Capitol 5
Sra Bertringer, un mestresa consensa de sua taxes e debes, en la dias presedente ia esperia a ves pos ves en sua mente la serie del organizas festal, con la sola desira de serti ce los desenrola ecuilibrada; an tal, el no ia es sufisinte serta de se per rejeta la pensa ce, en alga detalias, probable no tota va vade esata longo sua calculas. Total justida.
En acel momentos de repetes preparante, el ia vide se stante a la ora fisada a la limina del cabana do la banceta va aveni, e dirijente ordina a la flue del arivores, cadun coreta a sua loca definida. Ma el ia fali previde la fato ce la consentas per aperitivos va bambola ja la disiplina, no sola per la jovenes, ma ance entre la veas. E aora, cuando la state maturinte del carnes rostada ia consela ce, per conserva tota lor jus e sabor, on debe no pospone ataca la platos prima, aora lo ia es vera nonrealable ce tota persones leva a la mesma tempo per vade direta a la garaje.
An entre clamas e invitas repeteda, la visitores en la sala bon ia separa de sua sejas en modo sola gradal, como si con regrete. E cuando final los ia sta, los ia reformi instante grupos avida discutente. Algas ia comensa an senta se denova! Otras ia vade furtiva en dirije a la stalas, xercante un posible de isoli oportun per nesesas personal. Ancora otras ia debe asoluta consulta sua sposa e no ia trova el, en cuando la jovenes mas, ja sur la patio, ia resta sorda a la urjes “Al table!” e ia continua core corposa pos xicas xamante asta la campos visina. Sola Bignol no ia fali oia la invita jentil. Nonpausante, el ia repone sua strumento en la contenador e ia acrupi espetosa ante la porte del cosina, como la prima ja preparada per labora sua mandibulas.
Tal alga tardia ia apare en la program.
“Mea dio! La rostas va es tro coceda!” – Sra Bertringer ia cexa suspirante ante la forno grande. Vidente sua espresa misera, la femes presente ia declara consolante – “No problem! Nos vade!” – e los ia comensa puia la omes a la garaje, cortes ma sin esita, tal como on asembla un manada sperdeda, un ata per cual esta femes-cultivores solida ia ave alga capasia.
La garaje ia es ja plen de tumulta cuando Sra Bertringer ia ariva con intendes organizal. Tro tarda! El ia susede apena fisa un conca protejente sirca la nucleo del duple festal Lisette e Louis, ci ia ocupa la sentro del table. Sirca los Sra Bertringer ia senta senior prete, Sr e Sra Touchard, mestre Bertringer, la tio-avocato de Compiègne e alga relatadas ci, spesial esijosa per un aplica rijida de protocol, ia espeta vidable la loca obligada a lor grado de relata, e ci donce ia presenta se par volunta libre a la sejas coreta. Ma la otras ia senta se, si no par metodos acaso, a la min seguente lor simpatias. La simetria bela, laborosa calculada par Sra Bertringer, ia es malversada – sin cualce dana, en fato.
Cuando totas ia senta – e esta no ia aveni sin ruido e perde de tempo – la mestresa del casa ia lasa sua regarda inspetante a flota sur la ordina improvisada del table. Vera, la sena ia conforma sola partal a sua projetas, ma per compensa, el ia ave la plaser de pensa ce cualce noncontentes imajinable no va pote dirije reproxas contra el a pos, si los mesma ia instala se par propre moves entre visinas nonplasente. Dédé e Julot ia es cavaleros a lado del du xicetas ci ia porta la coda del velo en la matina.
Sola Museta, sempre desfavoreda par la fortuna, no ia sabe bon manobra per oteni un loca plu oportun. El ia senta como un escluida a un fini del table, entre jovenes bufoninte. De sua surie cuieta, ma intera neutra, on no ia pote divina esce el prende joia o noia del conversas caososa sirca se. Sra Bertringer, ci par natur ia nesesa crea per se a cada momento curas nova, ia demanda ja a se esce acel om vea no va es frustrada, e esce lo conveni ce on lasa el tan distante. Ja ela ia scema como on va pote discreta transplanta el asta persones ecuilibrada del mesma eda. Ma alora la platos sirculinte con la comedas prima ia pausa esata ante Museta, e el ia recolie tan asidua tota boles de salada, ajuntante talias larga de jamon, salsix e tarte, ce multe evidente el va ave instante un ocupa interesante. Vera, el ia comensa come nonpausante con tal enerjia del mandibulas ce, contra vole, Sra Cécile ia debe pensa a un coneo entre folias joven de col.
