Capitol 22
Per maturi – la Moria ia dise – un jenera de persones nesesa entre dudes e dudes-sinco anios.
Per oblida – la Moria ia dise – la umanas nesesa la tempo de un jenera. Masima. Poi los no senti plu tan agu, en sua propre carne, la sufris, tormentas, miserias pasada. Poi los es denova preparada per engoli tota prometes de jenios loco. La lesones de istoria ia es futil.
La falxi grande la plu resente – la Moria ia dise – me ia fa en novembre 1918. Un tal recolie a acel tempo! Tra cuatro anios intera … Verdun! Vos recorda Verdun? – Unica! – De alora los ia redui notable mea rasionas asta la volum del rutina comun. Maladas, veas, seniles, en dosa peti alga asidentes; de ves a ves un desastre avar de natur, epidemias e pestas lenta. Triviales.
1914 … 1939! Dudes-sinco anios ia pasa! – la Moria ia dise – e en previde felis lo ia craci sua punios ososa. “Cisa saja si me prepara mea granerias …”
La bate no ia veni subita. Un clama forte ia vade tra la mundo. Ja de alga tempo. Radios sur tota la tera ia ica e vomiti la ecos spasmin del dias de congresas en Nürnberg del Partito Sosialiste Nasional, cuando aplaudis, rujis e un isteria coletiva ia silenti la vose peti del consiensa umana. Nonmalcomprendable, Hermann Göring, un masa impresante e la xef suprema del Luftwaffe,1 ia averti bonvolente: “Wir Deutschen sind stets Schiesser gewesen, niemals Schisser!”2 Ha ha ha! Nos sabe no sola aplica, ma ance replica! Tu ia oia, Mundo? Tu ia comprende, Mundo?
La xefes de stato del mundo ia finje un serenia nondisturbada. Los no ia es tocada par la trucos de enfantes political. La xefes de stato del mundo ia diverti bon a tema de esta “cesares de carnaval”.
La bate no ia veni subita. Ja a un anio a ante, en setembre 1938, on ia fa un proba jeneral. Aora on recomensa. Ma, a esta ves, la situa es plu seria.
Convinseda sur la sedentia suave de sua oposores, sur lor nonpreparadia, sur la bambola de lor sistemes democrata, sur la esita de persones tota no acordante risca sua vive per alga Coredor Polsce, per alga bandas de teritorio txesce, Adolf Hitler ia marxa clacente, direta e firma a un destina no clar definida. De un grado ja atenida a un otra grado cual va es atenida. Nonfalinte. Nondiverjable.
Ala on ave un gidor de popla! El sabe parla a la vinsedas de 1918. “Me va elimina per sempre la umilis asetada par politicistes noncapas, forsada a un popla nunca bateda sur campo de batalia! Me va dona a vos un potia de colpa ancora nonconoseda en la mundo, tal ce nun va pote oposa la vole deutx de vinse. Nos es elejeda par Dio per rena la mundo!”
Esta titila tan plasente la oreas de umilidas! Esta dejeta pajes negra de istoria nasional. Esta es linguaje masiosa, direta, pertinente, tota no simil a lamentas vergoniante par mendicores political, a negosias par ministros coarde, a sedes par disesis sempre acordante. Esta sona como un sinial veliante de trompeta. Heil Hitler!