Capitol 31

Cuando Pierre, pos la libri de Paris, ia retrova sua casa en Asnières, el ia ave ancora no la cuietia e stablia mental per rededica se completa a temas de asecura. El ia solisita senior René Dumoulin ce per favore el ta continua atende tota documentos. Pierre ia resta en Paris per sola la tempo nesesada per reprende a se ance ofisial sua identia vera. Entretempo el ia fa alga visitas. La prima ia es a Sra Bourrié. El ia desira es informada sur la destina de sua bon ami Gérard. La seniora ia reseta el multe volente. Regretable el ia es sin novas de sua sposo, tra ja alga menses. En acel epoca Gérard ia trova se en Auschwitz. “Esce tu no crede ce aora la deutxes, per venja sua defeta, va mata tota prisonidas en la campas de consentra?” Pierre ia atenta calmi el, an si el no ia es convinseda ce sua temes es intera sin funda.

A casa de Marcel Weiller, Rue du 4-Septembre, el ia trova nun. La fem a la porte ia pote dise sola ce tota la familia ia es arestada ja en 1940 e ce de alora el ia oia nunca sur los. Asta la fini del governa deutx, lor abiteria ia es ocupada par deutxes de grado alta del Kommandantur prosima. A casa de Jacques Archet, Pierre ia descovre ce Jacques es un prisonida de gera en un Oflag prosima a Lübeck, “ja de cuasi cuatro anios. Un tempo longa! Bon, ultima, me pote espera ce el va reveni pos corta. El no va reconose la enfantes.”

Pierre ia senti ce el nesesa isoli, distante del presa e trema del site, per repone ordina a sua pensas. El ia viaja a Autrecourt. El va revide sua frate e la amis vea.

En Autrecourt tota la vileta ia lamenta ancora la nonfelisia cual ia colpa la familia Bertringer. La fio Hector, ci ia reveni a sua casa direta pos la sesaspara, e ci ia pote pasa la tempo intera del gera sur la cultiveria de sua jenitores, ia es asidente matada a un semana pasada. El ia pasea sur un bombeta camuflada a borda del foresta e ia es instante desintegrada. La jenitores nonfelis ia senti estrema emosiada. Los no ia ave plu la coraje per reata contra la colpa trajedin. Bertringer ia afoca en pensas negra. Tra multe oras de cada dia el ia senta longa en la cosina, noncurante la vive sirca se. Pierre ia vade a cada dia per atenta tira la vea de sua otusia. Lo no ia es fasil. Ma Pierre, ci mesma ia ave no novas sur Annemarie, e ci donce ia sufri nonsesante en sua alma, ia pote an tal ancora trova parolas consolante. Pico pos pico el ia introdui se como un lia entre la cultivor renunsiante e sua encargadas. Un cultiveria de multe ectares, con sua animales e empleadas, es un macina cual funsiona nonparable. Nunca lo pausa. Cada ora esije un manobra nova. Pierre ia deveni asorbeda en sua ativia. Esta ia es bon per el. A cada dia el ia dedica sempre plu tempo a la cultiveria de Bertringer.

En la inverno 1944–1945, cuando, par impedis material, la coliores de lete del rejion ia deside no veni plu a Autrecourt, e cuando en la vileta on ia comensa cexa sur cuantias cumulante de lete nonusada, Pierre ia recorda lo cual el ia aprende en Ribérac de la rusosa Montilleul injeniosa. Ala el ia colabora asidua en la prepara de acel cesos multe dur cual la Maquis-anes ia gusta tan. Los ia es eselente longo la gusta de Pierre. E la instalada de Sr Montilleul ia es multe primitiva e ia consiste xef de contenadores cabente, multe bonvole e un pasientia persistente. La prosede ia es noncomplicada e, si oji la campanianes ia oblida la reseta, esta es sola car los es longa abituada a vende sua lete a profesales de un tecnica plu moderna, preferente recompra comersial la suproduidas de lete nesesada per sua debes de casa. Tal on evita labora, jeneral nonprofitosa, en casos de cuantias peti. E on nomi esta la progresa. Ma aora, en Autrecourt, tota ia cambia. Pasiente per la reorganiza de la colie de lete, la viletanes ia porta volente sua lete a la cultiveria de Bertringer. Pos alga atentas, vera no descorajinte, Pierre ia persiste e ia susede. En viletas visina el ia descovre, e ia compra sin esita, sentrifugas anticin de sistemes diversa e, pos repara, ancora usable. Con aida de tota encargadas disponable de Bertringer, el ia pote prepara cuadros de bur e rondas de ceso sufisinte per vende los no mera en Autrecourt mesma, ma ance en la rejion.