E on ia ave ala Sra Perrin con sua dentes nova desaponable. El ancora no ia deveni bastante serta sur la dentes, aora sin fesura, e donce, a cada esplode de rie, sua mano ia continua scermi protejente ante sua boca, an si no plu motivada. Dio sabe par cual rus el ia susede afisa se a lado de Sr Denique, acel cuatrodes-sincan potiosa, lejendin conoseda como nonsedente nonsposida! “E bon,” – Sra Bertringer ia jemi pico – “nunca me ia ta pensa asosia acel du, la vidua joiosa e la nonsposo ostinosa! Ma vera elo no pare desplaseda.”
Pos la platos prima, stimulante acompaniada par la zelo creosa de un vino blanca de Pouilly versada de un botela con eticeta de anio bon, la asembladas ia deveni plu comunicosa. Aora vibrante, nonpersepida, tra persones ci a un pico de oras pasada ancora no ia conose lunlotra, on ia ave un esflue de unia corajinte. Los ia ave esperias comun, serta, donce temas de interesa comun per parleta. Lo ia sufisi ce algun mensiona la intercambia del xapos silindre per fa ce totas revive la sena comica a la sorti del eglesa, e ondas de rie vososa ia sperde instante. An la plu diniosas de acel vitimes, ci ia pardona ja longa la duple enganante Dédé e Julot, ia junta se a la ries nonfrenida.
Un spetaculo tan bela e bondiseda lo es, cuando en acorda armoniosa la conversa progresa par pasos egal con la platos! Lo es vera ce ance par pasos egal on ia ateni un deseveri del vestes. Ma perce on ta regrete? “Si on condui perfeta, on no pote banceta!” – Bertringer ia confida corajinte a sua visinas, ci ance a sua lado ia es cuasi sofocada par la caldia cumulada en la cabana. E sin pospone, Bertringer ia desapone sua jaca, poi imitada par cuasi tota omes, con ce la femes, ci ja a ante ia libri la botones alta de sua robas, ia ave aora no plu modo conveninte de venti se.
Totas ia acorda per loda la salmon en maiones, un regala rara en acel rejion campanial. Per acompania eselente on ia ave un xabli pico bruta. Cuando la bove rostada ia ariva, en talias majeste cual su un esterna alga crostida ia conserva sua jus vivente de carne ros, la omes ia desapone sua colares de camisa, a custa del protocol, serta, ma a profita del comforta.
Con la carne de bove on ia traversa a la vinos roja, sin protesta, como conveninte entre persones natural nondisposada a eresias gastronomial. An si lo ia es comun – on ia presenta lo en carafas anonim – la roja densa aljerian, como Bertringer ia dise, ia plase a la palatos, e senior prete Lanternois ia solisita discreta la informa de do Bertringer ia compra lo. “Ideal per vino de misa!” – el ia atesta, sin duta sola per loda lo.
Poi la tre femes aidante, gidada par la felisia radiante de Augustine, ia fa un entra rituin, cuasi en prosegue, la un pos la otra, cadun portante du platos sur brasos estendeda, con carne de gal ancora fuminte. Los ia es segueda, egal formal, par Bignol, ci – sensante en se un velia subita de talentos de servor – ia vole forte colabora. El ia susede porta, intera nonaidada, la cuatro contenadores jigante de pisos fresca, usante per esta no un platon de servi, cual ta es banal, ma mera sua manos e brasos. Sua jinastia ia es videda e recompensada par aplaudis. Veninte a fini ia es Biqui, la pastor orfan, ci ia teni la portasalsas.
