Capitol 25

Pierre ia retrova sua padre, multe malada. Ja a ves de sua visitas la plu resente, a apena ses semanas a ante, el ia nota un cambia definida en la senior vea. La padre ia magri e aora ia refusa toca an la platos la plu atraosa presentada par Augustine. Cuasi, el no ia sorti plu de leto.

Louis, sua frate, no ia asconde de Pierre ce poca espera resta per un resani posible. “Profesor Vautrin, de Nancy, ci nos ia veni a un mense pasada, ia diagnose canser del pancreas. Nonsirurjiable. Me no ia vole ansia tu cuando tu ia es ancora al fronte …”

Pierre ia modifia sua projetas. El ia opina ce, como fio, el debe resta con la padre asta la fini. El va resta en Autrecourt, tan nonotada como posible. Rumores ia sirculi ce la deutxes aresta tota ofisiores movablida en la armada franses en la gera resente. Pierre ia recorda la consela de Paulig. Crea per tu un identia nova. Entre la paperes lasada a ves pasada en casa del padre, Pierre ia retrova sua pasaporto. Esce el no pote fa a lo un “macia” peti? Par raspa pico la dijito ultima del anio de nase 1895, el va pote muta lo a un zero. El mesma ia es stonada ce esta es tan fasil per fa.

E perce no cambia ance pico la nom? Touchard. Lo ia es scriveda par mano en leteras major noncorente. La T inisial, mera un linia peti orizonal supra un linia vertical, mesma ia sujesta un completi fasil per reseta la forma de B. Lo ia sufisi ce el atende ce la inca ave la mesma color. Tal el ia deveni Pierre Bouchard.

Ma pos la letera final, ancora multe spasio ia resta. Spasio vacua. Perce no continua la camufla? Sin esita, el ia ajunta cuatro leteras. De aora el ia ave un paper de identia conveninte, un pasaporto produida par la Prefetia de Paris, en la anio 1938, su nom de Sr Pierre Bouchardelle, naseda en 10 april 1890. La posesor de esta pasaporto es oji, ofisial, alga plu ca sincodesan. Per merita plu bon un tal alti subita de eda, el ia deside crese sua barba. Esce Paulig no ia dise “Vade a Jerico e crese tua barba”?

La vive en Autrecourt ia retrova sua flue costumal e nonvariante. Aora finida ia es la dias joiosa del epoca de garnisones cambiante, la esperas fasil ce un vinse final va veni en dormi. Aora cadun ia senti sur sua nuca la mano plomin de realia. Frans vinseda. Sua futur nonserta. La elites del omes joven detenida en prisones deutx …

En la departe visina Moselle, per la amis en Chanzy – aora denova Schanzach! – la ansia ia es ancora plu osesente. La Gauleiter deutx Bürckel, en Metz, ia informa tota persones loren: “Esta tera es de aora deutx per sempre. La popla campanial de lingua franses no va pote resta plu longa sur nosa tera deutx. Natural, nos no vole mata los, an no forsa los a via, ma los va debe eleje. O los va migra a Frans par propre vole, o par volunta libre los va aseta es transplantada al Warthegau deutx.” Warthegau! Un provinse en Prusen Este, do, sur pesos de tera avar, la campanianes loren transplantada va pote spende sua fortia! Los pote eleje par volunta libre! Bon, los ia eleje.

Ja Sr Mazotte, o alga membro de sua familia, ia veni, sempre cuando los ia pote, per lasa ascondeda con Bertringer tota cual los no ia pote porta migrante. Los ia pote pasa sola cuando la duanores deutx ia es ocupada en otra loca. Alora los ia contrabanda tra la frontera nova sua telones de leto, coteles e forces de arjento, mobilas peti de casa, cosas personal, an si no multe valuosa, a veses ance avias, coneos, an un porco. Ci no ta desira salva ance acel?

La sola faro per la patriotas en esta periodo caososa ia es la jeneral joven de Gaulle, apena conoseda ancora ier. El ia deveni la xef de resiste. Tu ia oia sua clama par radio de London? “Frans ia perde un batalia; lo no ia perde la gera! Nos va continua plu batalia asta la vinse final!”

E lo ia es autono. La fria veni temprana en Loren. Nubes gris ia flota basa supra la tetos de telias roja, supra campos nudida.

En la dia 2 de novembre, la padre de Pierre ia mori. En esata acel dia cuando la eglesas cristian recorda sua mores. Lo ia pare ce esta om modesta, ci tra tota sua vive ia evita disturba cualcun, ia vole modesta ance en sua mori es sola un person mor entre la otras. An la campanas en la tore del eglesa de Autrecourt, cual par costum eterna debe anunsia a la vileta la mori de un de los, no ia es spesial disturbada par Sr Touchard. En acel dia, lor taxe bien en cada caso ia es la trae de resonas funeral per onora tota mores cristian. Los no ia nesesa sona spesial per Sr Touchard.

