Capitol 8

La graduadas nova del liseo Condorcet, en Paris, ia susede nunca profita de acel promete fada en la dias ardente del periodo de prepara, e renovida a tan multe veses: “Direta pos la esaminas, nos va reuni per pasa juntada un de tal notes sur cual on va parla per multe anios!” A tan multe veses, cuando los ia labora supra taxes rompente la testa e eserses stresante la nervos, a tan multe veses cadun de los ia jura a se: “Ha! Si me va susede, u la orjia pos la batalia! On va organiza un agape en Marguery tal ce lo va trema la petras vea del Porton Santa Denis!”

Perce en Marguery, presisa? En acel epoca lo ia es un del restorantes la plu conoseda. Lo ia trova se sur la parte media del bolevares grande, a sentro del site, e lo ia dispone un serie intera de salones, saletas e lojias. Sua cosini ia es famosa. Bon familias burjes ia asembla en Marguery a ves de sposis, eucaristias prima, festas de batiza. Comersistes ia ajendi un encontra en Marguery per discute sua negosias; amores ia proteje sua ama vergoniosa en un cambra peti de Marguery. Un banceta en Marguery, un selebra en Marguery, un pico de orjia en Marguery ia deveni espresas clixe en tota conversas. Donce nonsurprendente si la idea de selebra, pos nase en la testas del liseanes, ia cristali del comensa sirca la nom conoseda.

Lo va es tan desfrenida! Algas no ia esita declara ce alora, pos medianote, con venta en la velas, on va peregrina en colona compata tra Montmartre, e – avansa, camerada! – a nos la femes joven ci fumi e nidi en seda! La plu avidas ia promete resta juntada asta fatiga total, an si la festa va dura oto dias e notes! Si!

E asi es lo cual ia aveni. Direta pos la parte final del esaminas, ja ante publici e posta del resultas, algas ia parti ja de Paris per acompania sua familias a la campania o la borda de mar. Los ci ia resta en la site ia espeta futil un reuni del cameradas, e pos corta ia debe aseta ce los ia perde entre se la contata. Futil, la plu ostinosas ia vade a plur veses asta la porte del liseo, cluida de aora. Lo ia pare ce la otras no ave la mesma idea o ce los ia vade a otra oras. Sola aora cadun ia persepi ce, ante la sperde grande, los ia oblida acorda un data fisada e un loca serta de encontra. Alora, cuando on ia ave ancora tempo, cadun de los ia fida nondemandante la capasia organizal de alga On misteriosa ci va rejunta tota de los a la momento bon. Ma do aora on ta trova esta On?

Cuando Pierre Touchard, pos la festa sposal en Autrecourt, ia reveni a Paris, en la abiteria de sua jenitores en la suburbe Poissonnière, un letera de Henri Merle ia espeta. Henri Merle e Pierre Touchard ia es tra la sinco anios pasada cameradas de clase e amis bon.

“Tro stupida” – Henri Merle ia scrive – “ce nos encontra nos no plu. Nosa prometes bela de festa e banceta – a do los ia sofla? Me sabe sur al min un desuple de nos ci ia parti ja de Paris sin dise. Pos un pico de dias, nel prima de setembre, Jacques Archet, nosa filo de fero longa, va deveni un ofisior de banco. A Crédit Lyonnais. Alora tu va pote core per retrova el. Me veni de encontra Tissier, sur la bolevares, natural! Ala nosa dandi ias en sua elemento, no? Bon, Archet, Tissier e me opina ce nos deta a nosa reputa un reali la plu completa de nosa juras santa. Donce nos proposa un Sera Devorante cual va estende asta la matina! La mestresa de tua casa ia afirma ce tu va reveni en esta mercurdi. Tal nos espera firma vide tu entre nos en saturdi seguente. La loca: 138 strada de Aboukir. A dui pos sete. Lo es un peti restorante simple, ma simpatiosa, tu va vide. Me scrive ance a Corbeau, a Podowski, a Rivière, de ci me ia retrova lor adirijes. Tu ave otras? Lo ta es bon si ance Duriz ta pote veni; el es un farsor joiosa. Responde instante, an si sola con parola corta, per confirma tua partisipa …”

La proposa no ia desplase Pierre, ma ante responde acordante a Henri Merle, el ia nesesa argumenta multe con sua jenitores, ci no ia comprende la usosia de un tal consenta del note intera. Sin pausa la padre ia cexeta: “Strada de Aboukir?! No la cuartal la plu recomendable!”

Ma on no pote continua no sede a la solisita de un graduada fresca del forno. En la mesma dia, Pierre ia scrive a Henri Merle: “Multe serta: ajunta ance me al conta.”

Ci ia descovre acel peti restorante modesta en la strada de Aboukir? Lo ia es Jacques Archet, o – plu esata – sua padre.

