A un sera, un tren – Capitol 11

— E tu, profesor ? » me demanda pos un instante de silentia e con un interesa nova cual, me confesa, veni xef de la strania de la situa. On no va ansia, a casa ?

— No », la profesor responde, a duivose.

Ma – e persones sentosa es frecuente tal –, el ta pare regarda como nonconveninte la plu pico de compatia per el, consernante la punto delicata cual me ia tanje nonvolente. Pronto, el continua dise :

— Me no ave plu person, e mea manejor de casa es asente, ela pasa alga dias en sua familia.

Subita, la tren lenti. Nos regarda ambos par la fenetra, ma la vista no pare cambiada. La mesma campos, la mesma stelas distante e fisada.

— Tu crede ce lo vade a para ? », me demanda, stonada.

— Si, on ta dise.

En efeto, pos un curso de alga deses de metres, lentinte plu e plu, la tren para con un secute. Con la codos apoiada sur la bordo de la vitros basida, nos, esitosa e curiosa, esamina la orizon a via.

Car nosa vagon sta a la coda de la tren, nos regarda donce xef a ante, espetante ce un sinia de vive surje final.

Ma, estra la sibila xiliante e la sofla mate de la locomotiva, un silentia de mori rena ; no un clace de porte, no un ruido de vose, no cualce move pico. La lus roja de la locomotiva sintili, flamosa en la note, ma no cosa move, no ombra silueta sur esta fondo luminosa.

Alora, subita, un ruido lasera acel silentia opresante. Lo veni de retro. En la penombra oscur, algun, ci pare a me un om joven, core a nos, sofletante. El core tan rapida ce el vade cuasi a pasa nos sin atribui a nos an un regarda.

— Ee ! » me cria. « Ee ! »

E me lansa a sua pedes mea sigareta ensendeda, de cual alga sintilis surje, con un efeto eficas : la om joven salteta, como si el pasea vera en la flamas, e el para tan brusca ce el tropeza cuasi.

— Aa ! », el suspira tan forte como si el lejeri sua cor de un pesa grande. Fu ! final !

Pronto alora, el comensa fa demandas en freta.

— Cisa vos sabe do nos es, seniores ?

Pos nos espeta lunlotra, nos responde final simultan :

— No.

Nos ia responde a el con tristia, e sin duta el crede ce nos fa lo con regrete. Me persepi me mesma sua delude silente par sua responde a un demanda de nos.

— No ? » la joven cria. « Ance vos no sabe ? Mea Dio !

En acel cria, on ave un tal ansia enfantin ce el pare a punto de plora. Cuasi pronto, el reprende sua core a la locomotiva. An con la oscuria, nos comparti un regarda, la profesor Hernhutter e me.

— Veni », la erudita dise, « ta ce nos desende, ance nos.

— Si », me dise, preveninte ce me presede el.

La aventura pare comensa. Lo atrae me, como lo conveni a acel ci tende considera se mesma como un scrivor ; me espeta aora trova la segue estra la tren.