Ja la primavera ia reveni e la coliores de lete ia acorda reveni a Autrecourt. Ma on no ia nesesa plu lor servis. Pierre ia continua sua industria nova! El ia deveni pasionosa sur la labora e ia sabe interesa ance la vea Bertringer. Inisial sola a esta o acel ves, como si en sede cortes, la vea ia acompania Pierre en sua sirculis tra cabanas e suteras organizada per fabrica. Pos tempo el ia proposa se mesma per vade, e a veses, a veses, el ia ajunta ance sua mano. El ia deveni denova un om con ocupas normal e interesas nova.

A un dia, Sr Bertringer ia dise a Pierre: “Perce tu no ta instala tu permanente en Autrecourt? Esta cosa intera es tua creada. Tu va pote developa lo e rici. Me mesma no conveni plu multe, ma volente me va colabora finansial, si tu desira.” Ancora Pierre ia resta nonserta. La gera en Europa, ja longa mera masacras sur la teritorio deutx, ia es tocante sua fini. Pierre va debe revade a Paris. El ia comprende ce sola de ala el va pote recomensa xerca Annemarie. E ance Annemarie, si el va susede libri se de la campas de consentra deutx, va vade a Paris per retrova el.

Poi el ia reseta un letera de Gérard Bourrié. Esta ia es denova en Asnières, pos resta tra cuasi oto menses en Auschwitz. El ia scrive a Pierre ce el desira multe encontra el. Regretable el no ia presisi la ojeto de esta encontra. Pierre ia presensa un cosa nonplasente. Sin perde tempo, el ia viaja a Paris, lasante la fabriceria de ceso su la bon garda de Bertringer, entre la manos de Jules la corposa e sua colegas plu joven.

Pos intercambia informas sur se, la du amis ia silenti. Un pausa embarasante ia aveni en la studio de Gérard Bourrié. Pierre ia senti ce la momento desidente es aora veninte. El ia tremeta. E la avocato joven ia comensa:

“Mea camerada cara, me no ia oblida cua me ia promete a tu a nosa parti en Marseille. Me ia vole plu ocupa me a tema de Sra Bastrow. Tra mea resta en Auschwitz me ia prende nonfatigable informas de mea cosufrores, spesial de los ci ia veni de otra campas, esce un de los ia oia alga cosa sur Sra Bastrow. Sin resulta! Aora, pos mea libri, me colabora multe en la institui de nosa asosia, Asosia de Prisonidas Pasada en Campas de Consentra Deutx. Nos dispone aora listas cuasi completa, cuanto esta es posible, de tota prisonidas. Sur Sra Bastrow me ia demanda en tota locas do me ia pote penetra. A un pico de dias pasada me ia deveni cuasi serta. Me no vole dise ce no espera resta plu, ma, cara ami, ta ce tu ave coraje mas. Tu debe adata a la realia. Lo es multe probable ce Sra Bastrow ia mori en Dachau. Me ia reseta en esta relata plur atestas, conformante a lunlotra, cual, regretable, obliga nos a suposa ce Sra Bastrow va reveni nunca.”