Cuando on nesesa la acorda del jenitores per resta estra la casa tra un parte bon del note, e la contribui finansial del jenitores per covre la spendes espetable, plu saja es el ci parla franca. Sr Archet, padre, ia escuta con orea favorente. Vera el ia es orgulosa del susede resente de sua fio e contente ce pos corta esta va pote gania alga mone como caxor en un banco grande. Lo es un cosa intera normal ce, cuando seniores joven entra a la vive, los marca bon la ateni. Ma, cuando Jacques ia parla sur un banceta en Marguery – cua? la restorante prestijiosa sur la bolevares grande? – la padre ia interompe direta:

“Vos es loco! … Esta es snobia fol! Lo va custa a vos asta la fondo de vosa reservas, e vos va come no plu bon e no plu sasiante ca en un de acel ospiterias cuieta cual, par diablo, no manca en Paris. Nunca me ia diverti plu ca cuando, con la colegas, nos ia regala nosa xef a sua anio sincodes. Un boteca peti en un stradeta pos la Stasion Norde. Triste ce lo no esiste plu. Ma vide! Acel vea Drouin en Bergeries – tu conose el, no? El ci pone feros al cavalos de tua avo – el ia dise a me, a ves ja de nosa visita la plu resente al avo, ce sua fia …”

“Si,” – aora Sra Archet ia ajunta se – “sua nom es Ginette. Me ia fa la eucaristia prima con sua tia. Los es persones bonelevada.”

“Bon,” – Sr Archet, padre, ia pote continua – “bon, esta Ginette ave un ospiteria nel strada de Aboukir, e on dise ce el es contente sur lo. E el es tan plu meritante car el ia resta solitar. Sua sposo ia mori a du o tre anios pasada. Vade ala. Serta el va trata bon vosa partito si vos dise ci vos es.”

E la madre ia declara ancora: “Persones onesta e asidua. En Bergeries cadun respeta la familia de Sr Drouin.”

“Acordada.” – Jacques ia conclui, alga stonada ce la projeta de festa e banceta ia encontra min ostaculos ca el ia teme. “Me va parla sur esta con Henri Merle. A cual numero del strada de Aboukir?”

La madre ia leva sua spalas. “Me no sabe. Ma me pote scrive a tua tio Victor. El va prende informas del vea Drouin. Car tua tio ia anunsia ce el va ariva en Paris a soldi veninte, ante mediadia.”

“Tro tarda!” – Jacques ia regrete. “Nos va reuni ja en saturdi. A pos, nos no va pote fa encontras tan fasil.”

Ma la padre ia opina: “On no ave multe restorantes en acel strada. Plu, como Drouin ia dise a me, lo es en la parte prosima al Porton Santa Denis, per dise cuasi al bolevares grande, ma la custas va es otra ca en tua Marguery!” A esta, Sra Archet ia desira contribui ancora un presisi: “La sposo de acel Ginette ias nomida Meunier o Munier o simil. Ela mesma, si me recorda coreta, es un person pico corposa, como sua madre, con capeles blonde rojin.”

Ja en la dia seguente, Jacques Archet e Henri Merle ia vade per vide e esplora. Identifia la loca no ia es difisil. Del strada lo ia aspeta como un boteca. Tota sua largia ia porta un xapo de leteras palida – Buvette-Restorante – e a ambos lados del porte streta, vitrida en sua parte plu alta, ia es fenetrones, evidente reposante del labora, car cortinas sever, no plu intera blanca, serta nondiafana, ance contra la porte mem, ia preveni regarda a la interna, estra si un person curiosa ta es sufisinte grande per un videta secreta supra la cortinas. La jovenes no ia nesesa fa esta. Vera no duta ia resta. Sur la porte, como un invita discreta, on ia leje “Chez Ginette” scriveda en leteras jala, de data plu fresca. Henri Merle, segueda par sua filo de fero acompaniante, ia entra con impresa de un peti titila strana e anonim.

E cuando los ia sorti, a tema del trova, los ia es, plu ca mera contente, vera zelosa.

“Mea vea!” – Henri Merle ia joia – “nos ia colpa la blanco. Esata la taverna cual nos nesesa. Plu, acel fem no es desplasente. Al min, el es comprendosa. Bon ce tu no ia dise tua nom; nos va es multe plu libre. Si on misca la familia nel cosa, on fini nunca plu.”

Plu, los ia nesesa en no modo un recomenda spesial. La compania ia ave un prinsipe: Si cualcun traversa la limina de esta taverna-restorante, on regarda el como un ami. Sra Ginette, gustable corposa, pico ronda, ia es instante familiar: “Bon, mea conetas, cua me ta versa per vos?”

Plu ca sua silueta modosa – plen a supra, plen a su, ma en dirijes oposada, tal ce la un ia compensa la otra, conservante a tota un ecuilibra estetical – sua autoria moderada ia impresa forte la duple vangarda. El ia comprende direta cua los desira, ia proposa direta un menu atraosa e ia promete: “Pos come de sera de mea clientes costumal, sirca dui pos oto, me va envia los a via. Vos va resta solitar entre vos. E vos va vide, me va presenta custas basa. Me gusta jovenia e joiosia. Un pico de farsas no va asusta me.”