On ia ateni la culmina de un banceta bondiseda. De alora la conversas ia es puntuada par crias peti de rie sempre plu xiliante. E la jovenes ia deveni sempre plu ruidosa. La enfantes, ja plen sasiada par come, ia comensa move e ata con desbridi perilosa, spesial la asosia asustante Dédé-Julot. Lor descovre la plu resente ia consiste en rampe su la table longa per pinsi gamas nonconoseda. Inisial esta malcondui ia es bonumorosa tolerada, ma la repetes ia irita. Final, car la reproxas suave del jenitores ia resta sin responde, Sra Bertringer ia consela: “Ta ce los jua sur la patio. Los no pote senta tan longa sur la mesma loca. Core a estra, enfantes! Vos va reveni per la deser.”
Finida ia es la armonia bela del comensa. De acel momento cuando la enfantes ia sorti, la grupo ia es nunca plu completa. Lo ia aveni sempre ce un o un otra manca. Sra Bertringer mesma, contra vole, ia dona la esemplo. El ia parti del table car el ia debe asoluta regarda pico en la cosina. Poi la madres del enfantes sortida ia vade, pos lunlotra, per serti ce la fie cara no ia susi sua vestes formal. De ves a ves ance esta o acel om ia desapare con intende tan fasil divinable ce vera no escusas ia es nesesada, an si los ia dona indicas par clixes gastada: “On no pote sempre versa la vino a en …” o “Alga pluve no va nose la carotas de Bertringer!” – o par otra formulas, cisa plu estrema ma no min sufisinte.
Sola per la deser la grupo de table ia deveni denova densa. Con fas joiosa, totas ia espeta la apojeo. Lo ia es anunsiada par la tapos sonosa saltante de botelas de xampania, con ce la servores ia posa sur la table acel tortetas de crema e moca, per cui prepara perfeta e presenta artal Sra Bertringer ia es ja longa famosa en la rejion. Poi senior prete, pos un tintina avertinte de sua vitro, par cual el ia ateni un silentia cuasi instante, ia leva per dise, conveninte a la situa, la brinda nonevitable.
El ia comensa par asentua la vive cristian del familia Bertringer, traversante a remente como a dudes anios pasada el ia ave la plaser de bondise Lisette, batizante ela supra la trogo santa en la eglesa de Autrecourt, car “en acel epoca la madres en nosa viletas ia pari ancora en sua propre casa, tal ce la enfantes ia nase su teto de sua jenitores, an si oji nosa femes joven sede plu e plu a la moda nova. Cuando lor tempo veni, los demanda ce on prende los a un ospital o clinica urban per reveni con un enfante ci ia reseta la rituo de batiza estra sua vileta de casa. E an tal, esce lo no ta es bela, reserva la ata cristian prima a sua parocia?”
Sr Lanternois no ia insiste plu pesosa sur esta tema, multe cara a el, per no dona a pensores libre cisa presente – ci, an sin tal dises, tende tro frecuente egali la ofisia de prete a un emprende comersial – la posible de suspeta ce el atribui a sua colegas urban un competosia nonsuportante.
El ia continua, disente como, plu tarda, el ia ave la onora grande de prepara Lisette per la Eucaristia Prima e, aora, lia ela par sposi a un om joven de familia bon cui avis, a lado del madre, ia es conoseda con respeta en la rejion asta lor mori. No tro detaliosa el ia parla sur la momento prosiminte del separa, cuando la Sra Touchard nova va parti del ximineria del jenitores per fundi mesma, en un vila visina, sua propre casa, ma esta mensiona ia atrae an tal un pico de larmas a la oios de Sra Cécile, e la padre ia masci sua emosia pos un vitro levada.
La prete ia fini par formi desiras per un vive longa e felis en ronda de multe enfantes. Totas ia aplaudi forte, contente ce Sr Lanternois no ia sorti del strutur de retorica sobre e no ia malusa sua direto de parocior per parla plu longa. On ia sta, ia puieta la vitros a lunlotra e ia bevi, a un plu ves, per la sania del duple nova con multe crias de “vive!”
