A un sera, un tren – Capitol 12

Nos ia desende de la tren.

— Tu ave bagajes ? » Hernhutter demanda.

— No », me responde.

Me no demanda a el sur la suas ; me senti ce ance el no ave alga. E, de esta momento, me divina lo cual vade a aveni pos corta.

An si nos no ia oia alga sibileta, alga comanda, la tren comensa reparti. Nun regarda tra la fenetras. Nos ia perde la vide de la joven, an nos no oia plu el entre la ruidon cresente de la vagones cual move denova. Hernhutter no inisia la move la plu pico per reembarca en lo. Ma, tal como un om onesta e bonvolente, el crede bon averti me e lasa ce me eleje :

— Aora lo es repartinte », el dise. « Tu pote ancora reembarca en lo. Me, me prefere resta.

— Ance me », me murmura, e me sensa ce mea cor bate, lo cual no es frecuente, cisa per proteje nos. La ruidon vade cresente, e la vagones ultima tanje nos con un tona. Pos corta, los perde se en la oscuria. Sua marteli mati con la distantia, la brilia rojin de la locomotiva descrese. Pos corta, tota desapare en la note. On oia sola, en la silentia, la grinse de la grilos, ruidos debil familiar, cual clama lunlotra, responde a lunlotra e rebondi tra la campos, do la luses distante sintili como stelas cadeda de la sielo.

— Me ia resta », la profesor Hernhutter esplica a me alora, « car me teme ce esta joven no ia susede ateni la locomotiva, do el ia espera oteni un responde a sua demanda. Plu, me suspeta ce el no ia osa reprende sua seja en la tren, e me no vole abandona esta xice a sua fortuna.

Me amira la carita de esta om vea per un nonconoseda joven ci, en fato, no es plu un enfante, e me prefere silenti sur la razonas de mea propre eleje.

— Lo es multe jentil », me murmura per me, ma me persepi ce el oia me.

— Si », el dise cuasi seria, ma con cortesia e simplia, « aora nos es tre amis en la note.