Sua oios turbosa ia ta envolve an spiritos plu durida.

Jacques ia comprende ce si aora el ta refere a sua propre avo de Bergeries e a la padre de Ginette – Drouin, forjor de cavalos – el ta relasa un pluveta fria supra un vista suriente. Alora esta compatiosa Ginette ta redeveni en un momento alga Sra Meunier o Munier de maneras rijida, la fia bonelevada, onesta e asidua de un familia respetable de un campania sin istoria. E acel ta es regretable. A sua jenitores Jacques va serti ce mera simple el ia oblida mensiona ce el es la fio del fia de Sr Richard, la cultivor en Bergeries ci es donce sua avo, e ce donce on sabe ance ci ela es.

A la momento ultima, Rivière ia informa ce el no va pote partisipa – “car en acel mesma dia mea madre de batiza va ariva de Marseille.”

“Un escusa stupida!” – Corbeau ia declara. “Lo es plu probable ce sua enfantor no es libre per acompania el asi!”

“El ta pote dana se entre nos.” – Archet ia burla. “Pensa: bevi alcol e cisa an fuma sigares!”

“E – horribile dictu! – cisa —”

Ma Henri Merle ia es ja interompeda par sua cameradas: “He, he, he! No plu latinas!”

“Vos prefere bon.” – Henri Merle ia acorda. “Me ia vole dise ce cisa Rivière debe vade con nos per visita la xicas!”

“Si! A nos la femes ci fuma!”

“U asi Podo ariva! He, mea vea, tu ia susede an tira Marcel Weiller con tu!”

“Si,” – Podowski ia esplica, un jigante blonde de nas plata, en ce totas intercambia presas forte de manos – “me ia encontra el ier sur Champs-Élysées. El ia debe promete ce el va acompania me a esta sera. E el ia veni!”

“Nun manca plu.” – Henri Merle ia declara. “Nos pote vade a table.”

Asta aora los ia sta sirca la bar prosima a la porte, do Ginette ia reteni sempre arivores con proposa de bevi ante come. Longo un deside firma de esta person comersin, on no penetra plu profonda en sua restorante sin lasa un sentim a la parador cuasi duanin del bar – “mera per familiari!” Ance a la visitores ci ia veni de ariva, el ia surie: “E per vos, mea enfantes, Mandarin? Picon-Citron?”

Sin esita, Podowski ia esclama: “Ambos!”

“Un per cada gama!” – algun ia amira. “Podo no vole coxea!”

Plu saja, Marcel Weiller ia comanda mera un deleta debil: “Dubonnet!” – e, profitante del ruido del cameradas, el ia solisita cuieta: “En vitro peti con alga acua!”

“Si, mea volpeta!” – Ginette ia burla. “Tu va fa como tua colegas!” Intendente, el ia oblida la acua e ia aumenta la dosa de alcol.

Poi Ginette la manejante, alga autoritar, ia envia los a la table reservada a los. Lo ia es en la fondo, direta a lado del cosina, e ia aspeta como si vestida per soldi entre laborores dial, car tota otra tables, con dinia de laborores par mano, orgulosa de lor calos e bultos, ia estende casual sua platas nuda de marmo imitada, do, an pos frota, anelos oscur ia persiste como posefetos de carafas de vino roja. La table del jovenes ia es covreda par un tela blanca e an ornada par du vasos de flores.

Un mureta paperida, de solo a sofito, ia separa la sala restorante del cosina peti. Entre ambos on ia ave serta un porte, ma en oras de come lo ia resta cluida. La vade e reveni de platos e otra utiles de table ia aveni tra un fenetra tal organizada en la porte.

La servi a tota tables ia es fada par Sra Ginette, intera solitar. El ia move ajitada como un scural, asi a la bar cuando un side ia ariva, asi posante platos, asi prendente un vitro, clamante a la cosina la comandas del visitores. Sin duta, totas ia es conosedas, car a cada ves el ia ajunta la nom del person comandante – jeneral sola la nom individua, multe simple, en la modo de multe restorantes popular, e la nom familial sola si esta ia es un person ancora no abituada a la sistem, o nonusual distinguida. Tal, cada ospitada ia ave la impresa ce on prepara la comeda spesial per el.

“Un costeleta de ovea per Sr Georges, un!”

A Ginette, noncomun enerjiosa, esta ia permete frecuente aposas comica, cual el ia evita nunca, a la joia la plu resonante del clientes: “E la testa de boveta de Sra Jeannette, lo es cuasi preparada? No oblida un mexa de persil en sua narinas!” – “Do es la pede de porco de Sr Julien?”

