A un sera, un tren – Capitol 32

E el parti corente a via. Me freta prende sua jaca cual me ia desonci de la panel, me saisi la botela cual es ante me e me xuta pos el. Ante la porte abrida, el para per un secondo e turna ante traversa la sorti. En la restorante, on ave cuasi nun aora.

— Prende », me dise a el, soflante, « apone a la min tua jaca, o tu risca maladi ! On ta dise ce, a esterna, lo noti ancora. E teni esta botela de vino, per la caso cuando tu ta sidi o ta fri… Val, Val, cauti. Me…

— Grasias », el balbuta, prendente sua jaca su la braso e saisinte la botela par la colo. Tu es tan jentil per me, on ta dise un fraton ! Ma cual ansia tu ? » Subita, el vade a rie, con un osa enfantin, ma lo es un rie pico forsada.

— No disturba tu, per favore ! Suposante la plu mal, nos es asi a la pais de la moria ; alora, si un asidente ta debe ariva a me, cual cosa lo ta cambia ? Un negativa multiplida par un negativa resulta sempre un positiva ! Si me mori asi, esce lo no sinifia esata ce en acel caso la otra vive va es redonada a me ? La profesor ta dise ce…

Subita, la avertador de la tram sesa sua sibila.

— Adio », Val cria a un plu ves, e el sorti como un soflon.

Me segue el asta la troteria. A sirca sincodes metres de distantia de la restorante, en la oscuria neblosa, me vide en efeto un tram local, tre vagones luminada con un luseta roja e plen cargada con viajores ajitada e ruidosa. La vagones ia debe es ja cargada ante ce los ariva asi, car la restorante, vera, no ia pote conteni tan multe persones.

En la note, me oia la pasos de Val corente a via. Plu distante, sua silueta resurje sur la fondo jalin luminada de la vagones. La tram recomensa ja move.

Me ta vole cria ancora :

— La otra vive ! ma cual otra vive, Val ? Acel vive de ier, ante nosa aventura ? Acel vive de tua casa, de tua familia, aa, Val ! mea peti, o… esta… cual es vera otra ?

Ma la parolas resta en mea garga.

La tram reparti. Lo no pasa ante la restorante, natural, car on no ave reles asi. La vagones distanti lejera grinsente ; la trasa fluente roja desapare pronto en la nebla noturna. Pos alga instantes, tota va recade en la silentia e la note. Me sta ancora sur la troteria. E, subita, sensante ce algun sta a retro de me, me turna. Ma lo no es Hernhutter. En la cornisa de la porte, areolada par la lus de la lanterna, me reconose la xica. Ela, donce, no ia acompania la otras, an con sua ‘ajendida’ con Val !

Muda con stupor, me regarda el. Nun ta pote dise esce sua surie es ancora encantante, o mera soniosa e melancolica. Cisa lo no es plu an un surie, ma la gravia de un felisia dolosa. Un regarda nonespresable !

Un boca nonresistable !

Sin ce me es consensa, me ia prende sua brasos, sua spalas. El no es surprendeda. Sua oios es tan clar, gris perlin, sua labios simil como la cor roja de la carta de jua…

— Ci tu es ? » me esclama con un vose tan cambiada ce lo salteta me.