Pierre ia resta nonparlante. El ia pali. El ia presa forte sua testa entre sua manos e ia sanglota como enfante. Gérard ia lasa el a esflue sua angusa. Sola pos momentos longa el ia parla cuieta, como on xuxa a un person estrema malada:

“Me ia prefere revela lo cual tu debe espeta, ca engana tu a un espera futil. Franca, nun sabe como el ia mori. Plur persones ia pote mera dise ce los ia conose bon Sra Bastrow en Dachau, comensante en otobre 1944. Du de los, du femes de la ambiente de Paris, ia es preparada per encontra tu. Los conserva sua estima la plu alta a acel seniora. Car el ia studia medica, la xefes deutx ia es contente de usa el como un ospitalor e ia clama frecuente el per fa injetas a maladas. Ma, pos corta, Sra Bastrow ia oserva ce el colabora nonvolente en esperimentas de seros. Plur de sua pasientes ia mori subita. Poi un sena ruidosa ia aveni con protestas del seniora, ci ia declara ce de aora el refusa fa injetas a cualce person caturada. Ja en la dia seguente el ia desapare. Nunca plu on ia oia sur el. E cuando on conose lor metodos …”

Gérard ia leva de sua seja, ia vade a Pierre e con cor compatiosa el ia presa sua mano: “Pierre, mea camerada cara, Sra Bastrow ia es un bela alma nobil, un de los par causa de ci me pardona multe a multe deutxes.”

Pierre ia plora silente supra la mano de sua ami. Final el ia demanda: “On es serta ce el ia mori?”

“No. Tal atesta es probable nonotenable. Me no vole prende de tu tota espera … Ma tu va debe adata a la idea …”

La du femes de la ambiente de Paris, encontrante Pierre pos du dias, ia pote fa no plu ca confirma lo cual el ia sabe ja. Alga detalias emosiante de lor vive con Annemarie Bastrow ia pote sola profondi la dolon de Pierre. Poi el ia fa un deside major. El no va reprende sua ativia pregeral. Nunca plu el va pote readata a un profesa de ofisia. Sin retarda, el ia vade per acorda con Sr Dumoulin sur la sede permanente de sua emprende Assurances pour Tous. El ia licuidi ance sua abiteria en Asnières. El ia es avida per es instante reasorbeda par sua ocupas nova en Autrecourt.

La plu contente sur la deside de Pierre ia es Sr Bertringer. Direta, ambos ia acorda sur esta projeta: Prima, intercambia sua locas de abita. Senioreles Bertringer va instala se en la casa de “la tio”. Lo va es plu oportun per la duple vea. Pierre va abita la castel, prosima a sua macinas. Du, con grasias a la medias finansial de Sr Bertringer, la castel del barones de Autrecourt va es modernida, con plu comforta per sua abitores e, xef, con instaladas plu cabente, respondente a la nesesas de un ceseria competosa. E tal lo ia aveni ce la castel ia es no plu dedicada a cultiva de campos. Lo va ave pos corta la aspeta de un emprende industrial.

La laboras de reconstrui ia esije la partisipa noninterompeda de Pierre. Tra tota la estate el ia ave per se apena un momento libre. El ia debe discute con la arcitetores, dirije la construores, deside sur otenis de aparatos nova e sur divides e situas de salas. Ma ancora ante la fini del anio el ia ave un casa plasente, cual Augustine ia maneja con orgulo naive. Ala do on ia trova un cosina medieval a ante, on ia ave aora la sala de come. No plu on ia entra a lo direta del corte, ma longo un coredor; de ala ance a “la bon sala” con sua “fenetra del polisiores”. Tal asta oji on ia nomi acel fenetra a la rua, recordante la aventura famosa del polisiores en la festa de sposi de Lisette. Sur la nivel alta on ia trova aora cuatro salas bela, e entre los an un sala de banio. La cosina, min vasta ca la presedente, ia es prendeda de un stala prosima.

