Capitol 8

1. A pos, Jesus ia vade de un site a otra, predicante e proclamante la Bon Novas de la Rena de Dio. La Dudes ia acompania el,
2. e ance alga femes ci ia es sanida de mal spiritos e maladias: Maria, nomida de Magdala, de ci sete demones ia sorti;
3. Joana, sposa de Cusa, manejor de Herode, Susana e multe otras ci ia aida los par sua propre medias.
4. Car un fola grande ia reuni e persones de multe sites ia vade a Jesus, el ia dise, usante un parabola:
5. “Un semor ia sorti per semi sua seme. Pos semi, un parte de la seme ia cade a la borda de la via, do lo ia es craseda su pedes, e la avias de la sielo ia come lo.
6. Un otra parte ia cade sur la petras e, pos crese, ia seci par manca de umidia.
7. Un otra ia cade entre spinas, e estas, cresente a la mesma tempo, ia sofoca lo.
8. Un otra parte ia cade en tera fertil, ia crese e ia produi un recolie sentuple de la semida.” E cuando el ia dise esta, el ia esclama: “El ci ave oreas per oia, ta ce el oia!”
9. Sua disiplos ia demanda el sur la sinifia de esta parabola,
10. e Jesus ia dise a los: “Lo ia es permeteda a vos conose la misterios de la Rena de Dio; a la otras, en cambia, on ia parla a los en parabolas, afin los regarda sin vide e oia sin comprende.
11. La parabola vole dise esta: La seme es la Parola de Dio.
12. Los ci es en la borda de la via es los ci escuta, ma poi la demon veni e sutrae la Parola de sua cores, afin los no crede e salva se.
13. Los ci es sur la petras es los ci reseta la Parola de Dio con joia, apena los oia lo; ma los ave no radises: los crede un tempo, e en la momento de tenta los vade a retro.
14. Lo cual ia cade entre la spinas es los ci escuta, ma los es afocada par la preocupas, la ricias e la plaseres de vive, e fali produi frutas matur.
15. Lo cual ia cade en tera fertil es los ci escuta la Parola con cor jenerosa e bon, reteni lo, e dona frutas par causa de sua persiste.
16. On no ensende la lampa per covre lo con un vaso e per lasa lo su la leto, ma per situa lo sur un candelabro, afin los ci entra vide la lus.
17. Car on ave no cosa ascondeda cual no va es descovreda a alga dia, e no cosa secreta cual no va es conoseda o revelada.
18. Atende como vos oia, car el ci ave, va reseta; ma de el ci no ave, an lo cual el crede ave va es sutraeda de el.”
19. Sua madre e frates ia vade per vide el, ma los no ia pote prosimi par causa de la fola.
20. Poi on ia anunsia a Jesus: “Tua madre e tua frates es ala a estra e vole vide tu.”
21. Ma el ia responde a los: “Mea madre e mea frates es los ci escuta la Parola de Dio e pratica lo.”
22. A un dia, Jesus ia entra con sua disiplos a un barco e ia dise a los: “Ta ce nos pasa a la otra borda de la lago.” Los ia parti,
23. e, en cuando los ia naviga, Jesus ia adormi. Alora un tempesta forte ia eruta; la barco ia comensa pleni de acua, e los ia es en peril.
24. La disiplos ia prosimi e ia velia el, disente: “Mestre, Mestre, nos afonda!” El ia velia e ia reproxa la venta e la ondas; estas ia pasi e on ia ave calma.
25. Poi el ia dise a los: “Do es vosa fida?” E los, plenida par teme e amira, ia dise a lunlotra: “Ci es esta ci comanda an la venta e la ondas, e los obedi el?”
26. Poi los ia ariva a la rejion de la gerasenas, cual es situada a la otra borda ca Galilea.
27. Cuando Jesus ia atera, un om de la site ci ia es poseseda par demones ia veni per encontra el. El no ia porta vestes de multe tempo, e el no ia vive en un casa ma en tombas.
