Capitol 13

En la instituida de Dirijor Vogel, Pierre ia fa funsionas diversa. En la clases basa el ia coreti la taxes de scolores nonprogresante, la cretines peti, como Dr Kiebitz ia nomi los. Ala Pierre ia debe maneja alga ordina e un minima de disiplina. Acel ia es la parte la plu nonplasente de sua ocupa. Ma en la propre cursos del instituida per prepara graduadas, sua ativia ia es plu interesante. La lesones sur la lingua franses ia es fada par profesor Quindel, en conforma a la program de esaminas de la comision de stato. Esta senior ia labora su teto de Vogel sola como un ocupa ajuntada, estra la orario de sua lesones regular en la Scola Comersial Alta de la Site, do el ia teni un posto constante entre la instruores. En la instituida a la plaza Winterfeldt el, donce, ia pote resta sola corta, sola per la tempo nonevitable nesesada per developa e esplica la leson. El no ia pote ance gida la eserses pratical e consela sur formulas de tradui plu elegante. Asi, presisa, la rol de Pierre ia interveni. Sua taxe ia es supravide acel aplicas de paragrafes del gramatica resente aprendeda, e esta el ia fa con zelo, donce con plaser. Plu, en esta clases la aprendores ia es no plu enfantes; en la curso superior los ia ave aprosima la mesma eda como Pierre, e car de la comensa Pierre ia presenta se a los como “mera un conselor”, multe pronto un simpatia forte ia rena entre la aprendores e el.

Plu spesial, el ia amini ala multe rapida con Hans Paulig. Los ia ave bien entre se un cualia comun. Ante la comensa del curso, los ia senta con lunlotra en la sala de espeta de Dirijor Vogel, an si ancora no sabente, en acel momento, ci la otra es. Ma esta coaveni ia fasili un abri del conversa a pos. Esta Hans Paulig ia es plu vea ca Pierre. El ia ave ja plu ca dudes anios. El ia prepara se per gradua. Si el ancora no ia gania la diploma, lo ia es no par pigria, e no par otusia de spirito. Contrastada, el ia es, en corpo como ance en mente, estracomun enerjiosa, replicosa en cualce aveni, zelosa e frecuente turbosa. Pos fini, a sua ves, la sicle prima del studias alta de jinasio, el ia entra a la emprende comersial de sua padre e ia vende tra du o tre anios benes de esmalte en un boteca grande sur la Strada Alta en Köln. Alora el ia deveni convinseda ce acel vive en boteca va plase nunca el. El ia senti en sua interna un clama plu forte a alga rol statal de maneja, posta, duana o cosa simil. Ma ala on oteni la postos superior sola par aida de un pergamin de gradua. Hans Paulig ia segue un anunsia cual ia apare en un jornal e ia enscrive se a Dirijor Vogel per un curso rapida, tal nomida. El ia espera regania la tempo ja perdeda. De la comensa, Pierre ia gusta multe Hans Paulig, car esta ia remente el a Duriz, sua bon camerada de clase en Paris. Hans Paulig e Duriz ia es serta simil a lunlotra, no sola par aspeta de corpo, ma ance par multe angulos de sua temperas e carateres.

En la parte tre del instituida, Pierre ia labora como un “gidor de conversa”. Ance asi el ia ave relatas sola gustable con la membros de la curso. Estas ia es persones ja plu matur, de ci cuasi tota ia es ja stablida en bon situas. Los ia ave sabes solida de la lingua franses. Los ia veni a Vogel no per prepara se a esaminas, ma simple per perfeti se en la lingua franses, per oteni un pronunsia plu coreta, modos plu fluente de espresa. Los ia veni con sua propre inisia, per contenti personal o un nesesa profesal. Los ia progresa rapida.

En acel parte tre, Pierre ia comensa conose Senioreta Madeleine Cohn. Senioreta Madeleine Cohn ia es un person grasil, de fas briliante, multe blonde e intera multe plasente, con divinable 22 o 23 anios. El ia segue la cursos car el ia vole bien parla franses con la fasilia de un fem parisan. Flue parla la lingua franses, esta es un trumfo en bon sosia, esta permete relatas internasional e, final, on deta esta a se cuando on ave la nom personal Madeleine, no? Si algun no opina tal, ta ce el resta fidosa, per favore, a sua nom de nase Magdalena con tota sua formas reduida como Magda, Lena, Leni, Lenchen e similes. En ajunta, Senioreta Cohn ia es la fia de un careror rica de asioneria. El ia ave oras libre sufisinte per dedica se ance a plaseres inteletal.

Sua encontra prima con la “gidor de conversa” Senior Pierre Touchard, a la abri del curso, ia causa alga desilude a ela. La profesor notable, ci el ia imajina longo la informas de Dirijor Vogel, ia ave no similia a acel peti joven, ci ia impresa no par sua altia, no par sua fama, no par sua titulos. El no ia es un de acel xefes distinguable sur ci on pote vanta al amis e conosedas: “Me segue cursos de conversa su la gida de un profesor, un membro de la Academia Franses”, o “un educor pasada del enfantes del imperor en Petersburg …” No. An tal, Pierre ia ave du trumfos valuosa e valida. El ia es un parisan autentica e ia sabe pronunsia la lingua franses en modo vera himmlisch! – sielin, longo la declara personal de Senioreta Cohn. Ajuntada, el ia es un joven de aspeta plasente. Pos corta ela ia acorda mostra a el un bonvole nonfinjeda, an si alga superior.

