A un sera, un tren – Capitol 23

Donce nos ia nesesa jesti per sinifia ce nos fami e sidi. On no ia proposa a nos cualce menu, cual, en pasa, on vide a no loca, como on no vide cualce jornales, no otra pajes scriveda par mano o primida. Fortunosa, la fem joven, ci es amable, ia pare comprende nosa jesti primeval, al min per la bevi e la come.

Con anuis amable e prometosa, e sin ce nos espeta, a esta ves, on servi a nos un come deletosa : un sopa spesa, calda, spisosa, un plato prima con pex, un plato du con carne, segueda par cesos e cafe, an con un deser. Per la bevi, con un carafa de acua bolante como un soda, on servi a cadun de nos un botela de vino roja alga enebriante. Los es sin tapo e pare perfeta a temperatur de sala ; los no ave eticeta. Tota de lo ia es portada par la servor mas ; acel om cortes, con un eda nondefinable, sembla, ma magra, la om obesa de la bar, ci presenta a el lo cual el nesesa. En efeto, la platos pare ariva par asendeplato de la cosina situada a la nivel inferior o superior. Entretempo, la xica maneja tota, ma con alga casualia. Per dise : el fa lo con surie, sin tro autoritaria o zelo adulosa. Como en pasa, el para a destra o a sinistra, discute e an senta per un momento a cualce table. El pare conose en un modo egal tota la clientes, la nativas e an la ‘viajores’, como ance la publica de clase alta de la sala tapetida, a fas de nos.

Final, me demanda a me esce acel xica, o dama, es la tavernor mesma o un esemplo strana de servor xef. La idea ce posible el es la sposa de la bariste, ci pare es la tavernor, pare a me nonprobable, no sola car nun de du ave anelo de sposi. Sin razona esata, me senti ce acel fem, an con sua simplia amable, es no sola superior a la otra du, ma ance a cuasi tota la clientes de la loca.

Estra la problem de la lingua, du otra cosas noncoerente, si me pote dise, stona nos. Cuando, pos la sopa e alga des talias de pan, la famia de Val ia es sasiada, Val ia distanti a alga tempo per atenta esplica a la bariste ce el vole telefoni o envia un telegram. Ma, si nosa desira de bevi e come ia es sasiada, esta ia pare noncomprendable a la bariste, a la servor e a la fem joven. Vidable, los atenta comprende la studiante, ma sin susede. No sola, on no ave aparato telefon, ma on ta dise ce totas no conose an la esiste de esta media.

Ance, on no vide cualce orolojo. Val ia mostra sua orolojeta de polso, e Hernhutter sua orolojeta de pox, ma lo ia es futil. La fem joven, con un surie, ia nega sola con testa.