La ospitadas, sete o oto, ance en acel dia ia senta sperdeda tra la sala, con sola un o du a cada table, ma evidente los ia conose lunlotra. On ia intercambia salutas, bromas familiar, e ia pasa la jar de mostarda de table a table. Cadun ia sabe do el va trova sua teleta de boca, enrolada en anelo, en un peti comparte reservada per el en un portascafal sur la mur. El mesma ia prende lo en ariva e ia repone lo, bon ordinada, en parti. Ance, si pan ia manca, el mesma ia vade per prende a vole de un sesto grande do pesos ja taliada ia espeta; si no, el mesma ia talia de un bagete longa sua cuantia desirada.

Como la mestresa ia promete, la otra clientes no ia permane a sua tables. E el ia nesesa en no modo “envia los a via”, car ja ante la ora 9 la ultima ia sorti. Sra Ginette, de aora plu completa dedicante se a la comforta del visitores joven, ia comenta tisante: “Vos vide ce vos resta solitar. En sera de saturdi on no nesesa puia los. Lo pare ce tota ave un cosa urjente per fa.” E sin traversa el ia canteta:

Pos taxes de saturdi,
en sera la laboriste
al Ama ta tribui
e el vade sin resiste …

Per la plu, la jovenes ia oia a ves prima esta varia, alga osante, del clasica contempora e noiante, ma totas en junta ia catura la refren per canta con zelo nonrestrinjeda:

Veni, galeta, veni, galeta, veni!

Serta, la temperatur de esta sera de estate, a cual ia es ajuntada ance la caldia nonvolente produida par la lampas de gas, e egal par la cosina prosima, ia es nonoportun a Sra Ginette. La manobras nonpausante per servi sua clientes ia fatiga el. An tal, la fem de sania plen forte, con sua apena tredes anios, ia aspeta encantante, brilietante su la capeles oro cual el ia porta en forma de un trefolia jigante del cartas: a destra e sinistra un xinion alga inflada, supra cual, en media esata, un bulto tre del mesma tipo ia leva.

No sin un flirtantia spesial el ia cultiva sua similia notable a la eroesa del naras “apatxe” contempora, la famosa Elmo Oro como on ia nometa el, per ci, e per cui ama cambiante, la xicos mal major del epoca ia disputa entre se, comun asta la mori. A tan multe veses entre 1902 e 1910 sur la paje prima del jornales franses la testa flaminte de Elmo Oro ia apare! Sua figur ia es tan popular, par causa del vasti del leteratur apatxe, ce tra alga tempo el ia pote susede como cantor sur la stadio de un teatro periferial, e cuando el ia retira se del mundo corente a la vive privata, instante otras ia reprende mesma la personalia, si no la areola, del famosa Elmo Oro.

Sra Ginette ia porta un blusa de tafeta jala, con escota puntida, barida par un brox dorada, grande e multe vidable, sur un peto ancora plu vidable. Liada sirca la taie vespin ia es un faldon blanca, tal como portada asta aora par servores de opereta.

“Vos permete?” – el ia surie al jovenes. “Me sofoca!” – e el ia despini la brox grande, formida de un misca arabesca del leteras G e M. Esta ia capasi el a reseta alga frescia par un leva-e-basi ventinte del bordas del blusa.

La come ia fini cuasi. Con apetito conformante a lor eda, la oto tablanes ia estima la coxa de ovea con crutones brun e la parfum moderada del alio asi e ala picada. A la presenta de esta peso xef, Corbeau, un om pal con acne de fas, la poeta del ronda, ia declama la versos jusosa de Le gigot de Raoul Ponchon, cual esta autor dionisal ia dedica a la obra mestral de cosini, la Coxa de Ovea. Aora, sasiada, los ia abandona volente sua platos per amira con oios briliante la libri de vestes del mestresa.

Sola Marcel Weiller no ia acorda per interompe sua conversa con Jacques Archet. Marcel Weiller, pos sua gradua, ia colabora direta con sua padre en un asosia de ajentes de asiones, e pos ensabe ce Archet va deveni un ofisior de banco, el ia vole serta sulinia la interelata de lor profesas per – si posible – plani ja aora la via a cosas futur, profitosa per ambos partitos! Ma Jacques Archet an no ia finje un interesa a tal tema, intera steril en sua opina. An tal, Weiller no ia lasa sua vitim:

“No oblida” – el ia insiste – “cuando tu va ave alga cosa per dise en tua banco, ce nosa compania compra, su constrinjes la plu favorente del mercato, tota garantias paiable en mone stranjer. Per aceles del obligas osteraices de 1909, per esemplo, con valua nomal en frances suiz, me pote proposa un taso cual …”

Ja del comensa, Archet, la filo de fero longa, como on ia nomi el en la liseo, no ia escuta la proposas onesta de Marcel Weiller. Como si subita inspirada, el ia sta per posti se a lado del fem ventinte. Profitante de sua altia grande, el ia dirije furtiva sua oios a la tesoros su la blusa. El ia sujesta an ce el pote colabora en la atentas de Ginette per airi se.