Ma Pierre no ia es felis. Cuando frecuente, a note, el la reclina sin dormi, el ia es retorturada par reproxas e regretes. El ia senti la cadena de sua solitaria. Nunca el ia pote libri de pensa sur Annemarie la nonfortunosa. An pos tota razonas ce la destina, no el, es culpable de tota, el no ia senti completa estra deta. Annemarie ia lasa pos se un fio. Esce Pierre sinifia zero per acel fio? Esce el ia remete tota debes? Ma serta, acel fio no ia ave la cualias nobil de sua madre. Par culpa de ci? Ala en la mundo cisa un om joven malsolitar vaga, forte nesesante simpatia. E – Pierre ia fisa se par tota fortes a esta idea subita – e cisa esta fio de Annemarie ia retrova sua madre. Si la fio vive, el debe es trovable. An si el es un prisonida de gera. Alora an plu fasil!

Cuando Pierre, en momentos libre del seras de inverno, ia senta en “la bon sala”, a la radio, per escuta la informas la plu resente, el ia oia a veses acel litanias longa, enviada de Suiz, con la nomes e locas de resta de prisonidas deutx de gera. La Crus Roja de Geneve! El ia turna a esta. E ia pasienti. El ia pasienti longa. E en pasienti el ia demanda frecuente a se esce el espera o teme la responde. Frecuente, en momentos de fantasia minor, el ia imajina ce el reeleva a la vive, longo la consetas de Annemarie, acel om joven cui mente ia es contorseda par un governa autocrata e par la gera. Esta ia es la espera. Ma a otra veses el ia vide ante se un om joven con la egosia de un ofisior vera von Bastrow, refusante cualce relata con Pierre Touchard! Esta ia es la teme. La pasienti ia dura du menses. Alora un carta postal ia ariva simple. De Geneve. Con la slogan Inter arma caritas. Enviada par: Comite Internasional de la Crus Roja. La ajenteria sentral per prisonidas de gera. A la lado retro, mera un testo primida, completida par mano:

Nom: Bastrow (von)     Nom individua: Paul
Grado militar: Soldato de clase du
Grupo: Rejimento Infantrial N^o 238
Data de nase: 6 maio 1915     Loca de nase: Grasheim (Deutxland)
Informa: El ia es, a 29 desembre 1945, en prison militar P.G.A. Metz (Moselle) Garnison N^o 211
Esta informa ia es difusada su Numero 1 296 786, 27 janero 1946 par transmetador Entre-Crus-Roja, longia de onda 48,66 m.

La pensa prima de Pierre ia es: Me es no plu solitar en la mundo. Ma esce esta es vera lor fio? Annemarie ia mensiona ce el es un teninte. Asi on ave un soldato sin grado. Ma la data e loca de nase cabe. Ance la numero de rejimento. No duta pote resta. Lor fio es un prisonida de gera en la site Metz, multe prosima! Probable alga ofisior en Geneve ia fa un era de scrive sur la grado.

En la manejeria del prisonidas de gera, sur la isola St-Symphorien en Metz, Pierre ia reseta instante – con grasias a sua cualia de capitan de reservadas – la informa desirada. “Si, un Paul von Bastrow parteni a esta garnison. Si, longo la paperes el es un soldato de clase du. No, a presente el no es asi. El trova se con un scuadron en Merlebach. Ala el labora en la minerias de carbon. Los resta per ses semanas a cada ves.”

Pierre ia vole cuasi viaja sin pausa a Merlebach. El ia obliga se a freni sua nonpasientia. El ia comprende ce el va debe ata con delicatia estrema, sin improvisas. Si alga parola ta velia la suspetas del joven, esta ta enclui se en se mesma. Tal Pierre par sola un colpa ta ruina tota posibles de prosimi a pos. Pierre ia aseta considera pasiente. E an tal! Si Annemarie vive, serta ance el es interesada sur la prisonida. Ance ela ia pote reseta la mesma informa de Geneve. Cisa ela ia coresponde ja con sua fio, par la Crus Roja, no? E si lo es tal, Paul ave la adirije de Annemarie! Ma como el ta presenta se a la prisonida? Con cual escusa? Acel joven crede bien ce el es la fio de Erich von Bastrow. Como el, Pierre, pote interveni per reconcista sua propre fio? Momentos torturosa de esita, duta, nonsertia e nondesidosia.