Estra la curso en la instituida Senioreta Cohn ia reseta de Pierre ance lesones privata. La oras ia varia de un semana a la otra, pos acorda mutua, longo la debes sosial de la senioreta. A veses esta ia disturba Pierre en sua otra projetas, ma ela ia paia bon. La lesones ia aveni su teto de ela, en la casa de sua jenitores. Senior Cohn ia posese sua propre casa en la distrito rica Schöneberg. La senioreta ia aseta sempre Pierre en sua salon privata, cual el ia ave a lado de sua sala. A un ves, alora, Pierre ia encontra ance la jenitores, vidable burjeses de bon state en la sosia alta. La madre, pico ronda, alga corposa, ia intercambia mera salutas; el no ia es parlosa. O el ia es timida. La padre ia parla volente de Paris, do el ia es a plur veses ja. El ave un bon corespondente ala, con ci el arbitraje paperes de asioneria. Rue du 4 Septembre, Weiller e Compania. Esce Pierre conose?

“Un coaveni stonante!” – Pierre ia joia. “La fio Marcel ia es tra alga anios mea camerada de clase!” Final un tema de conversa ia presenta se, ma el no ia pote esplota lo, car un servor ia veni de informa Senior Cohn ce on clama el a la telefon.

A un otra ves Senior Cohn ia dise a Pierre ce el va fa con sua sposa un viaja peti a Paris e: “Cual es aora la restorantes selebrada?” Esta demanda ia embarasa Pierre. Sola rara, en un sera de soldi asi e ala, el ia vade con la jenitores per come en un restorante, jeneral alga Bouillon Duval o un loca de tal categoria, serta no sufisinte lusosa per Senioreles Cohn. Plu depintin ia es “A Ginette”, ma tota no recomendable al senioreles. Final el ia mensiona “A Maxim” e Marguery, ma estas Senior Cohn ia conose ja, e sin perde plu tempo el ia vade per responde a la telefon.

En sua salon privata tapetida, Madeleine Cohn ia es un sirena. Ala tota ia es suave. Tapetos, sejones, cuxines. Frecuente el ia presenta se moldida en un roba matinal de seda o drapeda en un veste simil a un cimono, de cual, parente, el ia posese un serie nonconsumable. El ia fumi de un portasigareta longa un tabaco oro, pico parfumida, e ia oblida nunca proposa lo ance a Pierre, an pos sua “Grasias, me no fumi” a cada ves. Asi, la presidente de la eserses de conversa ia es no Pierre, ma Senioreta Cohn. No par forsa, ma par encanta. El ia eleje la tema e ia dirije la conversa a do el ia desira. Pierre ia es sempre ansiosa. El ia teme alga embosce, alga trapa. El ia ave un consensia clar de lo cual el va dise per reproxa si el va cade a en. El ia deside no deveni la preda per no deveni la jueta o an la ojeto de la burlas de ela. Los no parteni a la mesma ambiente.

Comun la senioreta ia solisita ce el leje con el de alga novela franses. Per estrae la libro de sur la scafal, el no ia nesesa leva de la sofa. El ia estende sua braso supra sua testa, elejente la libro, parente, en modo acaso. Alora lor testas ia debe prosimi tan supra la sola copia ce Pierre ia senti sur sua propre jenas la arde comunicada de los de ela. Ma el ia resta como un petra, rementente se ce el es mera un laboror obligada a merita sua paia. An supra la pajes la plu ensendente de Afrodite, la obra conoseda de Pierre Louÿs, el ia susede finje ce el es plen asorbeda par sola la delicatas gramatical, la sutilia del stilo, e ce el es consernada a no grado par alga referes en un testo tan astuta elejeda ce, per trae lo a la table en presisa esta sera, lo ia es serta ce la colabora de mera la acaso no ia sufisi.

En acel dia, per vade a casa, Pierre no ia usa, como abitual, la linia de tram 72. El ia vade par pede. El ia nesesa respira la aira fresca del sera de inverno. El ia nesesa considera. Esce el es un fol? Multe serta, sua camerada Duriz ta garantia esta a el. “Asino!” – el ta reproxa – “en sosia alta o no, profita de la aveni! La pupeta desira no plu ca esta.” Per un momento, Pierre ia demanda a se esce, par sua disposa e asteni, el no ia ofende Senioreta Cohn. En cualce caso ela ia lasa no indica de mal umor filtrida a estra. Ma perce el ia esita? Esce donce el no es un om como sua cameradas? Esce la invita no ia es clar? Multe plu clar, an si noncapas de espresa lo, el ia senti ce de tal iritas carnal la ama vera no pote nase. Ma perce direta a la parolas grandiosa? La Ama Vera! El es riable. Esce sua colegas ocupa se sur la Ama Vera en sua aventuras titilante? Ma … si, confesa … tu es embarasada par la grado sosial de Senioreta Cohn. Cua si tu ia malcomprende sua intendes e si, en la momento de deside, el ta deveni denova la seniora grande? Senior Touchard, tu oblida ci tu es! Ha, si el ta ave sertia!

