Capitol 3

Marxante a la fronte ia es Bertringer, gidante con braso en braso sua fia Lisette, radiante ornada como sposa nova. La coda de sua velo ia es portada par du xicetas, contente e orgulosa de sua ofisia. Poi seguente, sempre en duples, ordinada par eda, comensante a la plu jovenes, e con prima Dédé la malelevada, on ia ave tota relatadas e amis. Dédé ia aspeta fea muosa. On ia refusa sua proposa de porta la coda de Lisette. Plu, el ia ave ance un otra causa de noncontentia. La sola xicas partisipante de aprosima sua eda ia es acel duple aora postida a la coda del sposa, con ce tota otras ia es ja cuasi femes des-sincan o des-sesan, tal ce no acompanior conveninte ia es trovable per Dédé e on ia debe asosia el con un otra xico del mesma eda, nomida Julot. Ancora la colegas nova no ia ave tempo per enconose lunlotra, e donce asta alora los ia condui en manera bon.

Ultima la sposo futur ia veni en braso con sua madre. Louis ia suporta par tota fortia la pesa de Sra Touchard, respetosa intendente ce el evita tro multe presa en sua sapatos nova. An con esta, Sra Touchard ia sufri multe, como on pote comprende sola si on ia esperia a ves la influe torturosa del sol a sapatos nova lacida.

Tal, partal rituin, partal farsin, la prosegue ia pasea a la eglesa. Cuando lo ia ateni la casas prima del vileta, la campanas ia comensa penduli con bates grande. A destra e sinistra, a limina de cada porte, tota la popla disponable ia sta, car un tal parade no es vidable a cada dia en Autrecourt. Cuasi totas, con surie jentil, ia esibi bonvole e simpatia a la familia Bertringer. Sola Thiriot, esente mesma un cultivor florinte, ia atenta a no grado asconde un grima burlante, e justable Bertringer ia previde ce esta pote auguri sola un rus nova.

De alga casas, invitadas tarda ia sorti liscante como ombras, discreta introduinte se entre la proseguores.

Final on ia entra marxante a la eglesa. Espetante ja de alga tempo a la limina ia es acel om uniformida ci en Autrecourt, como en tota de Frans e en multe otra paises, on nomi un “suiz”. Un tipo de abitua lingual eterni tal la fato ce tra multe desenios del tempos pasada lo ia es un direto de suizes ce on emplea los como soldatos eglesal. En Autrecourt, Gaspard la longa ia ofisia, en soldis e dias de festa, como suiz. De sua lado, el ia aseta esta rol sola contra vole, car el ia es nunca un aderor del eglesa. Ma el ia es completa nesesada, car el ia es la sola om capas, par sua altia, de pleni brava la vestes, ancora cuasi nova, legada del presedor mor. Poi el ia aprende rapida gusta la uniforma bela cual, sin duta, ia releva ancora plu sua superioria mas. Tan frecuente la femes ajenante, entre du desuples del rosario, ia envia a el regardas furtiva ardente!

Con fas seria e ostenta impresante, Gaspard la longa ia saluta aora en reseta la prosegue su la porton del eglesa, avente sur testa sua xapo plumida nova, a mano destra la alabarda, a sinistra la baston pesosa ritual, coronida par un pomon spesa de metal, oro briliante. Par esta baston, Gaspard ia anunsia la prosimi del proseguores, ritmosa colpante la pave del nave, con ce sua stoco nonusosa, pendente de sua sintur, ia deveni maraniada entre sua gamas. Tal el ia gida la colona e ia maneja un separa conveninte del duples, como on ia fa ancora abitual en Autrecourt: “La seniores a destra! La senioras a sinistra, per favore.”

Par alga causa, lo ia aveni ce Dédé e Julot ia perde sua loca entre la primas. Los ia para ja instante, a lado del trogo batizal, probable per saborea la pasa del prosegue. Lo es vera ce un partisipor en un parade no pote a la mesma tempo amira la ordina perfeta del fola manobrante de cual el mesma es un membro. On debe sta a estra. Cuando final los ia presenta se cuasi como ultimas ante la suiz ordinante, esta ia puxa los sin pausa a un banca libre pos la omes plu vea, ci, par sua dorsos larga, ia bari la campo de vide del petis. Tal, noncontente, Dédé e Julot, cada longo sua propre opina, ia deside perde interesa a la rituo.

Ma ja lor atende ia es caturada par la armonio cual comensa mui. Lo ia es un caxon asmica, cual Sr Dubout, la ensenior, ia maltrata con tota sua cor, e cual, par resulta, ia suspira un aria noncoerente. La saco de aira del strumento ia conteni nondutada un buco, car sempre cuando Sr Dubout ia presa la pedal per renovi la furni de sofla, la venta ia sorti del soflador, lasante pos se un pft-pft angusante cual – par sua repete regular – ia speroni tan tentante la talento imital de Dédé ce final ance el, par pft-pftes plu e plu sonosa, ia acompania la musica eglesal. On ia nesesa un interveni par la polisior suiz, ci par oios menasante e un jesti corespondente del alabarda ia susede silenti la xico malconduosa.