28. Pos vide Jesus, el ia comensa cria, el ia cade a sua pedes, e ia dise en vose potiosa: “Cual tu vole de me, Jesus, Fio de Dio, la Plu alta? Me suplica tu a no tormenta me.”
29. Car Jesus ia es comandante la spirito nonpur ce el sorti de acel om. A multe veses la spirito ia posese el, e an si el ia es liada con cadenas, el ia rompe la lias e la demon ia forsa el a locas desertin.
30. Jesus ia demanda a el: “Cua es tua nom?” “Lejion,” el ia responde, car multe ia es la demones ci a entra a el.
31. E los ia suplica el a no comanda los a parti a en la abiso.
32. On ia ave ala un manada de porcos cual ia es comente sur la colina. La demones ia suplica Jesus a permete los a entra a la porcos. El ia permete los.
33. Alora los ia sorti de acel om, ia entra a la porcos e, de la altia de la presipe, la manada ia lansa se a la mar e ia afonda.
34. Pos vide lo cual ia aveni, la porcores ia fuji e ia sperde la nova tra la site e la viletas.
35. Direta la popla ia vade per vide cua ia aveni. Cuando los ia ariva do Jesus ia es, los ia vide, sentante a sua pedes, vestida e con su mente sanida, la om de ci la demones ia sorti, e los ia es plenida par teme.
36. Los ci ia atesta lo ia nara a los como la om poseseda ia es sanida.
37. Tota la gerasenas ia demanda Jesus per sorti de ala, car los ia es asustada; e el, entrante a la barco, ia reveni.
38. La om de ci la demones ia sorti ia suplica el a porta el con se, ma Jesus ia envia el a via, disente a el:
39. “Reveni a tua casa e nara tota cual Dio ia fa per tu.” El ia vade e ia proclama tra tota la site cua Jesus ia fa per el.
40. A sua reveni, Jesus ia es bonvenida par la fola, car totas ia es espetante el.
41. Subita, un om nomida Jairo ia apare, ci ia es la xef de la sinagoga, e cadente a la pedes de Jesus, el ia demanda el a vade a sua casa,
42. car sua sola fia, ci ia ave des-du anios, ia es morinte. En cuando el ia vade, la fola ia crase cuasi el.
43. Un fem ci ia sufri emorajes tra des-du anios e ci nun ia pote sani,
44. ia prosimi pos el e ia toca la borlas de sua capa; la emoraje ia sesa direta.
45. Jesus ia demanda: “Ci ia toca me?” Car totas ia nega lo, Petro e sua acompaniores ia dise a el: “Mestre, lo es la fola ci ia es presante tu.”
46. Ma Jesus ia responde: “Algun ia toca me, car me ia sensa ce un forsa ia sorti de me.”
47. Cuando la fem ia comprende ce el es descovreda, el ia prosimi tremante, e cadente a sua pedes, el ia nara ante totas perce el ia toca el e como el ia es direta sanida.
48. Jesus ia dise a el alora: “Fia, tua fida ia salva tu, vade en pas.”
49. El ia es ancora parlante cuando algun de la casa de la xef de la sinagoga ia ariva e ia dise a el: “Tua fia ia mori, no molesta plu la Mestre.”
50. Ma Jesus, ci ia oia, ia responde: “No teme, lo sufisi ce tu crede e el va salva se.”
51. Cuando el ia ariva a la casa, el no ia permete ce cualcun entra con el: sola Petro, Joan e Jacobo, con la padre e la madre de la enfante.
52. Totas ia plora e ia lamenta. “No plora,” Jesus ia dise, “el no es mor, ma el dormi.”
53. E los ia burla el, car los ia sabe ce la enfante es mor.
54. Ma Jesus ia prende sua mano, disente: “Enfante, leva tu.”
55. Sua respira ia reveni e el ia leva direta. Poi Jesus ia comanda ce los debe dona a el alga cosa per come.
56. Sua jenitores ia es stonada, ma el ia proibi los de raconta lo cual ia aveni.