A un sera, un tren – Capitol 18

— Alora », la profesor comensa, pico esitante, an si me pare reconose en sua infleta alga plase, como si el ia espeta la continua de esta conversa, « me ia es soniante, pico nonclar, per dise sin relata con cualce real. On ia ave cisa, a fronte, un ombra de nostaljia, la melancolia nondefinida, calma, de mea eda, contra ce, a un otra plana, me vide ce me ia es segue ancora un pensa ostinosa ci, per tota mea vive, ia es cara. Mea atentas nunca susede – per dise los nunca produi lo cual me ia es espetante, an si lo no ia es conoseda. En curso de mea esiste, me ia ave opinas diversa, longo mea tendes e mea profesa, ma sempre me ia vide me como un xico juante con un meccano. Vos sabe ce esta juas de construi astuta es acompaniada con un libreta de modeles, e me ia senti sempre un sasia enfantin en la copia la plu bon posible de esta scemas, simultan proposada e solveda. Me no despeta esta tipo de sasia : lo ta ofende la vive, nosa vive, e me gusta lo tro per acel. Ma esta vive, esta libreta ia es sujestante a me otra posibles, cual ta dirije a plu distante. Acel, me nunca ia sesa xerca, a lado de mea labora de cada dia, e, plu tarda ancora, pos esta labora, cuando me ia es sufisinte vea per no toca plu la construis comun. A aceles me ia dedica plu ca un dui-sentenio de pratica, con un modo sasiante per la otras, on ia dise, e ance per me mesma. Donce, me ia pote abandona, con tota mea otra libros, ance nosa libreta meccano. Lo cual me ia es xercante no ia sta ala : acel cosa debe reali se par se mesma. Regretable, la problem nonvinsable es ce on no pote lasa la pesos de meccano, car lo es la sola materia prima disponable per la person aspirante construi ; ma acel pesos es fada tal ce on pote sola usa los per la modeles de la libreta, an si on ia sesa consulta lo. La causa es en la pesos mesma…

Hernhutter silenti, el pare subita consumada ; par acel, ance nos senti denova la fatiga e la famia.

Vidable, sua confidas ia nesesa multe enerjia de la profesor. El es un om solitar, ci, sin duta, discute min e min con sua contemporas, xef sur esta tipo de tema.

Cuando on es joven, silenti es frecuente como cumula ; lo detona a la xoca prima como un esplode. Ma, de alga eda, lo no es plu tal. En la silenti, lo es como si on ta afonda en se mesma, en tal modo ce espresa se deveni, con la tempo, un ata tro fatigante.

Consernante me, me es, ance sur esta tema, un promedia entre la erudita vea e la studiante joven. La parolas de la profesor pare impresa forte la joven. Los no ia es oscur, ma los alti el subita a un nivel de pensa cual el ia conose sola en alga cursos teorial. Me senti ce acel revela surprende el, e ansia el, simultan. Spontan, sua paso ia lenti.