Capitol 11

1. En un dia, Jesus ia es preante en alga loca, e cuando el ia fini, un de sua disiplos ia dise a el: “Senior, ensenia a nos como prea, como Joan ia ensenia a sua disiplos.”
2. Alora, el ia dise a los: “Cuando vos prea, dise: Padre, ta ce tua Nom es santida, ta ce tua Rena veni,
3. dona a nos nosa pan dial;
4. pardona nosa pecas, car ance nos pardona a los ci ofende nos; e no lasa nos cade en tenta.”
5. Jesus ia ajunta: “Ta ce nos suposa ce algun de vos ave un ami e vade a el a medianote, per dise: ‘Ami, presta a me tre panes,
6. car un de mea amis ia ariva de viaja e me ave no cosa per ofre el’,
7. e de interna el ia responde: ‘No disturba me, aora la porte es cluida, e mea enfantes e me es ja en la leto. Me no pote leva per dona los a tu.’
8. Me serti vos ce an si el no leva se per dona los a sua ami, el va leva a la min par causa de la insiste e va dona tota la nesesada.
9. Ance me serti vos: demanda e vos va reseta, xerca e vos va trova, bateta e la porte va es abrida a vos.
10. Car el ci demanda, reseta; el ci xerca, trova; e a el ci bateta, la porte va es abrida.
11. On ave entre vos alga padre ci dona un petra a sua fio cuando el demanda per pan? E si el demanda per un pex, esce el va dona a el un serpe?
12. E si el demanda per un ovo, esce el va dona un scorpion?
13. Si vos, ci es mal, sabe dona bon cosas a vosa enfantes, cuanto plu la Padre de la sielo dona la Spirito Santa a los ci demanda per lo a el.”
14. Jesus ia es espulsante un demon ci ia es muda. La demon ia sorti apena cuando la muda ia comensa parla. La fola ia es stonada,
15. ma algun de los ia dise: “Esta espulsa demones par la potia de Belzebul, la prinse de la demones.”
16. Otras, per proba el, ia esije a el un sinia ce el ia veni de la sielo.
17. Jesus, ci ia conose lor pensas, ia dise a los: “Un rena do on ave lutas interna vade a ruina e sua casas cade sur lunlotra.
18. Si Satan luta contra se mesma, como sua rena va pote susiste? Car vos dise ce me espulsa demones con la potia de Belzebul.
19. Si me espulsa la demones con la potia de Belzebul, con cual potia vosa disiplos espulsa los? Par causa de esta, vos va ave los como judores.
20. Ma si me espulsa la demones con la fortia de la dito de Dio, lo vole dise ce la Rea de Dio ia ariva a vos.
21. Cuando un om forte e bon armada garda sua palasio, sua posesedas es secur,
22. ma si un otra veni plu forte ca el, e domina el, el prende la armas cual el ia fida e divide sua posesedas.
23. El ci no es con me, es contra me; e el ci no colie con me, sperde.
24. Cuando la spirito nonpur sorti de un om, lo vaga tra rejiones seca xercante reposa, ma trovante nun, lo pensa: “Me va reveni a mea casa, de do me ia sorti.”
25. Cuando ariva, lo trova la casa scopida e organizada.
26. Alora lo xerca sete otra spiritos plu mal ca se; los entra e abitua ala. A fini, acel om trova se plu mal ca en la comensa.”
27. Cuando Jesus ia fini parla, un fem ia leva sua vose a media de la fola e ia dise a el: “Joiosa es la utero cual ia porta tu e la senos de cual tu ia prende lete!”
28. Jesus ia responde: “Plu, joiosa es los ci escuta la Parola de Dio e pratica lo.”
29. Jesus, pos vide ce la fola crese, ia comensa dise: “Esta es un jenera vil. Lo demanda un sinia, ma no sinia va es donada a lo, estra lo de Jonas.
30. Tal como Jonas ia es un sinia per la ninivanes, ance la Fio de la Om va es per esta jenera.
31. En la dia de la Judi, la Rena de la Sude va leva contra la omes de esta jenera e va condena los, car ela ia veni de la finis de la tera per escuta la sajia de Solomon e asi on ave algun ci es plu ca Salomon.
32. En la dia de la Judi, la omes de Ninive va leva contra esta jenera e va condena los, car los ia es convertida par la predica de Jonas e asi on ave algun ci es plu ca Jonas.
33. Cuando on ensende un lampa, on no asconde no covre lo, ma on pone lo sur la candelabro, afin los ci entra pote vide la lus.
34. La lampa de la corpo es tua oio. Cuando tua oio es sana, tota tua corpo es luminada, ma si tua oio es malada, ance tua corpo va es en oscuria.
35. Atende ce la lus cual es en tu no oscuri se.
36. Si tota tua corpo es luminada, sin ombra, lo va ave tan multe lus como cuando la lampa lumina tu con sua brilia.”
37. Cuando el ia fini parla, un fariseo ia invita el a come en sua casa. Jesus ia entra e ia senta a la table.
38. La fariseo ia es stonada vidente ce el no oserva la lava prescriveda ante la come.
39. Ma la Senior ia dise a el: “Vos es tal, la fariseos! Vos puri la esterna de la copa e la plato, e a interna vos es plen de avaria e malia.
40. Foles! Esce el ci ia fa la esterna no ia fa ance la interna?
41. Ma, plu bon, dona como carita lo cual vos ave e tota va es pur.
42. Ma, ai de vos, fariseos, ci paia la imposta de la menta, la ruta e tota erbas de la jardin, e descura la justia e la ama de Dio! On debe pratica esta, sin descura la otras.
43. Ai de vos, fariseos, car vos gusta ocupa la seja prima en la sinagogas e es salutada en la plazas!
44. Ai de vos, car vos es como acel tombas nonvideda sur cual la popla pasea sin sabe!”
45. Alora un dotor de la lege ia responde a el: “Mestre, cuando tu parla tal, tu insulta ance nos.”
46. El ia responde: “Ai de vos ance, car vos enforsa a la otras un carga nontolerable, ma vos no toca los an con un dito!
47. Ai de vos, ci construi la tombas de la profetas, ci sua mesma asendentes ia mata!
48. Tal vos deveni la atestores e aproba la atas de vosa asendentes; los ia mata los, e vos construi tombas a los.
49. Donce la Sajia de Dio ia dise: ‘Me va envia profetas e apostoles a vos: algas de los va es matada e persegueda.’
50. Tal va es esta jenera cargada con la sangue de tota la profetas, cual ia es versada de la crea de la mundo:
51. de la sangue de Abel asta la sangue de Zacaria, ci ia es asasinada entre la altar e la santeria. Si, me serti vos ce esta jenera va es cargada con sua sangue!
52. Ai de vos, dotores de la Lege, car vos ia propri la clave de la siensa! Lo no ia entra, e vos impedi la entra a los ci vole.”
53. Cuando Jesus ia sorti de ala, la scrivistes e la fariseos ia comensa molesta el, esijente ce el responde sur multe cosas
54. e conspirante per trapi el en alga afirma.