A un sera, un tren – Capitol 6

La desira de fumi un sigareta – me senti aora tan fresca ce me no teme sua efeto, simil como nos, joven, nesesa un stimulante lejera per deveni plen consensa de nosa frescia –, acel desira, entretempo, ia deveni un nesesa estrema. An tal, nosa vagon es ancora dorminte, a retro de sua fenetras neblosa ultra cual lo es plu e plu oscur. La tren vade secutente con la mesma rapidia grande e con la mesma zumbi mate. E me, me no pote tolera plu, en mea angulo de tormenta; tota mea corpo dolosa es cuasi anciloseda.

Vera lenta, me comensa leva. Mea visina, no plu suportada, tende colasa a la fenetra. Con un mano, me atenta reteni el, en cuando, con la otra, me onci la rede de la bagajes, supra la fem joven e la om con veste primaveral. Mea forsas susede reti la busto de mea visina. Ma, entre la gamas intermiscada de mea acompaniores de viaja, me no trova alga spasio per pone mea pede. Per resta ecuilibrada, me forsa la via. An tal, nun velia. Me ateni final la coredor cual traversa tota la vagon, entre la bancas. Me ave tota la vagon su mea regarda. An si lo ia oscuri entretempo, me persepi pronto ce tota la viajores dormi ala, sin eseta. An de la loca la plu sombre, no ruido de vose disturba la zombi monotono de la tren en sua progresa. Subita, lo pare strana a me, e, a esta ves, plu stonante ca plasente.

Esce nos ia pasa la stasion do me desende usual, o esce me ia prende un mal tren e ia embarca en alga tren rapida noturna en dirije de un otra pais ? Me ia ave fosfores en la pox de mea pantalon, e aora denova libre con mea moves, me pote ensende mea sigareta. An tal, alga cose preveni me. Lo no es la teme de la lus. Ma, brusca, me tremeta ; me senti depresada, isolida entre tota esta dormores, an con la presentia de tan multe persones a sirca.

Un nesesa plu grande, plu urjente, tormenta me aora : me nesesa encontra la plu pronto posible algun ci no ta dormi ; me vole denova pote entra con regarda a en oios abrida, oia la parla de un boca vivente. La flama peti cual me ta demanda a el ta es un justi per comunica con el.