El ia es noncontente contra se par causa de la senti ce, en loca de un autofida vinsente, un trumfo omnipotente en la manos an de un concistor de spirito povre, la sola cosa restante a el es un razona esitante. Pico el ia anela: “O, tan plu fasil lo ta es con acel fem servinte!” – Acel parolas el ia vosi ante se. De esta el ia es consensa. El ia para su un lanterna de gas en la strada Gleditsch. “Si, tan plu fasil lo ta es con acel fem servinte!” – el ia repete per secute la nebla a via, per reoteni un vide clar. El ia comprende ance la intendes de acel xica forte. E si el ta suposa ce ance asi el ia era, esce lo ta importa? “O, tan plu fasil …” Ancora la sena resta vivente en sua memoria. Lo ia aveni a sola du semanas pasada. El ia entra a la casa de la strada Bülow cuando, de la boteca de la vidua Stecken un fem joven e forte ia sorti, con jenas roja e faldon blanca. Alga fem servinte de la visineria ci ia veni, a la momento ultima, per compra bur. O ceso. Vidente Pierre, el ia sta fisada ancora a la basa de la tre grados. Alora Pierre ia es regardada par oios tan briliante, tan avida, ce nonvolente el ia debe turna a via. En cuando el ia pasa la fem, esta ia canta en zumbi multe oiable, alga tisante:

Ein kleiner Franzose durchsegelt die Welt …¹

Pierre ia catura la parola Franzose – om franses. Lo ia es estra duta ce la fem vole dise el. Per insulta? El ia turna, ia regarda el como si demandante. Instante ela ia responde con surie cortes, apoiante sua testa al spala. O! Esta no ia es un insulta. Asi un person joven e gustable, an si mera un servor, ia invita pico turbosa a plu conose. Sola un maleducada ta pote iniora esta, Pierre ia pensa, e el ia dise “Guten Abend, Fräulein!” intera spontan, sin considera. “Guten Abend!” – la fem ia responde. Ma Pierre ia pasea plu.

Plu tarda, el ia atenta informa se de Hugo sur un canta cual parla de un kleiner Franzose. Ma Hugo no ia conose lo. El no ia pote conose lo, car la testo orijinal dise Ein kleiner Matrose.² Lo es un canta de la folclor de studiantes o casernas, alga vulgar en la otra versos. Matrose – Franzose: esce, par similia de rima e ritmo, esta no evoca acel? El ia es stonada ce tan spontan a acel xica, como un portador per sua desira de espresa, un melodia pronto preparada per parti ia presenta se! La peti om franses ia sustitui per la maror gastada, e la clixe ia ave un sinifia nova. Clixes es la buses del pensas blanda en la vive dial.

Alga a pos, Pierre ia encontra la mesma fem servinte en la mesma loca. Denova los ia intercambia un saluta, e no sabente como el debe continua, Pierre ia pasea plu per desapare sur la scalera a sua casa. Alora el ia oia la xica, ci ia canta pos el, en la manera pigra nonatendente del parla berlinan:

Jedes junge Meedchen hat ‘ne Stube janz alleen’
Stube janz alleen’
Stube janz alleen’.³

A esta ves, la sinifia ia lasa no duta. Pierre no ia nesesa la colabora de Hugo. La refere ia es neta, forsante relevada. Tra tempo longa, esta sena, con tota sua prometes, ia ocupa la pensas de Pierre. E no ia desplase el. El ia regrete an, vera multe profonda en se, tan profonda ce el ia espresa nunca esta regrete en parolas, el ia regrete an ce, pos acel, el no ia encontra plu la servor atraosa con jenas roja.

Ancora Pierre ia pausa meditante su la lanterna de gas en la strada Gleditsch. Pasores ia comensa regarda el con curiosia. Automata el ia reprende la pasea e ia segue plu sua pensas: Ance acel fem servinte no parteni a mea ambiente. El es de un otra clase sosial. Como esplica ce … lo ta es plu fasil con el ca con Senioreta Cohn? Como interprete la fato ce plu volente me ta lasa ce me lisca a un ambiente su la mea ca leva a un ambiente plu alta? Pierre ia sabe ce per esplica esta el ta clama futil la leges de fisica. En ajunta, la responde coreta ia serpe tra sua mente: Si lo ta es mostrada en la momento de deside ce el ia era sur la intendes de … la person, la resultas ta es min grave en la caso de mera un servor.

Ma instante el ia rebela contra esta solve. Perce min grave? Cua “mera un servor” vole dise? Esce ance un servor no ave sua onora e la mesma direto de es respetada? Un bon tema per la bisturi analisente de sua ami Henri Merle! Me va debe parla de lo con el cuando nos retrova nos. Nos va nada en astratas! Bon amis es un bon cosa! Bien, ance asi en la site stranjer el ave amis, ma no tan intima. El no desira parla a Hugo de sua problem. Plu bon ce Hugo no sabe. Hans Paulig? Egal como Duriz, ance Paulig ta burla el sur sua esitas moral. E Dr Kiebitz? Pierre ta pote brandi la tema ante el, no como un esperia personal, ma como un demanda pur teorial. Sin duta, Dr Kiebitz senti multe plu en sua elemento entre la nubes de teoria ca sur la rua de pratica. Ma Pierre ia suposa ce Dr Kiebitz ia conose nunca un aveni de contorse entre la brasos de fero de un dilema simil.

De la dia prima, Pierre ia ave bon relatas, cuasi amin, con “senior xef de studias”. Ja a plur veses, seguente un invita jentil, el ia visita Dr Kiebitz en sua abiteria. Ala los ia pote parleta plu libre ca en la instituida.

