Cisa el va pote descovre alga cosa.
Alora lo ia aveni ce, en loca del responde espetada de Bourrié, Pierre ia reseta de Sr Adoux un letera corta de cui referes sibilin – comun en la stilo de coresponde de acel epoca – el ia comprende ce Gérard Bourrié ia es arestada par la Gestapo a sola un pico de dias pasada e ce on ave no plu sabes sur el.
A Pierre la sola posible ia es pasienti per la fini del gera. Asta alora el va pote fa no paso usosa per retrova Annemarie. Con plu zelo ca a cualce tempo presedente, el ia dedica se a sua taxes dial. Direta pos sua ariva en Ribérac e con grasias a sua relatas amin con la familia Mazotte, el ia es introduida su teto de Senioreles Montilleul, cultivores en la ambiente. Lor propria ia es situada a media de pastos vasta e campos cultivada, entre forestas. Ala Pierre ia desapare nontrasable de tota rejistras ofisial. El ia nesesa no plu biletas e no plu cartas, car la sposes Montilleul ia produi nurintes sufisinte per pote renunsia tota complicas e nonoportunes manejal. An tabaco, como ance vino, la vea rusosa Montilleul ia ave bastante par causa de un comersia peti de intercambias. “Me trae ovos, tu dona tabaco.” Franca, el ia crese bien en sua propre jardin ance alga folias de tabaco, ma sola per defia la impostores ci ia proibi tal produidas secreta estra la monopolio del stato. Per sua consuma personal. Montilleul ia prefere sempre tabaco prosededa en modo plu spesialiste capas en la fabricerias statal.
Ajuntada, la joias la plu bela de Senioreles Montilleul ia es cuando los ia pote engana la “verifiores economial” creada par la governa en Vichy. Sin depende de la astutia suposada de esta verifiores, los ia susede nunca sabe con presisia an mera aprosima cuanto porcos, oveas e bovetas parteni a la rusosa mestrin. Natural, Montilleul ia trae bien regular tota nesesadas a la mercato negra, longo la tasos multe interesante del momento. Per pardona a se ganias de mone cual el mesma ia regarda como tro fasil otenida, el ia furni al grupos resistente del rejion intera, a custas basa o an sin custa, vejetales, carne, bur e xef alga cesos, multe longa conservable e spesial preparada per la Maquis-anes.
Pierre ia colabora cuanto el ia pote. El ia porta con se multe bonvole. Nunca a ante el ia suspeta ce on pote prende tan multe contentia de labora par sua manos. Cisa la situa de alora ia velia en el talentos sola embrial lasada a el par avos e asendentes.