A un sera, un tren – Capitol 5

Lo ia es la razona per cual, en la tren, a esta sera, me ia es la preda de sentis miscada : fatiga, como sempre, an si alga reposa ia veni de la matina libre – noncontentia par causa de la noia, ma comforta de sua cualia. E acel pensas ia interompe la irita lejera causada par la caldia polvosa de la vagon e de sua viajores.

Un idea ia veni, vera resente ancora en la psicolojia de mea maturia; si me recorda bon, lo ia flori sola a la anio presedente, tal como un flor autonal deletosa e, como cualce cosa fresca, sua espresa ia es ancora naive : la idea ce la vive es bela, ce me es felis de vive, ce me es permeteda profondi esta instante tan valuosa – tota pote cambia tan pronto, e alora, cuanto me ta aspira lo ! Lo no es un idea orijinal, an si me pote ajunta esta : on leje o oia lo, frecuente en un frase de conclui, como un spesie de filosofia de la despera per los ci, a la fini, vole reteni la cosa la plu pico, car acel, a la min, es alga tenable, en cualce modo. Per algas, felisia es tenida ala, no cosa es a ultra.

En mea opina, lo es tota otra ; esta felisia pare a me nonrepresable, tal como un prelude de cual on no pote estrae se estra si on gusta lo, car, si no, on no ta pote continua sin prepara, la via de la esperia e de la salva. Me ia crede comprende ce a un dia nos va pote asede la cosas grande sola pos la consuma de la cosas peti. Si me no ta teme la alerjia de mea studiantes, me ta sita riscosa la ‘perspetiva escatolojial’ cual acompania sempre mea sentis plu o min esensal.

La tren ia es bordante ortos florida. La sol oblica ia es ancora briliante tra la fenetras cuantiosa de la vagon. Ja la color verde de la campos ia deveni oscur, palinte la sielo. La vista ia es tan bela como un depinta de mestre, e la ronda de la viajores ia es securinte. Me ia senti me como en un vale o sur un tereno alta de felisia, an con la colinas de turbas e malaventuras cual cada esiste debe distanti. Me ia es aprobante la vive, demandante a me esce esta renase de la alma con cual me ia velia plu tarda no ia es la fruta, per dise la efeto e la recompensa, de esta ata de grasia beneficante.