A un sera, un tren – Capitol 28

Aspetante deludeda, la servor inclina per escusa se, e distanti pronto.

La dui de la publica, ci ia burleta el con bonomia, aplaudi aora la studiante. Me crede ce la xica ia sinia lo.

— Ee », Val cria a la servor, « cual me gania ?… Car, ultima, me ia gania a du veses, esce no, profesor ? », el dise, turnante a nos alga reatante.

— En efeto », la profesor aproba joiosa.

Me mostra a la studiante la figur de sua carta.

— La dama de cor, Val ! Cual otra cosa esta sinifia, estra ce tu nesesa permete la espresa de tua cor e invita la dama elejeda par tu, per inisia la balo con el ? Per tota la sera, la musicistes no ia sesa jua, e nun comensa dansa.

— Esta es bon razona ! » la joven esclama. « Per favore, mestre ! » el cria a la bande, cual comensa direta un rola de tambur impresante. E, sin la esita la plu pico, Val prende la taie de la xica ci sta ancora a sua lado e move ela sur la pulsa. Ela pare gusta lo, en pasa, regardante el en sua oios, riente e con moves fasil ajustada tan merveliosa con acel ritmo moderna ce lo pare ce ela ia dansa nunca con un otra person.

Per dise, mea sujesta fada a la studiante pare es un susede, car, pronto, totas leva per dansa. Duples formi en cada sala, e totas dansa miscada, jovenes e veas, viajores e locales, laborores e burjeses. La tapeto de la clase alta pare cambiada a un tapeto volante ; en cualce caso, sua rola de frontera purpur es aora desusada. Emosiante e frajil, me crede reconose, en la flue cual ensirca me, la amazona gris de la table visina, liscante saja entre la brasos de un vendor vagante.

Me resta sentante a lado de Hernhutter, ci pare gusta tan joiosa como me esta spetaculo plasente.

— En mea opina, profesor, on no pote imajina un contata plu bon, no ? Ma como on pote fa aora per oteni plu informas ?

En cuando Val no sta con nos, Hernhutter pare min forsada a aspeta padrin cuieta e calminte. An si un surie vaga ancora sur sua labios, me vide un nube pensosa oscurinte sua regarda. El no responde direta.

— Du cartas entre tre ia es esata », el dise final con un tono soniosa. « Lo es plu ca permeteda par la acaso. E la telepatia es escluida, car nun ia vide acel cartas. Esce, donce, lo es clarvide ?…