A un sera, un tren – Capitol 21

Stimulada par la lus, nos reparti con un bon paso. Nos parla rara, sin duta bastante envolveda en nosa pensas, preparante se silente per la segue posible strana o per la clui posible comun de nosa aventura, a cual nos dirije nos. Aora, nos prosimi rapida a la lus, cual pronto fusa en la radia de un lampa a supra de un porte, e la raios de un cortina, a retro de la vitros de la porte, e de la du fenetras a lado. En esta silueta cual la profesor Hernhutter ia nota ja, nos reconose en efeto, alga neta, la forma de un construida grande cual, con sua lanterna e sua fenetras luminada, aspeta como un taverna campanial alga plasente. An tal, lo no ave avisa de boteca, e no nom es depintada sur la vitros. Un ruido mate de voses veni a nos, sur un fondo de bande musical.

Tota pare multe plu comun ca strana. Stante en la refleta de la lampa, a alga pasos de la porte, nos regarda lunlotra silente. Per dise vera, nos descovre a ves prima la linias de nosa fases. Ma nos ia deveni tan intima con lunlotra ce nun de nos mostra la stona la plu pico. Cadun pare trova en la otra la imaje esata cual el ia senti de el, longo sua parolas e la aspeta flax saisida a la luseta de la flama con cual, de ves a ves, nos ensende un sigar o un sigareta.

Val es un joven blonde e magra, con un pel fresca, vestida elegante simple ; como la jovenes de oji, el aspeta sportor, ma sin bizaria. Sua regarda sombre, cuasi ardosin blu, brilia joiosa.

Silente, nos esamina a sirca. La taverna es a borda de rua, pico supra la nivel de solo. La cornisa es un spesie de paseria de brices, tro streta per es un troteria e cual pare fini a la angulo de la casa. Tal como nos pote vide lo a la luseta de la lanterna, la rua cual nos ia prende es un rueta de arena, an ultra la taverna.

Acel es isolida. An tal, nos crede distingui en la oscur, asi ala, otra manxas sombre cual pote es ance casas. Sin duta nos sta en efeto a la comensa de un vileta. La lusetas tremante cual nos descovre plu a via, a sinistra e a destra, parteni posible a un distrito plu abitada. En cualce caso, los pare a nos min distante ca esta taverna cuando nos ia comensa nosa pasea.

La sintili, cual es cisa sola un ilude otical creada par la distantia, ia desapare aora.

— Alora », me demanda, « on entra o on vade prima descovre la vileta, afin on trova la stasion e posible an un ofisia telegrafial ?

— Me, me fami como lupo ! » Val declara a un plu ves, riente.

— Alora, ta ce nos entra », Hernhutter dise a dui vose.

Me puxa la porte, ma lasante ce los pasa a ante – la profesor, ci desapone sua xapo, e Val, la joven fame. Direta a pos, me segue los en… esta otra mundo perfeta comun.