Lo ia benefica Pierre ce sua emprende funsiona con susede grande. Lo ia monopoli completa el. La peti caxas ronda con imaje colorosa sur la covrente, presentante la castel del barones de Autrecourt, ia gania bon fama longo tota la vale de la Seille, entre Metz e Château-Salins. En tota locas on ia conose e aproba la “Ceso del Castel”. Pierre ia senti ce pos corta el va ateni la limitas ultima de sua capasia, no par nonsufisi del instaladas – el ta pote produi multe plu – ma par manca de colaborores. La jovenes no ia vole plu isoli en campania distante. La sites es multe plu atraosa, e an la sentros industrial de metalurjia, a norde de Metz, presenta divertis plu tentante ca un rejion mera cultival.

Poi Bertringer ia sujesta a Pierre: “Perce no proba a ves un prisonida militar deutx? Me ia oia ce alga cultivores en la ambiente es contente con los. Ance Gaston Mazotte ia prende un a se, en la semana pasada. Jeneral acel deutxes, bon eserseda, labora asidua.”

“Tu razona bon.” – Pierre ia acorda. “Si lo es fatible, me va emplea serta un. Ja doman me va viaja a Metz per informas.”

Pierre ia presenta sua desira a la sarjento-scriviste atendente la dona de prisonidas deutx de gera per emplea a emprendes privata, e ia demanda: “Esce me pote ave un ci me eleje?”

“Tu vole dise ce tu mesma va dona la nom? Bon, lo es serta posible si la individua es un bonvolor. Nos no es permeteda a obliga los. Ma si par propre vole los aseta es empleada como laborores, me oposa no cosa.”

“Los acorda volente?”

“Cuasi tota! Los ave bien sola un desira: parti de esta casernas e la disiplina de caserna. Los vade con plaser per resatura se en la vive sivil.”

“Esce un Paul Bastrow es aora asi e disponable?”

La sarjento-scriviste ia turna la pajes de sua listas.

“Si. Ma acel om no va cabe a tu. Par profesa el es un cimiciste. Plu capas con lapis ca con pala!”

Perce Pierre no ia pensa plu temprana a esta? Perce el ia oblida esta detalia? Si, ante la gera Paul ia labora bien como cimiciste en alga ofisia sur inspeta de nurintes! El ia trova sua om!

“Bon,” – el ia dise a la sarjento – “me ave un fabriceria de produidas caliada. Un cimiciste es bonvenida.”

“Ma tu va debe emplea el como mera un laboror de campo. Bon, ultima lo es tua propre conserna.”

Cuando la sarjento ia reveni, el ia anunsia: “Ça va. Lo vade bon. Bastrow prepara se. Entretempo ta ce nos fa la formales. Tota su tua encarga, natural. La contrata entre tu e la prisonida reali sur funda de garantias donada par la stato franses a la prisonidas ci aseta es empleada como laborores libre. Los es regardada como laborores ci ia migra a la pais. Tal los reseta per labora egal un salario egal … En ajunta, on recomenda teni los a alga distantia e tolera no familiaria de lor lado.”

Lo ia es per Pierre un emosia tan strana e nondefinable cuando el ia trova se a ves prima con fas a fas con sua fio, Paul von Bastrow! Sola difisil el ia susede controla sua sentis. Direta el ia fa un reproxa pico a sua nonfidablia. El ia ave un vantaje supra sua partito oposante. El ia sabe ci la joven es. Alga engana ia es presente a sua lado, car en fato el ia es interesada plu como padre ca como mera empleor.

La joven ia encontra el con otra sentis. Sua sola interesa ia es: Esce, longo la aspeta de sua mestre nova, el pote espera relatas plasente o debe espeta sola parolas asida?

