Capitol 20
Acel encontra de du patrulias oposante sur la Colina del Lupos, en la note de 10 a 11 de agosto 1914, ia es, en longia del gera intera, la sola ata militar notable en la ambiente de Autrecourt. En acel setor de fronte la linia ia move nunca. Asta la fini, la vileta Autrecourt ia resta en manos deutx. Ma ja en otobre 1914 membros vea del Landsturm1 ia veni per recambia la rejimentos plu zelosa, urjente esijeda en un otra loca. Pos corta los ia abita en la casas del viletanes o ia construi sua propre casernas, si la salas del campanianes no ia conveni; los ia instala un banieria con duxes, un sentro de soldatos per consentas comun, un comeria, e ia colabora volente con la siviles en cultiva la campos. Lor comandor, Capitan Weser, ia abita tra cuasi tre anios noninterompeda su teto de Sra Denique, la vidua Perrin a ante.
Del enfantes ci ia nase en Autrecourt entre 1914 e 1919, a la min tre ia ave padres demostrable deutx.
A la otra lado del peti rio Seille, la vileta Vétilly ia resta sin cambia en manos franses. La enfantes ci ia nase ala en la mesma periodo ia pote ave sola padres franses. Ance ala, pos multe corta, sola membros del Territoriale,2 movablida en la momento ultima, ia ocupa la setor. Esata como sua colegas a la otra lados del rio, ance los ia demanda a se: “Perce nos bricoleta asi? Revade a casa ta es plu saja, no?”
Ma la sajia ancora no ia pote parla.