“Tu, om alta, vade e senta!” – ela ia reenvia el a sua loca. “Mea brasos ancora no es debil e me pote mesma atende mea nesesas!”

Los ia senti ancora plu libre cuando, pos presenta la tases de cafe, Sra Ginette ia informa la cosinor, ci on ia vide a veses tra la fenetra – un fem vea, seca, con capeletas supra la angulos de boca – ce de aora el va es no plu nesesada. “Tu pote vade a casa, Mélanie. Sin duta, la seniores no va oblida lasa tua grasieta.” Poi Ginette ia pone ante la ospitadas un caxa de Demi-Londres. “Asi es sigares per vos. Los no es multe forte.”

“Ci dise ce on teme la plu fortes?” – Podo ia vanta.

E cuando la mestresa ia demanda: “Cual licor me va servi a vos?” – algun ia declara: “La mesma como a tu!” – par cual ela ia es invitada a bevi juntada. E ela ia deside: “Bénédictine.”

Henri Merle, como inisior del Sera Devorante, ia senti alga encargada par la organiza. Ja de alga tempo el ia nota ce multe probable lo va conteni plu devoras ca el ia intende ajunta. Al min un pico de minutos de formalia ta es desirable, per dona a esta reuni final del grupo la marca de cameradia diniosa. Esce lo no es emosiante cuando cameradas bon, ci tra plur anios ia vive con lunlotra, frecuente plu intima ca en sua propre familias, asembla per dise adio? Doman la molin del vive va crase los a tota ventas. Un va sposi, va ave enfantes, la propre curas, un otra – u ala Pierre Touchard – va viaja estra la pais; Podowski, la jigante blonde, va deveni un maror. Pos corta los no va ave plu interesas comun, e si a alga ves – un tal coaveni! – plur de los va retrova se en junta, esce los no va es alora stranjeres entre otra stranjeres?

Henri Merle ia desira comunica a sua acompaniores esta nostaljia invadente, en ce ancora los va escuta el con bonvole. El ia leva e ia comensa: “Amis cara! No sin emosia grande …”

Denova he-he-hes reproxante ia es lansada contra el, e Tissier, la elegante, ia pare sita del Gida de Boneleva cuando el ia proposa seria: “Pospone la retorica al min asta la xampania!”

Direta la coro ia scande: “Si, xampania, si, xampania!”

Alga cosas on no nesesa repete a plur veses a Sra Ginette. “Bon ce ance a esta me ia pensa. On ave ja alga botelas nel baldes de jelo.”

Como Henri Merle, ance Pierre Touchard ia regrete ce la conversa – o, plu vera, la conversas – orienta se plu e plu en dirije a migas trivial. Serta ce doman, con lingua pesosa, tota de los va balbuta: “Nos ia desgrupi per sempre. Adio, nosa anios joven! … e nos no ia intercambia an du ideas sana!”

Poi, con plu autofida ca sua natur ia conteni jeneral, Pierre Touchard ia leva en sua turno, ia prende en mano sua vitro plen e no ia esita: “Vos va permete me a dise alga parolas, parolas de adio. Nel mense veninte me va es instalada en Berlin, como vos sabe ja …”

“Saluta lor Gretxenes!” – Duriz ia interompe, noiada par tota cosas retorical, con ce Corbeau, ci ia recorda la strofes patriota de Musset, ia tisa: “Tu va dise a los ce nos ia ave lo, lor Reno deutx! Nos ia ave lo en nosa vitros!”

Ma Pierre no ia permete ce sua filo lisca a via: “Cuando pos un anio me va reveni, do vos va es, cameradas de mea jovenia?” El ia trova la parolas par improvisa, e vidable el ia interesa sua acompaniores; el ia susede an cuasi emosia los, cuando Duriz – sempre la mesma – ia pone nonvideda un peseta de jelo en la pox del pantalon de Pierre. Pos momento, esta ia esperia la sensa de fria fluente contra sua coxa destra. El ia xuta sua mano a en, e cuando el ia lansa sur la table un peseta fondente de jelo, la parla bela ia es finida. Pierre ia rie con la otras.

Ma Sra Ginette ia es noncontente; el no ia asconde sua simpatia a Pierre: “Vos es cruel, vos barbares. El ia parla multe bela, esta joven. Ta ce me besa el!” E tal el ia fa.

Pierre ia roji – su sentis diversa, de cual la plaser ia manca en no modo! La contata con la jenas calda del fem, la apoia delicata de sua peto sur la spala, ia eletrici el plasente. Ma la otras ia protesta. “E nos? Be-sa! Be-sa!” Esta es un ben cual Sra Ginette no reserva. Besas, en sua opina, es semes. Semi, semi sin sesa, si tu vole recolie. Algas ia vole profita plu completa del situa, Duriz par deslia la faldon, Jacques la longa par desbotoni la blusa a un plu grado, ma Ginette ia colpeta lor ditos. “Pica poca!” – el ia tisa – “ancora no la ora bon!”