Parente Paul von Bastrow no ia es noncontente. Sua fas ia contorni un surie bonvolente. E Pierre ia resta colpada par acel cualias de fas, tan simil a suas cuando el ia ave la mesma eda! Nonegable, asi un padre ia fasa sua fio. Cuasi, Pierre ia vole nonpensante abri sua brasos, ma a bon tempo el ia recorda do el es e ce on veni de recomenda “teni los a alga distantia”!

Paul Bastrow, como – sin la paroleta nobil – el ia es nomida sur sua paperes de emplea, ia adata a sua artisania nova en modo tan lisa fluente ce on ia pote crede ce el ia fa nunca cualce otra cosa. Del dia prima el ia es interesada a la labora, tan plu ce en la castel el no ia trova metodos rijida aprobada par un tradision pedante, ma un emprende ancora partal en sua fase esperimental. Cada de sua proposas per un modifia cabente, per un boni, ia es sempre bonvenida par acel Sr Touchard comprendosa. Reveliante en la om joven ia es la cimiciste con ama profonda de sua taxe. Del comensa el ia stona tota persones en la fabriceria par sua capasia alta. Paul ia es multe probable la sola entre acel amatores ci ia sabe ce ceso consiste esensal de la albumen, la casena e la calio contenida en la lete. Pronto el ia trova metodos de aselera la asidi del lete e la maturi del albumen separada, e tal on ia gania tempo. El ia sabe ance ce cada ceso reseta sua sabor distinguida longo la modo de trata baterias diversa, e el ia pasioni se sur esperimentas pertinente, su la regarda aprobante de Sr Touchard mesma, tal ce pos corta la Ceso del Castel ia pote es presentada en plur varias.

Car ambos ia dedica se con la mesma zelo a la mesma emprende, Pierre Touchard e Paul Bastrow ia simpatia rapida entre se e – an contra tota recomendas del sarjento – ia amini. En esta situa, la sola problem peti per Pierre ia es ce la prosimi resiproca ia es posible sola par causa del fabrica de cesos! El ia ta prefere, per la encontra e comunica de lor almas, un tereno min prosal. Bien del comensa el ia intende trata Paul como un membro de sua familia. En sua imajina, Paul ta abita en un sala a lado de sua propre, ta come a sua table e ta pasa la seras con el en la “bon sala”. Ma – an sin la avertis bonvolente del sarjento ala en Metz – Pierre ia es consensa ce on no ta comprende un tal favore a un prisonida de gera, no entre la servores, no su teto de Bertringer, no en la vileta. Donce Paul ia reseta un saleta a la otra lado del patio, en acel parte del casa destinada a la servores, e con la servores el ia partisipa tota comes.

Sola pos alga tempo, cuando la superioria notable del cimiciste joven ia convinse cadun ce Paul es no un laboror comun, ma un fator major en la vive del fabriceria, Pierre ia pote, sin provoca cualcun, invita el a sua table e reteni el pos la come de sera con la escusa multe valida de discute la interesas del emprende, o de pratica la lingua franses a la profita de Paul o la lingua deutx a sua propre profita. En esta peti consentas comfortosa, Pierre ia atenta ja a plur veses gida la conversa a la vive privata de Paul. El ia prosede sempre con cautia estrema. El ia sabe par sua propre esperia ce un informa nonespetada ajuntada pote secute vera destruosa. Paul vive convinseda de nase ce el desende valida de un familia de ofisiores prusen. La ecuilibra de sua alma no va es sin peril si el sabe ce el es mera la fio de un vendor minor de ceso burjes ci ia sposi nunca sua madre!

