A un sera, un tren – Capitol 17

Nos pasea ancora. La lusetas distante sperdeda en la campos no pare prosimi. La note resta parfumida e dulse tal como a ante. Nonevitable, nos fatiga e fami; an tal, mea du acompaniores, fasinada como me par nosa aventura strana, no pare preocupada, e ance me. Un flama arde en me, merveliosa ma ancora oscur, sustada par la sertia ce me no ia era en mea opina sur Hernhutter.

— Profesor », me recomensa dise, « esce tu no senti, como me, ce la pensa cual ia preocupa cada de nos en la tren ia ave un potia de salva, ce esta spesie de medita – como dise ? – pote fa… miracles ?

— Si », la profesor responde, pensosa, « me crede ce alga pensas influe direta, e noncomun. Pensas cual veni de la vive e pertine con lo, de esta vive, esensal tan merveliosa, como Kataev dise, e cual solve tota. Pensas cual survive en tua perspetiva la plu vasta, mea cara ami scrivor. Per dise corta, pensas cual velia nos cuando tota dormi a sirca.

— U ce lo es bon ! Val esclama con un zelo jovenin.

Me no osa interveni, par teme de disturba la meditas de Hernhutter.

Per alga tempo, me vide me, en mea mente, paseante con esta studiante, con la vive, la aventura, a mea lado sinistra, e esta erudita vea, pensor siensal e sonior filosofial, a mea lado destra. Esce lo no es esata la via de la scrivor : es un lia entre la un e la otra ? Ma Hernhutter no continua direta, e me teme ce el no esplica se plu.

Per acel razona, me demanda :

— Si lo no es nondiscreta, profesor, tu ta vole dise a nos cual forma ia ave tua pensas en la tren ?

— Oo, si, ance me, me ta desira tan sabe lo », Val insiste, plen de curiosia.