A un sera, un tren – Capitol 20

Denova, nos para. No par causa de Hernhutter, a esta ves, ma par causa de Val. El ia xoca cuasi nos, bondinte a ante, con la fas a nos e la dorso a la strada. Subita, a retro de sua spala, me persepi un lus briliante, vera prosima, aora. Nos ia perde lo en la parte ultima de nosa conversa. Lo es un cosa strana ce, cuando on comensa pensa profonda, on basi la oios. Esce lo es un abitua de leje o scrive, o un move nonconsensa de umilia ?

— Ee ! » Val esclama, « lo ta esplica tota. Lo es donce esta pais cual nos descovre ?

Subita, el esclama :

— Ma, alora, profesor, nos es mor !

E el estende sua brasos a nos.

— Me no ta aposta, Val », la profesor Hernhutter dise, amin e repososa. « La siensa progresa sempre con ‘si… alora…’. Esta ‘si’ sta sempre pico teorial o al min esperial, e on nesesa donce conseta lo como un artifis. Lo es un ipotese, un strumento de labora, un elemento separada de la realia, ma no un real asoluta. Cisa, per esemplo, tota tre nos ia prende un mal tren e, en esta caso, nos situa a sinco o ses oras distante de nosa casa, en esta ambiente familiar, cual es tipal de la Europa, de ueste a este. Returna : nos es arivada, en cuando nos parla, prosima a un de acel luses cual ia pare tan longa nonatenable. Me crede an reconose ala la silueta de un casa, sin duta la prima de cualce vileta.

Val returna en freta. A la lus de la dia morinte, me vide ce sua fas destensa e ce sua oios brilia denova, suriente.

— Bon Dio ! », el dise, encantada, « u la aventura, vera ! An tal, mor o perdeda, me fami como un lupo ! Si sola me trova alga cose comable, me no cura per la resta… Ma, lo ta es min fasinante si nos ta es mera perdeda, vos no acorda ?», el ia ajunta.

Acel frase ultima es vera osante ; an tal, sua vose tremeta con un francia ardente.

— Lo no ta asusta tu, Val ? » me demanda, fratin.

— No », el responde con un infleta plu e plu desidosa, no ! Cual me ta teme con vos du a mea lado e pos la esplica de la profesor Hernhutter ? Si, vera, nos es dirijente a ‘otra parte’, sua pensas ta es usosa per me como un busola. Me ne ta senti plu tota abandonada a mea fortuna, an si me ta debe a un dia retrova me tota solitar. Aora, me teni un clave.

— Ance tu, tu es como un busola per nos, cara enfante », Hernhutter dise, vidable emosiada. Tu ave la clave de la otra porte : tua jovenia…