Un caos neblinte ia menasa engoli la armonia del consenta. Henri Merle ia sensa esta a grado otusa. El ia cexeta a Pierre Touchard, la sempre fidosa: “La sera no responde a mea esperas. Me veni de consensi al fator culpable: la realia umana! La realia umana, lo es sentral! Lo esiste en tota cosas. On era si on no considera lo. Un organizor pote susede sola si el calcula lo en sua projetas, si el calcula la disposa umana, la modo umana de pensa, la state del alma umana no sola en acel momento ma ance … en un parola, la realia umana tal como lo va deveni nel pasos seguente del evolui de sua projetas …”

“Tu parla del colar, ma tu no parla clar!” – Pierre Touchard ia burleta con ironia bonvolente.

“Si,” – Henri Merle ia acorda – “me ancora no pote espresa esta idea en modo nonconfusante, ma ja bon me comprende lo. Me va debe analise plu profonda. Nos va parla denova sur esta nel semana veninte.”

Henri Merle ia gusta multe promove temas filosofial e argumenta sin fini con sua ami bon Pierre sur astratas distante.

La ruido del destapi de un botela ia aranca el de sua meditas. A la mesma tempo, acaso, la tapo spesa del xampania, pos toca la sofito, ia recade sur la table direta ante Henri Merle. El ia prende la tapo, ia regarda lo con atende esajerada e ia sta silente, perdeda en pensa. Corbeau ia nota prima la strania del posa.

“Cua aveni a Merle?” – el ia mervelia. “El es Hamlet nel sena con la cranio sceletal?”

La vose de Merle ia sona cava, como si el monologa a se: “U asi tu, tapo! Ancora tu es prisonida par esta filos metal, ancora tu porta la paramorde, o! tapo elite! E tu no pote cria acusante a acel jovenes, la flores del pais, ce nonpensante los consuma a via la oras cual los ta debe eterni per recordas eterna. Cua va resta de tua consenta final e defininte?”

“No enplora nos!” – Tissier ia broma. “Larmas es un cosa fea. Un eresia estetical!”

Ma otras ia invita: “Continua, Merle!”

“Amis, cua va resta de esta consenta? Me, la tapo, me va permane como la sola documento palpable de un amia solida. Vos va sperde al mundo; de aora no cosa va es plu como a ante, nunca plu. Con eseta de me, vosa tapo! Donce conserva me, onora me, garda me! Me va es per tota tempos la simbol de un cosa grande, bela, la xapo de …”

“… la tapo!” – Duriz no ia pote evita interompe. Ma Merle ia es tro seria e ia continua: “… la xapo coroninte de vosa anios e ideales de liseo!” Poi la retoriciste joven ia tira se de sua melancolia: “La garda de esta Tapo Respetable me confida formal a la plu perdurante de nos, a Étienne Podowski!”

Entre crias de “vive!” Podo ia aseta; con alga embarasa el ia grima a la Tapo, ia pone lo en sua pox interna de peto e ia declara: “Cualcun ci prende lo de me va mori!”

A Corbeau la seria del sena ia plase. El ia es stimulada par la tema: “Cameradas, nos veni de oserva la fundi de un instituida importante, la Sosia del Tapanes. Jura ce de aora nos va porta como insinia un tapo de xampania nel buco de boton!”

On ia fundi un sosia … La asosia de ideas ia es vera tro tentante e Jacques Archet ia canta, nonrestrinjable:

On vient d’fonder une société …

cui strofes, tro espresosa en stilo de Rabelais, ia es resonada par totas.

Sola cuando los ia fini, Tissier ia pote comenta: “Un tapo nel buco de boton! No sola riable, ma imajina la efeto estetical de un tal monstrin!”

“Bon, tu, esteticiste,” – Duriz ia misca se a en – de sempre el ia senti la posa perfeta del vestes de Tissier como un reproxa a sua propre libralisme boemian – “tu sabe cua es un pluve ambar?”

“Un pluve ambar?” – Tissier ia repete, iritada ce el no conose esta, cual parteni suposable a la vives del crema de sosia.

“Bon, me va fa a tu un pluve ambar. Supra tota, ta ce nos ecuilibra nosa fortias!”

Ancora la botela de Bénédictine ia sta sur la table. Duriz ia pleni du vitros peti, a mesura egal, e ia invita Tissier: “Bon sania, mea vea!” – e los ia comensa bevi, Tissier en modo diniosa, lenta, como conveninte a un probor sabosa, Duriz par sola un colpa, direta. Ma el no ia engoli a su, mera reservante lo entre sua jenas de amster. El ia repone la vitro sur la table, ia regarda avertinte a Tissier ci ia senta contra el, con fas a fas, e con la calmia serena de un arciprete en posto, el ia sofla a Tissier, tan subita, tan dirijeda, un flueta jetada de licuida ambar ce cuando Tissier ia comprende final cua aveni, lo ia es tro tarda per proteje sua jaca bela de alpaca negra. El ia vole repaia par la mesma arma, ma la forte de sua jeta ia ateni apena la media del table, con ce Duriz, su la aplaudis e riones del ronda, ia conclui formal: “Acel ia es un pluve ambar!”

