A un sera, un tren – Capitol 1

Cuando me reabri mea oios, me persepi ce tota la vagon es dorminte. A fronte de me, un fem joven, con un fas alga plasente ma con ungias en dol, teni en manos sua obra de croxe, cual reposa, aora, sur la teleta estendeda sur sua jenos. Sur sua labios muosa e esperta rojida, me nota un trasa de xocolada. Cuanto el ia saborea los, esta pesos cual el ia estrae furtiva de la bara poneda en sua bolsa!

A lado de ela, un om joven, con sua vestes primaveral briliante colorida – sin duta, ance elo, un stranjer –, ia colasa dulse contra ela. Sua testa osilante tanje la spala e la capeles con refletas roja de ela. Ma, aora, ela no evita elo, an si ela ia mostra ansia e enemia, cuando elo ia adormi. Tota ia comensa tal, me recorda, apena pos ce la biletor ia controla la biletas.

Me ia es compresada en mea angulo, con mea dorso en dirije de la locomotiva, sur la banca prima, a esta parte de la vagon. Par causa de la porte, esta bancas es plu streta, sirca la coredor sentral. A la stasion, tra longa me ia resta solitar asi, en cuando la vagon ia es pleninte pico a pico. Cisa la viajores ia evita comparti esta loca streta con me. A la minuto ultima, un om alga volumosa ia entra en la vagon e, no trovante alga loca otra, el ia debe comparti con me esta banca magra.

Sur sua nas, esta senior ia pone sua oculos, fada con cuasi tota la casca de un tortuga, e ia sumerji en la leje de un jornal franses. A un momento, el ia ensende un sigar, pos ce el ia talia un parte de lo con sua dentes, afin el no debe xerca sua cotel en sua pox, car nos ia es presada contra lunlotra. El ia teni la jornal entre sua manos bonom de xef industrial. Sua testa ia inclina pico sur sua peto, e sua oculos ia lisca de sua nas. Sua sigar sta ancora entre sua ditos, visina a la meas, e sua labios carnosa ave un plia voluntosa.

La sigar dui consumada ia estingui – lo cual me regrete, car me sensa un desira forte de fumi. Mea sigaretas es prosima, en la pox interna de mea jacon de pluve; ma, presada en esta modo, lo no es posible ateni mea fosfores en la pox de mea pantalon. Si la sigar no ia estingui ja, me ta pote inclina alga fasil per prende la foco.

Me vide sola partal la otra viajores, e sola traversal, par causa de la paneles alta de lenio separante la bancas; ance los es parente dormi profonda. Lo es un spetaculo plasente, ma alga surprendente. An tal, la surprende es miscada con un senti familiar, car me reconose la plu de la fases, videda pronto ante ce me ia clui la oios. Lor espresas, per dise esata, no ia cambia multe, si me recorda bon.

Un suofisior corajosa, de eda promedia, es dorminte con convinse; la pel fasal de un fem joven con jenas flasida no ia tensa. En efeto, la fases de la viajores no ia destensa, car dormi sentante en la tren dona un reposa alga frajil.

On pote esplica ance esta spetaculo misteriosa par la debilia de lumina. No lampa arde ancora en nosa vagon, e la penombra envolvente la vagon preveni la penetra de la regarda a en, e tota esta dormi es comprendable tal.

Acel asentia de lus no stona me multe. Evidente, an si la gera pasada es distante de alga anios, nos es tan abituada viaja a note ce frecuente me ia fa ja viajas en la oscur sin ce cualcun cexa contra un tal state, cual es, aora, causada par un descura o un rompe.