A un sera, un tren – Capitol 2

An tal, me es surprendeda, vidente ce la note veni tan temprana. A un semana ante oji – car me fa esta curso a cada semana –, la sera ia aveni sola cuando nos ia ariva a destina. E la tren, oji, ia parti puntual, como usual.

Me salteta. Esce, car me ia dormi, me ia pasa la para? Pronto, me regarda mea orolojeta. La cuantia de lus entrante par la fenetra es ancora mera sufisinte afin me distingui la posa de la agos. Nos es a tempo, donce pico plu ca a mediapunto entre la parti e la ariva. Evidente, la primavera es un saison caprisosa, con la dura de la dias dependente de multe influes diversa, cual no es posible oservable par un sonior enamada par la natur.

Me pone mea fas contra la vitro, pos ce me ia frota un parte de lo, rijida con mea manga. Me crede reconose la vista; lo pare familiar, con sua campania, sua campos aradida, sua prados neta, dulse inclinada, ma parente min colinosa ca a la comensa de la viaja, a sirca de la vila cual nos ia lasa.

De ves a ves, la teraplen de la ferovia, surjente brusca, masci la vista. Ma tal avenis caresa plasente mea regarda. Per esemplo, con alga imajinosia e sumerji en sua pensas, on pote vide, en esta colinetas verdin, un orizon de montes presipe, tal como un decora perfeta per un filma de caubois. A pos, la vista reapare, como un disco jirante a reversa. A ante la locas oscur blu distante, on vide la ortos florinte blanca, sirca la cultiverias. A veses, me catura la vista rapida de un vola de casetas burjes parteninte a alga vileta, con lor fenetras luminada, ancora rara.

Cual comunia lo es? Me no pote dise. Totas pare familiar a me; en pasa, totas es tan simil a lunlotra, a tan multe otras. Me conose ance lor nomes,car, de mea enfantia, me viaja sur esta mesma curso, vidente sempre la mesma vista, ma nunca me ia pote identifia par sua nom cualce loca de esta curso. Sin duta, lo es, a un ves nova, un disposa de la sonior enamada par la natur. Me no crede ce lo es un sinia de iniora, ma un spesie de ama cual prefere abrasa un asembla vasta, plu ca aplica se a un contempla detaliosa.