Dr Kiebitz ia aspeta cuatrodesan, probable sola par causa de sua esterna descurada. Credable el ia es multe plu joven. El ia vive nonsposida, nontocada par nesesas prosin, en un casa peti consistente de un sola sala con alcova de cosina, a la nivel prima de alga construida retro sur la strada Luisen. Ancora la casa no ia dispone eletrica. Kiebitz ia usa un lampa de olio, un de la modeles plu perfetida. Lo ia pende de la media del sofito, tenida sirca un taie larga par un anelo de metal briliante, ance larga, con per xapo un paralampa de stofa azul, longa covreda par polvo. Lo ia pare un dama de bon carater, nonajitable balansinte supra la table ronda. Alga larga de colo, lo ia ofre jenerosa un lus sufisinte per ateni, cuando tirada a supra, tota angulos. Per dise: on ia pote, usante un sistem de cadena e pulea, leva o basi sua posa a vole e par resulta vasti o streti la surfas luminada. Dr Kiebitz, om solitar, ia deveni abituada a la posa la plu basa de sua lampa. La ronda de lus projetada sur sua table ia sufisi esata per conteni un libro o un plato. Plu, un boton turnable sur la colo del lampa, astuta gradida, ia permete pico e pico atrofia la fonte de lus asta la discretia de un lampa de eglesa.

Pierre ia ave un plaser definida cuando el ia visita la nido del nonsposida. Acel om ia diverti el. El ia es un person strana. Un orijinal. Como el mesma ia asentua volente, el no ia nada con la ecipo. “On no debe dise si e amen a tota. Cada person normal reseta sua rasiona de capasia de pensa. Ta ce el usa lo pico. Ma cua la umanas fa? Tro pigra per pensa mesma, los lasa sua opinas a la mastica de la molin grande del jornales e compra los a cada dia con sua salsixes, preparada per consuma instante.”

Dr Kiebitz ia ave ideas sosialiste, an si el ia junta se a no partito. Nada con la ecipo sinifia renunsia sua direto de deside. El ia es un amiror solida de Jaurès, en acel epoca la gidor grande de la partito sosialiste franses. “Un tal om!” – Dr Kiebitz ia repete comun a Pierre. Triste ce Pierre ia sabe no cosa per raconta sur acel om political, ci el ia conose sola par nom.

Dr Kiebitz no ia gusta la armada. Ance el, a sua tempo, ia debe es un soldato: “Si, como un bonvolor. Me no sabe perce me ia eleje un rejimento de artileria. Ta ce la dios olimpian vole nunca ce me revive la miseria de acel anio! Tan me ia sufri! Plu en moralia ca en corpo. Me debe confesa ce me ia es un soldato multe mal, la vergonia del rejimento completa, como la sarjentos ia ruji en mea oreas. Nunca a ante los ia vide un tal fenomeno, per dise un bonvolor per un anio, ci on ia susede nunca fa a un caporal! Cuando final alga comision ia declara ce me no conveni plu a servi militar, me ia suspeta ce los ia fa esta mera per no revide plu me en la periodos seguente de eserse. Per esta, en pasa, me es multe grasiosa a los. E tal lo ia aveni,” – aora sua peti vose xiliante ia frati en tonos apena persepable per la orea umana – “tal lo ia aveni ce Heinrich Kiebitz, dotor de filosofia, ia resta un canonor simple de grado du, en cuando la umana universal Hans ia oteni la insinia de sarjento!”

Pierre ia trovia sajia en distrae la irita de Dr Kiebitz a un dirije plu calma: “Ja a veses me ia oia ce tu nomi Hans un umana universal. Esce tu ta dise a me la razona?”

“Volente, mea cara,” – la dotor stimulada ia redeveni pasosa – “ma lasa ce prima me pone a table nosa come modesta de sera.” De caxetas del comoda el ia trae pacetas diversa, platos, tases, ance un stufa de gasolina sur cual, sin pausa, el ia boli acua per la te. Panes de jamon, salsixes, ceso e per cadun du talias de torta de miel sur cual el ia estende ancora un plu strato de bur. Ambos ia come bon e asta sasia. Entretempo Dr Kiebitz ia raconta:

“Acel Vogel es no fol. Ancora a alga anios pasada, el ia vive como un peti Oberlehrer⁴ de liseo en un vila de provinse. No bon paiada. Con nos la stato paia mal, ma lo dona titulos. Herr Oberlehrer! En acel epoca sua sposa ia reseta un erita bela. Direta la duple Vogel ia lua un cason en Wilmersdorf e el ia instala sua instituida en la plaza Winterfeldt, donante a se la titulo Dirijor. Acel loca ia es un aparte burjes. Tu mesma ia vide ce mea ofisia tal nomida es mera la cosina pasada. Tu instrui la cretines peti en un sala de dormi pasada; nosa graduadas futur asembla en la sala de come, e tal continuante. Me no sabe a cual grado Dirijor Vogel esele en la sujetos cual el ensenia, sempre jeografia e istoria, ma me es serta ce el es un comersiste capas. Consernante me, el suposa multe coreta ce me no va pote fa un carera briliante en un scola de stato, probable par causa de mea fiasco militar, e donce el paia mal me. Per compensa, el nomi me la xef de studias. Sempre titulos. E sua descovre la plu susedosa es Hans, nosa umana universal! Pos tre anios de instrui par la soldatos montante, Hans es la om perfeta per cura la du cavalos de senior dirijor. Tal, Hans, a cada dia, en matina, mediadia, sera, transporta la senior entre la cason en Wilmersdorf e la instituida en Berlin. Ma plu, Hans atende e ave la encarga del bon funsiona de la fornos en tota salas de clase; a veses, el scopi solos e coredores, limpi la muretas negra. El fa tota reparas a cualce tubo, a cualce valva. El introdui la visitores, sorti la turbosas, reali la misionetas de nosa aprendores, compra per los panetas e frutas, porta leteras de ama de clase a clase e poxi grasietas. En Wilmersdorf, plu, el jardina, frota la parcetas, aida la fem servinte e probable dormi con la cosinor. Esce esta, en sua manera, no es universalia?”

