A un sera, un tren – Capitol 24

En efeto, tota es cuasi comun…

Val, aora, es comente la ceso ; el ia fini sua botela de vino e desira un otra, ma en loca de porta sola un, la servor porta tre – un per cadun. Cuando el fini sua come, Hernhutter dise :

— Esce vos nota ce si, ancora longo mea ipotese, nos loca en esta teritorio singular, per dise a la limita de un otra parte, lo ta es perfeta conformante con la lege de inertia ce tota pare a nos absoluta normal e ce vera lo ta es, sin duta. Longo un otra lege, acel de la automatia de la psice, esta normalia debe inclui alga devias, e, esata, sur puntos xef. Tre entre los, no minor, ia stona nos pronto : la lingua de Babel parlada asi, la nonconose total de la telefon e de la telegraf, e la asentia de cualce strumento per mesura la tempo. Ancora longo mea ipotese, Val, e con un estrapola osante, nos ta pote dedui un isoli strana en la spasio e ance un para tipal de la tempo. Si nos ta resta a la mesma loca – car, si no, nos ta vade a un otra zona cual no ta ave posible la mesma cualias –, esta fenomen debe es fasil oservable, pos alga tempo. Si mea razona es coreta, asi la note no va fini. Entretempo, cisa, nos va descovre acaso otra cualias : aceles, cual ta es donce la plu ascondeda, en fato debe ance es la plu strana e major.

— Merveliosa », Val dise, joiosa, comensante come sua crema de caramel. « Direta cuando me fini, como un bon studiante de Wolmes, me vade a xerca. Me ave ja mea opina.

De cuando el no es plu turbada par la famia e comensa sua botela du de vino, nosa studiante es lenta deveni la simbol perfeta de la jovenia frivol e aventurosa. En pasa lo es nesesada ce un entre nos deside fa alga cosa, si nos vole comprende plu profonda la misterio de nosa situa. Car on no pote previde pos cuanto tempo la spetaculo comun de la restorante, cual nos oserva de nosa ariva, va esperia alga modifia.

Tota segue sua curso, con la normalia de un jua de marionetas automata, noncapas de fa cualce cosa otra ca un sola e mesma ata ; acel, apena finida, recomensa direta. Ma on no descovre la mano cual reenrola sin sesa la operador consumada. De ves a ves, alga clientes vade a via e los es sustituida par otras, esata simil como la presedentes, viajores e nativas o publica plu refinada.

Nondisturbable, la bande rejua siclin la mesma pesos musical nonconoseda, ma de cual la nondefini pare ancora plu familiar ; refrenes cual ia ta pote es moderna o vea par un dui sentenio, o orijinal franses, o anglosason o deutx. La servor e la bariste fa sua labora ; tota la clientes bevi cafe, vino o un acua parente sempre tan deletosa fresca e bolante, algas come e, cuando los fini, otras susede los. Vera, consernante la comes, la predises de la profesor Hernhutter pare coreta : on no ave ora.

Clientes fumi. Me ia susede ce la servor comprende ce me vole sigaretas. El ia porta los e, sin ce on demanda, ajunta an sigares per la profesor, ci ia aseta volente. Los es covreda con un paper primida con imajes colorida strana, stelas e sirculos intermiscada sin razona. An sur la sigaretas, du triangulos reversada es primida sur lunlotra, como sur la anelo de la sigares : un triangulo arjento e un triangulo oro, con un punto roja peti en media. Ance ala no nom es scriveda.