A la mesma tempo cuando alga senioras versa la cafe, la femes aidante ia trae la “pos-cafe” tal nomida. Lo ia consiste xef de acel coniac de mirabel distilada a propre casa, un spesiali del campania de Loren. Ma per la importa del situa, Bertringer ia ajunta oji ance botelas de otra fontes. Asi un coniac de tre stelas, de un sentro nobil de vinos prosima a Bordeaux; asi un coniac de serisas de Fougerolles en la montania Vosges; asi Calvados, acel coniac pal jala de pomas de Normandia, en cui sabor de fungos mofosa sola un palato educada pote trova un valua; asi la botelas de formas strana, simil a lanternas, con la Cointreau Triple Sec famosa, e otras, de taies ancora plu larga, con la Benedictin no min famosa, un produida autentica del monceria de Fécamp, ambos delicata dedicada a la senioras. Tal, a la aveni del sposi su teto de Bertringer, multe provinses de Frans ia partisipa la banceta, cada en sua sustantia la plu bon.
Cuando Sra Bertringer ia proposa a senior prete – “Un pos-cafe, no?” – esta ia responde partal protestante, partal acordante – “Sola du ditos, per favore” – e, ilustrante sua parla par un jesti, el ia pone du ditos orizonal, la un sur la otra, contra la vitro peti per marca la mesura coreta, e, vidente esta, Dédé, ancora su la influe de un vino blanca furtiva bevida en alga modo, ia comenta subita: “Senior prete ave ditos spesa!”
“Tu no va silenti?” – la madre ia reproxa embarasada, ma ja on ia rie a tota lados, notante ce Sr Lanternois ave vera ditos plu spesa ca normal, de calibre aprosima la mesma como acel salsixes de sangue de porco, multe gustada e nomida boudins en esta pais. E Sra Bertringer ia confesa riente e rojinte: “Serta, per conforma a tua mesura, la altia de nosa vitros peti no sufisi!”
Sr Lanternois mesma ia es tan jentil ce el secute en rie e remete la impertinentia del xico par parolas moderada: “He, un peti farsor! El ave un capasia agu de oserva.” Ma el ia comprende ance ce per el, ci no gusta fa la rol de intruor, la momento de retira ia ariva. No causada par la comenta de Dédé. Sr Lanternois ia es tro clar de mente per vide en lo cualce plu ca mera la parla naive e donce comica de un enfante. Par otra sintomes el ia es avertida. Cuando on ia rie sur la spesia de sua ditos de boudin, esce el no ia persepi un ironia, an si diseda sola a duivose? “Acel ditos pote distribui bondises solida!” Plu ca la sinifia, la tono ia indica un cuantia de burla, e donce de desrespeta. Plu, a veses la conversa del omes ia lisca a referes de un tipo cui asentua ia es restrinjeda sola car el es presente. E la jovenes fema! Esce los no espeta sin pasientia ce el parti, per pote vosi cantas frivol e comensa la dansas? En tal eserses, pos tal bancetas, alga esedes de parla o jesti es serta nonevitable. “Pecetas pico,” – la prete bon ia conclui – “ma mea loca es no plu asi. Ta ce la recolie per confesas futur confidable maturi sin me.”
Donce, pos bevi la cafe e “gusta” la pos-cafe – como el mesma ia dise, car el ia sabe distingui entre la modos diversa de consuma – senior prete Lanternois ia solisita ce on permete el a retira se. El ia dise adio a Senioreles Bertringer, trovante sin difisilia la formula conveninte de grasia; a Lisette e sua sposo el ia desira un viaja plasente, car on ia sabe ce la duple nova va viaja a via, ancora en la mesma posmedia, a la costa euscara, per reveni pasante tra Paris, natural. “… e no fali visita Lourdes cuando vos es en la sude. Lo no es distante de Biarritz. En vosa preas a la pedes de la Virjin Miraclosa, per favore, no oblida me!”
A la otra persones presente el ia dirije un sinia discreta de saluta par mano e ia sorti, evidente atentante no interompe la ritmo del joia.