La cosa la plu desplasente a Dr Kiebitz en sua vive nonsposida ia es ce el mesma debe lava sua platos. Con un desinclina inata a tal atas sclavin el ia pospone comun esta labora asta cuando la colie completa de sua tases e platos ia es consumada. Alora el ia interveni sola – como el ia confesa en broma, sitante de Schiller –

sedente a la urje,
no a sua propre tende.

Sempre cuando posible, el ia lasa esta taxe a la mantenor del construida, un fem vea ma forte ci ia veni a du veses en cada semana per airi sua nido. Ela ia atende ance la lava e repara de sua telas e similes.

No disponente sua propre casa, Pierre no ia pote reseta Dr Kiebitz a se. De ves a ves el ia invita el a un restorante simple. En la mesma modo el ia regala ala, o en botecas de zucarosas, la amis a ci el ia deta un favore. Tal condui cortes el ia resiproci spesial con Hans Paulig, ci mesma ia abita bien en Berlin en situas simil a los de Pierre. On ia vide comun los en junta. La simpatia inisial grande entre los ia deveni rapida un amia armoniosa. A vide prima esta ia pote pare strana, car serta Pierre no ia es enerjiosa como acel Paulig. Pierre no ia segue cualce idea sin considera, an si lo ia promete turbosia, ma Hans Paulig ia esita nunca. Tan frecuente sua parlas ia presede sua pensas! Par causa de la similia asentuada, ance en esta punto, entre la deutx Hans Paulig e la franses Jean Duriz, sua camerada del Liseo Condorcet, Pierre ia demanda comun e seria a se esce no alga lege fundal comanda ce aspetas egal de corpo, cualias egal de fas debe moldi carateres egal, o, inversada, ce modos egal de pensa, de espresa de alma, impresa un marca egal sur la fases. Par coaveni, ambos ia ave ance la mesma nom individua. Hans, un corti de Johann, e Jean. On conclui, no, ce nomes individua influe la temperas? Cua tu opina a esta, Henri Merle?

Jeneral, Pierre, con la fida bela e nonegosa de jovenia, ia abri volente per sua amis la mundo de sua pensas. El no ia esita intercambia con los sua sonias e aspiras jovenin. Ma sur un tema, cosas de ama, el ia ave un modestia nonvinsable. No en pertine a la aventura con Senioreta Cohn; acel es nonseria, e si ancora el no ia mensiona lo ante Paulig, lo es sola car el ia previde tro bon la responde. Ma sua ama secreta a Annemarie Balkenwirth el ia asconde jelosa. Ancora nunca el ia parla sur lo, no a Hugo, no a Paulig. El ia senti ce esta tema es delicata, personal, tro pur; e ance tro nonserta per es esposada a un regarda stranjer cual ta pote sola dana lo.

Ai! A un ves, an tal, en un sede momental, alga refere ia evade sua controla a alga senioreta, un blonde clemente ci ia entra furtiva a sua cor. Tal Hans Paulig ia es informada.

En acel saturdi, Pierre ia ave un posmedia multe ocupada. Paulig ia insiste ja, an pos la rejeta inisial de Pierre: “Bonom! Tu no pote no acorda! Saturdi va es la aniversario de mea nase! E sin fali me vole festa con tu supra un botela de Liebfrauenmilch. Poi tu va dise a me esce la vino del rejion Reno no egali la vino franses.” Hans Paulig ia es orgulosa de sua orijina en acel rejion. Ma Pierre contrargumenta: “Nonposible! En acel saturdi me va labora asta la ora un de posmedia. Calcula per tempo de come mera un cuatriora, ajunta la tempo nesesada per viaja a tu, per senta con tu e festa asta Dio-sabe-cual ora, per reviaja a mea abiteria … Conclui: nunca me va trova me a la ora 4 en la strada Bülow per un ajendida nonposponable.

En fato, en acel saturdi la Cuatrofolia famosa va asembla en casa de Lotte, e lo ia pare ce Senioreta Annemarie Balkenwirth, “la presidente tal nomida” de la club, ia revisa ja sua punto de vista sur la conveni o nonconveni de aseta un om esterna en la secretas del peti ronda cluida, car resente Lotte ia informa Pierre ce on va bonveni el si el va vole fa la onora, e tal continuante … “No! Hugo no va es invitada. Si plur seniores veni,” – Lotte ia dise “seniores”! – “los va fa sin pausa un acorda mutua per irita nos!” Pierre ia dedui de la dises de Lotte ce Senioreta Balkenwirth ia converti a opinas min pasionosa partital a tema jeneral del franseses e plu spesial sur Pierre Touchard. El ia promete es presente. E aora la program de aniversario de Paulig intrui. Pierre no ia vole sede.

