A un sera, un tren – Capitol 22

— Perfeta comun ! » me repete, pliante mea teleta e regardante a sirca ; la profesor es ja a la deser. Val devora la plato de la dia cual el ia servi a el a du veses.

— Cuasi vera », Hernhutter oserva suriente e, atendosa, el porta a sua labios un culiereta de crema reversada.

Como la pais videda de la tren, la sala es simil como tan otras de la mesma tipo, sin duta noncontable, en esta ambiente fisada cual estende de asi a la comensa de la Asia. La salon es composada de alga salas en forma de L, asemblada sirca la bancon sentral.

La stilo – car esta asembla ave an tal stilo – es un misca no desplasente de antica e de moderna, sempre campanial. Su la sofito, a altia umana, un plataforma de la mesma lenio loca la musicistes. A tota partes, cuantiosa tables peti, algas servida, e sejas bela partal con vim. La parceta es de lenio clar ; en un sala, lo desapare su un tapeto spesa bela. Plantas flori en vasos e portaplantas.

La bande, con musicistes sin uniformas, ma vestida alga simple, jua como en tota locas. Me no ia identifia cualce peso musical, ma, strana, totas aspeta como los cual me conose. Ance la empleadas – un om a retro de la bancon de servi, un servor mas e un servor fema joven – no ave uniformas, an si sua vestes usual es curada.

Consernante la clientes, alga cuantiosa, algas aspeta como viajores – car los ave bagajes, ma no multe –, otras pare es campanianes abitante a sirca, on ta dise cultivores o laborores, ma ance persones rica, ci sta per la plu en la sala tapetida.

Nosa entra no ia inspira cualce atende. Nos ia senta pronto a un tableta servida, en un angulo a fronte de la bancon de servi, e nos ia jesti a sua manejor. Pos alga tempo la xica prosimi a nos, e nos ia persepi alora ce nos no pote comprende lunlotra. Ela, como la servor e como la manejor de la buferia, e, en pasa, ance como la publica de la restorante – nos ia ta pote persepi lo plu a ante –, ela parla un otra lingua ca la nosa.

Nun pare conose la nosa, no cualce de aceles cual nos conose, e la profesor Hernhutter el mesma es noncapas de reconose la idiom en cual on espresa se asi. An con sua atende forte, sua xerca de la radises filolojial e mesma sua notas, sur la borda de sua teleta, de segues fonetical, lo ia es futil.