A un sera, un tren – Capitol 13

En efeto, Hernhutter no ia era. Nos vade automata en la dirije do la tren ia desapare, e nos persepi pronto un silueta cual es acel de la joven. Descorajida como el es, el no oia nos veninte, en tal modo ce el salteta, con stona temosa. Ma, cuando el persepi nos en la lus de la sigar de la profesor, el pare felis surprendeda.

— Tu ia debe ariva tro tarda per demanda a la maciniste ? », Hernhutter comensa dise, padrin.

— Lo es la caso, senior », la joven responde con un vose tremante, como banida con larmas.

— Vade, no es preocupada », me dise per consola el. « Tu no es solitar, e lo es importante. La profesor Hernhutter, ci tu vide asi, disturba se tan per tu ce el ia desende intendente.

— Grasias, profesor », la joven balbuta con un pronunsia cual no lasa alga duta sur sua orijina.

— Tu es studiante, no ? Me nomi X. e me ensenia, de ves a ves.

Me ia divina bon. Val – tal es sua nom – studia la direto. El lua un sala en un vila universial, ma, a du veses per semana, el returna a casa de sua jenitores. Con la impresablia de la jovenia, la studiante ia reprende se e, joiosa, el ofre un sigareta a nos. Hernhutter aseta lo, ance el ; en pasa, el ia fini sua sigar. Con sua peseta, nos ia ensende nosa sigaretas.

— E cual cosa la profesor proposa ? » me demanda alora cuasi con joia.

— Ta ce nos vade », la erudita declara, con un vose firma e desidosa. « On nesesa xerca, asi o a otra parte, alga sinia de vive. A ante, nos va discute nosa caso, considerante lo su tre angulos diferente.

— Vade, Val, con un paso pulsante ! », me comanda. Un aveni tan estracomun no ariva a cada dia, e an alga persones nunca esperia lo en tota sua vive. A la ofisia de posta prima, tu va telegrafi a tua jenitores ; si no, doman, nos va aida tu per esplica a los.

— Merveliosa », el dise. « Me jura ce me es encantada.

Nos segue la ferovia, en la dirije do la tren ia desapare. Ma me vide sin sesa ce Hernhutter sonda asi ala la oscuria, con un regarda investigosa. Final, el para.

— Oia », el dise, « me crede ce un rua inisia ala. Lo es plu bon ce on evita la ferovia : lo es sempre riscosa. Plu, a ante o a retro, me no persepi alga punto luminosa, an a la plu distante. A contra, a ala, en la campos, lusetas brilia, a via. Esta rua debe serta gida a un de los. Lo pare ce lo es la via la plu corta.

Val e me, nos acorda per desende la teraplen a cada lado de la profesor Hernhutter, afin nos suporta el, car la teraplen fini a un foso. Ante ce el xerca como pasa, Val ave ja acua asta la jenos.

— Me es pronto, profesor », el cria joiosa, « me pote aida tu ?

E, vera, el trae la om vea. El ta fa simil con me, si me no ia risca ja salta sieca. Me atera bon, con pedes en la fango, ma fortunosa a la otra lado. Per un instante, me abrasa la studiante : un person tan aidosa !