“Vide, Pierre,” – Paulig ia murmura, atentante empresta de alga Lorelei distante la fortia convinsente de encanta, en cuando sua oios peti ia brilia prometosa pos la vitros spesa de la lentes de sua oculo de nas – “vide, lo es completa simple. Nos va fa un cometa media con lunlotra, en mea cabana, alga cosa rapida preparada. Nos va vacui nosa botela peti, e tu va parti de me cuando tu vole. Si?”

E tal lo ia aveni ce su la potia encantante de acel vino del Reno, en senta intima con un bon ami, Pierre ia senti plu e plu serta de vinse. Sua cor ia pleni con joia espetada per la encontra seguente con Annemarie, la joia ia suprabola, e de confida e confida, Pierre ia relasa sua secreta. El ama un fem blonde.

“Lodas, cavalero! Ta ce tu vinse!” Los ia puia sua vitros a lunlotra. “Como olio lo flue! Como olio …” Pierre ia surie e Paulig ia xerca informa: “Esce la encantor blonde resiproci?”

“U ala la cosa coxea,” – Pierre ia confesa – “ma oji un aveni presenta se, e me va usa plen lo. Par esta causa, tu va pardona, Hans, si me no resta longa con tu. Oji me debe ataca e vinse!” Avansa!

Ho, ho! Tan desidosa! Diablin, acel botela del Reno!

Hans Paulig ia mostra un comprende completa de la situa. “Tu va vade a gera cuando lo conveni a tu, vea ami mera … vole dise mea ami vera, ma en cada caso no ante ce tu proba mea Hackepeter, Hackepeter, la divin, la cura la plu gastada, pardona, la cara la plu gustada! Me mesma prepara lo longo un reseta personal.”

Cuando el ia es bonumorosa, Hans Paulig ia sede sin pensa a esta mania: inversa leteras en alga parolas sempre cuando un diverti comica o bobo ia pote resulta de la misca. Paulig ia sabe eselente finje ce sua lingua ia tropeza e ce el mesma, plu ca cualcun, es surprendeda par la desformi nonespetada del sinifia, cual ia colpa sempre la escutor nonavertida como un contrapete xocante. Instante, presisa, instintosa, el ia deteta tota posibles de tal inversas e ia inserta los en la conversa, parente en modo tan naive e natural ce la impresa ia resta ce el mesma es la vitim de un era de pronunsia nonfortunosa. Si la resulta de esta ia es odiable, an plu bon! El ia demanda per pardona, ia restora la sinifia coreta e ia saborea en sua interna la potia de sua efetos de permuta. Un espresa como “dio volente” ia esflue de sua boca como un “via dolente”; un tarte de pera ia deveni un parte de tera e tal plu.⁵

Paulig ia desapare ja tra la coredor a la cosina. El ia abita suluante de la vidua vea de un ofisior de stato, ma sin asede al table de come de ela. Esta ia lasa multe libria a sua caprises. An tal, el ia ave la direto de usa la cosina a sua vole. Jeneral – estra per la cafe de matina – el ia fa esta sola a veses esetal, sola a fini del mense, si la xece postal de sua padre ia es retardada. Pos alga tempo, cual no ia pare longa a Pierre fantasiante, Hans Paulig ia reveni, bambolante en porta sur un platon grande un Hackepeter jigante, un carne axida e ros, cru, ja miscada, bateda, salida, peperida con esta e acel. Un vaso peti de mostarda ia sta separada, como ance un vitro de caparas e plu ingredientes diversa, conoseda o no.

Nondisputable lo ia es eselente. Pierre ia descovre instante en lo alga sabor spesial, pico tisante, tota no desplasente; si, el ia reconose lo, cual es per dise, aprosima … Esta sabor, esce lo no es alga cosa spisosa en la cosina de sua madre? La jovenes ia come con bon apetito. Pierre no ia reserva sua lodas a sua ami capas. Final, pos engoli la peso ultima, el ia identifia la trumfo de la jua:

“Hans! Tu ia ajunta alio, no?”

“Alio? Si, serta, an plur, multe, mea reseta personal esije lo.” E esplodente su la presa de un rion, el ia declara: “Esta va es per tu la demostra la plu clar: si tua fem blonde permete posa la peca, o! pardona, besa la boca, tu va pote trompi tra la universo ce tu es amada!”

“Tan intelijente!” – Pierre ia grima. Ancora el no ia prende un vista vasta del grado grande de esta vandali. El ia deveni consensa de la desastre sola pos alga tempo, cuando, en revade a casa, el ia encontra Ohlberg en la plaza Alexander. “Xico!” – Ohlberg ia esclama, retirante se tra du o tre pasos con brasos estendeda. “Tu ia engoli tota un bulbo de alio! Ci tu vole anestese?”

E cuando Minna ia abri la porte a el, sua demanda direta ia es: “Cua tu ia come, senior Pierre? Esce tu no crede ce lo ia conteni alga tro multe alio?”

Turbante! Multe turbante! Pierre ia desapare en sua sala. El ia es furiosa contra Hans Paulig. Ma cua el va fa? Futil frotante, el ia consuma la resta se sua pasta de dentes, futil el ia gargara profonda con acua saturada de Odol. Penetrante, ostinosa e vinsente, reintruinte pos mera un pico de momentos ia es la osese del alio, cui volum ia desupli en sua imajina alarmada. El no ia es un fumor e donce no ia pensa ce alga sigaretas va pote cisa oposa la invade.