Poi Dédé ia trova un otra diverti. Car aora totas presente ia es ajenante, lo ia aveni ce la banca ante Dédé resta ocupada par sola oto xapos silindre, nongardada. Sin esita, el ia prende un, mera per palpa como lo pesa. Julot, corajida par la esemplo de sua colega, ia fa la mesma. E, car la tempo ia ariva per institui relatas amin con sua visina, Dédé ia sujesta a el un intercambia del xapos.

Cuando los ia es serta ce tota xapos ia partisipa en la migra grande e ce aora cada trova se pos un mestre nova, los ia ave la impresa complis ce un amia firma ia nase entre los. Per completia del reporta, on debe ajunta ce la turbosas ia espeta ancora plu plaser del fato ce, multe atendosa, los ia pone la xapos en la ase direta del ajenores, imajinante ce, cuando la momento de resenta va veni, cadun contra vole va crase sua covretesta valuosa su sua pesa. Ma esperas en esta relata, como on ia vide a pos, ia es tro alta visida e no ia reali. Cada posesor de xapo ia atende bon per no dana sua ojeto respetada.

De aora, asta la fini del rituo, tota ia evolui lisa. La parolas lodante del prete, destrosa miscada con formulas de bondise, ia emosia la escutores. La intercambia del anelos entre la sposes nova ia es un momento formal. La colie de mone, manejada con encanta jovenin par la du damas de onora, acompaniada longo protocol par sua cavaleros, la prima par Pierre Touchard, la otra par Totor Bertringer, ia aveni como prevideda, estra un lisca peti cual merita apena un mensiona. Cuando la fem en duple con Pierre Touchard, ancora no abituada a sua roba longa, ia marania se en la coda, el ia tropeza. Felis, la acompanior ia reteni el tal ce el ia retrova sua ecuilibra, ma no la multe monetas cual ia rola entre la bancas. “Lasa, lasa,” – la suiz ia consela – “me va atende acel a pos.” Sabe serta ce, a pos, esta Gaspard la longa ia fa como el ia dise.

Senas vera nonprogramida ia presenta se sola cuando la prosegue ia regrupi per sorti formal del eglesa. Aora prima marxante ia es la sposes nova fornida, segueda par sua jenitores resiproca ci ia formi duples crusada entre se, e par la caravan intera en duples coreta reformida. La momento confusante ia veni cuando la oto vitimes del compania Dédé & Julot ia apone sua xapos silindre. Alora cada de los ia demanda a se perce aora el desapare subita su un tubo tro larga, o perce un xapo, cual a ante ia ave un formato perfeta conformante a el, covre aora apena la punto de sua cranio. En cualce caso la person portante ia pote presenta sola un aspeta comica.

Lo es un fato ce a esta spetaculo la viletanes felis, ci, natural avida per vide, ia grupi ante la eglesa, ia esplode tan con rie ruidosa ce final ance la omes con xapos miscada ia debe junta se a la rie, si volente o no. Pico e pico los ia suspeta la aveni de un farsa stupida, e cadun, a sua interna, ia desira lansa a tota diablos la autor de esta broma dutable. Trucos tal e simil un person de maneras bon permete a se no plu temprana ca pos la aperitivo, nunca en la rituo relijial! Bon, los ia susede rapida reordina la situa, intercambiante la xapos entre se asta ce cadun ia retrova un calibre plu conveninte.

Malfortunosa ia es sola Sr Placide Latuile, ma vera malfortunosa. El ia es un relatada distante de Bertringer, un om corta, apena creseda, an si serta ja plu ca sincodesan. En la vastia de un jacon emprestada, el ia aspeta an plu peti. El ia ave un fas puntida en cual du oios sasiada ia surie noncomprendente ma constante. Direta del comensa, la jovenes nonrespetosa ia nometa el Museta. Bon, Museta ia es duple malfortunosa. El ia intercambia sua xapo, serta tro larga, per un otra an multe plu larga, e en ajunta – Dio sabe como lo ia pote aveni – sortinte del eglesa el no ia susede retrova sua fem de duple. Tal, sin comprende, renunsiante, el ia junta se como membro final a la prosegue, pos cual el ia coxea solitar, desapareda su sua monumento silindre.