En relata con la fini del consenta a Ginette, nun ia conserva un imaje presisa. An la divide del custas del agape entre la partisipores no ia pote resobri los. Ma a acel momento cuando on ia debe pone la mano a la bolseta, totas ia es confondeda en descovre ce, ja longa pasada, Marcel Weiller ia susede sorti del loca, furtiva e nonpersepida.

“A, la frate falsa!” – Podo ia coleri. “Doman me va retrova el!”

La spendes fada ia es alta, tal ce per la mesma custa los ia ta fa du bancetas en Marguery – sin la favores de Ginette e sua elmo oro, natural. La servores coreta amidonida del restorante famosa ia ave un disposa plu distante. Esce no, a la sorti de sua ospiteria, Ginette la focosa ia trova un parola spesial jentil per cadun de los, un ginia sinifiosa, un presa discreta de manos? Esce no cadun de los ia porta la impresa multe plasente ce, si el ta vole …? Donce perce, sirca la fini, esta fem ia urje los a parti? On ave no duta: el ia vole dejeta la torpes per reteni sola la prefereda.

La atmosfera oscur e ancora calda del strada estatal ia conteni un sujesta de amosia. Cadun ia persepi lo. Estra Tissier. La nonfortunosa ia batalia contra sua stomaco. Ma la stomaco ia es plu forte. Lo ia vinse.

“U ala un plu ci abandona nos!” – Duriz ia burla. “Nos va puxa el a un taxi, e poi a nos la xicas ci fuma! Nos va crea un ruido nel cabana de gales.”

Podo a esta lado, Jacques la longa a acel, con braso su braso ia tira con se la vinseda e sua fas verde. Sur la bolevares grande, multe prosima, alga taxis ia pasienti. No sin ruido on ia instala Tissier en la veculo. Ancora el ia es morin pal e ia fa no atenta per emerje de un apatia profonda. No cosa vivente ia interesa plu el. Henri Merle ia comunica a la gidor la adirije del pasajor muda e ia negosia la custa de viaja. La otras ia tiseta la vitim par recomendas asurda.

Entretempo Podo, ci ia sensa en sua pox de peto, contra la cor, alga ojeto torpe, ia estrae stonada un tapo multe spesa e ia demanda a se como esta tapo ia ariva ala. Ja un idea fisada ia osese el. El ia vole forte inserta la tapo a la cavalo. No tra la boca. A la otra fini. Futil la cameradas ia desconsela el. Podo ia ostina. Multe seria, consensa de sua ojeto, el ia manobra. Alga violente. Poi la cavalo ia sorti de sua state asta alora neutra. La taxiste ia sputa insultas, ia menasa par sua flajelo. Pasores noturna ia deveni interesada, ia pausa en mervelia. Algas ia es per la esperimenta, otras contra lo. Un polisior ia debe interveni, e en ce el ia discute con Podo, la veculo ia pote rola a via. Nun ia pensa a reproxa Podo sur la malusa intendeda e desacrinte del Tapo Respetable.

“Aora ta ce nos parti!” – Duriz ia proposa, e ia gida la survivores. Los no ia nesesa vaga longa. En tota stradetas sirca la Porton Santa Denis la mercato de ama ia flori – la ofisial, organizada, en casas discreta, ma an tal fasil reconosable de distante par causa del lanternas roja, con ce la libre, nonpatentada, ia es praticada sur la troteria. Un grupo de femes, a la canto del strada Santa Apolin, ia ensirca instante la scuadron de Duriz, ci ia aspeta como un preda fasil.

“Bon, ovetas peti, on veni per visita la lupo?” – con vose alga raspante un madron ia comensa, no plu joven ma barilin, crasente la resta de un sigareta su un talon pesosa. Sua colegas ia afisa se per catura la omes joven, atentante tira los con se.

Pierre Touchard ia resobri subita su la toca de un xica tro monopolinte. Sua oios, nonatural maciada, ia asusta el. Los ia regarda tan fisada como un buo. Instintosa el la libri se. La espira del fem ia porta un misca tradosa de tabaco e alcol. Un lanterna de gas, lansante un lus pal en dirije direta a sua fas, ia revela, su strato de polvo cosmetica, plietas serta no cultivada en la jardin de virtua. La bordas de sua ungias ia es descurada. Un prostituida barata, preparada per tota tipos de umili.

La femes no ia porta xapos. Algas ia ave colares alta, otras ia es larga escotada su xarpes roja; plur ia porta faldones negra supra faldas cual ia ateni lor talos ma ia es fasil tirable a supra su mano fasil, tal ce de ves a ves, como si mera un sample, un gama ia apare plu o min plasente moldida, cresente de un sapato de talon alta, cluida par botones. Totas ia releva volente petos favorente.