Cuando el ia oia la vola pipinte del cuatrofolianes entrante a la atrio e coredor, el ia deside no mostra se entre los. Ma no multe tempo ia pasa e el ia debe sede al insistes de Lotte. El ia segue ela a en la sala de come, con tota no orgulo. A cada presa de manos el ia balbuta sua saluta, turnante sua testa a via. Nunca el ia fa inclinas tan profonda. El ia envia sua respondes, como enfantes maleducada, a angulos del sala tan distante como posible. Cuando el ia crede ce nun oserva el, sua soflas ia xuta apestas pesosa a la sofito. Cuanto el ia pote, el ia evita parla. Si vera nesesada, el ia pone un mano vergoniante ante sua boca. El ia prefere resta muda, intensa ocupada supra sua tas, sorbente cafe pos cafe, con zucar, sin zucar, con lete, sin lete, e fa peti masticas asidua de torta pos torta. Furtiva el ia oserva Annemarie e ia roji su la regarda de ela, cual el ia interprete como un reproxa.

La conversa ia coxea. La xicas, ci ia espera multe de la enerjia franses, ia senti enganada, no sola Lotte, ci ia conose cuanto la inspiras subita de Pierre pote salta, ma ance Hedi e Trudchen, ci ja a plur veses ia ave turnos per cade su la encanta de sua lodas tropezante en flirtas stimulante. Sempre denova, ma sin susede, los ia atenta fili Pierre a la dansa sirculinte del parlas alida. El ia coce lenta en apatia isolida. Sua disposa ia es tan noncomun, nonatural, ce cuando, su la escusa de un labora urjente per sua cursos, el ia solisita la permete de revade a sua sala, nun ia oposa. El ia lasa pos se un confonde grande.

“Cua es mal a el oji?” – Hedi ia dise stonada. “Me tota no ia reconose el!”

“Me no pote suposa ce el no ia gusta nosa sosia.” – Trudchen ia sujesta a se con un espresa subita de teme sur sua fas.

“Nunca me ia vide el tan torpe rijida.” – Lotte ia dise. “El ia aspeta como un campanian ci trova se a ves prima en un salon.”

“Esce tu no crede” – Annemarie ia interveni – “ce pur e simple tua idol ave alga cosa contra me? El ia vole mostra ce mea presentia no plase el. U ala tota. Tu mesma ia raconta la tipo de om joiosa e divertinte cual el es cuando … me no partisipa en tua juas. Me regrete ce me ia priva vos de vosa plaser.”

Cuando, en la mesma sera, pos ce la folias ia vola a via, Lotte ia xerca informa – “Cua ia es mal a tu, Pierre? Tu ia condui tan strana e stranjer ce tu ia ansia me. Esce tu no ia senti intera sana?” – la joven ia pote dise mera: “Me es triste pos acel spetaculo stupida cual me ia presenta. Vera, me no ia trova me en mea state normal. Tu va desculpa me entre tua cameradas, no, Lotte?”

“Serta, Pierre, ma cua ia aveni a tu?”

“Tu no ta comprende, Lotte. Crede ce me regrete sinsera.”

Hans Paulig, la farsor frivol, ia dijesta fasil la reproxas de Pierre. “Nos no ta confusa” – el ia parodia con fas seria la manera de Kiebitz en profesoria – “e nos no ta misca, per favore! Astronomia es un cosa – gastronomia un cosa completa diferente. No inserta en la sapatos de Hans Paulig la atas stupida de Paul Hansig!” U ala.

Pierre ia sabe ce sua ami, en momentos de malcondui, aplicante sua sistem de inversa, ia presenta multe frecuente se como Paul Hansig. Tan comun e capris el ia fa esta ce, a pos, el mesma ia demanda a se esce sua nom es vera Paul Hansig o Hans Paulig. En situas nonplasente, como oji, el ia proba usa, bromante, natural, la alibi de la un contra la otra. Pierre ia es vidable noncontente, ma la astutia de Hans Paulig ia es nonretenable. El ia jeta sua ideas en un serie noninterompeda e noninterompable. Resiniante, Pierre ia escuta la predica intera. Si el ia surie, el ia fa esta sola contra sua vole.

“… Donce no serebri esce tu debe vergonia o mera repenti pos un tal bromo pica, vole dise broma pico! Aposta ce me va vade, cuando me eleje, a cualce encontra, con boca ancora plu aliosa ca la tua ia es, e ce pos comentas porta … momentos corta me va concista an un senioreta la plu malvisida, no? Tu va vide ce alora el va aseta tan grasiosa la pesa del barcon, pardona, la besa del padron.”

Pierre no ia responde. El ia resta meditosa. Triste el ia divina ce multe probable la tatica de Paulig es justa. Ma sola en modo jeneral, el ia ajunta per se, car el no ia vole imajina ce a cualce tempo Annemarie Balkenwirth va sede a tal maneras de husar.

