Capitol 13

1. En acel momento alga persones ia apare e ia dise a Jesus la caso de acel galileanes, de ci Pilato ia misca lor sangue con lo de la vitimes de sua sacrifias.
2. El ia responde: “Esce vos crede ce acel galileanes ia sufri esta car los ia es plu pecores ca la otras?
3. Me serti vos ce no, e si vos no converti, totas va fini en la mesma manera.
4. O esce vos crede ce la des-oto persones, ci ia mori cuando la tore de Siloe ia cade, ia es plu culpable ca la otra abitores de Ieruxalim?
5. Me serti vos ce no, e si vos no converti, totas va fini en la mesma modo.”
6. El ia dise ance esta parabola a los: “Un om ia ave un figo plantada en sua orto. El ia vade per xerca frutas e no ia trova los.
7. El ia dise alora a la jardinor: ‘Per tre anios me veni per xerca frutas sur esta figo e me no trova. Cade lo! Perce lo ta consuma la tera?’
8. Ma el ia responde: ‘Senior, lasa lo ance per esta anio; me va cultiva la solo sirca lo e me va fertili lo.
9. Cisa lo va dona frutas. Si no, cade lo.’”
10. A un saturdi, Jesus ia ensenia en un sinagoga.
11. On ia ave ala un fem poseseda par un spirito, ci ia ave un maladia tra des-oto anios. El ia es completa curvida e el no ia pote sta erijeda.
12. Jesus, cuando el ia vide el, ia clama el e ia dise: “Fem, tu es sanida de tua maladia”,
13. e el ia pone sua manos sur ela. Ela ia sta direta erijeda e ia glori Dio.
14. Ma la xef de la sinagoga, iritada car Jesus ia remedia en saturdi, ia dise a la fola: “La dias de labora es ses; veni en acel dias per es sanida, ma no en saturdi.”
15. La Senior ia responde: “Ipocritas! Esce cadun de vos, an si lo es saturdi, no deslia de la portafeno sua bove o sua asino per porta lo a bevi?
16. E esta fia de Abraham, ci Satan ia prisoni tra des-oto anios, esce el no ia pote es librida de sua cadenas en saturdi?
17. Pos oia esta parolas, tota sua oposores ia es plenida par confusa, ma la fola ia es joiosa par causa de la miracles cual el ia fa.
18. Alora Jesus ia dise: “Cua la Rena de Dio sembla? A cua on pote compara lo?
19. Lo sembla un seme de mostarda cual un om ia semi en sua orto; lo ia crese, ia deveni un arboreta, e la avias de la sielo ia abita sur sua ramos.”
20. El ia dise ance: “A cua me pote compara la Rena de Dio?
21. Lo sembla un pico de fermentante cual un fem ia misca con un cuantia grande de farina, asta ce tota la pasta ia fermenta.”
22. Jesus ia ensenia tra la sites e viletas, en cuando el ia vade en dirije a Ieruxalim.
23. Un person ia demanda a el: “Senior, esce lo es vera ce poca es los ci salva se?” El ia responde:
24. “Compete per entra tra la porte streta, car me serti vos ce multes vole entra e no va reali lo.
25. Cuando la mestre de la casa leva se e clui la porte, vos, de estra, va bateta la porte, disente: “Senior, abri nos.” E el va responde a vos: “Me no sabe de do vos veni.”
26. Alora vos va comensa dise: “Nos ia come e bevi con tu, e tu ia ensenia en nosa plazas.”
27. Ma el va dise a los: “Me no sabe de do vos veni; parti de me, tota de vos ci fa mal!”
28. Ala on va ave ululas e mole de dentes, cuando vos vide Abraham, Isaac, Jacob e tota la profetas en la Rena de Dio, e vos va es lansada a estra.
29. E multes va veni de la Este, de la Ueste, de la Norde e de la Sude, per ocupa sua loca en la banceta de la Rena de Dio.
30. On ave multes ci es la ultimas e va es la primas, e on ave otras ci es la primas e va es la ultimas.”
31. En esta momento, alga fariseos ia prosimi a el e ia dise: “Vade de asi, car Herode vole mata tu.”
32. El ia responde: “Vade per dise a acel volpe: oji e doman me espulsa demones e fa remedias, e a la dia tre me va fini.
33. Ma me debe segue mea via oji, doman e a la dia seguente, car lo no pote aveni ce un profeta mori estra Ieruxalim.
34. Ieruxalim, Ieruxalim, tu ci mata profetas e apetra los ci es enviada a tu! A cuanto veses me ia vole reuni tua enfantes, como la gal fema reuni sua projenia su sua alas, e tu no ia vole!
35. Par esta causa, vosa casa va resta vacua. Me serti vos ce vos no va vide plu me, ante la veni de la dia en cual vos dise: ‘Bondiseda es el ci veni en nom de la Senior!’”