A un sera, un tren – Capitol 25

— Aora ! » Val dise, « me comensa !

Ance el ia fini sua come e ia bevi ja la dui de sua botela du de vino. El aspeta tan studiantin ce Hernhutter e me, nos regarda lunlotra, divertida. La profesor ia ofre ja a el un sigar, cual Val ensende sin ce el sutrae la anelo. Acel sigar tan grande pare comica en media de sua fas enfantin : el es forsada mua per preveni lo de cade de sua labios umida e nonesperta. La servor vacui la table e trae portasenes e vitros limpa ; no vitros comun, ma vitros ronda, con bordas prosiminte afin on no perde la aroma cual on ole bevinte. La fem joven sta esata prosima a nosa table.

Val desapone sua jaca, pone lo a sua reposadorso e estrae de sua pox un jua de cartas. Tal ce el sta ala, con sua camisa clar, con sua cravata pico deslocada e sua pantalon simple tenida par un sintur, el presenta vera un apare plasente. Sua jestis ia perde la discretia de la tempo presedente cual nos ia comparti : los es vera animada e vidable asentuante, como per atrae la atende de nosa visinas. Un tatica eselente – me crede persepi en la espresa de fas de Hernhutter ce el acorda con me – car si nos vole descovre alga cosa otra ca esta ambiente familiar, nos nesesa prima, nondutable, atenta contata plu streta la taverna e sua publica.

Como prevideda, Val susede cuasi direta, no sola par sua jestis plasente e par sua aspeta joven, bela e seduinte, ma par otra plu cosa, strana fasinante, cual stona me plu e plu en el. Cual cosa lo es ? Alga cosa nondefinable e cual, sin cualce aspeta costumal, no es an tal misteriosa. Me va dise sola ce esta evoca per me, per un instante, la carisma enigmosa de un cerubin.

La fem joven regarda nos, suriente, e, de otra tables, me vide la regardas turna a nos con un interesa amable. On ta dise ce la musicistes, per vide nos plu bon, estende la colo e inclina supra la cornisa de la galeria, lo cual lenti lor jua, aprosima como un fonograf con un mola fatigante, ma sin la mal sona cual segue usual. A la table visina a la nosa, do, a esta sera, on come ance, du seniores e un dama con capeles gris vestida con un roba de amazona, an ia interompe per un instante sua come.