Par via de Pierre, ance Hans Paulig ia entra a la clan sirca Hugo, presentante se a algas como Hans Paulig, a otras como Paul Hansig, tal ce nun ia sabe plu. Instante, en acel ronda de persones cuasi coedal, el ia es bonvenida e respetada como divertor. El ia ave la elasticia del abitores del Reno e ia es multe plu rapida de pensa ca la berlinanes solida ci ia sabe fa scrimas de parolas sola par clixes, comun comica, frecuente forte, ma ja tro conoseda tra tempo longa. Paulig ia es capas de inventa fluente, longo la acasos de la situas. On ia ave alora un moda snobe, cual ia fa no plu ca vasti en tempos plu tarda, xef entre la jinasianes, per usa, en loca de alga espresas sempre repetente, mera la leteras inisial. Par esta, longo la dise, on ia gania tempo. Ma en veria on ia perde tempo, car un abitua ia esiste de clari la leteras misteriosa par completi los direta a pos, a cual bromores ia ajunta ancora un pico de interpretes, regretable ance ja no nova. Tal, sola per dona un esemplo, si un person ia fa un sujesta a sua cameradas e si la sujesta ia conveni, sin pausa on ia trova algun ci responde “M.W.” con la sinifia “machen wir – nos va fa lo”, e el ia ajunta, usante la clixes, “Möbelwagen”⁶, “Mettwurst”⁷ e similes. Un person de tipo total diferente ia es Paulig. El ia ave sua propre colie e ia pote, ja al encontra prima, stona sua colegas joven. Pos la presenta – lo ia aveni sur la strada – Pierre, la inisior, ia pensa ce resta stante sur la troteria es nonoportun e ia proposa ce tota de los vade a Aschinger per un vitro de bir. Instante Hugo ia dona sua acorda par la formula “C.p. – Con plaser!” e no ia oblida continua la serie, fidosa a la clixes: “canta plana, carne picida, cravata papilin!” El ia para, fatigada. Poi Hans Paulig ia improvisa plu: “Ci pote, cuando pluve, core pisinte, contra platos, como porco, cara Pierre?” On ia aplaudi longa el. Sua fama ia es firma fundida. Pos corta el ia reseta la titulo Re del Contrapetes.

Alga ante natal, cuando la clan, cuasi completa, ia pasea avida per aventura sur la strada Tauentzien, la jovenes ia encontra du xicas de la Cuatrofolia, Annemarie Balkenwirth e Trudchen Bachmann. Multe coreta, con xapo en mano, la cavaleros ia saluta con la clica obligada de talones e acel inclina automata de peto en linia tan reta ce Pierre ia pensa a cada ves a la anguli rijida de un cotel de pox cluinte. Los ci “ancora no ia ave la onora …” ia es presentada a la senioretas. Pronto Pierre ia perde sua calmia. Lo no ia plase el ce de aora ance Hans Paulig va conose senioreta Balkenwirth. Esce no pos corta el va divina ce esta es la blonde del fantasia? Pierre ia teme sua parleta frivol. Hans ta es bien capas, mera per diverti sua cameradas, de maxa sua secreta con la corposia de un elefante.

On ia acompania la xicas direta al eglesa Gedächtnis. Pierre ia ave un sola preocupa: el ia debe par cualce escusa reteni Hans Paulig de la senioretas. Pierre ia lenti sua pasos tan multe como posible. Hans ia turna a el con la ginia comprendosa de un complis: “Multe adorable, acel person encantante. Lodas!”

“Hans, per favore, no parla tal!” A la eglesa, la grupeta prima ia para. La xicas ia desira continua solitar. Los ia comensa dise adio. Pierre ia espira, librida. Paulig no va ave tempo … Cuando, la ultimas, los ia ariva entre la grupo stante, probable Bastrow ia proposa ja ce la senioretas longi sua pasea con la jovenes. Ancora sua regarda, plen de amira e desira de ama, ia es colida a la fas de la xica, ma Annemarie ia dise: “Grasias, Erich, nos conose nosa via e ance nosa program de labora. Cisa lo ta es saja si ance tu ta vade per reregarda tua aljebra!”

Bastrow ia comprende la refere. No sabente responde, el ia resta muda, stante en embarasa, torpe puiante un dito longa entre colo e colar. Poi Hans Paulig, con cautia de caracol, ia envia sua antenas a ante e ia declara su un masca de trajedia: “O, senioretas, no vade ja a via de nos. On ave entre nos un cui cor va rompe …” Annemarie ia interompe, multe diniosa: “Sr Paulig, lo pare ce discretia no es tua virtua xef!” La ronda ia rie. Pierre ia tremeta. Esce la babelor no va silenti? Hans Paulig no ia vole resta su reproxa. El ia nesesa jeta sintiles.

“Senioreta, tu es un fem saja. Ma sajia es un cosa, masaje – un otra! E tal como masajes, ance paseas con jovenes de inteleto es usosa, nesesada. El ci labora sin pausa fa un labora orosa porosa! Pardona, ia vole dise erosa perosa.” Trudchen Bachmann ia libri un cascade de rie e ia repete: “Orosa porosa!” Ma Annemarie ia leva sua surie la plu moderada e ia dise: “Me amira la rocetos astuta de tua jergo, Sr Paulig, ma los no va sufisi per lumina mea sielo. Asta revide!” – e la xicas ia aseta la inclinas del jovenes inteletosa.

Hans Paulig is contrae en sua conca en ce Pierre ia vinse en sua interna: “Brava, Annemarie! Tu no va cade su atacas de husar!”

Ja distante, Annemarie ia confida a Trudchen: “El ave serta alga cosa contra me, tua franses. Tu ia nota ce el ia resta con intende pos sua cameradas?”