Capitol 9

1. Jesus ia clama la Dudes e ia dona potia e autoria a los per espulsa tota clase de demones e cura maladias.
2. E el ia envia los a proclama la Rena de Dio e cura la maladas,
3. disente a los: “Porta no cosa per la via, no basto curva, no saco, no pan, no mone, no ance du tunicas cadun.
4. Resta en cualce casa do vos entra, asta la momento de parti.
5. Si vos no es resetada, pos sorti de acel site, secute asta la polvo de vosa pedes, en atesta contra los”.
6. Alora los ia vade de un popla a otra, anunsiante la Nova Bon e curante maladas en tota partes.
7. La tetrarca Herode ia escuta de tota esta, e el ia es multe turbada car algun ia dise: “El es Joan, ci ia revive”.
8. Otras ia dise: “El es Elias, ci ia apare”, e otras “El es un de la profetas antica ci ia reveni”.
9. Ma Herode ia dise: “Me ia fa destesti Joan. Alora, ci es esta del ci me oia dise cosas simil?” E el ia atenta vide el.
10. Pos reveni, la Apostoles ia dise a Jesus tota lo cual los ia fa ja. E ia porta los con se, e ia retira sola con los a un site nomida Betsaida.
11. Ma la fola ia reali e ia segue el. El ia reseta los, ia parla los de la Rena de Dio e ia sani los ci ia nesesa es curada.
12. Pos la cade de la sera, la Dudes ia prosima e ia dise a el: “Envia la fola a via, afin los vade a la poplas e caserias a sirca per xerca refuja e comeda, car nos es en un loca deserta”.
13. El ia responde a los: “Dona alga come a los vos mesma”. Ma los ia dise a el: “Nos sola ave sinco panes e du pexes, estra si nos vade nos mesma compra comeda per tota esta persones”.
14. Car los ia es sirca sincomil omes. Alora Jesus ia dise a sua disiplos: “Fa ce los senta en grupos de sincodes”.
15. E los ia fa senta a totas.
16. Jesus ia prende la sinco panes e la du pexes e, levante la oios a la sielo, ia pronunsia sur los la bondise, el ia divide los e ia dona los a sua disiplos per servi la fola.
17. Totas ia come asta sasia e con la restantes on ia pleni dudes sestos de bastetas.
18. Un dia en cual Jesus ia prea sola e sua disiplos ia es con el, el ia demanda los: “Ci dise la popla ce me es?”
19. Los ia responde: “Algun, Joan la Batizor; otras, Elias; e otras, algun de la profetas antica ci ia revive”.
20. “Ma vos”, el ia demanda, “ci vos dise ce me es?”. Pedro ia responde: “Tu es la Maxia de Dio”.
21. E el ia comanda los sever no dise a nun.
22. “La Fio de la Om”, el ia dise a los, “debe sufri multe, es rejetada par la veas, la pretes alta e la scrivistes, es condenada a mori e reveni a la dia tre”.
23. A pos el ia dise a totas: “El ci veni pos me, ta ce el renunsia a se mesma, carga con sua crus cada dia, e segue me”.
24. Car el ci vole salva sua vive, va perde el, e el ci perde sua vive per me, ma salva el.
25. Cual profita va ave la om si gania la tota mundo, ma ancora perde e ruina sua vive?
26. Car si algun vergonia de me e de mea parolas, la Fio de la Om va vergonia de el cuando el veni en sua gloria e en la gloria de la Padre e de la anjeles santa.
27. Me serti vos ce algun de ci es asi no va mori asta vide la Rena de Dio”.
28. Sirca oto dias pos dise esta, Jesus ia prende Petro, Joan e Jacobo e ia asente a la montania per prea.
29. En cuando el ia prea, sua fas ia cambia de aspeta e sua vestes ia deveni de un blancia briliante.
30. E du omes ia conversa con el: los ia es Moxe e Elias,
31. ci ia apare revestida de gloria e ia parla de la parti de Jesus, ci ia vade aveni en Ieruxalim.