Si Paul ia raconta volente sua anios de enfantia en Heidelberg, su la garda jentil de sua ava peti, el ia mudi instante en embarasa nonascondable cuando Pierre ia refere ance a la anios seguente e la relatas de Paul a sua madre. A plur veses lo ia aveni ce alora la joven ia ave larmas en sua oios, e alora Pierre ia debe turna a via o an sorti rapida del sala per no mostra ce ance el plora. Pierre ia es aora serta de un cosa: Paul ave no sabe sur la destina presente de sua madre.

La desestima, o nonestima a la min, cual en Autrecourt on ia evidenti comensal a Paul como a un membro de un armada odiada e a un person culpable de multe atas xocante, ia sede pico pos pico a sentis plu compatiosa, en ritmo con la frecuenti de sua contatas con la popla. Pico pos pico an acel viletanes ci, per parla sur la empleada deutx de Sr Touchard, ia refere inisial sola a la boche¹ del castel, e la colegas encargada en la fabriceria ci, inisial, ia clama el sola par “He, Fritz!”, ia consensi sur la clase plu alta de esta tecniciste. Pos corta en la vileta intera el ia deveni per cadun “Sr Bastroff!” An Odette, la fia burlosa de Édouard Thiriot, ci ia entra a cada dia en la castel per trae la lete del stalas de sua padre, e ci en la tempo prima ia regarda Paul sola con sentis enemin, como si el ta es un animal esotica e serta estrema savaje, ia sabe ja longa, a cada encontra con Paul, ce par un sintili lampin sur sua fas el pote atrae un sintili respondente ance en la oios del joven rojinte. La vive para nunca.

Lo no es stonante ce Paul Bastrow ia fa progresas solida en sua usa del lingua franses. El ia es interesada par la persones sirca el e – estra con Sr Touchard – el ia pote parla sola franses. Per abitua sua oreas ance a un pronunsia plu coreta ca la parla parente tirante sua pedes del campania loren, Pierre ia coraji la joven a escuta con el la difusas radio de Paris. Ambos ia gusta, en la seras longa de acel desembre, senta en la “bon sala”, do Augustine ia ensende ja ante la come de sera la carpino en la forno de faiense. Ala, resente, ambos ia segue con deleta inteletosa la episodios divertinte de Jean Courtauld, la reportor conoseda de radio.

La serie presente de parletas ia es “Tra la cuartales de Paris”. Jean Courtauld ia sabe catura e teni sua escutores par la stilo enerjiosa de sua improvisa. Ja el ia vaga tra Montmartre, del dia e ance del note, la Cuartal Latina, la Bastille, Ménilmontant e Champs-Élysées. El ia pausa min longa a la monumentos de petra de sentenios pasada ca a la imajes vivente del stradas presente. El ia sabe desinia, par un pico de tocas, la carater spesial de cada cuartal e sua tipos la plu marcante. Pierre ia serti a Paul ce vera cada parte del site Paris ave sua spesiali, reconosable en sua abitores, a tal grado ce un conosor esperta de Paris, viajante par la Metro suteran, ta pote sin era, an si la nomes del stasiones no ta es postada, reconose instante su cual cuartal el trova se, mera longo la aspeta del persones ci entra o parti del vagones a acel stasiones!

Par causa del prosimi del festas de natal – lo ia es ja la dia 23 de desembre en la anio posgeral 1946 – Jean Courtauld ia eleje oji la Mercato Covreda, acel sentro jigante de comedas con grasias a cual la site de milion nuri se dial. El ia sita ja par cuantias statistical, en la modo divertinte de Rabelais, cuanto cilometres de boudins blanca, cuanto tores Eiffel de pavos, cuanto catedrales de figato de ganso la parisanes va consuma en la sera de natal, e aora el ia comensa contorni conversas con representores diversa de acel animales depintin cui esiste consiste de freta tra la note en e sirca la Mercato: camionores, descargores, caretores, comersiores, verifiores, vendores, ajentes, negosiores e … ance polisiores.