Pierre ia deside refuja se en la Zona Sude. Ala, serta, el va trova un ocupa per gania pan. El ia sabe ce acel via es barida, cuasi nonusable, estra con permete spesial. Si entre Autrecourt e Chanzy – o “de aora per sempre Schanzach” como la suordinadas de Gauleiter Bürckel ia dise – la frontera nova, longo la linia de 1914, ia es gardada cuasi en modo de amator, sola par duanores vea, la Linia de Limina, como la jergo de legores ia nomi la frontera entre la du Franseses, ia es sever cluida. Tota puntos de traversa ia es firma securida. Los ia abri, partal, sola per los ci ave en mano un permete regular marcada par la xefes deutx. Ai per la contrabandor riscante ci ia es descovreda par lor canes de xerca prosima a acel linia!

En acel dias Mazotte ia veni, con sua fio Gaston, per fa un visita de adio a Bertringer. Ala Pierre ia encontra los. La du Mazottes ia conserva no plu ilude sur sua destina. La menasa de Bürckel va reali pos corta. Asta aora los ia espera ancora pico ce on no va osa forsa a via la popla de un rejion intera, ma aora la program ia presisi neta. Ier un comision deutx ia veni per crea un lista del casas e la bestias cual on va lasa. Ja a du semanas pasada la listas del persones per esclui ia es preparada. Cisa doman, cisa la dia seguente …

Pierre ia demanda, plu per broma ca en modo seria: “Tu no ave un loca peti do me va pote senta?”

“Tua nom no es nel lista,” – Gaston Mazotte ia regrete – “ma … si, si tu vole! Pos ce los ia fa la conta de nomes, Justin Beaupré ia desapare del vileta. On dise ce el asconde en Metz, en casa del sore. El no vole parti del pais. Si tu vole responde en sua loca cuando on clama sua nom …”

“Lo no ta es la ves prima ce me profita de un situa simil. E vera, perce no? Esta ta simpli multe cosas. Acordada. Doman me va vade per abita en Chanzy.”

E lo ia es un tempo urjente. En la dia seguente, en temprana de matina, Chrétien, la ofisior vea de vileta en Chanzy, ia prende a ves final sua tambur per anunsia a la abitores la comanda espetada:

“Tota persones, abitores de Schanzach, ci ia espresa sua desira de migra a Frans, debe presenta se oji a la ora 11 ante mediadia sur la plaza del eglesa. Los pote porta con se, per cada person, masima tredes cilogrames de bagaje. Tota portes de casa va es cluida, ma la claves va resta en la securadores. Tota la bestias, cavalos, boves, porcos, coneos, avias de cultiveria e otras, va resta en la stalas, con comeda sufisinte per un dia!”

Alga plu bates de tambur e aora ta ce cadun vade per prepara.

E instante, en tota casas, la paci ultima ia comensa. En sua freta panicada, multe persones ia pone en sua pacos ojetos la plu estracomun, de cual algas va es per los nunca usosa, e simultan los ia oblida casolas e padelas plu nesesada.

A la ora 11 los ia sta sur la plaza peti; direta los ia adere a lunlotra en grupos. On ave momentos en cual lo no es bon ce un person resta solitar. Los ia parleta pasionosa, ia dise cualce cosa, mera per no lasa a emosias intruosa la tempo per infiltra. Los ia es sofocada par la senti ce un cosa desidente es a punto de aveni; los ia stimula lunlotra en la idea ce los va fa mera un escurso e ce los va reveni pronto, pos la vinse de jeneral de Gaulle.

Cuatro buses grande ia ariva rolante. Instante un suofisior deutx ia comensa clama, alfabetal, la nomes del persones partinte. Cuando, pos la nom de “Beaupré Justin”, un om barbida ia responde – “Présent!” – an los ci ia es ancora nonavertida sur la sustitui, ia proba no contradise. Los ia comprende e ia taze.

Cuando la buses ia comensa en via, la pasajores strana ia crase un larma vergoniosa su la palpebra. A ves final, los ia jesti un adio a sua casas (ancora no tota focos ia estingui – de alga ximines banderas de fuma ia flota ancora como un saluta respondente …), a sua eglesa peti, a la semetero del vileta, do los ia lasa sua mores, e aora, con voses unida, simultan de tota cuatro buses los ia leva un tal Marseillaise ce an la aleluias la plu resonante a soldis de pascua ia ateni nunca un grado simil de joia!

Plur miles de escluidas, de tota la teritorio de lingua franses de Loren reproprida, ia es descargada par la buses en acel dia a la stasion de Metz, do trenes spesial ia formi per pasa en un sola bloco, sin impedi, traversante la Linia de Limina.

La escluidas ia es sperdeda a tota rejiones del Zona Libre, longo la posibles local. La comunia Chanzy ia reformi en la strutur de Ribérac, la comunia ospitante. Pos corta, esta campanianes asidua ia trova ala ocupas en cultiva. An en la momentos la plu difisil, con ostina loren, los ia susta un espera nonmatable.

En la dia du, Pierre Touchard, no plu Justin Beaupré, ma de aora Pierre Bouchardelle, ia deside viaja a Marseille. No cosa, no person ia preveni el.