A un sera, un tren – Capitol 27

An tal, ance me grasia Val, car esta diverti ia pare produi la resulta desirada : per dise, el ia fa ce nosa visinas fida nos e permete ce nos es impulsada a lo cual ta segue.

En efeto, la servor no distanti direta ; an la xica prosimi a nosa table, aora cuasi a lado de Val, e la clientes de la sala refinada tapetida ia prosimi a la bar per bevi e oserva, suriente, nosa grupo.

Denova, la servor inclina se lejera e fa ce nos comprende, con multe jestis, ce el ta vole empresta per un instante la jua de cartes de la studiante. Con zelo, esta presenta lo a el. La om prende la paceta, misca lo lenta, ma tan consiensosa ca nosa ami joven. An per la espertas, nondutable la cartas es amirable miscada, a esta ves. Pos esta, la servor formi un vano con la jua e estende lo en tal modo ce on no pote, e el e nos, vide la fases.

Vadente a la profesor Hernhutter, el invita, con un jesti cortes, ce el estrae un carta de la paceta. La erudita vea obedi multe seria e sedente, ma cuando el vole returna la carta, la servor jesti per dise ‘no’, e indica nosa table. La profesor pone la carta ala, sin ce cualcun ia pote regardeta lo. La servor grasia el con testa.

A pos, lo es mea turno. La om estende la cartas en vano, me prende un carta e pone lo, simil reversada, sur nosa table. Per fini, Val fa la mesma cosa. La servor uni alora la vano per refa la paceta, cual el presenta a la studiante. Sin duta esta cartas no es plu interesante, car Val depone los en la pox de sua pantalon.

Con un jesti, la servor pare demanda espeta per un instante, el returna e core asta la bar, do el empresta un otra jua de cartas a la bariste.

Reveninte a nosa table, el presenta prima la cartas, estendeda en vano, ma, a esta ves, con la fases vidable. Lo es un jua comun, esata simil a acel de Val. La om recolie denova la cartas e, sin ce el asconde la jua, en modo ce nos oserva tota la maneja, el comensa estrae a cada ves la carta de supra, o lenta, o rapida, e el lisca lo su la paceta.

Cuando el ariva a la as de diamante, el para per un secondo, sin espresa, pos fisa la profesor. Alora, el pone la carta, vidable e impresante, a lado de la carta nonconoseda cual Hernhutter ia estrae a ante. Longo la mesma prosede, me reseta la tre de trefolia, e Val reseta la pajo de spada. De nova, la servor depone en sua pox la resta de la jua.

Con alga formalia seria, el sinia afin Hernhutter descovre sua carta nonconoseda. Imajina donce : lo es un as de diamante ! A pos, me descovre la mea : un tre de trefolia, en efeto ! Esta servor pare leje vera la imajes de la diablo ! Un xuxa de amira alti sirca nos, e me confesa ce en nosa grupo peti, la profesor Hernhutter no es la sola partisipor zelosa. Esta es serta un truco estracomun ! En tal modo ce me espeta sin tro atende la momento cuando Val descovre sua carta, convinseda ja de la resulta. Ma, a esta ves, cadun – o plu vera, la dui de la publica – esplode de rie burlante. A esta ves, lo fali ; la carta estraeda par Val e cual el secute aora no es la pajo de spada, ma la dama de cor.