A un sera, un tren – Capitol 15

Per continua – e multe pronto me persepi ce cisa lo es per introdui –, la profesor demanda esce nos recorda la pensa vera ultima ante ce nos adormi en esta tren bizara. Me lasa ce Val, la plu joven, parla prima. El no responde direta, car el no remente clar de lo. Ma Hernhutter, gidor eserseda, fa a el alga demandas amin, e, par esta, la joven remente se de la tema de sua pensas.

— Aa serta !… Lo ia conserna la cursos de Wolmes e Z… Wolmes es criminolojiste en nosa un universia. Per dise vera, el nomi profesor W… ma, par causa de sua campo de studia e car el es multe popular entre nos, on nomi el Sherlock Wolmes. Un naror briliante merveliosa. On ta dise ce el mesma ia vive e solve tota la problemes. Donce, en la tren, me ia es relejente mea notas sur la esemplo clasica de la asasina fada par Dobkin, cual Wolmes ia analise fina detaliosa per esempli la punto de la identifia siensal. Esta Dobkin ia es pompor e ia strangula sua sposa. El ia entera la corpo en la cripta de un eglesa menonita e ia ensende la construida. Ma un polisior ia averti la National Fire Service, cual en sua turno ia averti Dobkin consernante la ensende cual, nota lo, aveni en sua propre teritorio. La destruores ia descovre plu tarda la corpo mor, e la espertas ia conclui ce lo es acel de Sra Dobkin, aidada par la osido de calsio cual Dobkin ia versa sur la corpo e cual ia preveni la putri de alga organos, como la larinje. La asasinor ia es pendeda a la prison de Wandsworth…

« Me confesa ce me es fan de novelas criminal, car on trova ala simultan la siensa e la aventura. La siensa pur noia me, e la libros comun de imajina es stupida. En la naras de detetores, la razona domina, ma su la forma de persones vivosa, e lo ia pare la cosa la plu interesante. Ma a esta sera, en la tren, brusca, la notas sur la curso de Wolmes ia repulsa me. Subita, la caso de Dobkin ia pare orible a me e, strana, asoluta nonprobable, an si me nunca ia duta la realia de la relata de la profesor Wolmes. On ia ta dise ce tota esta ia aveni en un mundo tan nonormal e misera ce on ta judi bon ce lo es un menti. Un mundo, me dise, ma lo es plu un impas vulgar cual no vade a cualce loca, un spesie de apendis malada cual on ta pote supresa sin priva la corpo de alga cosa real.

La profesor Hernhutter emete un ronci de aproba ; ance me, me es surprendeda par la pensa de Val, tal como par la modo plasente con cual el ia sabe espresa lo.