Inisial vivosa marxante, la proseguores ia pausa subita pos ja un pico de pasos. Emerjente del staleria de Thiriot, a alga distantia a ante, on ia ave un dudesuple de boves, ci un pastor susia e alga enebriada, aidada par du canes sin raza, usante jestis de basto e crias xiliante, ia gida a la pasto. Dudes boves fema ia invade la rua, tan prosima ante la membros del partito festal ce estas, per no misca se con la boves, ia debe pasea sin avansa. An plu mal! Asi esta bove, ala acel – e, pos corta, totas – ia relasa tapetetas sur la largia intera del paseria, do a cada ves un flatx-flutx amortida ia confirma la reseta puntual del paceta, tal anulante en spasio de alga minutos tota laboras de scopa fada par la servores de Bertringer.

A esta spetaculo Bertringer ia roji en furia. El ia vide instante tra lo la malvole total de Thiriot. Esta om, noncontente ce la projetas per sposi sua fio plu vea a Lisette Bertringer ia fa un fiasco, ia inventa esta venja. Ai, la vil! Par cual metodo nonconfesable el ia pote organiza un tal emete tan jenerosa par tota boves a cuasi la mesma tempo, a la momento nesesada, con esatia inviable par tota fabricores de orolojos suiz? Sin duta el ia debe conose bon esta e acel erbas, ajuntante los en dosas coreta, miscada con la feno de matina, e ia debe esperimenta pasiente, cisa tra plur semanas, per ateni un tal puntualia! A esta consideras, Bertringer contra vole ia senti en se un amira nasente cual, en sua coleria, el ia sofoca instante.

E vide! Acel bovor cretin, en loca de rapidi la vade, aora, cuando sua remasticantes ia ocupa la tereno en vinse, ia restrinje tro notable sua zelo inisial. Sempre cuando un del canes ia saisi par dentes la coda de un bove lenta, el ia grima: “Lupo, veni asi! – Negra, lasa el! Nos ave tempo, par sielo! Cuieta, cuieta, mea xicos!” Esta ia sinifia multe simple ce la parade de sposi de Bertringer pote pausa.

Ai, un ostaculo tan diablin esata calculada! On ia es embarasada.

Tan grasiosa Bertringer ia vide aora, veninte a el con brasos estendeda, acel du polisiores brava Auchoux e Perelli ci, en un otra situa, el ia ta desira serta lasa en un baril de mostarda!

“Sr Bertringer, permete ce nos loda tu e tua familia a la aveni felis!” E los ia presa manos en modo lodante con la sposes nova e en modo salutante con la otra conosedas. Tal, a la min, la pausa del prosegue ia es razonada. Aora on ia sta sur loca no par causa del boves de Thiriot, tota no, ma par un encontra joiosa con esta polisiores bon.

“Seniores,” – Bertringer ia desira mostra sua cortesia – “seniores, vos va aseta bevi un aperitivo con nos, no?”

“Serta, on no va refusa,” – Auchoux ia acorda e ia continua – “ma no crede ce nos ia veni per acel! Nos trova nos asi asoluta acaso, o vera no acaso, ma … como me ta dise lo? … en modo alga profesal … si, profesal. Nos ia veni per consulta senior xef de vileta, e nos ia oia ce ance el partisipa la festa.”

Tal parlante, Auchoux ia xerca con sua oios Sr Desmartin, descovrente el pos breve. Direta el ia esplica, turnante plu spesial a la xef de vileta: “Vide, nos xasa algun nomida Albert Bignol, de Voiron. Nos suspeta ce cisa el asconde en Autrecourt.”

“Albert Bignol? El es ci?” – Sr Desmatin ia es confondeda.

“Un turbosa ci ia frati tota vitros del casa de Sr Sémard, en Voiron.”

“Cua? El intende rompe ance la vitros del nosa?” – Desmartin ia rie.

Ma un del jovenes ia dise: “Bignol de Voiron? Un xico intera sin peril. Me conose el. Nos ta es bondiseda si el ta es asi! El ave un acordion e ta pote dansa nos tra tota la note!”

“Un musiciste, si?” – la otras ia joia. “Trae el sin pausa!”

On no nesesa ajunta ce la membros del jenera capas de dansa ia aproba esta proposa con crias canibal. E en cuando la xef de vileta ia serti ce longo sua sabe e consensia on ia vide nunca cualce Bignol en Autrecourt, la plu emprendentes del jovenes ia scema un mision per trae a la festa de Bertringer esta Bignol famosa con sua strumento musical.

Los ia uni final stimulada sirca la idea de Isidore Porcin: “Me va envia nosa encargada con la veculo a Voiron. Pos poca tempo el va es denova asi con acel Bignol.” E Isidore ia core ja a la casa de sua jenitores per instrui la encargada sur sua taxe. Pos alga minutos el ia reapare, riente: “Ordinada. El va parti direta. Me ia promete a el sincodes sentimes si el reveni con Bignol.”

E, car la boves de Thiriot ia es aora sufisinte distante, la prosegue ia pote marxa plu. On ia debe sola regarda bon do on pone sua pedes e dupli sua atende a la coda del roba festal de Lisette.