Capitol 32
Cuasi des anios ia pasa pos acel sera de natal memorable en 1946 cuando, limina de un peti abiteria modesta en la cuartal del Mercato en Paris, Pierre e Paul, padre e fio, ia surprende Annemarie, la stonada, la Fem Santa del Mercato. Si, un tal cosa ia pote aveni! “Esce tu recorda, Annemarie, esata como en acel tua raconta de natal cual, a vera multe anios pasada, Hedi Griethke ia leje a nos en la sala de come de Geist! Su la arbor de natal. Como aora … Alora tu ia rie sur la romanse per pexes fritada … A veses la vive reserva a nos un situa strana.”
Cuasi des anios ia pasa.
Un novembre gris divide nubes basa contra la rojia pal del telias de teto en Autrecourt. Melancolia de autono. La dia de recorda del mores.
Longo la tradision local, ance la familia de Pierre Touchard peregrina en grupo, pos la rituo de eglesa, a la semetero del vileta per sua pasea anial tra la pasada.
Rosalie Touchard
la plu bon de madres
Félicien Touchard
sua sposo fidosa
Stante a lado de Pierre es Annemarie, sua sposa; a la otra lado, Paul Bastrow con sua sposa joven, Odettel, fia de Édouard Thiriot, e con los du enfantes, Pierrot e Annette. La grupeta ia vade per inclina supra la tomba del bon tio Gustave Dulong, ci dormi ala a lado de sua Henriette. Alga plu distante on ave la monumento de la familia Bertringer.
Hector Bertringer 1896–1945
Prosper Bertringer 1865–1947
Cécile Bertringer 1874–1949
Pasante, los ia saluta la tomba de Sr Amédée Lanternois, parocior pasada de Autrecourt, e los ia para plu longa a la tomba del familia Thiriot. Cyprien Thiriot ia es el ci ia eleva boves tan mal educada en la epoca cuando Lisette ia sposi! De alora el ia ave la posible de deveni, pos mori, la avo par sposi de Paul Bastrow. Ante parti del semetero, Pierre ia gida sua caravan minor asta un tomba modesta, apena curada, en un peti angulo oblidada del semetero. Sur la crus de lenio, la enscrive, ja longa erodeda par tota pluves, ia es no plu desifrable. Ma Pierre teni lo en memoria:
Albert Bignol
matada par fusiles deutx
en la dia 11 de agosto 1914
Lo es cisa la caso ce la parade ante sua oios de acel nomes conoseda Touchard, Dulong, Bertringer, Thiriot …, siselida en blocos de marmo, ia influe la meditas de Paul. Paseante a la casa de sua jenitores – Senioreles Pierre Touchard abita en la casa del Tio, e Paul ia resta con sua familia peti en la castel – Paul ia comenta a Pierre: “E sur un monumento futur en la semetero de Autrecourt on va trova, como intruor, ance la nom Bastrow. Tu no pensa, padre, ce me ta debe cambia lo?”
Pierre ia opina: “Lasa tua nom sin cambia. La destina ia dona lo a tu, con acorda de tua madre. El ia es intera coreta. Plu, no la nom formi la om. Ma la cor. Tua cor ia vinse.”
E tal lo ia aveni ce la nom von Bastrow, destinada tra multe jeneras a distingui figures bela de ofisiores en la armada prusen e burocratas amidonida en la ministrerias prusen, ia deveni, par un capris strana del fortuna, un sinonim de “cualia plu bon” en la industria de ceso loren!
Tal ance bon, no?
Lo es vera ce, en via a esta evolui, lo ia perde sua paroleta nobil.
Ma un paroleta nobil es a un nom lo cual es un apendis a un corpo umana. Mera un bulto de la seco. Asta oji on no conose sua usosia.