A un sera, un tren – Capitol 29

A un ves nova, la profesor silenti. Serta la mestrin de la joven pare notable, ma me no vide ala alga relata con nosa preocupas. A un ves nova, me lasa ce la spetaculo de la dansores encanta mea oios. Lo aveni ce, a esta momento, Val, con plu enerjia joiosa si lo ta es posible, es movente ante nos e saluta nos amin, en ce la xica surie a nos.

Automata, per broma, me dise :

— Acel xica blonde es vera plasente, esce tu no opina tal, profesor ?

— Cual xica blonde ? » Hernhutter demanda, veliante de sua medita.

— Evidente, la xica con ci Val dansa de la comensa », me responde nonatendosa, sin devia mea regarda de la duple joven.

Ma, car Hernhutter no responde, me persepi pronto alga cosa nonusual e turna mea regarda a el. Como me, poca a ante, el fisa Val e la xica con sua regarda. Alora, me oia el respondente con un vose basa, sin sesa surie :

— Ma vide, la acompanior de Val es brun !

Me esperia como un lasera corta, la mesma como en la tren, a oras a ante. Me ia oia ja de esta tipo de abalia cual causa la nondistingui entre roja e verde, ma nunca de daltonisme relatada a capelbrun e capelpal.

En pasa, lo es tal ance per la profesor, el confesa lo a me direta.

— Profesor », me murmura, « lo es vera strana. Esce me pote demanda a tu como la blusa de la xica es colorida, longo tu ?

— Blu, con stelas, colo e mangas blanca.

Lo es tal, o, en esta caso, me vide lo tal.

— … E con un falda semilonga con plias larga, oscur purpur, ela debe ia despone sua faldon per dansa.

— En efeto, e cual eda tu pensa ce ela ave, profesor ? » me demanda rapida, acaso.

— Sirca cuatrodes anios, en mea opina », Hernhutter dise.

Cuatrodes ! La ansia laserante junta aora con un spesie de desira cresente. Cuatrodes, en cuando me persepi a la plu dudes sinco ! Me dise lo a el e continua :

— Per me, ela ave un fas oval, les osos de jena lejera vidable. De asi, me no vide otra cosa, ma me ia nota poca a ante ce ela ia ave la oios multe clar, gris pal, me crede.

— No », Hernhutter dise con un vose plu e plu basa e roncin, « per me, me vide sua fas ronda, an vera ronda, e poca a ante ela ia ave oios brun, no oios clar.

— Ma, profesor », me dise, turnante brusca a el, e suriente, « si tu ajunta un boca bela e carnosa, lo ta es cuasi la portrae de mea sposa !

— En efeto », el continua, « tal es sua boca como me vide. E… », el xuxa con tristia, an si un ombra de surie flota ancora en sua barba tremante, « si tu dise ce ela ave un boca streta, a forma de cor simil a acel de la carta de Val, alora tu es a fronte de la fantasma de mea sposa joven, mor de un duisentenio…

La surie mori sur mea labios, como esta senti misteriosa de desira estingui en me. An tal, me forsa ce me no mostra lo : esta om vea inspira a me un tal compatia ! Sin duta ance el luta.

— Veni, profesor », me balbuta, « nos es vera tro fatigada, e esta vino es tro enebriante.

— No », la profesor replica, e el saisi la botela, versa un flue, manxante la telon de table con vino, e engoli difisil un sorbe. « Joia an tal, car alga cosa esiste donce asi… cisa la cosa esensal !