A un sera, un tren – Capitol 4

La fato es ce me ia vinse mea disposa de noia, de fa no cosa. E lo ia es tal a la posmedia. La fenetras de la sala de clase ia es plen abrida a la sofla fresca de la jardin, la studiantes ia es amable, an si no plu astuta ca usual.

Serta, los no es stupida, ma an per la leteratur, on no ave oji la mesma interesa como a la tempo pasada – e me no parla de zelo ! Per nos, lo ia es un evade romantica; la jovenes de oji judi lo como noiante e monotono. Sin duta, los ave aora otra modos de evade, e, cisa, en efeto, la vive moderna furni tro multe de aceles.

Me no ia es multe leteratural, a esta dia, car me ia presenta a los un serie de demandas per prepara la esaminas prosima, e nos ia revide alga puntos de fonetica cual ia es enseniada a la comensa de la anio. Natural, nun de esta jovenes ia es capas de esplica la sinifia de la terma ‘simili regresante’. Los ia reteni sola un esemplo, acel de la parola latina doctor cual deveni dottore en italian; e la regula elemental ‘un consonante, cuando lo presede un otra, tende a simili con la seguente’ ia pare tota canselada de lor mente.

Me ia reprende esta, donce, e, con la zelo tipal de la trimestre ultima ante la esamina, los recomensa a nota lo como si lo ia es un formula majial. A un plu ves, me ia atenta esplica a los la spontania de acel fenomeno e remente los de cual me sinifia con ‘reflexe incoativa’ : la idea de un move causa automata en la musculos un comensa de esecuta, en tal modo ce, cuando un italian intende dise doctor (la parola latina), ante ce el es arivada a la c, el prepara se a pronunsia la letera t e, final, cade la c. La fato ce Pierre-Marie Félix Janet – ci ia deveni un de la medicistes franses plu famosa – ia dedica un parte de sua tese sur la isteria a acel reflexe, cual el ia nomi ‘automatia psical’, no ia pare lasa alga impresa en mea escutantes, estra alga alerjia con la detalia erudita.

Per refresci lor memoria, a esta ves, me ia strateji presenta la incoativa como la oposada de un fenomeno fisica, la inertia. En la mesma modo ce, longo la lege de la lenti, un move tende continua alga, an cuando la motor ia descomuta, en esta modo, un ata tende a comensa ante ce nos esecuta lo.

Fortunosa, los ia pare gusta esta esemplo e aproba lo.