“No perde vosa tempo.” – Duriz ia consela a los. “Nos conose nosa via!” – e la grupeta ia pasa a ultra.

“Bande bancarota!” – la madron spesa ia insulta pos los.

Duriz ia pausa ante un coredor streta su la avisa “Casa del Japaneses Bela” e el ia deside: “Nos entra!”

Ma sua grupo ia esita. Los ia comensa discute. Podo ia declara ultima: “Me segue asta la fini final.”

Corbeau e Henri Merle ia acorda: “Nos va fa como la otras.”

Ma Jacques Archet ia afirma superior: “Bordeles no interesa me. Me ave posibles plu bon.”

Pierre Touchard, ancora su influe de un desilude dolosa, no ia asconde sua senti: “Nauseante.”

Duriz ia vole mostra a sua colegas ce el conose ja la loca e sua prosedes. El ia insiste: “No es stupida. Nos va entra mera per bevi un botela nel salon!” – e el ia avansa segueda par Podo, Corbeau e, a alga distantia, ance par Henri Merle ci, sin orgulo, ia surie un escusa a Pierre: “Un studia del abituas del animales de note!” La coredor ia engoli los.

Jacques Archet e Pierre Touchard, silente ma desidosa, ia axi un via tra esta jungla de brasos desirante, rubante, afisante, asta ariva en la spasio plu libre del bolevar Sébastopol.

“Final!” – Archet ia respira plu libre, con finje vidable. “Per me acel sufisi. Me vade a casa. Serta me va gania ancora la metro final del stasion Réaumur. E tu?”

“Me no abita distante.” – Pierre ia responde. “Me va vade par pede.” E los ia separa, la un a sude, la otra a norde.

Arivante a la bolevares grande, Pierre ia segue los en dirije a sua casa. Sua pasos no ia es intera firma. Ma sua testa ia es clar. El no ia atende la persones pasante, aora cuantiosa, pos sorti de teatros e conserterias. El no ia persepi la terazas del caferias, ancora en lus briliante del garlandas de lampas de gas. Sua pensas ia jira. “U la ilude, acel xicas comprable! Acel no es la ama … Sra Ginette es de un otra tipo …” E el ia resensa sur sua spala la apoia calda de sua peto. Tan plasente e calminte lo ta es, si el ta pote senta a lado, direta a lado de el e distila la descargas nondefinable de sua femia envolvente!

El ia pasa la Porton Santa Denis. Futil el ia atenta iniora un forte misteriosa atraente. El ia pasea plu, ma per alga razona el no ia desira usa la via la plu direta a la suburbe Poissonnière. El ia entra a la strada Cléry. El ia es consensa ce lo vade paralel con la strada de Aboukir. Ja cocente en sua serebro bolinte ia es un escusa conveninte: “Pardona, Sra Ginette; me ia perde mea teleta de pox. Esce me ia lasa lo con tu?” Si, a mano sinistra el va devia a la stradeta Chénier. Un rejion sin person. Apena luminada. A alga loca, distante, pasos ia sona sur la pave. Del otra fini del stradeta Chénier un silueta gris ia prosimi, e a la canto do la stradeta Chénier talia la strada de Aboukir, nonevitable los ia encontra lunlotra.

“Cua? Jacques Archet? Tu asi?”

“E tu?” – Archet ia replica noncontente.

“Me veni de trova ce me ia lasa mea teleta a casa de Ginette – e tu, cua tu fa asi?”

Archet ia esita apena. “Un cosa total stupida.” E el ia informa Pierre ce sua familia conose bon la familia de Sra Ginette, Ginette Meunier de Bergeries, ce el ia es encargada a dise salutas cortes e ce el ia oblida completa fa lo. Donce el ia reveni …

Sola un pico de pasos ia resta asta la boteca de Sra Ginette. Ma lo ia es ja cluida. Un covrente de lenio, pliable e retropuiada a dia en alcovas de mur a ambos lados del boteca, ia asconde aora la fasada intera del ospiteria. Raios minor de lus ia veni ancora filtrida tra fesuras streta. Jacques Archet, par causa de sua altia, ia pote regarda a en. E el ia resta regardante. Longa. Colinte sempre plu sua oios a la bucos peti. A interna, sentante a la mesma table do resente los ia banceta, aora, con dorso a la regardor, ia es un om de spalas larga. E Ginette ia senta sur sua jenos.

Jacques ia dise mera: “Txa!”

Esce la covrente del boteca ia craci pico su presa de sua curiosia? La om ia comensa escuta e ia turna sua fas a la porte.

Jacques Archet ia resta xocada! “Txa de txa!” – el ia repete e ia confida a Pierre: “Lo es mea tio Victor! La volpe rusosa! El va ariva en Paris doman … ante mediadia! … Donce, bon note, Touchard!”

“Bon note, Archet!”

Tal ia es la fini del Sera Devorante.