Capitol 17

1. Poi el ia dise a sua disiplos: “Lo es nonevitable ce on ave tropezas, ma: ai a el ci causa los!
2. Lo ta es plu bon per el si un petra de molin ta es poneda sirca sua colo e el ta es lansada a la mar, ca tropeza un de esta petis.
3. Donce, es atendosa! Si tua frate peca, reproxa el, e si el repenti, pardona el.
4. E si el peca a sete veses contra tu, e reveni a sete veses, disente: ‘Me repenti’, pardona el.”
5. La apostoles ia dise a la Senior: “Aumenta nosa fida.”
6. El ia responde: “Si vos ta ave la fida de un gran de mostarda, e ta dise a acel morero cual es ala: ‘Desplanta tu e planta tu en la mar’, el ta obedi vos.
7. Ta ce nos suposa ce un de vos ave un servor per aradi o atende la oveas. Cuando el reveni de la campo, esce el va dise a la servor: ‘Veni pronto e senta a la table’?
8. Esce el no va dise plu bon: ‘Prepara mea come de sera e apone tua faldon per servi asta ce me ia come e bevi, e tu va come e bevi a pos’?
9. Esce el va debe es grasiosa a la servor car el ia fa lo a cual el ia es comandada?
10. Tal vos ance, cuando vos ia fa ja tota cual me ia comanda, dise: ‘Nos es servores simple, nos ia fa lo a cual nos ia es comandada.’”
11. En cuando los ia vade a Ieruxalim, Jesus ia pasa tra Samaria e Galilea.
12. Pos entra a un vileta, des leprosas ia encontra el, parante a un distantia
13. e comensante cria: ‘Jesus, Mestre, compatia nos!’
14. Pos vide los, Jesus ia dise: ‘Vade per presenta vos ante la pretes.’ E en via, los ia deveni purida.
15. Un de los, comprendente ce el es sanida, ia reveni lodante Dio en vose alta
16. e ia lansa se a la pedes de Jesus con fas a tera, grasiante el. El ia es un samarian.
17. Jesus ia dise alora: “Esce on no ia ave des ci ia deveni purida? La otra nove, do los es?
18. Esce nun ia reveni per grasia Dio, estra esta stranjer?.”
19. E el ia ajunta: “Leva e vade, tua fida ia salva tu.”
20. La fariseos ia demanda el cuando la Rena de Dio va aveni. El ia responde: “La veni de la Rena de Dio no pote es oservada,
21. e on no va pote dise: ‘Lo es asi’ o ‘Lo es ala’. Car la Rena de Dio es entre vos.”
22. Poi Jesus ia dise a sua disiplos: “La tempo va veni en cual vos va desira vide un sola dia de la Fio de la om e no va vide lo.
23. On va ave los ci va dise a vos: ‘Lo es asi’, o ‘Lo es ala’, ma no core per xerca el.
24. Como la lampo brilia de un estrema a un otra de la sielo, tal va es la Fio de la om cuando sua Dia ariva.
25. Ma a ante, el va debe sufri multe e es rejetada par esta jenera.
26. En la dias de la Fio de la om, lo va aveni como en la tempo de Noe.
27. La persones ia come, bevi e ia sposi, asta la dia cuando Noe ia entra a la arca e la deluvia ia ariva, destruinte totas.
28. Lo va aveni como en la tempo de Lot: on ia come e bevi, compra e vende, planta e construi.
29. Ma en la dia cuando Lot ia sorti de Sodoma, un pluve de foco e sulfur ia cade de la sielo, destruinte totas.
30. La mesma va aveni en la dia cuando la Fio de la om es revelada.
31. En acel dia, el ci es en la parte alta de la casa e ave sua cosas en la casa, ta ce el no desende per xerca los. Ance el ci es en la campo, ta ce el no reveni.
32. Recorda la sposa de Lot.
33. El ci atenta salva sua vive, va perde lo; el ci perde lo, va conserva lo.
34. Me serti vos ce en acel note, de du persones en un leto, la un va es prendeda e la otra lasada;
35. de du femes molente gran en junta, la un va es prendedda, e la otra lasada.”
36. E los ia demanda a el: “Do, Senior?’
37. Jesus ia responde: “Do on ave un corpo mor, ala la vultures va asembla.”