A un sera, un tren – Capitol 19

An tal, Val es acel prima ci reprende la conversa, cuando nos reparti.

— Ma, en resoma, cual cosa tu vole construi ? Cual strutur tu intende dona a tua meccano, profesor ? el demanda, xercante sua parola, pico desorientada, como un studiante ante sua esaminor.

— Tu conose la fenomeno de la inertia, Val ? (Esce me nesesa dise lo – con esta parolas, un plu flama surje en me.) Alora, ta ce nos suposa ce nos aplica a la totalia de la vive esta lege mecanical. Lo ta resulta ce nosa esiste ta continua ancora per un instante a la entra de la moria, tan intensa nosa vive ia es, tan multe nos ia gusta lo e tan forte nos abrasa lo, ante ce… tu vide lo cual me vole dise ?

— Oo, serta ! Tu pensa a un ama como acel cual nos ia dedica a la vive direta ante ce nos ia adormi en la tren ?

— En efeto. E aora, ta ce nos forti la strutur ce esta meccano, visinte un otra elemento. Estra si me era, la conseta de funsiona automata de la psice no es nonconoseda par tu. (Un flama tre ia es ensendeda en mea cor.) Val esita, ma Hernhutter fa ce el comprende.

— Vide… Si la leges de la esiste funsiona simil per la mori, acel debe comensa alga instantes ante nosa mori real, no ? Nosa du elementos de meccano, cuando los es soldada con lunlotra, formi como un ponte entre ‘asi’ e ‘otra parte’, un pasaje tra la ‘tera de nun’ cual separa los, e cual es donce un teritorio prima de rexerca, car lo permete considera e trata esta ‘otra parte’ como esente ancora un ‘asi’ tempora, en la mesma modo ce ‘asi’ revela aora alga cosa de esta ‘otra parte’, e ensenia a nos la sinifia profonda de la esiste. La problem es, aora, como nos va ateni la paseria cual traversa acel teritorio.

Noncapas de domina me plu longa, me murmura :

— En la curso de un asidente ferovial, per esemplo.

Ma Hernhutter no responde.