32. Pero a sua acompaniores ia es multe dormosa, ma los ia resta veliada, e los ia vide la gloria de Jesus e la du omes ci ia es con el.
33. En cuando los ia es distantinte, Petro ia dise a Jesus: “Mestre, como de bon nos es asi! Ta ce nos fa tre tendas, un per tu, otra per Moxe e otra per Elias”. El no ia sabe lo cual el ia dise.
34. En cuando el ia parla, un nube ia covre los con sua ombra e, pos entra en lo, la disiplos ia pleni de teme.
35. Alora, de la nube on ia escuta un vos cual ia dise: “Esta es mea Fio, la Elejeda, escuta el”.
36. E cuando la vos ia es escutada, Jesus ia es sola. La disiplos ia silenti e en tota acel tempo los no ia dise a nun lo cual los ia vide ja.
37. A la dia seguente, cuando los ia desende de la monte, un fola ia veni a sua encontra.
38. Subita, un om ia cria: “Mestre, per favore, regarda mea fio, la unica ci me ave.
39. Car un spirito saisi el e subita el cria e el ia convulsa el asta ce el spuma de la boca; el libri el con difisilia, gastante el.
40. Me ia demanda a tua disiplos que los espulsa el, ma los no ia pote”.
41. Jesus ia responde el: “Jenera nonfidosa e pervertida, asta cuando me va es con vos e va debe tolera vos? Trae tua fio asi”.
42. En cuando la enfante ia es prosiminte, la demon ia lansa el a la solo e ia secute el violente. Ma Jesus ia reproxa la spirito nonpur, ia cura la enfante e ia returna el a sua padre.
43. Totas ia es mervelia de la majestia de Dio. En cuando totas ia stona par las cosas cual el ia fa, Jesus ia dise a sua disiplos:
44. “Escuta bon esta cual me dise a vos: La Fio de la Om va es pasada a la omes”.
45. Ma los no ia comprende esta parolas: sua sinifia ia es ascondeda afin los no ia pote comprende los, e los ia teme interoga Jesus sur esta.
46. Alora un disputa ia surje entre la disiplos sur ci ia es la plu eselente.
47. Ma Jesus, conosente sua pensas, ia prende un enfante e prosiminte el,
48. ia dise a los: “El ci reseta esta enfante en mea Nom, reseta me, e el ci reseta me, reseta acel ci ia envia me; car la plu peti de vos, acel es la plu grande”.
49. Joan ia dise en responde: “Mestre, nos ia vide un ci ia espulsa demones en tua Nom e nos ia atenta impedi el, car el no es de la nosas”.
50. Ma Jesus ia dise a el: “No impedi a el, car el ci no es contra vos, es con vos”.
51. Cuando la tempo de sua eleva a la sielo ia es a punto de completi, Jesus ia vade determinada en dirije a Ieruxalim
52. e ia envia mesajores ante el. Los ia parti e ia entra en un vileta de Samaria per prepara reseta el.
53. Ma los no ia saluta el car el ia vade en dirije a Ieruxalim.
54. Cuando sua disiplos Jacobo e Joan ia vide esta, los ia dise a el: “Senior, esce tu vole ce nos comanda cade foco de la sielo per consuma los?”
55. Ma el ia returna e ia reproxa los.
56. E los ia vade a otra vileta.
57. En cuando los ia pasea, algun ia dise a Jesus: “Me va segue tu a do tu vade!”
58. Jesus ia responde el: “La volpes ave sua cavas e la aves de la sielo sua nidos, ma la Fio de la om no ave do reclina sua testa”.
59. E el ia dise a otra: “Segue me”. El ia responde: “Lasa me vade prima entera mea padre”.
60. Ma Jesus ia dise: “Lasa la moridas entera sua moridas; tu vade anunsia la Rena de Dio”.
61. Otra ia dise a el: “Me va segue tu, Senior, ma lasa me ante dise adio a la meas”.
62. Jesus ia responde el: “El ci ia pone la mano en la arado e mira a retro, no servi per la Rena de Dio”.