A un sera, un tren – Capitol 7

Me abri la porte, a la fini de la coredor. La venta e la grinse de la rotas ruidi tonin en la oscuria de esta pasaje entre vagones. Como sieca, me pone mea pede sur esta ponte secuteda e, rapida como flax, en cuando me es ancora razonante sur como tota esta es la efeto de esta lege famosa de inertia, me es impulsada en la otra vagon.

Ance ala, no lampa lumina. E tota la viajores dormi. Me reprende mea respira e continua mea via sin pausa. Con la osila de la tren, me no susede segue reta la traversa sentral, en tal modo ce me xoca multe spalas e gamas cual protende en la coredor. Mea murmura de escusas, cual marania en la ruidon de la entrevagon de cual, par causa de mea freta, me ia oblida clui la portes, acel murmura es futil ; nun velia.

Cuanto vagones me ia traversa ? Lo pare a me un segue nonumerable. Totas es plen, car esta tren de sera parti de un vila grande, ma en cada parte on no ave lus, e la dormi la plu profonda rena. Esce vera me ia eleje un mal plataforma, esce vera me sta en un tren de note a dirije de un pais stranjer?

Ma tota esta viajores, an si me distingui los mal en esta oscuria, no aspeta tan viajores internasional, ci, usual, es vestida plu bon, al min en vagones de clase du, e los teni alga plu bagajes. Serta, lo no es un tren lenta per laborores e empleadas ; aceles viaja tarda, ance, ma esta tren no ia para a cualce stasion, al min de cuando me es veliada. A no grado, me intende ensende un fosfor. Me no teme alga, ma me es stimulada tro multe. Mea state de grasia clar manteni se, ma un tono de rompe misca con lo, causada par un spesie de depresa ativa, si me pote dise. Me nesesa encontra algun, an mera per retrova me mesma.

Me comensa core plu e plu rapida, plu e plu torpe, bambolante en la coredores, tropezante sur la plataformas grinsente e secutente, en la pasajes plen de la sibilas de la vapor e de la ronci aserin de la rotas, xocante brasos e gamas sempre plu cuantiosa. Ma me no murmura plu cualce escusa : nun velia.