A un sera, un tren – Capitol 16

— E acel ia es tua pensa ultima ante ce tu adormi, Val ?

— Per dise vera, no, ma me ariva cuasi. Me ia clui alora esta notas e ia leje aceles sur la leteratur moderna universal. Esta curso es fada par la profesor Z., ci nos nomi ‘la Siera’, car el analise tota en sua detalias plu pico, e ala do nos vide sola un nara simple o la espresa de un senti (e cual sin duta ia es mera tal en la mente de la autor), el xerca un sinifia e un sistem e, en pasa, susede sempre trova los ala. Ma, pos la asasina par Dobkin, la Siera ia es un acompanior comfortosa. Subita, el ia pare a me tan plu credable e familiar. Me ia debe adormi con esta senti de fida.

— Con un senti de fida », la profesor Hernhutter asentua.

— Si », Val responde, parente noncauta de la tono cual me ia crede reconose en la parolas de la profesor.

— Cual ia es la tema de acel notas cual tu ia veni de leje ? » me demanda con alga interesa profesal, comprendente ce, si me no ta fa lo, Hernhutter ta fa la mesma demanda.

— La tema ia es la scrivores rusce nova… Aleksei Tolstoi, Ilya Ehrenburg, Valentin Kataev…

— Aa », me esclama, « A via, un vela ?

— E en acel notas, cual ia comforta tu ? » Hernhutter insiste.

— Alora, lo ia es, me crede, la conseta de la vive, longo Kataev. La profesor Z. sujesta ce esta conseta es tipal de el e ce, en la Rusia nova, sola el pratica lo, car lo es perfeta nonsosial. Longo Kataev, la vive en lo mesma es bela e merveliosa, cual on ta fa con lo. Lo conteni sua propre justi, en tal modo ce on pote fida lo en tota avenis : lo solve final cualce problem.

— Mm », Hernhutter dise, « lo es plasente. Me no ia conose acel scrivor. El nomi Kataev, tu dise ? Lo es plasente e, en efeto, multe eficas per combate la apendisite de Dobkin !… Cual otra libros esta Kataev ia scrive, estra A via, un vela ?

Pico e pico, me senti ce la irita crese. Me no comprende la interesa de Hernhutter per un scrivor nova, ma, a esta instante, lo no es la cosa xef ! Esce me ta era sur la profesor ?

— Profesor », me dise, « tu ia demanda cual ia es nos pensas ultima cuando nos adormi, a esta sera en esta tren. Alora, consideras de la mesma tipo como aceles de Val ia asorbe me, an si no tota longo la formula de Kataev. Me ia dise esata a me cuanto la esiste es bela, an tal, e ce on nesesa e pensa a lo e abandona se a lo – ambos egal, me opina – ; lo es nonevitable, considerante un perspetiva plu vasta, me ta dise.

Hernhutter no responde direta. Esce me ta era vera sur el ?

— Me ia pensa tal », el dise final, con un vose mate e cuasi formal. Mea amis, ta ce nos no stona ce nos es unida asi per esta pasea, en un situa ancora nonesplicada. Nos ia parti de la mesma punto. A la mesma tempo como vos, me ia aplica me, a esta sera, a la mesma tipo de medita. En mea modo, la modo de la veia, me ia onci me, alora, como vos, a la vive, a la sinifia merveliosa de acel realia, en un pensa simil como un abrasa !