El ia veni a sua microfon an un de acel clochards ci xama constante en esta cuartal, sempre atraeda par la posible de un de la furas peti par cual persones natural nonlaborante pote nuri se de ves a ves. Lor corpora consiste de individuas de tota tipos; los es unida par un sola cualia comun: un odia a la leges del popla. Tan regretable ce on no pote egal fasil iniora ance la leges de natur! An Diogene, serta la patron grande del corpora, la plu autorestrinjeda de tota filosofistes, ia nesesa come e bevi. Asta oji, multe de acel nonavores prefere vejetali en sua corpos ca sede an un sentimetre de sua libria de spirito. E do los abita? En tota locas, en no loca. Lor sola teto es la clox vasta del sielo de note. Los merita la nom “cloxores”.²

La dialoga entre Jean Courtauld e Cuque Oio-Bovin ia fini tal:

“E a do aora tu dirije tua pasos?”

“Me vade per renovi mea bandaje.”

“Lo es vera,” – la difusor famosa ia continua – “lo es vera, cara escutores, ce nosa ami Cuque Oio-Bovin porta sur sua fronte un tela larga cual a ves pasada ia es cisa blanca! Serta lo es un idea eselente ce el va reseta un plu limpa. E ci, mea cara, atende la ijien del cloxores?”

“Ma la Fem Santa!”

“Cua? Cual Fem Santa?”

“La Fem Santa del Mercato.”

“Nos pote encontra el?”

“Multe prosima. Rue de la Lingerie.”

“Cara escutores,” – denova Jean Courtauld ia turna a sua publica – “ta ce nos no iniora esta aveni unica! Me segue con mea microfon nosa ami Cuque Oio-Bovin …” Tra alga minutos sola un musica blanda fondal ia es persepable del aparato. Poi la reportor ia reveni: “Nos veni de entra a un casa multe vea. Sola par miracle la mures ancora no ia cade a pesos! Nos ia penetra a la patio. Ala tota un lejion de cloxores presa e puxa. Me ia susede fora un vieta a ante. Asi, en un reteneria simil a un cabana, la silueta de un fem move, en la vestes blanca de un ospitalor … Pardona, seniora, me suposa ce tu es la Fem Santa del Mercato!”

“On es tan bon, con esajera jentil, per nomi me tal en esta cuartal.”

“Me es serta ce on no esajera. Tu reali entre esta persones misera un taxe vera plen de merita. Esce a la min alga instituida carital suporta tu?”

“No. Ma multe botecores en la visineria aida compra medisines.”

“Tua pasientes no pote paia, evidente. Esce tro nondiscreta me demanda como tu pote vive?”

“En la dia me labora como ospitalor, a veses ance como dotor. Me ave un diploma.”

“Longo tua pronunsia me suposa ce tu no es franses …”

“Coreta. Me es deutx.”

“Longa en Paris?”

“Me ia veni fretante, cuando me ia pote, pos parti de un ospital militar brites. En acel tempo me ia es multe malada par resta en campas de consentra.”

“Campas deutx?”

“Prima Dachau. Poi ance Bergen-Belsen.”

“Perce tu ia veni a Frans?”

“Mea sposo ia es franses. El ia desapare en la gera. Sin duta, un vitim del Gestapo.”

“Tu no ia ave enfantes?”

“Un fio. Me ia perde el …”

“En la gera?”

“La dia 7 de maio 1943.”

“Ancora un demanda, seniora. Tu es felis?”

“Me es usosa. Si, me es felis cuando me pote redui lor sufris, e ancora plu cuando me parla a lor cores. Esta cloxores es mea sola familia. Cisa tu ta pote, par tua microfon, urje tua escutores a pensa a sua frates misera en la festas de natal …”

“Seniora, la duiora lasada a me per mea difusa ia fini ja, ma volente me va esamina con tu como on pote reali tua proposa. Me no duta ce la dirijores del Radio va acorda … Cara escutores, ja vos ia comprende, no? E vos va es jenerosa! Multe pronto me va reveni sur la ondas per dise a do vos ta envia tua donadas. Bon sera, senioreles!” …