BIBLIA
Atesta Vea —
Jenese ·
Esodo ·
Levitico ·
Numeros ·
Deuteronomio ·
Joxua ·
Judores ·
Rut ·
Samuel ·
Res ·
Cronicas ·
Ezra ·
Nehemia ·
Ester ·
Tobi ·
Judita ·
Macabeos ·
Job ·
Salmos ·
Proverbos ·
Eclesiaste ·
Canta de Cantas ·
Sajia ·
Sirac ·
Isaia ·
Jeremia ·
Lamentas ·
Baruc ·
Ezeciel ·
Daniel ·
Hoxea ·
Joel ·
Amos ·
Obadia ·
Jona ·
Mica ·
Nahum ·
Habacuc ·
Sefania ·
Hagai ·
Zecaria ·
Malaci
Atesta Nova —
Mateo ·
Marco ·
Lucas ·
Joan ·
Atas ·
Romanes ·
1 Corintianes ·
2 ·
Galatianes ·
Efesianes ·
Filipianes ·
Colosianes ·
1 Tesalonianes ·
2 ·
1 Timoteo ·
2 ·
Tito ·
Filemon ·
Ivris ·
Jacobo ·
1 Petro ·
2 ·
1 Joan ·
2 ·
3 ·
Juda ·
Apocalise
Capitol 19
- Jesus ia entra en Jerico e ia traversa la site.
- Ala ia vive un om multe riva nomida Zaceo, ci ia es la xef de la impostores.
- El ia vole vide ci ia es Jesus, ma no ia pote par causa de la fola, car el ia es de grandia basa.
- Alora es ia avansa e ia asende a un sicomoro per pote vide el, car el ia vade pasa per ala.
- Pos ariva a acel loca, Jesus ia regarda a alta e ia dise a el: “Zaceo, desende pronto, car oji me debe permane en tua casa”.
- Zaceo ia desende rapida e ia reseta el con joia.
- Cuando los ia vide esta, tota ia murmura, disente: “El ia vade resta en la casa de un pecor”.
- Ma Zaceo ia dise determinada a la Senior: “Senior, me va dona la media de mea posesedas a la povres, e si me ia estorse alga cosa a algun, me va repaia cuatro veses plu”.
- E Jesus ia dise a el: “Salva ia ariva a esta casa, car esta om es ance un fio de Abraham,
- car la Fio de la om ia veni per xerca e salva lo cual ia es perdeda”.
- Como la popla ia continua escutante, el ia ajunta un parabola, car el ia es prosima a Ieruxalim e los ia pensa ce la Rena de Dio ia vade apare a cualce ora.
- El ia dise a los: “Un om de un familia nobil ia vade a un pais distante per reseta la indui reial e reveni rapida.
- El ia cria a des de sua servores e ia dona sento monetas de arjento a cadun, disente: “Fa los produi asta ce me reveni”.
- Ma sua cositadanes ia odia los e los ia envia un ambasada pos el encargada de dise: “Nos no vole ce esta es nosa re”.
- Pos reveni, induida con dinia reial, el ia fa cria la servores e ci el ia dona la mone, per sabe lo cual los ia gania cadun.
- La prima ia presenta e ia dise: “Senior, tua sento monetas de arjento ia produi des veses plu”.
- “Lo es bon, bon servor, el ia responde, car tu ia es fidosa en tan poca, reseta la governa de des sites”.
- La numero du ia ariva e ia dise: “Senior, tua sento monetas de arjento ia produi sinco veses plu”.
- El ia dise ance a el: “Tu va es encargada de sinco sites”.
- La otra ia ariva e ia dise: “Senior, asi tu ave tua sento monetas de arjento, cual me ia garda envolveda en un teleta.
- Car me ia teme tu, ci es un om esijente, ci vole reseta lo cual tu no ia depone e recolie lo cual tu no ia semi”.
- El ia responde: “Me judi tu par tua propre parolas, mal servor. Si tu ia sabe ce me es un om esijente, ce me vole reseta lo cual me no ia deponeda e recolie lo cual me no ia semi,
- perce tu no pone mea mone en la banca? A mea reveni, me ia ta colie lo con interesas”.
- E el ia dise a los ci ia es ala: “Prende la sento monetas e dona los a ci ia ave des veses plu”.
- Los ia responde el: “Ma senior, el ia ave mil!”.
- “Me serti vos ce ci ave, plu va es donada a el; ma de ci no ave, an lo cual el ave on va prende de el.
- Aora, en refere a mea enemis, ci no ia vole me como re, trae los e mata los en me presentia”.
- A pos dise esta, Jesus ia prosegue sua viaja, asendente a Ieruxalim.
- Cuando el ia prosimi Betfage e Betania, en la loca nomida Monte de la Olivos, el ia envia du de sua disiplos, disente los:
- “Vade a la vileta cual es a fas de vos, e pos entra, vos va trova un asino liada, ci nun ia monta ancor. Deslia lo e e trae lo.
- e si algun demanda vos: “Perce vos deslia lo?”, responde: “La Senior nesesa lo”.
- La enviadas ia parti e ia trova tota como el ia dise a los.
- Cuando los ia deslia la asino, sua propriores ia dise los: “Perce vos deslia lo?”.
- E los ia responde: “La Senior ia nesesa el”.
- A pos los ia trae la asino do Jesus ia es e, ponente sur el sua mantos, el ia fa el monta.
- En cuando el ia avansa, la popla ia estende sua mantos sur la via.
- Cuando Jesus ia prosimi la inclina de la Monte de la Olivos, tota la disiplos, plenida de joia, ia comensa loda Dio en vose alta, par tota la miracles cual los ia vide ja.
- E los ia dise: “Ta ce es bondiseda la Re ci veni en nom de la Senior! Pas en la sielo e gloria en la altias!”.
- Alga fariseos ci ia es entre la fola ia dise el: “Mestre, reproxa tua disiplos”.
- Ma el ia responde: “Me serti vos ce, si los silenti, la petras va cria”.
- Cuando el ia es prosima e ia vide la site, el ia comensa plora per lo,
- disente: “Si tu ance ta comprende en acel dia la mesaje de pas! Ma aora lo es ascondeda a tua oios.
- Car la dias es veninte sur tu cuando tua enemis va ensirca tu con sercas; los va aseja tu, e ataca tu en tota lados.
- Los va crase tu con tua enfantes, ci es a en tu, e no va lasa en tu petra sur petra, car tu no ia reconose la tempo en cual tu ia es visitada par Dio”.
- E pos entra en la Templo, el ia comensa espulsa la vendores,
- disente a los: “Lo es scriveda: ‘Mea casa va es casa de prea, ma vos ia converti lo en un cava de furores”.
- E cada dia el ia ensenia en la Templo. La pretes altas, la scrivistes e la plu importantes de la popla ia xerca la forma de mata el.
- Ma los no ia sabe como fa lo, car tota la popla ia escuta el e ia es atendente sua parolas.
