A un sera, un tren – Capitol 3

Per la momento, me no es ansiada par la aspeta surprendente de tota esta dormores, o con esta penombra. Mea frivolia es causada, partal, par mea umor, un state de grasia cual me conose bon, an si, regretable, lo no es atribuida frecuente a me.

Un dormeta corta, en curso de la dia, sani me sempre, an tra un viaja par tren. Lo forti me, reanima mea sentis. Ma acel frescia de alma en cual me ia velia apena alora es un fortuna rara en la vive de un inteletosa, de ci la mente es cuasi sempre stimulada.

Un claria de judi, un capasia de atende simultan multe laxe e bonveninte e an tal rijida, es juntada a un senti de felisia seria e profonda; esta state de grasia es difisil descrivable, on ta pote compara lo con un desapare subita e cuasi majial de tota la toxinas cumulada en la renes, la oios, la testa, la boca de un lejor o scrivor manica e pantoflor, sempre sentante tra tota sua vive.

An en curso de esta periodo de claria interna, mea mente de contor, como me dise frecuente, mervelia, demandante cual cosa me ia fa per merita lo. Serta me no considera ce la Senior es un bancor merveliosa, xef de un instituida enorme, distribuinte punis e premias, ma mea respeta inata per la intelijentia misteriosa cual preside la universo preveni me de imajina cualce cosa sin justi bon o mal.

Me recorda alora ce, ante mea adormi, me ia pensa a acel consideras sur la merita. Presada en mea angulo, me ia sta a fronte de esta fem joven no fea ci croxe con manos manxada e rode con un sensosia furtiva sua pesos de xocolada, e ance a fronte de esta om joven, con veste primaveral tro fasil persepable, ci ia adormi pronto pos la controla de la biletor. Mea visina ia es fuminte sua sigar e lejente sua jornal; me ia persepi, plu distante, la ofisior vana e la seniora con jenas tremetante. Regardante esta persones, me ia sensa alga sofoca. Un caldia de inverneria ia invade la tren; la caldador ia es funsionante e raios de sol oblica, tra la fenetra, veni carga la aira polvosa, odorinte la tabaco vea e esflues nova. Esta viajores ia es parente tan comun; la bani de saturdi ia es distante, e me ia sta tan prosima a los!

Me mesma, me ia sensa me tan cargada de scorias, scorias de mea noia aora abitual, e scorias de cada primavera. Per alga disposas, esta afirma ce la primavera es un renase es tota falsa. Nunca me senti plu dolente ca a la saison de la flores, e esta senti dura asta la autono, la autono bondiseda cuando, como un rosa tarda, me senti ce me reflori, alora plen de atende e de claria mental.

A esta dia, an tal, me no ia es multe fatigada; algas ia ta considera lo an como un pausa. Cisa lo ia es tal per me, ma, a esta tempo, me no ia pote ancora evalua la resultas.

En mea vila de nase, me ave un posto alga estracomun, car mea ‘soldi’ es situada en media de la semana, per dise la dia de clui de la museo. Me ave donce nunca soldi, estra en la vacanses car, tra la anio scolal, esta dia de libria permete ce me ensenia en un otra vila, per alga oras. Lo paia mea viaja e ofre a me la oportunia de compra cosas ala o de fa la visitas nesesada.

Per dise vera, a esta dia, me no ia nesesa fa cualce cosa. Alga telefonis ia permete ce me maneja tota. Me ia pasa la resta de mea tempo en paseas, vagas, regardante la fenetras de esibi de la librerias o lejente sentante sur un banca en la parce. Noiante, sin alga cosa per fa, me ia deside a esta ves per tota la otra veses ce me no ta viaja con un program de labora tan lejera. Per la semanas vacuas, me va debe pensa a ante, con un lapis en mano, a la cosas cual me pote fa ala.

Me ia vade no a la caferia, no a otra loca, car me no ia vole ofende la primavera, o otra, ma me ia pasea, leje e anota mea libro. De esta, me ia estrae alga contentia moral, me no ta dise nonusual (car me es laboramanica), ma cual no ia es min profonda, e ia pare a me, per un razona misteriosa, un auguri modesta ma fortunosa.