A un sera, un tren – Capitol 14

Tra cuanto tempo nos ia pasea, a pos ? Me no sabe. No sola nosa orolojetas no funsiona plu, ma nos pare perde an la senti de la tempo. La note, on ta dise, cansela la perspetiva de la dura e, ance, de la spasio. An tal, esta pasea pare sin fini.

A la comensa, cuando nos ia lasa la ferovia, la lusetas persepida en la campos ia desapare. Plu tarda, los ia resurje, ma tra longa los ia pare sempre tan distante como a ante. Fortunosa, esta note sin stelas es dulse. La prados e la campos odori primaveral. A veses, nos pasa a lado de ortos, do la floris blanca es como nubes de tul, nonmovente e frajil, estendeda en la oscuria. An tal, nos no distingui alga silueta de cultiveria.

En la rieta, longo la rua, on oia la ruideta emosiante de familias de grilos, de ranas e de cualce otra viventes. Nunca, en mea eda joven, me ave un bon profesor de biolojia ; los ia pare interesada plu par la fisica e la cimica. De esta, mea nonsabe, cisa noncoretable, de la rena de la plantas e de la animales, acel amis la plu fidosa, la plu consolante de la umanes. Multe rara nos persepi la canta dormosa de un avia.

Tan como nos pote imajina – la vista pare sempre familiar ‘nosa’, intata. Val ia nota lo, con un tono joiosa, per conclui ce esta tren de note suposada internasional no ia trae nos multe distante de nosa casa. Ma, cauta, la profesor ia fa ce nos remente de lo –, si on ia viaja ja an pico, on sabe ce esta ambiente jeografial, su la mesma latitude, estende asta la portes de la Asia.

A la comensa, nos ia vade con un paso enerjiosa. A pos, nos ia nesesa lenti, no sola per Hernhutter, ci natural no ave tan fortes ca nos, e ancora plu a esta ora tarda, ma ance car la fame presa nos, e la lusetas, sempre tan distante, es descorajinte nos. An tal, Val aida nos con sua umor joiosa. Car el gusta, ance el, nosa aventura strana, tota sua joia de vive propre a la jovenia ia reveni a el.

Tal, plu o min, es como nos ia comensa conversa :

— Esta tren », Val dise, « on ta dise ce el es encantada ! No alga lus, e totas dorminte plu e plu. Cuando me…

Nos comprende ce el ia dormi, ance el ; el ia dormeta sur sua libro de notas, e sua orolojeta, como la nosas, ia par a la ora ses e la dui. Cuando el aprende ce lo es simil per nos, me ia crede ce sua ansia ta reprende el. Fratin, me pone mea manos sur sua spalas, ma el esplode ja con rie, solitar,

— No, lo es tro per me… Me jura ce me no vade a ansia, car me comprende no cosa en esta aveni. Ma, la ansia e la sabe de sua propre nonsabe, esce los no esclui lunlotra, profesor ? » el demanda, riente.

Hernhutter ia anui con sajia, e el ia sita la esemplo de la esiste umana : nun comprende lo e, sin duta par acel causa, totas aseta lo como un cosa normal.